២. ទុកំ

១៥៣. ចត្តារោ ខន្ធា ន ហេតូ. សង្ខារក្ខន្ធោ សិយា ហេតុ, សិយា ន ហេតុ. រូបក្ខន្ធោ អហេតុកោ. ចត្តារោ ខន្ធា សិយា សហេតុកា, សិយា អហេតុកា. រូបក្ខន្ធោ ហេតុវិប្បយុត្តោ. ចត្តារោ ខន្ធា សិយា ហេតុសម្បយុត្តា, សិយា ហេតុវិប្បយុត្តា. រូបក្ខន្ធោ ន វត្តព្ពោ – ‘‘ហេតុ ចេវ សហេតុកោ ចា’’តិបិ, ‘‘សហេតុកោ ចេវ ន ច ហេតូ’’តិបិ. តយោ ខន្ធា ន វត្តព្ពា – ‘‘ហេតូ ចេវ សហេតុកា ចា’’តិ, សិយា សហេតុកា ចេវ ន ច ហេតូ, សិយា ន វត្តព្ពា – ‘‘សហេតុកា ចេវ ន ច ហេតូ’’តិ. សង្ខារក្ខន្ធោ សិយា ហេតុ ចេវ សហេតុកោ ច, សិយា សហេតុកោ ចេវ ន ច ហេតុ, សិយា ន វត្តព្ពោ – ‘‘ហេតុ ចេវ សហេតុកោ ចា’’តិបិ, ‘‘សហេតុកោ ចេវ ន ច ហេតូ’’តិបិ. រូបក្ខន្ធោ ន វត្តព្ពោ – ‘‘ហេតុ ចេវ ហេតុសម្បយុត្តោ ចា’’តិបិ, ‘‘ហេតុសម្បយុត្តោ ចេវ ន ច ហេតូ’’តិបិ. តយោ ខន្ធា ន វត្តព្ពា – ‘‘ហេតូ ចេវ ហេតុសម្បយុត្តា ចា’’តិ, សិយា ហេតុសម្បយុត្តា ចេវ ន ច ហេតូ, សិយា ន វត្តព្ពា – ‘‘ហេតុសម្បយុត្តា ចេវ ន ច ហេតូ’’តិ. សង្ខារក្ខន្ធោ សិយា ហេតុ ចេវ ហេតុសម្បយុត្តោ ច, សិយា ហេតុសម្បយុត្តោ ចេវ ន ច ហេតុ, សិយា ន វត្តព្ពោ – ‘‘ហេតុ ចេវ ហេតុសម្បយុត្តោ ចា’’តិបិ, ‘‘ហេតុសម្បយុត្តោ ចេវ ន ច ហេតូ’’តិបិ. រូបក្ខន្ធោ ន ហេតុ អហេតុកោ. តយោ ខន្ធា សិយា ន ហេតូ សហេតុកា, សិយា ន ហេតូ អហេតុកា. សង្ខារក្ខន្ធោ សិយា ន ហេតុ សហេតុកោ, សិយា ន ហេតុ អហេតុកោ, សិយា ន វត្តព្ពោ – ‘‘ន ហេតុ សហេតុកោ’’តិបិ, ‘‘ន ហេតុ អហេតុកោ’’តិបិ.

សប្បច្ចយា, សង្ខតា.

ចត្តារោ ខន្ធា អនិទស្សនា. រូបក្ខន្ធោ សិយា សនិទស្សនោ, សិយា អនិទស្សនោ. ចត្តារោ ខន្ធា អប្បដិឃា. រូបក្ខន្ធោ សិយា សប្បដិឃោ, សិយា អប្បដិឃោ. រូបក្ខន្ធោ រូបំ. ចត្តារោ ខន្ធា អរូបា. រូបក្ខន្ធោ លោកិយោ. ចត្តារោ ខន្ធា សិយា លោកិយា, សិយា លោកុត្តរា; កេនចិ វិញ្ញេយ្យា, កេនចិ ន វិញ្ញេយ្យា.

