២. អាយតនវិភង្គោ

១. សុត្តន្តភាជនីយំ

១៥៤. ទ្វាទសាយតនានិ – ចក្ខាយតនំ, រូបាយតនំ, សោតាយតនំ, សទ្ទាយតនំ, ឃានាយតនំ, គន្ធាយតនំ, ជិវ្ហាយតនំ, រសាយតនំ, កាយាយតនំ, ផោដ្ឋព្ពាយតនំ, មនាយតនំ, ធម្មាយតនំ.

ចក្ខុំ អនិច្ចំ ទុក្ខំ អនត្តា វិបរិណាមធម្មំ. រូបា អនិច្ចា ទុក្ខា អនត្តា វិបរិណាមធម្មា. សោតំ អនិច្ចំ ទុក្ខំ អនត្តា វិបរិណាមធម្មំ. សទ្ទា អនិច្ចា ទុក្ខា អនត្តា វិបរិណាមធម្មា. ឃានំ អនិច្ចំ ទុក្ខំ អនត្តា វិបរិណាមធម្មំ. គន្ធា អនិច្ចា ទុក្ខា អនត្តា វិបរិណាមធម្មា. ជិវ្ហា អនិច្ចា ទុក្ខា អនត្តា វិបរិណាមធម្មា. រសា អនិច្ចា ទុក្ខា អនត្តា វិបរិណាមធម្មា. កាយោ អនិច្ចោ ទុក្ខោ អនត្តា វិបរិណាមធម្មោ. ផោដ្ឋព្ពា អនិច្ចា ទុក្ខា អនត្តា វិបរិណាមធម្មា. មនោ អនិច្ចោ ទុក្ខោ អនត្តា វិបរិណាមធម្មោ. ធម្មា អនិច្ចា ទុក្ខា អនត្តា វិបរិណាមធម្មា.

សុត្តន្តភាជនីយំ.

២. អភិធម្មភាជនីយំ

១៥៥. ទ្វាទសាយតនានិ – ចក្ខាយតនំ, សោតាយតនំ, ឃានាយតនំ, ជិវ្ហាយតនំ, កាយាយតនំ, មនាយតនំ, រូបាយតនំ, សទ្ទាយតនំ, គន្ធាយតនំ, រសាយតនំ, ផោដ្ឋព្ពាយតនំ, ធម្មាយតនំ.

១៥៦. តត្ថ កតមំ ចក្ខាយតនំ? យំ ចក្ខុ [ចក្ខុំ (សី. ស្យា. ក.) ធ. ស. ៥៩៦-៥៩៩] ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យេន ចក្ខុនា អនិទស្សនេន សប្បដិឃេន រូបំ សនិទស្សនំ សប្បដិឃំ បស្សិ វា បស្សតិ វា បស្សិស្សតិ វា បស្សេ វា, ចក្ខុម្បេតំ ចក្ខាយតនម្បេតំ ចក្ខុធាតុបេសា ចក្ខុន្ទ្រិយម្បេតំ លោកោបេសោ ទ្វារាបេសា សមុទ្ទោបេសោ បណ្ឌរម្បេតំ ខេត្តម្បេតំ វត្ថុម្បេតំ នេត្តម្បេតំ នយនម្បេតំ ឱរិមំ តីរម្បេតំ សុញ្ញោ គាមោបេសោ. ឥទំ វុច្ចតិ ‘‘ចក្ខាយតនំ’’.

១៥៧. តត្ថ កតមំ សោតាយតនំ? យំ សោតំ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យេន សោតេន អនិទស្សនេន សប្បដិឃេន សទ្ទំ អនិទស្សនំ សប្បដិឃំ សុណិ វា សុណាតិ វា សុណិស្សតិ វា សុណេ វា, សោតម្បេតំ សោតាយតនម្បេតំ សោតធាតុបេសា សោតិន្ទ្រិយម្បេតំ លោកោបេសោ ទ្វារាបេសា សមុទ្ទោបេសោ បណ្ឌរម្បេតំ ខេត្តម្បេតំ វត្ថុម្បេតំ ឱរិមំ តីរម្បេតំ សុញ្ញោ គាមោបេសោ. ឥទំ វុច្ចតិ ‘‘សោតាយតនំ’’.

១៥៨. តត្ថ កតមំ ឃានាយតនំ? យំ ឃានំ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យេន ឃានេន អនិទស្សនេន សប្បដិឃេន គន្ធំ អនិទស្សនំ សប្បដិឃំ ឃាយិ វា ឃាយតិ វា ឃាយិស្សតិ វា ឃាយេ វា, ឃានម្បេតំ ឃានាយតនម្បេតំ ឃានធាតុបេសា ឃានិន្ទ្រិយម្បេតំ លោកោបេសោ ទ្វារាបេសា សមុទ្ទោបេសោ បណ្ឌរម្បេតំ ខេត្តម្បេតំ វត្ថុម្បេតំ ឱរិមំ តីរម្បេតំ សុញ្ញោ គាមោបេសោ. ឥទំ វុច្ចតិ ‘‘ឃានាយតនំ’’.

១៥៩. តត្ថ កតមំ ជិវ្ហាយតនំ? យា ជិវ្ហា ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យាយ ជិវ្ហាយ អនិទស្សនាយ សប្បដិឃាយ រសំ អនិទស្សនំ សប្បដិឃំ សាយិ វា សាយតិ វា សាយិស្សតិ វា សាយេ វា, ជិវ្ហាបេសា ជិវ្ហាយតនម្បេតំ ជិវ្ហាធាតុបេសា ជីវ្ហិន្ទ្រិយម្បេតំ លោកោបេសោ ទ្វារាបេសា សមុទ្ទោបេសោ បណ្ឌរម្បេតំ ខេត្តម្បេតំ វត្ថុម្បេតំ ឱរិមំ តីរម្បេតំ សុញ្ញោ គាមោបេសោ. ឥទំ វុច្ចតិ ‘‘ជិវ្ហាយតនំ’’.

១៦០. តត្ថ កតមំ កាយាយតនំ? យោ កាយោ ចតុន្នំ មហាភូតានំ ឧបាទាយ បសាទោ អត្តភាវបរិយាបន្នោ អនិទស្សនោ សប្បដិឃោ, យេន កាយេន អនិទស្សនេន សប្បដិឃេន ផោដ្ឋព្ពំ អនិទស្សនំ សប្បដិឃំ ផុសិ វា ផុសតិ វា ផុសិស្សតិ វា ផុសេ វា, កាយោបេសោ កាយាយតនម្បេតំ កាយធាតុបេសា កាយិន្ទ្រិយម្បេតំ លោកោបេសោ ទ្វារាបេសា សមុទ្ទោបេសោ បណ្ឌរម្បេតំ ខេត្តម្បេតំ វត្ថុម្បេតំ ឱរិមំ តីរម្បេតំ សុញ្ញោ គាមោបេសោ. ឥទំ វុច្ចតិ ‘‘កាយាយតនំ’’.

១៦១. តត្ថ កតមំ មនាយតនំ? ឯកវិធេន មនាយតនំ – ផស្សសម្បយុត្តំ.

ទុវិធេន មនាយតនំ – អត្ថិ សហេតុកំ, អត្ថិ អហេតុកំ.

តិវិធេន មនាយតនំ – អត្ថិ កុសលំ, អត្ថិ អកុសលំ, អត្ថិ អព្យាកតំ.

ចតុព្ពិធេន មនាយតនំ – អត្ថិ កាមាវចរំ, អត្ថិ រូបាវចរំ, អត្ថិ អរូបាវចរំ, អត្ថិ អបរិយាបន្នំ.

បញ្ចវិធេន មនាយតនំ – អត្ថិ សុខិន្ទ្រិយសម្បយុត្តំ, អត្ថិ ទុក្ខិន្ទ្រិយសម្បយុត្តំ, អត្ថិ សោមនស្សិន្ទ្រិយសម្បយុត្តំ, អត្ថិ ទោមនស្សិន្ទ្រិយសម្បយុត្តំ, អត្ថិ ឧបេក្ខិន្ទ្រិយសម្បយុត្តំ.

