(២) មូលមូលនយោ

៧៧. (ក) យេ កេចិ អព្យាកតា ធម្មា, សព្ពេ តេ អព្យាកតមូលមូលាតិ?

តីណេវ អព្យាកតមូលមូលានិ. អវសេសា អព្យាកតា ធម្មា ន អព្យាកតមូលមូលា.

(ខ) យេ វា បន អព្យាកតមូលមូលា, សព្ពេ តេ ធម្មា អព្យាកតាតិ? អាមន្តា.

៧៨. (ក) យេ កេចិ អព្យាកតា ធម្មា, សព្ពេ តេ អព្យាកតមូលេន ឯកមូលមូលាតិ?

អហេតុកំ អព្យាកតំ អព្យាកតមូលេន ន ឯកមូលមូលំ. សហេតុកំ អព្យាកតំ អព្យាកតមូលេន ឯកមូលមូលំ.

(ខ) យេ វា បន អព្យាកតមូលេន ឯកមូលមូលា, សព្ពេ តេ ធម្មា អព្យាកតាតិ? អាមន្តា.

៧៩. (ក) យេ កេចិ អព្យាកតមូលេន ឯកមូលមូលា ធម្មា, សព្ពេ តេ អព្យាកតមូលេន អញ្ញមញ្ញមូលមូលាតិ?

មូលានិ យានិ ឯកតោ ឧប្បជ្ជន្តិ អព្យាកតមូលានិ ឯកមូលមូលានិ ចេវ អញ្ញមញ្ញមូលមូលានិ ច. អវសេសា អព្យាកតមូលសហជាតា ធម្មា អព្យាកតមូលេន ឯកមូលមូលា, ន ច អញ្ញមញ្ញមូលមូលា.

(ខ) យេ វា បន អព្យាកតមូលេន អញ្ញមញ្ញមូលមូលា, សព្ពេ តេ ធម្មា អព្យាកតាតិ? អាមន្តា.