(៣) មូលកនយោ

៥៦. (ក) យេ កេចិ កុសលា ធម្មា, សព្ពេ តេ កុសលមូលកាតិ? អាមន្តា.

(ខ) យេ វា បន កុសលមូលកា, សព្ពេ តេ ធម្មា កុសលាតិ?

កុសលសមុដ្ឋានំ រូបំ កុសលមូលកំ ន កុសលំ. កុសលំ កុសលមូលកញ្ចេវ កុសលញ្ច.

៥៧. (ក) យេ កេចិ កុសលា ធម្មា, សព្ពេ តេ កុសលមូលេន ឯកមូលកាតិ? អាមន្តា.

(ខ) យេ វា បន កុសលមូលេន ឯកមូលកា, សព្ពេ តេ ធម្មា កុសលាតិ?

កុសលសមុដ្ឋានំ រូបំ កុសលមូលេន ឯកមូលកំ, ន កុសលំ. កុសលំ កុសលមូលេន ឯកមូលកញ្ចេវ កុសលញ្ច.

៥៨. (ក) យេ កេចិ កុសលមូលេន ឯកមូលកា ធម្មា, សព្ពេ តេ កុសលមូលេន អញ្ញមញ្ញមូលកាតិ?

មូលានិ យានិ ឯកតោ ឧប្បជ្ជន្តិ កុសលមូលានិ ឯកមូលកានិ ចេវ អញ្ញមញ្ញមូលកានិ ច. អវសេសា កុសលមូលសហជាតា ធម្មា កុសលមូលេន ឯកមូលកា, ន ច អញ្ញមញ្ញមូលកា.

(ខ) យេ វា បន កុសលមូលេន អញ្ញមញ្ញមូលកា, សព្ពេ តេ ធម្មា កុសលាតិ? អាមន្តា.