ឆព្ពិធេន មនាយតនំ – ចក្ខុវិញ្ញាណំ, សោតវិញ្ញាណំ, ឃានវិញ្ញាណំ, ជិវ្ហាវិញ្ញាណំ, កាយវិញ្ញាណំ, មនោវិញ្ញាណំ. ឯវំ ឆព្ពិធេន មនាយតនំ.

សត្តវិធេន មនាយតនំ – ចក្ខុវិញ្ញាណំ, សោតវិញ្ញាណំ, ឃានវិញ្ញាណំ, ជិវ្ហាវិញ្ញាណំ, កាយវិញ្ញាណំ, មនោធាតុ, មនោវិញ្ញាណធាតុ. ឯវំ សត្តវិធេន មនាយតនំ.

អដ្ឋវិធេន មនាយតនំ – ចក្ខុវិញ្ញាណំ, សោតវិញ្ញាណំ, ឃានវិញ្ញាណំ, ជិវ្ហាវិញ្ញាណំ, កាយវិញ្ញាណំ អត្ថិ សុខសហគតំ, អត្ថិ ទុក្ខសហគតំ, មនោធាតុ, មនោវិញ្ញាណធាតុ. ឯវំ អដ្ឋវិធេន មនាយតនំ.

នវវិធេន មនាយតនំ – ចក្ខុវិញ្ញាណំ, សោតវិញ្ញាណំ, ឃានវិញ្ញាណំ, ជិវ្ហាវិញ្ញាណំ, កាយវិញ្ញាណំ, មនោធាតុ, មនោវិញ្ញាណធាតុ អត្ថិ កុសលំ, អត្ថិ អកុសលំ, អត្ថិ អព្យាកតំ. ឯវំ នវវិធេន មនាយតនំ.

ទសវិធេន មនាយតនំ – ចក្ខុវិញ្ញាណំ, សោតវិញ្ញាណំ, ឃានវិញ្ញាណំ, ជិវ្ហាវិញ្ញាណំ, កាយវិញ្ញាណំ អត្ថិ សុខសហគតំ, អត្ថិ ទុក្ខសហគតំ, មនោធាតុ, មនោវិញ្ញាណធាតុ អត្ថិ កុសលំ, អត្ថិ អកុសលំ, អត្ថិ អព្យាកតំ. ឯវំ ទសវិធេន មនាយតនំ.

ឯកវិធេន មនាយតនំ – ផស្សសម្បយុត្តំ.

ទុវិធេន មនាយតនំ – អត្ថិ សហេតុកំ, អត្ថិ អហេតុកំ.

តិវិធេន មនាយតនំ – អត្ថិ សុខាយ វេទនាយ សម្បយុត្តំ, អត្ថិ ទុក្ខាយ វេទនាយ សម្បយុត្តំ, អត្ថិ អទុក្ខមសុខាយ វេទនាយ សម្បយុត្តំ…បេ…. ឯវំ ពហុវិធេន មនាយតនំ. ឥទំ វុច្ចតិ ‘‘មនាយតនំ’’.

១៦២. តត្ថ កតមំ រូបាយតនំ? យំ រូបំ ចតុន្នំ មហាភូតានំ ឧបាទាយ វណ្ណនិភា សនិទស្សនំ សប្បដិឃំ នីលំ បីតកំ លោហិតកំ [បីតំ លោហិតំ (សី.)] ឱទាតំ កាឡកំ មញ្ជិដ្ឋកំ [មញ្ជេដ្ឋកំ (សី. ស្យា.)] ហរិ ហរិវណ្ណំ អម្ពង្កុរវណ្ណំ ទីឃំ រស្សំ អណុំ ថូលំ វដ្ដំ បរិមណ្ឌលំ ចតុរស្សំ ឆឡំសំ អដ្ឋំសំ សោឡសំសំ និន្នំ ថលំ ឆាយា អាតបោ អាលោកោ អន្ធការោ អព្ភា មហិកា ធូមោ រជោ ចន្ទមណ្ឌលស្ស វណ្ណនិភា សូរិយមណ្ឌលស្ស [សុរិយមណ្ឌលស្ស (សី. ស្យា. កំ.)] វណ្ណនិភា តារករូបានំ វណ្ណនិភា អាទាសមណ្ឌលស្ស វណ្ណនិភា មណិសង្ខមុត្តវេឡុរិយស្ស វណ្ណនិភា ជាតរូបរជតស្ស វណ្ណនិភា, យំ វា បនញ្ញម្បិ អត្ថិ រូបំ ចតុន្នំ មហាភូតានំ ឧបាទាយ វណ្ណនិភា សនិទស្សនំ សប្បដិឃំ, យំ រូបំ សនិទស្សនំ សប្បដិឃំ ចក្ខុនា អនិទស្សនេន សប្បដិឃេន បស្សិ វា បស្សតិ វា បស្សិស្សតិ វា បស្សេ វា, រូបម្បេតំ រូបាយតនម្បេតំ រូបធាតុបេសា. ឥទំ វុច្ចតិ ‘‘រូបាយតនំ’’.

១៦៣. តត្ថ កតមំ សទ្ទាយតនំ? យោ សទ្ទោ ចតុន្នំ មហាភូតានំ ឧបាទាយ អនិទស្សនោ សប្បដិឃោ ភេរិសទ្ទោ មុទិង្គសទ្ទោ [មុតិង្គសទ្ធោ (សី.)] សង្ខសទ្ទោ បណវសទ្ទោ គីតសទ្ទោ វាទិតសទ្ទោ សម្មសទ្ទោ បាណិសទ្ទោ សត្តានំ និគ្ឃោសសទ្ទោ ធាតូនំ សន្និឃាតសទ្ទោ វាតសទ្ទោ ឧទកសទ្ទោ មនុស្សសទ្ទោ អមនុស្សសទ្ទោ, យោ វា បនញ្ញោបិ អត្ថិ សទ្ទោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យំ សទ្ទំ អនិទស្សនំ សប្បដិឃំ សោតេន អនិទស្សនេន សប្បដិឃេន សុណិ វា សុណាតិ វា សុណិស្សតិ វា សុណេ វា, សទ្ទោបេសោ សទ្ទាយតនម្បេតំ សទ្ទធាតុបេសា. ឥទំ វុច្ចតិ ‘‘សទ្ទាយតនំ’’.

១៦៤. តត្ថ កតមំ គន្ធាយតនំ? យោ គន្ធោ ចតុន្នំ មហាភូតានំ ឧបាទាយ អនិទស្សនោ សប្បដិឃោ មូលគន្ធោ សារគន្ធោ តចគន្ធោ បត្តគន្ធោ បុប្ផគន្ធោ ផលគន្ធោ អាមគន្ធោ វិស្សគន្ធោ សុគន្ធោ ទុគ្គន្ធោ, យោ វា បនញ្ញោបិ អត្ថិ គន្ធោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យំ គន្ធំ អនិទស្សនំ សប្បដិឃំ ឃានេន អនិទស្សនេន សប្បដិឃេន ឃាយិ វា ឃាយតិ វា ឃាយិស្សតិ វា ឃាយេ វា, គន្ធោបេសោ គន្ធាយតនម្បេតំ គន្ធធាតុបេសា. ឥទំ វុច្ចតិ ‘‘គន្ធាយតនំ’’.

