៣. បញ្ហាបុច្ឆកំ

៧៤៧. ចតស្សោ បដិសម្ភិទា – អត្ថបដិសម្ភិទា, ធម្មបដិសម្ភិទា, និរុត្តិបដិសម្ភិទា, បដិភានបដិសម្ភិទា.

៧៤៨. ចតុន្នំ បដិសម្ភិទានំ កតិ កុសលា, កតិ អកុសលា, កតិ អព្យាកតា…បេ… កតិ សរណា, កតិ អរណា?

១. តិកំ

៧៤៩. សិយា កុសលា, សិយា អព្យាកតា. សិយា សុខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា. តិស្សោ បដិសម្ភិទា សិយា វិបាកធម្មធម្មា, សិយា នេវវិបាកនវិបាកធម្មធម្មា; អត្ថបដិសម្ភិទា សិយា វិបាកា, សិយា វិបាកធម្មធម្មា, សិយា នេវវិបាកនវិបាកធម្មធម្មា. តិស្សោ បដិសម្ភិទា អនុបាទិន្នុបាទានិយា; អត្ថបដិសម្ភិទា សិយា អនុបាទិន្នុបាទានិយា, សិយា អនុបាទិន្នអនុបាទានិយា. តិស្សោ បដិសម្ភិទា អសំកិលិដ្ឋអសំកិលេសិកា; អត្ថបដិសម្ភិទា សិយា អសំកិលិដ្ឋសំកិលេសិកា, សិយា អសំកិលិដ្ឋអសំកិលេសិកា.

តិស្សោ បដិសម្ភិទា សវិតក្កសវិចារា; អត្ថបដិសម្ភិទា សិយា សវិតក្កសវិចារា, សិយា អវិតក្កវិចារមត្តា, សិយា អវិតក្កអវិចារា. សិយា បីតិសហគតា, សិយា សុខសហគតា, សិយា ឧបេក្ខាសហគតា. នេវ ទស្សនេន ន ភាវនាយ បហាតព្ពា. នេវ ទស្សនេន ន ភាវនាយ បហាតព្ពហេតុកា.

តិស្សោ បដិសម្ភិទា សិយា អាចយគាមិនោ, សិយា នេវាចយគាមិនាបចយគាមិនោ; អត្ថបដិសម្ភិទា សិយា អាចយគាមិនី, សិយា អបចយគាមិនី, សិយា នេវាចយគាមិនាបចយគាមិនី.

តិស្សោ បដិសម្ភិទា នេវសេក្ខនាសេក្ខា, អត្ថបដិសម្ភិទា សិយា សេក្ខា, សិយា អសេក្ខា, សិយា នេវសេក្ខនាសេក្ខា. តិស្សោ បដិសម្ភិទា បរិត្តា; អត្ថបដិសម្ភិទា សិយា បរិត្តា, សិយា អប្បមាណា. និរុត្តិបដិសម្ភិទា បរិត្តារម្មណា; តិស្សោ បដិសម្ភិទា សិយា បរិត្តារម្មណា, សិយា មហគ្គតារម្មណា, សិយា អប្បមាណារម្មណា.

តិស្សោ បដិសម្ភិទា មជ្ឈិមា; អត្ថបដិសម្ភិទា សិយា មជ្ឈិមា, សិយា បណីតា. តិស្សោ បដិសម្ភិទា អនិយតា; អត្ថបដិសម្ភិទា សិយា សម្មត្តនិយតា, សិយា អនិយតា. និរុត្តិបដិសម្ភិទា ន វត្តព្ពា – មគ្គារម្មណាតិបិ, មគ្គហេតុកាតិបិ, មគ្គាធិបតិនីតិបិ; អត្ថបដិសម្ភិទា ន មគ្គារម្មណា, សិយា មគ្គហេតុកា, សិយា មគ្គាធិបតិនី, សិយា ន វត្តព្ពា មគ្គហេតុកាតិបិ, មគ្គាធិបតិនីតិបិ; ទ្វេ បដិសម្ភិទា សិយា មគ្គារម្មណា, ន មគ្គហេតុកា, សិយា មគ្គាធិបតិនោ, សិយា ន វត្តព្ពា មគ្គារម្មណាតិបិ, មគ្គាធិបតិនោតិបិ.

តិស្សោ បដិសម្ភិទា សិយា ឧប្បន្នា, សិយា អនុប្បន្នា, ន វត្តព្ពា ឧប្បាទិនោតិ; អត្ថបដិសម្ភិទា សិយា ឧប្បន្នា, សិយា អនុប្បន្នា, សិយា ឧប្បាទិនី. សិយា អតីតា, សិយា អនាគតា, សិយា បច្ចុប្បន្នា. និរុត្តិបដិសម្ភិទា បច្ចុប្បន្នារម្មណា; ទ្វេ បដិសម្ភិទា សិយា អតីតារម្មណា, សិយា អនាគតារម្មណា, សិយា បច្ចុប្បន្នារម្មណា; អត្ថបដិសម្ភិទា សិយា អតីតារម្មណា, សិយា អនាគតារម្មណា, សិយា បច្ចុប្បន្នារម្មណា, សិយា ន វត្តព្ពា អតីតារម្មណាតិបិ, អនាគតារម្មណាតិបិ, បច្ចុប្បន្នារម្មណាតិបិ. សិយា អជ្ឈត្តា, សិយា ពហិទ្ធា, សិយា អជ្ឈត្តពហិទ្ធា. និរុត្តិបដិសម្ភិទា ពហិទ្ធារម្មណា; តិស្សោ បដិសម្ភិទា សិយា អជ្ឈត្តារម្មណា, សិយា ពហិទ្ធារម្មណា, សិយា អជ្ឈត្តពហិទ្ធារម្មណា. អនិទស្សនអបដិឃា.

