២. អកុសលា ធម្មា (១) មូលនយោ

៦២. (ក) យេ កេចិ អកុសលា ធម្មា, សព្ពេ តេ អកុសលមូលាតិ?

តីណេវ អកុសលមូលានិ. អវសេសា អកុសលា ធម្មា ន អកុសលមូលា.

(ខ) យេ វា បន អកុសលមូលា, សព្ពេ តេ ធម្មា អកុសលាតិ? អាមន្តា.

៦៣. (ក) យេ កេចិ អកុសលា ធម្មា, សព្ពេ តេ អកុសលមូលេន ឯកមូលាតិ?

អហេតុកំ អកុសលំ អកុសលមូលេន ន ឯកមូលំ. សហេតុកំ អកុសលំ អកុសលមូលេន ឯកមូលំ.

(ខ) យេ វា បន អកុសលមូលេន ឯកមូលា, សព្ពេ តេ ធម្មា អកុសលាតិ?

អកុសលសមុដ្ឋានំ រូបំ អកុសលមូលេន ឯកមូលំ, ន អកុសលំ. អកុសលំ អកុសលមូលេន ឯកមូលញ្ចេវ អកុសលញ្ច.

៦៤. (ក) យេ កេចិ អកុសលមូលេន ឯកមូលា ធម្មា, សព្ពេ តេ អកុសលមូលេន អញ្ញមញ្ញមូលាតិ?

មូលានិ យានិ ឯកតោ ឧប្បជ្ជន្តិ អកុសលមូលានិ ឯកមូលានិ ចេវ អញ្ញមញ្ញមូលានិ ច. អវសេសា អកុសលមូលសហជាតា ធម្មា អកុសលមូលេន ឯកមូលា, ន ច អញ្ញមញ្ញមូលា.

(ខ) យេ វា បន អកុសលមូលេន អញ្ញមញ្ញមូលា, សព្ពេ តេ ធម្មា អកុសលាតិ? អាមន្តា.

(២) មូលមូលនយោ

៦៥. (ក) យេ កេចិ អកុសលា ធម្មា, សព្ពេ តេ អកុសលមូលមូលាតិ?

តីណេវ អកុសលមូលមូលានិ. អវសេសា អកុសលា ធម្មា ន អកុសលមូលមូលា.

(ខ) យេ វា បន អកុសលមូលមូលា, សព្ពេ តេ ធម្មា អកុសលាតិ? អាមន្តា.

៦៦. (ក) យេ កេចិ អកុសលា ធម្មា, សព្ពេ តេ អកុសលមូលេន ឯកមូលមូលាតិ?

អហេតុកំ អកុសលំ អកុសលមូលេន ន ឯកមូលមូលំ. សហេតុកំ អកុសលំ អកុសលមូលេន ឯកមូលមូលំ.

(ខ) យេ វា បន អកុសលមូលេន ឯកមូលមូលា, សព្ពេ តេ ធម្មា អកុសលាតិ?

អកុសលសមុដ្ឋានំ រូបំ អកុសលមូលេន ឯកមូលមូលំ, ន អកុសលំ. អកុសលំ អកុសលមូលេន ឯកមូលមូលញ្ចេវ អកុសលញ្ច.

៦៧. (ក) យេ កេចិ អកុសលមូលេន ឯកមូលមូលា ធម្មា, សព្ពេ តេ អកុសលមូលេន អញ្ញមញ្ញមូលមូលាតិ?

មូលានិ យានិ ឯកតោ ឧប្បជ្ជន្តិ អកុសលមូលានិ ឯកមូលមូលានិ ចេវ អញ្ញមញ្ញមូលមូលានិ ច. អវសេសា អកុសលមូលសហជាតា ធម្មា អកុសលមូលេន ឯកមូលមូលា, ន ច អញ្ញមញ្ញមូលមូលា.

(ខ) យេ វា បន អកុសលមូលេន អញ្ញមញ្ញមូលមូលា, សព្ពេ តេ ធម្មា អកុសលាតិ? អាមន្តា.

(៣) មូលកនយោ

៦៨. (ក) យេ កេចិ អកុសលា ធម្មា, សព្ពេ តេ អកុសលមូលកាតិ?