១៦៥. តត្ថ កតមំ រសាយតនំ? យោ រសោ ចតុន្នំ មហាភូតានំ ឧបាទាយ អនិទស្សនោ សប្បដិឃោ មូលរសោ ខន្ធរសោ តចរសោ បត្តរសោ បុប្ផរសោ ផលរសោ អម្ពិលំ មធុរំ តិត្តកំ កដុកំ លោណិកំ [លបិលកំ (សី.), លម្បិកំ (ក. សី.)] ខារិកំ លម្ពិកំ កសាវោ សាទុ អសាទុ, យោ វា បនញ្ញោបិ អត្ថិ រសោ ចតុន្នំ មហាភូតានំ ឧបាទាយ អនិទស្សនោ សប្បដិឃោ, យំ រសំ អនិទស្សនំ សប្បដិឃំ ជិវ្ហាយ អនិទស្សនាយ សប្បដិឃាយ សាយិ វា សាយតិ វា សាយិស្សតិ វា សាយេ វា, រសោបេសោ រសាយតនម្បេតំ រសធាតុបេសា. ឥទំ វុច្ចតិ ‘‘រសាយតនំ’’.

១៦៦. តត្ថ កតមំ ផោដ្ឋព្ពាយតនំ? បថវីធាតុ តេជោធាតុ វាយោធាតុ កក្ខឡំ មុទុកំ សណ្ហំ ផរុសំ សុខសម្ផស្សំ ទុក្ខសម្ផស្សំ គរុកំ លហុកំ, យំ ផោដ្ឋព្ពំ អនិទស្សនំ សប្បដិឃំ កាយេន អនិទស្សនេន សប្បដិឃេន ផុសិ វា ផុសតិ វា ផុសិស្សតិ វា ផុសេ វា, ផោដ្ឋព្ពោបេសោ ផោដ្ឋព្ពាយតនម្បេតំ ផោដ្ឋព្ពធាតុបេសា. ឥទំ វុច្ចតិ ‘‘ផោដ្ឋព្ពាយតនំ’’.

១៦៧. តត្ថ កតមំ ធម្មាយតនំ? វេទនាក្ខន្ធោ, សញ្ញាក្ខន្ធោ, សង្ខារក្ខន្ធោ, យញ្ច រូបំ អនិទស្សនអប្បដិឃំ ធម្មាយតនបរិយាបន្នំ, អសង្ខតា ច ធាតុ.

តត្ថ កតមោ វេទនាក្ខន្ធោ? ឯកវិធេន វេទនាក្ខន្ធោ – ផស្សសម្បយុត្តោ. ទុវិធេន វេទនាក្ខន្ធោ – អត្ថិ សហេតុកោ, អត្ថិ អហេតុកោ. តិវិធេន វេទនាក្ខន្ធោ – អត្ថិ កុសលោ, អត្ថិ អកុសលោ, អត្ថិ អព្យាកតោ…បេ… ឯវំ ទសវិធេន វេទនាក្ខន្ធោ…បេ… ឯវំ ពហុវិធេន វេទនាក្ខន្ធោ. អយំ វុច្ចតិ ‘‘វេទនាក្ខន្ធោ’’.

តត្ថ កតមោ សញ្ញាក្ខន្ធោ? ឯកវិធេន សញ្ញាក្ខន្ធោ – ផស្សសម្បយុត្តោ. ទុវិធេន សញ្ញាក្ខន្ធោ – អត្ថិ សហេតុកោ, អត្ថិ អហេតុកោ. តិវិធេន សញ្ញាក្ខន្ធោ – អត្ថិ កុសលោ, អត្ថិ អកុសលោ, អត្ថិ អព្យាកតោ…បេ… ឯវំ ទសវិធេន សញ្ញាក្ខន្ធោ…បេ… ឯវំ ពហុវិធេន សញ្ញាក្ខន្ធោ. អយំ វុច្ចតិ ‘‘សញ្ញាក្ខន្ធោ’’.

តត្ថ កតមោ សង្ខារក្ខន្ធោ? ឯកវិធេន សង្ខារក្ខន្ធោ – ចិត្តសម្បយុត្តោ. ទុវិធេន សង្ខារក្ខន្ធោ – អត្ថិ ហេតុ, អត្ថិ ន ហេតុ. តិវិធេន សង្ខារក្ខន្ធោ – អត្ថិ កុសលោ, អត្ថិ អកុសលោ, អត្ថិ អព្យាកតោ…បេ… ឯវំ ទសវិធេន សង្ខារក្ខន្ធោ…បេ… ឯវំ ពហុវិធេន សង្ខារក្ខន្ធោ. អយំ វុច្ចតិ ‘‘សង្ខារក្ខន្ធោ’’.

តត្ថ កតមំ រូបំ អនិទស្សនអប្បដិឃំ ធម្មាយតនបរិយាបន្នំ? ឥត្ថិន្ទ្រិយំ បុរិសិន្ទ្រិយំ…បេ… កពឡីការោ អាហារោ. ឥទំ វុច្ចតិ រូបំ ‘‘អនិទស្សនអប្បដិឃំ ធម្មាយតនបរិយាបន្នំ’’.

តត្ថ កតមា អសង្ខតា ធាតុ? រាគក្ខយោ, ទោសក្ខយោ, មោហក្ខយោ – អយំ វុច្ចតិ ‘‘អសង្ខតា ធាតុ’’.

ឥទំ វុច្ចតិ ធម្មាយតនំ.

អភិធម្មភាជនីយំ.

៣. បញ្ហាបុច្ឆកំ

១៦៨. ទ្វាទសាយតនានិ – ចក្ខាយតនំ, រូបាយតនំ, សោតាយតនំ, សទ្ទាយតនំ, ឃានាយតនំ, គន្ធាយតនំ, ជិវ្ហាយតនំ, រសាយតនំ, កាយាយតនំ, ផោដ្ឋព្ពាយតនំ, មនាយតនំ, ធម្មាយតនំ.

១៦៩. ទ្វាទសន្នំ អាយតនានំ កតិ កុសលា, កតិ អកុសលា, កតិ អព្យាកតា…បេ… កតិ សរណា, កតិ អរណា?

១. តិកំ

១៧០. ទសាយតនា អព្យាកតា. ទ្វាយតនា សិយា កុសលា, សិយា អកុសលា, សិយា អព្យាកតា. ទសាយតនា ន វត្តព្ពា – ‘‘សុខាយ វេទនាយ សម្បយុត្តា’’តិបិ, ‘‘ទុក្ខាយ វេទនាយ សម្បយុត្តា’’តិបិ, ‘‘អទុក្ខមសុខាយ វេទនាយ សម្បយុត្តា’’តិបិ. មនាយតនំ សិយា សុខាយ វេទនាយ សម្បយុត្តំ, សិយា ទុក្ខាយ វេទនាយ សម្បយុត្តំ, សិយា អទុក្ខមសុខាយ វេទនាយ សម្បយុត្តំ. ធម្មាយតនំ សិយា សុខាយ វេទនាយ សម្បយុត្តំ, សិយា ទុក្ខាយ វេទនាយ សម្បយុត្តំ, សិយា អទុក្ខមសុខាយ វេទនាយ សម្បយុត្តំ, សិយា ន វត្តព្ពំ – ‘‘សុខាយ វេទនាយ សម្បយុត្ត’’ន្តិបិ, ‘‘ទុក្ខាយ វេទនាយ សម្បយុត្ត’’ន្តិបិ, ‘‘អទុក្ខមសុខាយ វេទនាយ សម្បយុត្ត’’ន្តិបិ. ទសាយតនា នេវវិបាកនវិបាកធម្មធម្មា. ទ្វាយតនា សិយា វិបាកា, សិយា វិបាកធម្មធម្មា, សិយា នេវវិបាកនវិបាកធម្មធម្មា.

