២. បញ្ហាបុច្ឆកំ

៧១៤. បញ្ច សិក្ខាបទានិ – បាណាតិបាតា វេរមណី សិក្ខាបទំ, អទិន្នាទានា វេរមណី សិក្ខាបទំ, កាមេសុមិច្ឆាចារា វេរមណី សិក្ខាបទំ, មុសាវាទា វេរមណី សិក្ខាបទំ, សុរាមេរយមជ្ជបមាទដ្ឋានា វេរមណី សិក្ខាបទំ.

៧១៥. បញ្ចន្នំ សិក្ខាបទានំ កតិ កុសលា, កតិ អកុសលា, កតិ អព្យាកតា…បេ… កតិ សរណា, កតិ អរណា?

១. តិកំ

៧១៦. កុសលាយេវ. សិយា សុខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា, វិបាកធម្មធម្មា, អនុបាទិន្នុបាទានិយា, អសំកិលិដ្ឋសំកិលេសិកា, សវិតក្កសវិចារា, សិយា បីតិសហគតា, សិយា សុខសហគតា, សិយា ឧបេក្ខាសហគតា.

នេវ ទស្សនេន ន ភាវនាយ បហាតព្ពា, នេវ ទស្សនេន ន ភាវនាយ បហាតព្ពហេតុកា, អាចយគាមិនោ, នេវសេក្ខនាសេក្ខា, បរិត្តា, បរិត្តារម្មណា, មជ្ឈិមា, អនិយតា, ន វត្តព្ពា មគ្គារម្មណាតិបិ, មគ្គហេតុកាតិបិ, មគ្គាធិបតិនោតិបិ. សិយា ឧប្បន្នា, សិយា អនុប្បន្នា, ន វត្តព្ពា ឧប្បាទិនោតិ, សិយា អតីតា, សិយា អនាគតា, សិយា បច្ចុប្បន្នា, បច្ចុប្បន្នារម្មណា, សិយា អជ្ឈត្តា, សិយា ពហិទ្ធា, សិយា អជ្ឈត្តពហិទ្ធា, ពហិទ្ធារម្មណា, អនិទស្សនអប្បដិឃា.

២. ទុកំ

៧១៧. ន ហេតូ សហេតុកា, ហេតុសម្បយុត្តា. ន វត្តព្ពា ‘‘ហេតូ ចេវ សហេតុកា ចា’’តិ, សហេតុកា ចេវ ន ច ហេតូ, ន វត្តព្ពា ‘‘ហេតូ ចេវ ហេតុសម្បយុត្តា ចា’’តិ, ហេតុសម្បយុត្តា ចេវ ន ច ហេតូ, ន ហេតុ សហេតូកា, សប្បច្ចយា, សង្ខតា, អនិទស្សនា, អប្បដិឃា, អរូបា, លោកិយា, កេនចិ វិញ្ញេយ្យា, កេនចិ ន វិញ្ញេយ្យា.

នោ អាសវា, សាសវា, អាសវវិប្បយុត្តា, ន វត្តព្ពា ‘‘អាសវា ចេវ សាសវា ចា’’តិ, សាសវា ចេវ នោ ច អាសវា, ន វត្តព្ពា ‘‘អាសវា ចេវ អាសវសម្បយុត្តា ចា’’តិបិ, ‘‘អាសវសម្បយុត្តា ចេវ នោ ច អាសវា’’តិបិ. អាសវវិប្បយុត្តា សាសវា, នោ សំយោជនា…បេ… នោ គន្ថា…បេ… នោ ឱឃា…បេ… នោ យោគា…បេ… នោ នីវរណា…បេ… នោ បរាមាសា…បេ… សារម្មណា, នោ ចិត្តា, ចេតសិកា, ចិត្តសម្បយុត្តា, ចិត្តសំសដ្ឋា, ចិត្តសមុដ្ឋានា, ចិត្តសហភុនោ, ចិត្តានុបរិវត្តិនោ, ចិត្តសំសដ្ឋសមុដ្ឋានា, ចិត្តសំសដ្ឋសមុដ្ឋានសហភុនោ, ចិត្តសំសដ្ឋសមុដ្ឋានានុបរិវត្តិនោ, ពាហិរា, នោ ឧបាទា, អនុបាទិន្នា, នោ ឧបាទានា…បេ… នោ កិលេសា.

ន ទស្សនេន បហាតព្ពា, ន ភាវនាយបហាតព្ពា, ន ទស្សនេន បហាតព្ពហេតុកា, ន ភាវនាយ បហាតព្ពហេតុកា, សវិតក្កា, សវិចារា, សិយា សប្បីតិកា, សិយា អប្បីតិកា, សិយា បីតិសហគតា, សិយា ន បីតិសហគតា, សិយា សុខសហគតា, សិយា ន សុខសហគតា, សិយា ឧបេក្ខាសហគតា, សិយា ន ឧបេក្ខាសហគតា, កាមាវចរា, ន រូបាវចរា, ន អរូបាវចរា, បរិយាបន្នា, អនិយ្យានិកា, អនិយតា, សឧត្តរា, អរណាតិ.

បញ្ហាបុច្ឆកំ.

សិក្ខាបទវិភង្គោ និដ្ឋិតោ.