(៣) អនាគតវារោ

(ក) អនុលោមបុគ្គលោ

៦២. (ក) យស្ស រូបក្ខន្ធោ ឧប្បជ្ជិស្សតិ តស្ស វេទនាក្ខន្ធោ ឧប្បជ្ជិស្សតីតិ? អាមន្តា.

(ខ) យស្ស វា បន វេទនាក្ខន្ធោ ឧប្បជ្ជិស្សតិ តស្ស រូបក្ខន្ធោ ឧប្បជ្ជិស្សតីតិ?

យេ អរូបំ ឧបបជ្ជិត្វា បរិនិព្ពាយិស្សន្តិ តេសំ វេទនាក្ខន្ធោ ឧប្បជ្ជិស្សតិ, នោ ច តេសំ រូបក្ខន្ធោ ឧប្បជ្ជិស្សតិ. ឥតរេសំ តេសំ វេទនាក្ខន្ធោ ច ឧប្បជ្ជិស្សតិ រូបក្ខន្ធោ ច ឧប្បជ្ជិស្សតិ.

(ខ) អនុលោមឱកាសោ

៦៣. (ក) យត្ថ រូបក្ខន្ធោ ឧប្បជ្ជិស្សតិ តត្ថ វេទនាក្ខន្ធោ ឧប្បជ្ជិស្សតីតិ?

អសញ្ញសត្តេ តត្ថ រូបក្ខន្ធោ ឧប្បជ្ជិស្សតិ, នោ ច តត្ថ វេទនាក្ខន្ធោ ឧប្បជ្ជិស្សតិ. បញ្ចវោការេ តត្ថ រូបក្ខន្ធោ ច ឧប្បជ្ជិស្សតិ វេទនាក្ខន្ធោ ច ឧប្បជ្ជិស្សតិ.

(ខ) យត្ថ វា បន វេទនាក្ខន្ធោ ឧប្បជ្ជិស្សតិ តត្ថ រូបក្ខន្ធោ ឧប្បជ្ជិស្សតីតិ?

អរូបេ តត្ថ វេទនាក្ខន្ធោ ឧប្បជ្ជិស្សតិ, នោ ច តត្ថ រូបក្ខន្ធោ ឧប្បជ្ជិស្សតិ. បញ្ចវោការេ តត្ថ វេទនាក្ខន្ធោ ច ឧប្បជ្ជិស្សតិ រូបក្ខន្ធោ ច ឧប្បជ្ជិស្សតិ.

(គ) អនុលោមបុគ្គលោកាសា

៦៤. (ក) យស្ស យត្ថ រូបក្ខន្ធោ ឧប្បជ្ជិស្សតិ តស្ស តត្ថ វេទនាក្ខន្ធោ ឧប្បជ្ជិស្សតីតិ?

អសញ្ញសត្តានំ តេសំ តត្ថ រូបក្ខន្ធោ ឧប្បជ្ជិស្សតិ, នោ ច តេសំ តត្ថ វេទនាក្ខន្ធោ ឧប្បជ្ជិស្សតិ. បញ្ចវោការានំ តេសំ តត្ថ រូបក្ខន្ធោ ច ឧប្បជ្ជិស្សតិ វេទនាក្ខន្ធោ ច ឧប្បជ្ជិស្សតិ.

(ខ) យស្ស វា បន យត្ថ វេទនាក្ខន្ធោ ឧប្បជ្ជិស្សតិ តស្ស តត្ថ រូបក្ខន្ធោ ឧប្បជ្ជិស្សតីតិ?

អរូបានំ តេសំ តត្ថ វេទនាក្ខន្ធោ ឧប្បជ្ជិស្សតិ, នោ ច តេសំ តត្ថ រូបក្ខន្ធោ ឧប្បជ្ជិស្សតិ. បញ្ចវោការានំ តេសំ តត្ថ វេទនាក្ខន្ធោ ច ឧប្បជ្ជិស្សតិ រូបក្ខន្ធោ ច ឧប្បជ្ជិស្សតិ.

(ឃ) បច្ចនីកបុគ្គលោ

៦៥. (ក) យស្ស រូបក្ខន្ធោ នុប្បជ្ជិស្សតិ តស្ស វេទនាក្ខន្ធោ នុប្បជ្ជិស្សតីតិ?

យេ អរូបំ ឧបបជ្ជិត្វា បរិនិព្ពាយិស្សន្តិ តេសំ រូបក្ខន្ធោ នុប្បជ្ជិស្សតិ, នោ ច តេសំ វេទនាក្ខន្ធោ នុប្បជ្ជិស្សតិ. បច្ឆិមភវិកានំ តេសំ រូបក្ខន្ធោ ច នុប្បជ្ជិស្សតិ វេទនាក្ខន្ធោ ច នុប្បជ្ជិស្សតិ.

(ខ) យស្ស វា បន វេទនាក្ខន្ធោ នុប្បជ្ជិស្សតិ តស្ស រូបក្ខន្ធោ នុប្បជ្ជិស្សតីតិ? អាមន្តា.

(ង) បច្ចនីកឱកាសោ

៦៦. (ក) យត្ថ រូបក្ខន្ធោ នុប្បជ្ជិស្សតិ តត្ថ វេទនាក្ខន្ធោ នុប្បជ្ជិស្សតីតិ? ឧប្បជ្ជិស្សតិ.

(ខ) យត្ថ វា បន វេទនាក្ខន្ធោ នុប្បជ្ជិស្សតិ តត្ថ រូបក្ខន្ធោ នុប្បជ្ជិស្សតីតិ? ឧប្បជ្ជិស្សតិ.

(ច) បច្ចនីកបុគ្គលោកាសា

៦៧. (ក) យស្ស យត្ថ រូបក្ខន្ធោ នុប្បជ្ជិស្សតិ តស្ស តត្ថ វេទនាក្ខន្ធោ នុប្បជ្ជិស្សតីតិ?

អរូបានំ តេសំ តត្ថ រូបក្ខន្ធោ នុប្បជ្ជិស្សតិ, នោ ច តេសំ តត្ថ វេទនាក្ខន្ធោ នុប្បជ្ជិស្សតិ. បច្ឆិមភវិកានំ តេសំ តត្ថ រូបក្ខន្ធោ ច នុប្បជ្ជិស្សតិ វេទនាក្ខន្ធោ ច នុប្បជ្ជិស្សតិ.

(ខ) យស្ស វា បន យត្ថ វេទនាក្ខន្ធោ នុប្បជ្ជិស្សតិ តស្ស តត្ថ រូបក្ខន្ធោ នុប្បជ្ជិស្សតីតិ?

អសញ្ញសត្តានំ តេសំ តត្ថ វេទនាក្ខន្ធោ នុប្បជ្ជិស្សតិ, នោ ច តេសំ តត្ថ រូបក្ខន្ធោ នុប្បជ្ជិស្សតិ. បច្ឆិមភវិកានំ តេសំ តត្ថ វេទនាក្ខន្ធោ ច នុប្បជ្ជិស្សតិ រូបក្ខន្ធោ ច នុប្បជ្ជិស្សតិ.