បញ្ចាយតនា ឧបាទិន្នុបាទានិយា. សទ្ទាយតនំ អនុបាទិន្នុបាទានិយំ. ចត្តារោ អាយតនា សិយា ឧបាទិន្នុបាទានិយា, សិយា អនុបាទិន្នុបាទានិយា, សិយា អនុបាទានិយា. ទ្វាយតនា សិយា ឧបាទិន្នុបាទានិយា, សិយា អនុបាទិន្នុបាទានិយា, សិយា អនុបាទិន្នអនុបាទានិយា. ទសាយតនា អសំកិលិដ្ឋសំកិលេសិកា. ទ្វាយតនា សិយា សំកិលិដ្ឋសំកិលេសិកា, សិយា អសំកិលិដ្ឋសំកិលេសិកា, សិយា អសំកិលិដ្ឋអសំកិលេសិកា. ទសាយតនា អវិតក្កអវិចារា. មនាយតនំ សិយា សវិតក្កសវិចារំ, សិយា អវិតក្កវិចារមត្តំ, សិយា អវិតក្កអវិចារំ. ធម្មាយតនំ សិយា សវិតក្កសវិចារំ, សិយា អវិតក្កវិចារមត្តំ, សិយា អវិតក្កអវិចារំ, សិយា ន វត្តព្ពំ – ‘‘សវិតក្កសវិចារ’’ន្តិបិ, ‘‘អវិតក្កវិចារមត្ត’’ន្តិបិ, ‘‘អវិតក្កអវិចារ’’ន្តិបិ. ទសាយតនា ន វត្តព្ពា – ‘‘បីតិសហគតា’’តិបិ, ‘‘សុខសហគតា’’តិបិ, ‘‘ឧបេក្ខាសហគតា’’តិបិ. ទ្វាយតនា សិយា បីតិសហគតា, សិយា សុខសហគតា, សិយា ឧបេក្ខាសហគតា, សិយា ន វត្តព្ពា – ‘‘បីតិសហគតា’’តិបិ, ‘‘សុខសហគតា’’តិបិ, ‘‘ឧបេក្ខាសហគតា’’តិបិ.

ទសាយតនា នេវ ទស្សនេន ន ភាវនាយ បហាតព្ពា. ទ្វាយតនា សិយា ទស្សនេន បហាតព្ពា, សិយា ភាវនាយ បហាតព្ពា, សិយា នេវ ទស្សនេន ន ភាវនាយ បហាតព្ពា. ទសាយតនា នេវ ទស្សនេន ន ភាវនាយ បហាតព្ពហេតុកា. ទ្វាយតនា សិយា ទស្សនេន បហាតព្ពហេតុកា, សិយា ភាវនាយ បហាតព្ពហេតុកា, សិយា នេវ ទស្សនេន ន ភាវនាយ បហាតព្ពហេតុកា. ទសាយតនា នេវាចយគាមិនាបចយគាមិនោ. ទ្វាយតនា សិយា អាចយគាមិនោ, សិយា អបចយគាមិនោ, សិយា នេវាចយគាមិនាបចយគាមិនោ. ទសាយតនា នេវសេក្ខនាសេក្ខា. ទ្វាយតនា សិយា សេក្ខា, សិយា អសេក្ខា, សិយា នេវសេក្ខនាសេក្ខា. ទសាយតនា បរិត្តា. ទ្វាយតនា សិយា បរិត្តា, សិយា មហគ្គតា, សិយា អប្បមាណា. ទសាយតនា អនារម្មណា. ទ្វាយតនា សិយា បរិត្តារម្មណា, សិយា មហគ្គតារម្មណា, សិយា អប្បមាណារម្មណា, សិយា ន វត្តព្ពា – ‘‘បរិត្តារម្មណា’’តិបិ, ‘‘មហគ្គតារម្មណា’’តិបិ, ‘‘អប្បមាណារម្មណា’’តិបិ. ទសាយតនា មជ្ឈិមា. ទ្វាយតនា សិយា ហីនា, សិយា មជ្ឈិមា, សិយា បណីតា. ទសាយតនា អនិយតា. ទ្វាយតនា សិយា មិច្ឆត្តនិយតា, សិយា សម្មត្តនិយតា, សិយា អនិយតា.

ទសាយតនា អនារម្មណា. ទ្វាយតនា សិយា មគ្គារម្មណា, សិយា មគ្គហេតុកា, សិយា មគ្គាធិបតិនោ, សិយា ន វត្តព្ពា – ‘‘មគ្គារម្មណា’’តិបិ, ‘‘មគ្គហេតុកា’’តិបិ, ‘‘មគ្គាធិបតិនោ’’តិបិ. បញ្ចាយតនា សិយា ឧប្បន្នា, សិយា ឧប្បាទិនោ, ន វត្តព្ពា – ‘‘អនុប្បន្នា’’តិ. សទ្ទាយតនំ សិយា ឧប្បន្នំ, សិយា អនុប្បន្នំ, ន វត្តព្ពំ – ‘‘ឧប្បាទី’’តិ. បញ្ចាយតនា សិយា ឧប្បន្នា, សិយា អនុប្បន្នា, សិយា ឧប្បាទិនោ. ធម្មាយតនំ សិយា ឧប្បន្នំ, សិយា អនុប្បន្នំ, សិយា ឧប្បាទិ, សិយា ន វត្តព្ពំ – ‘‘ឧប្បន្ន’’ន្តិបិ, ‘‘អនុប្បន្ន’’ន្តិបិ, ‘‘ឧប្បាទី’’តិបិ. ឯកាទសាយតនា សិយា អតីតា, សិយា អនាគតា, សិយា បច្ចុប្បន្នា. ធម្មាយតនំ សិយា អតីតំ, សិយា អនាគតំ, សិយា បច្ចុប្បន្នំ, សិយា ន វត្តព្ពំ – ‘‘អតីត’’ន្តិបិ, ‘‘អនាគត’’ន្តិបិ, ‘‘បច្ចុប្បន្ន’’ន្តិបិ. ទសាយតនា អនារម្មណា. ទ្វាយតនា សិយា អតីតារម្មណា, សិយា អនាគតារម្មណា, សិយា បច្ចុប្បន្នារម្មណា, សិយា ន វត្តព្ពា – ‘‘អតីតារម្មណា’’តិបិ, ‘‘អនាគតារម្មណា’’តិបិ, ‘‘បច្ចុប្បន្នារម្មណា’’តិបិ; សិយា អជ្ឈត្តា, សិយា ពហិទ្ធា, សិយា អជ្ឈត្តពហិទ្ធា. ទសាយតនា អនារម្មណា. ទ្វាយតនា សិយា អជ្ឈត្តារម្មណា, សិយា ពហិទ្ធារម្មណា, សិយា អជ្ឈត្តពហិទ្ធារម្មណា, សិយា ន វត្តព្ពា – ‘‘អជ្ឈត្តារម្មណា’’តិបិ, ‘‘ពហិទ្ធារម្មណា’’តិបិ, ‘‘អជ្ឈត្តពហិទ្ធារម្មណា’’តិបិ. រូបាយតនំ សនិទស្សនសប្បដិឃំ. នវាយតនា អនិទស្សនសប្បដិឃា. ទ្វាយតនា អនិទស្សនអប្បដិឃា.