២. ទុកំ

៧៥០. ហេតូ, សហេតុកា, ហេតុសម្បយុត្តា, ហេតូ ចេវ សហេតុកា ច, ហេតូ ចេវ ហេតុសម្បយុត្តា ច, ន វត្តព្ពា ន ហេតូ សហេតុកាតិបិ, នហេតូអហេតុកាតិបិ.

សប្បច្ចយា, សង្ខតា, អនិទស្សនា, អប្បដិឃា, អរូបា, តិស្សោ បដិសម្ភិទា លោកិយា, អត្ថបដិសម្ភិទា សិយា លោកិយា, សិយា លោកុត្តរា, កេនចិ វិញ្ញេយ្យា, កេនចិ ន វិញ្ញេយ្យា.

នោ អាសវា. តិស្សោ បដិសម្ភិទា សាសវា; អត្ថបដិសម្ភិទា សិយា សាសវា, សិយា អនាសវា. អាសវវិប្បយុត្តា. តិស្សោ បដិសម្ភិទា ន វត្តព្ពា អាសវា ចេវ សាសវា ចាតិ, សាសវា ចេវ នោ ច អាសវា; អត្ថបដិសម្ភិទា ន វត្តព្ពា អាសវោ [អាសវា (សី.) ធាតុវិភង្គេ បន បាឋនានត្តំ នត្ថិ] ចេវ សាសវា ចាតិ, សិយា សាសវា ចេវ នោ ច អាសវោ [អាសវា (សី.) ធាតុវិភង្គេ បន បាឋនានត្តំ នត្ថិ], សិយា ន វត្តព្ពា សាសវា ចេវ នោ ច អាសវាតិ. ន វត្តព្ពា អាសវា ចេវ អាសវសម្បយុត្តា ចាតិបិ, អាសវសម្បយុត្តា ចេវ នោ ច អាសវាតិបិ. តិស្សោ បដិសម្ភិទា អាសវវិប្បយុត្តា សាសវា; អត្ថបដិសម្ភិទា សិយា អាសវវិប្បយុត្តា សាសវា, សិយា អាសវវិប្បយុត្តា អនាសវា.

នោ សំយោជនា…បេ… នោ គន្ថា…បេ… នោ ឱឃា…បេ… នោ យោគា…បេ… នោ នីវរណា…បេ… នោ បរាមាសា…បេ… សារម្មណា. នោ ចិត្តា, ចេតសិកា, ចិត្តសម្បយុត្តា, ចិត្តសំសដ្ឋា, ចិត្តសមុដ្ឋានា, ចិត្តសហភុនោ, ចិត្តានុបរិវត្តិនោ. ចិត្តសំសដ្ឋសមុដ្ឋានា, ចិត្តសំសដ្ឋសមុដ្ឋានសហភុនោ, ចិត្តសំសដ្ឋសមុដ្ឋានានុបរិវត្តិនោ, ពាហិរា, នោ ឧបាទា, អនុបាទិន្នា.

នោ ឧបាទានា…បេ… នោ កិលេសា…បេ… ន ទស្សនេន បហាតព្ពា. ន ភាវនាយ បហាតព្ពា. ន ទស្សនេន បហាតព្ពហេតុកា. ន ភាវនាយ បហាតព្ពហេតុកា. តិស្សោ បដិសម្ភិទា សវិតក្កា; អត្ថបដិសម្ភិទា សិយា សវិតក្កា, សិយា អវិតក្កា. តិស្សោ បដិសម្ភិទា សវិចារា; អត្ថបដិសម្ភិទា សិយា សវិចារា, សិយា អវិចារា. សិយា សប្បីតិកា, សិយា អប្បីតិកា. សិយា បីតិសហគតា, សិយា ន បីតិសហគតា. សិយា សុខសហគតា, សិយា ន សុខសហគតា. សិយា ឧបេក្ខាសហគតា, សិយា ន ឧបេក្ខាសហគតា. តិស្សោ បដិសម្ភិទា កាមាវចរា; អត្ថបដិសម្ភិទា សិយា កាមាវចរា, សិយា ន កាមាវចរា. ន រូបាវចរា. ន អរូបាវចរា. តិស្សោ បដិសម្ភិទា បរិយាបន្នា; អត្ថបដិសម្ភិទា សិយា បរិយាបន្នា, សិយា អបរិយាបន្នា. តិស្សោ បដិសម្ភិទា អនិយ្យានិកា; អត្ថបដិសម្ភិទា សិយា និយ្យានិកា, សិយា អនិយ្យានិកា. តិស្សោ បដិសម្ភិទា អនិយតា; អត្ថបដិសម្ភិទា សិយា និយតា, សិយា អនិយតា. តិស្សោ បដិសម្ភិទា សឧត្តរា; អត្ថបដិសម្ភិទា សិយា សឧត្តរា, សិយា អនុត្តរា. អរណាតិ.

បញ្ហាបុច្ឆកំ.

បដិសម្ភិទាវិភង្គោ និដ្ឋិតោ.