អហេតុកំ អកុសលំ ន អកុសលមូលកំ. សហេតុកំ អកុសលំ អកុសលមូលកំ.

(ខ) យេ វា បន អកុសលមូលកា, សព្ពេ តេ ធម្មា អកុសលាតិ?

អកុសលសមុដ្ឋានំ រូបំ អកុសលមូលកំ ន អកុសលំ. អកុសលំ អកុសលមូលកញ្ចេវ អកុសលញ្ច.

៦៩. (ក) យេ កេចិ អកុសលា ធម្មា, សព្ពេ តេ អកុសលមូលេន ឯកមូលកាតិ?

អហេតុកំ អកុសលំ អកុសលមូលេន ន ឯកមូលកំ. សហេតុកំ អកុសលំ អកុសលមូលេន ឯកមូលកំ.

(ខ) យេ វា បន អកុសលមូលេន ឯកមូលកា, សព្ពេ តេ ធម្មា អកុសលាតិ?

អកុសលសមុដ្ឋានំ រូបំ អកុសលមូលេន ឯកមូលកំ, ន អកុសលំ. អកុសលំ អកុសលមូលេន ឯកមូលកញ្ចេវ អកុសលញ្ច.

៧០. (ក) យេ កេចិ អកុសលមូលេន ឯកមូលកា ធម្មា, សព្ពេ តេ អកុសលមូលេន អញ្ញមញ្ញមូលកាតិ?

មូលានិ យានិ ឯកតោ ឧប្បជ្ជន្តិ អកុសលមូលានិ ឯកមូលកានិ ចេវ អញ្ញមញ្ញមូលកានិ ច. អវសេសា អកុសលមូលសហជាតា ធម្មា អកុសលមូលេន ឯកមូលកា ន ច អញ្ញមញ្ញមូលកា.

(ខ) យេ វា បន អកុសលមូលេន អញ្ញមញ្ញមូលកា, សព្ពេ តេ ធម្មា អកុសលាតិ? អាមន្តា.

(៤) មូលមូលកនយោ

៧១. (ក) យេ កេចិ អកុសលា ធម្មា, សព្ពេ តេ អកុសលមូលមូលកាតិ?

អហេតុកំ អកុសលំ ន អកុសលមូលមូលកំ. សហេតុកំ អកុសលំ អកុសលមូលមូលកំ.

(ខ) យេ វា បន អកុសលមូលមូលកា, សព្ពេ តេ ធម្មា អកុសលាតិ?

អកុសលសមុដ្ឋានំ រូបំ អកុសលមូលមូលកំ ន អកុសលំ. អកុសលំ អកុសលមូលមូលកញ្ចេវ អកុសលញ្ច.

៧២. (ក) យេ កេចិ អកុសលា ធម្មា, សព្ពេ តេ អកុសលមូលេន ឯកមូលមូលកាតិ?

អហេតុកំ អកុសលំ អកុសលមូលេន ន ឯកមូលមូលកំ. សហេតុកំ អកុសលំ អកុសលមូលេន ឯកមូលមូលកំ.

(ខ) យេ វា បន អកុសលមូលេន ឯកមូលមូលកា, សព្ពេ តេ ធម្មា អកុសលាតិ?

អកុសលសមុដ្ឋានំ រូបំ អកុសលមូលេន ឯកមូលមូលកំ, ន អកុសលំ. អកុសលំ អកុសលមូលេន ឯកមូលមូលកញ្ចេវ អកុសលញ្ច.

៧៣. (ក) យេ កេចិ អកុសលមូលេន ឯកមូលមូលកា ធម្មា, សព្ពេ តេ អកុសលមូលេន អញ្ញមញ្ញមូលមូលកាតិ?

មូលានិ យានិ ឯកតោ ឧប្បជ្ជន្តិ អកុសលមូលានិ ឯកមូលមូលកានិ ចេវ អញ្ញមញ្ញមូលមូលកានិ ច. អវសេសា អកុសលមូលសហជាតា ធម្មា អកុសលមូលេន ឯកមូលមូលកា, ន ច អញ្ញមញ្ញមូលមូលកា.

(ខ) យេ វា បន អកុសលមូលេន អញ្ញមញ្ញមូលមូលកា, សព្ពេ តេ ធម្មា អកុសលាតិ? អាមន្តា.