២. ទុកំ

១៧១. ឯកាទសាយតនា ន ហេតូ. ធម្មាយតនំ សិយា ហេតុ, សិយា ន ហេតុ. ទសាយតនា អហេតុកា. ទ្វាយតនា សិយា សហេតុកា, សិយា អហេតុកា. ទសាយតនា ហេតុវិប្បយុត្តា. ទ្វាយតនា សិយា ហេតុសម្បយុត្តា, សិយា ហេតុវិប្បយុត្តា. ទសាយតនា ន វត្តព្ពា – ‘‘ហេតូ ចេវ សហេតុកា ចា’’តិបិ, ‘‘សហេតុកា ចេវ ន ច ហេតូ’’តិបិ. មនាយតនំ ន វត្តព្ពំ – ‘‘ហេតុ ចេវ សហេតុកញ្ចា’’តិ, សិយា សហេតុកញ្ចេវ ន ច ហេតុ, សិយា ន វត្តព្ពំ – ‘‘សហេតុកញ្ចេវ ន ច ហេតូ’’តិ. ធម្មាយតនំ សិយា ហេតុ ចេវ សហេតុកញ្ច, សិយា សហេតុកញ្ចេវ ន ច ហេតុ, សិយា ន វត្តព្ពំ – ‘‘ហេតុ ចេវ សហេតុកញ្ចា’’តិបិ, ‘‘សហេតុកញ្ចេវ ន ច ហេតូ’’តិបិ. ទសាយតនា ន វត្តព្ពា – ‘‘ហេតូ ចេវ ហេតុសម្បយុត្តា ចា’’តិបិ, ‘‘ហេតុសម្បយុត្តា ចេវ ន ច ហេតូ’’តិបិ. មនាយតនំ ន វត្តព្ពំ – ‘‘ហេតុ ចេវ ហេតុសម្បយុត្តញ្ចា’’តិ, សិយា ហេតុសម្បយុត្តញ្ចេវ ន ច ហេតុ, សិយា ន វត្តព្ពំ – ‘‘ហេតុសម្បយុត្តញ្ចេវ ន ច ហេតូ’’តិ. ធម្មាយតនំ សិយា ហេតុ ចេវ ហេតុសម្បយុត្តញ្ច, សិយា ហេតុសម្បយុត្តញ្ចេវ ន ច ហេតុ, សិយា ន វត្តព្ពំ – ‘‘ហេតុ ចេវ ហេតុសម្បយុត្តញ្ចា’’តិបិ, ‘‘ហេតុសម្បយុត្តញ្ចេវ ន ច ហេតូ’’តិបិ. ទសាយតនា ន ហេតូអហេតុកា. មនាយតនំ សិយា ន ហេតុសហេតុកំ, សិយា ន ហេតុអហេតុកំ. ធម្មាយតនំ សិយា ន ហេតុសហេតុកំ, សិយា ន ហេតុអហេតុកំ, សិយា ន វត្តព្ពំ – ‘‘ន ហេតុសហេតុក’’ន្តិបិ, ‘‘ន ហេតុអហេតុក’’ន្តិបិ.

ឯកាទសាយតនា សប្បច្ចយា. ធម្មាយតនំ សិយា សប្បច្ចយំ, សិយា អប្បច្ចយំ. ឯកាទសាយតនា សង្ខតា. ធម្មាយតនំ សិយា សង្ខតំ, សិយា អសង្ខតំ. រូបាយតនំ សនិទស្សនំ. ឯកាទសាយតនា អនិទស្សនា. ទសាយតនា សប្បដិឃា. ទ្វាយតនា អប្បដិឃា. ទសាយតនា រូបា. មនាយតនំ អរូបំ. ធម្មាយតនំ សិយា រូបំ, សិយា អរូបំ. ទសាយតនា លោកិយា. ទ្វាយតនា សិយា លោកិយា, សិយា លោកុត្តរា; កេនចិ វិញ្ញេយ្យា, កេនចិ ន វិញ្ញេយ្យា.

ឯកាទសាយតនា នោ អាសវា. ធម្មាយតនំ សិយា អាសវោ, សិយា នោ អាសវោ. ទសាយតនា សាសវា. ទ្វាយតនា សិយា សាសវា, សិយា អនាសវា. ទសាយតនា អាសវវិប្បយុត្តា. ទ្វាយតនា សិយា អាសវសម្បយុត្តា, សិយា អាសវវិប្បយុត្តា. ទសាយតនា ន វត្តព្ពា – ‘‘អាសវា ចេវ សាសវា ចា’’តិ, ‘‘សាសវា ចេវ នោ ច អាសវា’’. មនាយតនំ ន វត្តព្ពំ – ‘‘អាសវោ ចេវ សាសវញ្ចា’’តិ, សិយា សាសវញ្ចេវ នោ ច អាសវោ, សិយា ន វត្តព្ពំ – ‘‘សាសវញ្ចេវ នោ ច អាសវោ’’តិ. ធម្មាយតនំ សិយា អាសវោ ចេវ សាសវញ្ច, សិយា សាសវញ្ចេវ នោ ច អាសវោ, សិយា ន វត្តព្ពំ – ‘‘អាសវោ ចេវ សាសវញ្ចា’’តិបិ, ‘‘សាសវញ្ចេវ នោ ច អាសវោ’’តិបិ. ទសាយតនា ន វត្តព្ពា – ‘‘អាសវា ចេវ អាសវសម្បយុត្តា ចា’’តិបិ, ‘‘អាសវសម្បយុត្តា ចេវ នោ ច អាសវា’’តិបិ. មនាយតនំ ន វត្តព្ពំ – ‘‘អាសវោ ចេវ អាសវសម្បយុត្តញ្ចា’’តិ, សិយា អាសវសម្បយុត្តញ្ចេវ នោ ច អាសវោ, សិយា ន វត្តព្ពំ – ‘‘អាសវសម្បយុត្តញ្ចេវ នោ ច អាសវោ’’តិ. ធម្មាយតនំ សិយា អាសវោ ចេវ អាសវសម្បយុត្តញ្ច, សិយា អាសវសម្បយុត្តញ្ចេវ នោ ច អាសវោ, សិយា ន វត្តព្ពំ – ‘‘អាសវោ ចេវ អាសវសម្បយុត្តញ្ចា’’តិបិ, ‘‘អាសវសម្បយុត្តញ្ចេវ នោ ច អាសវោ’’តិបិ. ទសាយតនា អាសវវិប្បយុត្តសាសវា. ទ្វាយតនា សិយា អាសវវិប្បយុត្តសាសវា, សិយា អាសវវិប្បយុត្តអនាសវា, សិយា ន វត្តព្ពា – ‘‘អាសវវិប្បយុត្តសាសវា’’តិបិ, ‘‘អាសវវិប្បយុត្តអនាសវា’’តិបិ.

ឯកាទសាយតនា នោ សំយោជនា. ធម្មាយតនំ សិយា សំយោជនំ, សិយា នោ សំយោជនំ. ទសាយតនា សំយោជនិយា. ទ្វាយតនា សិយា សំយោជនិយា, សិយា អសំយោជនិយា. ទសាយតនា សំយោជនវិប្បយុត្តា. ទ្វាយតនា សិយា សំយោជនសម្បយុត្តា, សិយា សំយោជនវិប្បយុត្តា. ទសាយតនា ន វត្តព្ពា – ‘‘សំយោជនា ចេវ សំយោជនិយា ចា’’តិ, សំយោជនិយា ចេវ នោ ច សំយោជនា. មនាយតនំ ន វត្តព្ពំ – ‘‘សំយោជនញ្ចេវ សំយោជនិយញ្ចា’’តិ, សិយា សំយោជនិយញ្ចេវ នោ ច សំយោជនំ, សិយា ន វត្តព្ពំ – ‘‘សំយោជនិយញ្ចេវ នោ ច សំយោជន’’ន្តិ. ធម្មាយតនំ សិយា សំយោជនញ្ចេវ សំយោជនិយញ្ច, សិយា សំយោជនិយញ្ចេវ នោ ច សំយោជនំ, សិយា ន វត្តព្ពំ – ‘‘សំយោជនញ្ចេវ សំយោជនិយ’’ន្តិបិ, ‘‘សំយោជនិយញ្ចេវ នោ ច សំយោជន’’ន្តិបិ. ទសាយតនា ន វត្តព្ពា – ‘‘សំយោជនា ចេវ សំយោជនសម្បយុត្តា ចា’’តិបិ, ‘‘សំយោជនសម្បយុត្តា ចេវ នោ ច សំយោជនា’’តិបិ. មនាយតនំ ន វត្តព្ពំ – ‘‘សំយោជនញ្ចេវ សំយោជនសម្បយុត្តញ្ចា’’តិ, សិយា សំយោជនសម្បយុត្តញ្ចេវ នោ ច សំយោជនំ, សិយា ន វត្តព្ពំ – ‘‘សំយោជនសម្បយុត្តញ្ចេវ នោ ច សំយោជន’’ន្តិ. ធម្មាយតនំ សិយា សំយោជនញ្ចេវ សំយោជនសម្បយុត្តញ្ច, សិយា សំយោជនសម្បយុត្តញ្ចេវ នោ ច សំយោជនំ, សិយា ន វត្តព្ពំ – ‘‘សំយោជនញ្ចេវ សំយោជនសម្បយុត្តញ្ចា’’តិបិ, ‘‘សំយោជនសម្បយុត្តញ្ចេវ នោ ច សំយោជន’’ន្តិបិ. ទសាយតនា សំយោជនវិប្បយុត្តសំយោជនិយា. ទ្វាយតនា សិយា សំយោជនវិប្បយុត្តសំយោជនិយា, សិយា សំយោជនវិប្បយុត្តអសំយោជនិយា, សិយា ន វត្តព្ពា – ‘‘សំយោជនវិប្បយុត្តសំយោជនិយា’’តិបិ, ‘‘សំយោជនវិប្បយុត្តអសំយោជនិយា’’តិបិ.

ឯកាទសាយតនា នោ គន្ថា. ធម្មាយតនំ សិយា គន្ថោ, សិយា នោ គន្ថោ. ទសាយតនា គន្ថនិយា. ទ្វាយតនា សិយា គន្ថនិយា, សិយា អគន្ថនិយា. ទសាយតនា គន្ថវិប្បយុត្តា. ទ្វាយតនា សិយា គន្ថសម្បយុត្តា, សិយា គន្ថវិប្បយុត្តា. ទសាយតនា ន វត្តព្ពា – ‘‘គន្ថា ចេវ គន្ថនិយា ចា’’តិ, គន្ថនិយា ចេវ នោ ច គន្ថា. មនាយតនំ ន វត្តព្ពំ – ‘‘គន្ថោ ចេវ គន្ថនិយញ្ចា’’តិ, សិយា គន្ថនិយញ្ចេវ នោ ច គន្ថោ, សិយា ន វត្តព្ពំ – ‘‘គន្ថនិយញ្ចេវ នោ ច គន្ថោ’’តិ. ធម្មាយតនំ សិយា គន្ថោ ចេវ គន្ថនិយញ្ច, សិយា គន្ថនិយញ្ចេវ នោ ច គន្ថោ, សិយា ន វត្តព្ពំ – ‘‘គន្ថោ ចេវ គន្ថនិយញ្ចា’’តិបិ, ‘‘គន្ថនិយញ្ចេវ នោ ច គន្ថោ’’តិបិ. ទសាយតនា ន វត្តព្ពា – ‘‘គន្ថា ចេវ គន្ថសម្បយុត្តា ចា’’តិបិ, ‘‘គន្ថសម្បយុត្តា ចេវ នោ ច គន្ថា’’តិបិ. មនាយតនំ ន វត្តព្ពំ – ‘‘គន្ថោ ចេវ គន្ថសម្បយុត្តញ្ចា’’តិ, សិយា គន្ថសម្បយុត្តញ្ចេវ នោ ច គន្ថោ, សិយា ន វត្តព្ពំ – ‘‘គន្ថសម្បយុត្តញ្ចេវ នោ ច គន្ថោ’’តិ. ធម្មាយតនំ សិយា គន្ថោ ចេវ គន្ថសម្បយុត្តញ្ច, សិយា គន្ថសម្បយុត្តញ្ចេវ នោ ច គន្ថោ, សិយា ន វត្តព្ពំ – ‘‘គន្ថោ ចេវ គន្ថសម្បយុត្តញ្ចា’’តិបិ, ‘‘គន្ថសម្បយុត្តញ្ចេវ នោ ច គន្ថោ’’តិបិ. ទសាយតនា គន្ថវិប្បយុត្តគន្ថនិយា. ទ្វាយតនា សិយា គន្ថវិប្បយុត្តគន្ថនិយា, សិយា គន្ថវិប្បយុត្តអគន្ថនិយា, សិយា ន វត្តព្ពា – ‘‘គន្ថវិប្បយុត្តគន្ថនិយា’’តិបិ, ‘‘គន្ថវិប្បយុត្តអគន្ថនិយា’’តិបិ.

ឯកាទសាយតនា នោ ឱឃា…បេ… នោ យោគា…បេ… នោ នីវរណា. ធម្មាយតនំ សិយា នីវរណំ, សិយា នោ នីវរណំ. ទសាយតនា នីវរណិយា. ទ្វាយតនា សិយា នីវរណិយា, សិយា អនីវរណិយា. ទសាយតនា នីវរណវិប្បយុត្តា. ទ្វាយតនា សិយា នីវរណសម្បយុត្តា, សិយា នីវរណវិប្បយុត្តា. ទសាយតនា ន វត្តព្ពា – ‘‘នីវរណា ចេវ នីវរណិយា ចា’’តិ, នីវរណិយា ចេវ នោ ច នីវរណា. មនាយតនំ ន វត្តព្ពំ – ‘‘នីវរណញ្ចេវ នីវរណិយញ្ចា’’តិ, សិយា នីវរណិយញ្ចេវ នោ ច នីវរណំ, សិយា ន វត្តព្ពំ – ‘‘នីវរណិយញ្ចេវ នោ ច នីវរណ’’ន្តិ. ធម្មាយតនំ សិយា នីវរណញ្ចេវ នីវរណិយញ្ច, សិយា នីវរណិយញ្ចេវ នោ ច នីវរណំ, សិយា ន វត្តព្ពំ – ‘‘នីវរណញ្ចេវ នីវរណិយញ្ចា’’តិបិ, ‘‘នីវរណិយញ្ចេវ នោ ច នីវរណ’’ន្តិបិ. ទសាយតនា ន វត្តព្ពា – ‘‘នីវរណា ចេវ នីវរណសម្បយុត្តា ចា’’តិបិ, ‘‘នីវរណសម្បយុត្តា ចេវ នោ ច នីវរណា’’តិបិ. មនាយតនំ ន វត្តព្ពំ – ‘‘នីវរណញ្ចេវ នីវរណសម្បយុត្តញ្ចា’’តិ, សិយា នីវរណសម្បយុត្តញ្ចេវ នោ ច នីវរណំ, សិយា ន វត្តព្ពំ – ‘‘នីវរណសម្បយុត្តញ្ចេវ នោ ច នីវរណ’’ន្តិ. ធម្មាយតនំ សិយា នីវរណញ្ចេវ នីវរណសម្បយុត្តញ្ច, សិយា នីវរណសម្បយុត្តញ្ចេវ នោ ច នីវរណំ, សិយា ន វត្តព្ពំ – ‘‘នីវរណញ្ចេវ នីវរណសម្បយុត្តញ្ចា’’តិបិ, ‘‘នីវរណសម្បយុត្តញ្ចេវ នោ ច នីវរណ’’ន្តិបិ. ទសាយតនា នីវរណវិប្បយុត្តនីវរណិយា. ទ្វាយតនា សិយា នីវរណវិប្បយុត្តនីវរណិយា, សិយា នីវរណវិប្បយុត្តអនីវរណិយា, សិយា ន វត្តព្ពា – ‘‘នីវរណវិប្បយុត្តនីវរណិយា’’តិបិ, ‘‘នីវរណវិប្បយុត្តអនីវរណិយា’’តិបិ.

ឯកាទសាយតនា នោ បរាមាសា. ធម្មាយតនំ សិយា បរាមាសោ, សិយា នោ បរាមាសោ. ទសាយតនា បរាមដ្ឋា. ទ្វាយតនា សិយា បរាមដ្ឋា, សិយា អបរាមដ្ឋា. ទសាយតនា បរាមាសវិប្បយុត្តា. មនាយតនំ សិយា បរាមាសសម្បយុត្តំ, សិយា បរាមាសវិប្បយុត្តំ. ធម្មាយតនំ សិយា បរាមាសសម្បយុត្តំ, សិយា បរាមាសវិប្បយុត្តំ, សិយា ន វត្តព្ពំ – ‘‘បរាមាសសម្បយុត្ត’’ន្តិបិ, ‘‘បរាមាសវិប្បយុត្ត’’ន្តិបិ. ទសាយតនា ន វត្តព្ពា – ‘‘បរាមាសា ចេវ បរាមដ្ឋា ចា’’តិ, ‘‘បរាមដ្ឋា ចេវ នោ ច បរាមាសា’’. មនាយតនំ ន វត្តព្ពំ – ‘‘បរាមាសោ ចេវ បរាមដ្ឋញ្ចា’’តិ, សិយា បរាមដ្ឋញ្ចេវ នោ ច បរាមាសោ, សិយា ន វត្តព្ពំ – ‘‘បរាមដ្ឋញ្ចេវ នោ ច បរាមាសោ’’តិ. ធម្មាយតនំ សិយា បរាមាសោ ចេវ បរាមដ្ឋញ្ច, សិយា បរាមដ្ឋញ្ចេវ នោ ច បរាមាសោ, សិយា ន វត្តព្ពំ – ‘‘បរាមាសោ ចេវ បរាមដ្ឋញ្ចា’’តិបិ, ‘‘បរាមដ្ឋញ្ចេវ នោ ច បរាមាសោ’’តិបិ. ទសាយតនា បរាមាសវិប្បយុត្តបរាមដ្ឋា. ទ្វាយតនា សិយា បរាមាសវិប្បយុត្តបរាមដ្ឋា, សិយា បរាមាសវិប្បយុត្តអបរាមដ្ឋា, សិយា ន វត្តព្ពា – ‘‘បរាមាសវិប្បយុត្តបរាមដ្ឋា’’តិបិ, ‘‘បរាមាសវិប្បយុត្តអបរាមដ្ឋា’’តិបិ.

ទសាយតនា អនារម្មណា. មនាយតនំ សារម្មណំ. ធម្មាយតនំ សិយា សារម្មណំ, សិយា អនារម្មណំ. មនាយតនំ ចិត្តំ. ឯកាទសាយតនា នោ ចិត្តា. ឯកាទសាយតនា អចេតសិកា. ធម្មាយតនំ សិយា ចេតសិកំ, សិយា អចេតសិកំ. ទសាយតនា ចិត្តវិប្បយុត្តា. ធម្មាយតនំ សិយា ចិត្តសម្បយុត្តំ, សិយា ចិត្តវិប្បយុត្តំ. មនាយតនំ ន វត្តព្ពំ – ‘‘ចិត្តេន សម្បយុត្ត’’ន្តិបិ, ‘‘ចិត្តេន វិប្បយុត្ត’’ន្តិបិ. ទសាយតនា ចិត្តវិសំសដ្ឋា. ធម្មាយតនំ សិយា ចិត្តសំសដ្ឋំ, សិយា ចិត្តវិសំសដ្ឋំ. មនាយតនំ ន វត្តព្ពំ – ‘‘ចិត្តេន សំសដ្ឋ’’ន្តិបិ, ‘‘ចិត្តេន វិសំសដ្ឋ’’ន្តិបិ. ឆាយតនា នោ ចិត្តសមុដ្ឋានា. ឆាយតនា សិយា ចិត្តសមុដ្ឋានា, សិយា នោ ចិត្តសមុដ្ឋានា. ឯកាទសាយតនា នោ ចិត្តសហភុនោ. ធម្មាយតនំ សិយា ចិត្តសហភូ, សិយា នោ ចិត្តសហភូ. ឯកាទសាយតនា នោ ចិត្តានុបរិវត្តិនោ. ធម្មាយតនំ សិយា ចិត្តានុបរិវត្តិ, សិយា នោ ចិត្តានុបរិវត្តិ. ឯកាទសាយតនា នោ ចិត្តសំសដ្ឋសមុដ្ឋានា. ធម្មាយតនំ សិយា ចិត្តសំសដ្ឋសមុដ្ឋានំ, សិយា នោ ចិត្តសំសដ្ឋសមុដ្ឋានំ. ឯកាទសាយតនា នោ ចិត្តសំសដ្ឋសមុដ្ឋានសហភុនោ. ធម្មាយតនំ សិយា ចិត្តសំសដ្ឋសមុដ្ឋានសហភូ, សិយា នោ ចិត្តសំសដ្ឋសមុដ្ឋានសហភូ. ឯកាទសាយតនា នោ ចិត្តសំសដ្ឋសមុដ្ឋានានុបរិវត្តិនោ. ធម្មាយតនំ សិយា ចិត្តសំសដ្ឋសមុដ្ឋានានុបរិវត្តិ, សិយា នោ ចិត្តសំសដ្ឋសមុដ្ឋានានុបរិវត្តិ.

ឆាយតនា អជ្ឈត្តិកា. ឆាយតនា ពាហិរា. នវាយតនា ឧបាទា. ទ្វាយតនា នោ ឧបាទា. ធម្មាយតនំ សិយា ឧបាទា, សិយា នោ ឧបាទា. បញ្ចាយតនា ឧបាទិន្នា. សទ្ទាយតនំ អនុបាទិន្នំ. ឆាយតនា សិយា ឧបាទិន្នា, សិយា អនុបាទិន្នា. ឯកាទសាយតនា នោ ឧបាទានា. ធម្មាយតនំ សិយា ឧបាទានំ, សិយា នោ ឧបាទានំ. ទសាយតនា ឧបាទានិយា. ទ្វាយតនា សិយា ឧបាទានិយា, សិយា អនុបាទានិយា. ទសាយតនា ឧបាទានវិប្បយុត្តា. ទ្វាយតនា សិយា ឧបាទានសម្បយុត្តា, សិយា ឧបាទានវិប្បយុត្តា. ទសាយតនា ន វត្តព្ពា – ‘‘ឧបាទានា ចេវ ឧបាទានិយា ចា’’តិ, ឧបាទានិយា ចេវ នោ ច ឧបាទានា. មនាយតនំ ន វត្តព្ពំ – ‘‘ឧបាទានញ្ចេវ ឧបាទានិយញ្ចា’’តិ, សិយា ឧបាទានិយញ្ចេវ នោ ច ឧបាទានំ, សិយា ន វត្តព្ពំ – ‘‘ឧបាទានិយញ្ចេវ នោ ច ឧបាទាន’’ន្តិ. ធម្មាយតនំ សិយា ឧបាទានញ្ចេវ ឧបាទានិយញ្ច, សិយា ឧបាទានិយញ្ចេវ នោ ច ឧបាទានំ, សិយា ន វត្តព្ពំ – ‘‘ឧបាទានញ្ចេវ ឧបាទានិយញ្ចា’’តិបិ, ‘‘ឧបាទានិយញ្ចេវ នោ ច ឧបាទាន’’ន្តិបិ. ទសាយតនា ន វត្តព្ពា – ‘‘ឧបាទានា ចេវ ឧបាទានសម្បយុត្តា ចា’’តិបិ, ‘‘ឧបាទានសម្បយុត្តា ចេវ នោ ច ឧបាទានា’’តិបិ. មនាយតនំ ន វត្តព្ពំ – ‘‘ឧបាទានិយញ្ចេវ ឧបាទានសម្បយុត្តញ្ចា’’តិ, សិយា ឧបាទានសម្បយុត្តញ្ចេវ នោ ច ឧបាទានំ, សិយា ន វត្តព្ពំ – ‘‘ឧបាទានសម្បយុត្តញ្ចេវ នោ ច ឧបាទាន’’ន្តិ. ធម្មាយតនំ សិយា ឧបាទានញ្ចេវ ឧបាទានសម្បយុត្តញ្ច, សិយា ឧបាទានសម្បយុត្តញ្ចេវ នោ ច ឧបាទានំ, សិយា ន វត្តព្ពំ – ‘‘ឧបាទានញ្ចេវ ឧបាទានសម្បយុត្តញ្ចា’’តិបិ, ‘‘ឧបាទានសម្បយុត្តញ្ចេវ នោ ច ឧបាទាន’’ន្តិបិ. ទសាយតនា ឧបាទានវិប្បយុត្តឧបាទានិយា. ទ្វាយតនា សិយា ឧបាទានសម្បយុត្តឧបាទានិយា, សិយា ឧបាទានវិប្បយុត្តអនុបាទានិយា, សិយា ន វត្តព្ពា – ‘‘ឧបាទានវិប្បយុត្តឧបាទានិយា’’តិបិ, ‘‘ឧបាទានវិប្បយុត្តអនុបាទានិយា’’តិបិ.

ឯកាទសាយតនា នោ កិលេសា. ធម្មាយតនំ សិយា កិលេសោ, សិយា នោ កិលេសោ. ទសាយតនា សំកិលេសិកា. ទ្វាយតនា សិយា សំកិលេសិកា, សិយា អសំកិលេសិកា. ទសាយតនា អសំកិលិដ្ឋា. ទ្វាយតនា សិយា សំកិលិដ្ឋា, សិយា អសំកិលិដ្ឋា. ទសាយតនា កិលេសវិប្បយុត្តា. ទ្វាយតនា សិយា កិលេសសម្បយុត្តា, សិយា កិលេសវិប្បយុត្តា. ទសាយតនា ន វត្តព្ពា – ‘‘កិលេសា ចេវ សំកិលេសិកា ចា’’តិ, ‘‘សំកិលេសិកា ចេវ នោ ច កិលេសា’’. មនាយតនំ ន វត្តព្ពំ – ‘‘កិលេសោ ចេវ សំកិលេសិកញ្ចា’’តិ, សិយា សំកិលេសិកញ្ចេវ នោ ច កិលេសោ, សិយា ន វត្តព្ពំ – ‘‘សំកិលេសិកញ្ចេវ នោ ច កិលេសោ’’តិ. ធម្មាយតនំ សិយា កិលេសោ ចេវ សំកិលេសិកញ្ច, សិយា សំកិលេសិកញ្ចេវ នោ ច កិលេសោ, សិយា ន វត្តព្ពំ – ‘‘កិលេសោ ចេវ សំកិលេសិកញ្ចា’’តិបិ, ‘‘សំកិលេសិកញ្ចេវ នោ ច កិលេសោ’’តិបិ. ទសាយតនា ន វត្តព្ពា – ‘‘កិលេសា ចេវ សំកិលិដ្ឋា ចា’’តិបិ, ‘‘សំកិលិដ្ឋា ចេវ នោ ច កិលេសា’’តិបិ. មនាយតនំ ន វត្តព្ពំ – ‘‘កិលេសោ ចេវ សំកិលិដ្ឋញ្ចា’’តិ, សិយា សំកិលិដ្ឋញ្ចេវ នោ ច កិលេសោ, សិយា ន វត្តព្ពំ – ‘‘សំកិលិដ្ឋញ្ចេវ នោ ច កិលេសោ’’តិ. ធម្មាយតនំ សិយា កិលេសោ ចេវ សំកិលិដ្ឋញ្ច, សិយា សំកិលិដ្ឋញ្ចេវ នោ ច កិលេសោ, សិយា ន វត្តព្ពំ – ‘‘កិលេសោ ចេវ សំកិលិដ្ឋញ្ចា’’តិបិ, ‘‘សំកិលិដ្ឋញ្ចេវ នោ ច កិលេសោ’’តិបិ.

ទសាយតនា ន វត្តព្ពា – ‘‘កិលេសា ចេវ កិលេសសម្បយុត្តា ចា’’តិបិ, ‘‘កិលេសសម្បយុត្តា ចេវ នោ ច ន កិលេសា’’តិបិ. មនាយតនំ ន វត្តព្ពំ – ‘‘កិលេសោ ចេវ កិលេសសម្បយុត្តញ្ចា’’តិ, សិយា កិលេសសម្បយុត្តញ្ចេវ នោ ច កិលេសោ, សិយា ន វត្តព្ពំ – ‘‘កិលេសសម្បយុត្តញ្ចេវ នោ ច កិលេសោ’’តិ. ធម្មាយតនំ សិយា កិលេសោ ចេវ កិលេសសម្បយុត្តញ្ច, សិយា កិលេសសម្បយុត្តញ្ចេវ នោ ច កិលេសោ, សិយា ន វត្តព្ពំ – ‘‘កិលេសោ ចេវ កិលេសសម្បយុត្តញ្ចា’’តិបិ, ‘‘កិលេសសម្បយុត្តញ្ចេវ នោ ច កិលេសោ’’តិបិ. ទសាយតនា កិលេសវិប្បយុត្តសំកិលេសិកា. ទ្វាយតនា សិយា កិលេសវិប្បយុត្តសំកិលេសិកា, សិយា កិលេសវិប្បយុត្តអសំកិលេសិកា, សិយា ន វត្តព្ពា – ‘‘កិលេសវិប្បយុត្តសំកិលេសិកា’’តិបិ, ‘‘កិលេសវិប្បយុត្តអសំកិលេសិកា’’តិបិ.

ទសាយតនា ន ទស្សនេន បហាតព្ពា. ទ្វាយតនា សិយា ទស្សនេន បហាតព្ពា, សិយា ន ទស្សនេន បហាតព្ពា. ទសាយតនា ន ភាវនាយ បហាតព្ពា. ទ្វាយតនា សិយា ភាវនាយ បហាតព្ពា, សិយា ន ភាវនាយ បហាតព្ពា. ទសាយតនា ន ទស្សនេន បហាតព្ពហេតុកា. ទ្វាយតនា សិយា ទស្សនេន បហាតព្ពហេតុកា, សិយា ន ទស្សនេន បហាតព្ពហេតុកា. ទសាយតនា ន ភាវនាយ បហាតព្ពហេតុកា. ទ្វាយតនា សិយា ភាវនាយ បហាតព្ពហេតុកា, សិយា ន ភាវនាយ បហាតព្ពហេតុកា. ទសាយតនា អវិតក្កា. ទ្វាយតនា សិយា សវិតក្កា, សិយា អវិតក្កា. ទសាយតនា អវិចារា. ទ្វាយតនា សិយា សវិចារា, សិយា អវិចារា. ទសាយតនា អប្បីតិកា. ទ្វាយតនា សិយា សប្បីតិកា, សិយា អប្បីតិកា. ទសាយតនា ន បីតិសហគតា. ទ្វាយតនា សិយា បីតិសហគតា, សិយា ន បីតិសហគតា. ទសាយតនា ន សុខសហគតា. ទ្វាយតនា សិយា សុខសហគតា, សិយា ន សុខសហគតា. ទសាយតនា ន ឧបេក្ខាសហគតា. ទ្វាយតនា សិយា ឧបេក្ខាសហគតា, សិយា ន ឧបេក្ខាសហគតា.

ទសាយតនា កាមាវចរា. ទ្វាយតនា សិយា កាមាវចរា, សិយា ន កាមាវចរា. ទសាយតនា ន រូបាវចរា. ទ្វាយតនា សិយា រូបាវចរា, សិយា ន រូបាវចរា. ទសាយតនា ន អរូបាវចរា. ទ្វាយតនា សិយា អរូបាវចរា, សិយា ន អរូបាវចរា. ទសាយតនា បរិយាបន្នា. ទ្វាយតនា សិយា បរិយាបន្នា, សិយា អបរិយាបន្នា. ទសាយតនា អនិយ្យានិកា. ទ្វាយតនា សិយា និយ្យានិកា, សិយា អនិយ្យានិកា. ទសាយតនា អនិយតា. ទ្វាយតនា សិយា និយតា, សិយា អនិយតា. ទសាយតនា សឧត្តរា. ទ្វាយតនា សិយា សឧត្តរា, សិយា អនុត្តរា. ទសាយតនា អរណា. ទ្វាយតនា សិយា សរណា, សិយា អរណាតិ.

បញ្ហាបុច្ឆកំ.

អាយតនវិភង្គោ និដ្ឋិតោ.