ចត្តារោ ខន្ធា នោ អាសវា. សង្ខារក្ខន្ធោ សិយា អាសវោ, សិយា នោ អាសវោ. រូបក្ខន្ធោ សាសវោ. ចត្តារោ ខន្ធា សិយា សាសវា, សិយា អនាសវា. រូបក្ខន្ធោ អាសវវិប្បយុត្តោ. ចត្តារោ ខន្ធា សិយា អាសវសម្បយុត្តា, សិយា អាសវវិប្បយុត្តា. រូបក្ខន្ធោ ន វត្តព្ពោ – ‘‘អាសវោ ចេវ សាសវោ ចា’’តិ, សាសវោ ចេវ នោ ច អាសវោ. តយោ ខន្ធា ន វត្តព្ពា – ‘‘អាសវា ចេវ សាសវា ចា’’តិ, សិយា សាសវា ចេវ នោ ច អាសវា, សិយា ន វត្តព្ពា – ‘‘សាសវា ចេវ នោ ច អាសវា’’តិ. សង្ខារក្ខន្ធោ សិយា អាសវោ ចេវ សាសវោ ច, សិយា សាសវោ ចេវ នោ ច អាសវោ, សិយា ន វត្តព្ពោ – ‘‘អាសវោ ចេវ សាសវោ ចា’’តិបិ, ‘‘សាសវោ ចេវ នោ ច អាសវោ’’តិបិ. រូបក្ខន្ធោ ន វត្តព្ពោ – ‘‘អាសវោ ចេវ អាសវសម្បយុត្តោ ចា’’តិបិ, ‘‘អាសវសម្បយុត្តោ ចេវ នោ ច អាសវោ’’តិបិ. តយោ ខន្ធា ន វត្តព្ពា – ‘‘អាសវា ចេវ អាសវសម្បយុត្តា ចា’’តិ, សិយា អាសវសម្បយុត្តា ចេវ នោ ច អាសវា, សិយា ន វត្តព្ពា – ‘‘អាសវសម្បយុត្តា ចេវ នោ ច អាសវា’’តិ. សង្ខារក្ខន្ធោ សិយា អាសវោ ចេវ អាសវសម្បយុត្តោ ច, សិយា អាសវសម្បយុត្តោ ចេវ នោ ច អាសវោ, សិយា ន វត្តព្ពោ – ‘‘អាសវោ ចេវ អាសវសម្បយុត្តោ ចា’’តិបិ, ‘‘អាសវសម្បយុត្តោ ចេវ នោ ច អាសវោ’’តិបិ. រូបក្ខន្ធោ អាសវវិប្បយុត្តសាសវោ. ចត្តារោ ខន្ធា សិយា អាសវវិប្បយុត្តសាសវា, សិយា អាសវវិប្បយុត្តអនាសវា, សិយា ន វត្តព្ពា – ‘‘អាសវវិប្បយុត្តសាសវា’’តិបិ, ‘‘អាសវវិប្បយុត្តអនាសវា’’តិបិ.

ចត្តារោ ខន្ធា នោ សំយោជនា. សង្ខារក្ខន្ធោ សិយា សំយោជនំ, សិយា នោ សំយោជនំ. រូបក្ខន្ធោ សំយោជនិយោ. ចត្តារោ ខន្ធា សិយា សំយោជនិយា, សិយា អសំយោជនិយា. រូបក្ខន្ធោ សំយោជនវិប្បយុត្តោ. ចត្តារោ ខន្ធា សិយា សំយោជនសម្បយុត្តា, សិយា សំយោជនវិប្បយុត្តា. រូបក្ខន្ធោ ន វត្តព្ពោ – ‘‘សំយោជនញ្ចេវ សំយោជនិយោ ចា’’តិ, ‘‘សំយោជនិយោ ចេវ នោ ច សំយោជនំ’’. តយោ ខន្ធា ន វត្តព្ពា – ‘‘សំយោជនា ចេវ សំយោជនិយា ចា’’តិ, សិយា សំយោជនិយា ចេវ នោ ច សំយោជនា, សិយា ន វត្តព្ពា – ‘‘សំយោជនិយា ចេវ នោ ច សំយោជនា’’តិ. សង្ខារក្ខន្ធោ សិយា សំយោជនញ្ចេវ សំយោជនិយោ ច, សិយា សំយោជនិយោ ចេវ នោ ច សំយោជនំ, សិយា ន វត្តព្ពោ – ‘‘សំយោជនញ្ចេវ សំយោជនិយោ ចា’’តិបិ, ‘‘សំយោជនិយោ ចេវ នោ ច សំយោជន’’ន្តិបិ. រូបក្ខន្ធោ ន វត្តព្ពោ – ‘‘សំយោជនញ្ចេវ សំយោជនសម្បយុត្តោ ចា’’តិបិ, ‘‘សំយោជនសម្បយុត្តោ ចេវ នោ ច សំយោជន’’ន្តិបិ. តយោ ខន្ធា ន វត្តព្ពា – ‘‘សំយោជនា ចេវ សំយោជនសម្បយុត្តា ចា’’តិ, សិយា សំយោជនសម្បយុត្តា ចេវ នោ ច សំយោជនា, សិយា ន វត្តព្ពា – ‘‘សំយោជនសម្បយុត្តា ចេវ នោ ច សំយោជនា’’តិ. សង្ខារក្ខន្ធោ សិយា សំយោជនញ្ចេវ សំយោជនសម្បយុត្តោ ច, សិយា សំយោជនសម្បយុត្តោ ចេវ នោ ច សំយោជនំ, សិយា ន វត្តព្ពោ – ‘‘សំយោជនញ្ចេវ សំយោជនសម្បយុត្តោ ចា’’តិបិ, ‘‘សំយោជនសម្បយុត្តោ ចេវ នោ ច សំយោជន’’ន្តិបិ. រូបក្ខន្ធោ សំយោជនវិប្បយុត្តសំយោជនិយោ. ចត្តារោ ខន្ធា សិយា សំយោជនវិប្បយុត្តសំយោជនិយា, សិយា សំយោជនវិប្បយុត្តអសំយោជនិយា, សិយា ន វត្តព្ពា – ‘‘សំយោជនវិប្បយុត្តសំយោជនិយា’’តិបិ, ‘‘សំយោជនវិប្បយុត្តអសំយោជនិយា’’តិបិ.

ចត្តារោ ខន្ធា នោ គន្ថា. សង្ខារក្ខន្ធោ សិយា គន្ថោ, សិយា នោ គន្ថោ. រូបក្ខន្ធោ គន្ថនិយោ. ចត្តារោ ខន្ធា សិយា គន្ថនិយា, សិយា អគន្ថនិយា. រូបក្ខន្ធោ គន្ថវិប្បយុត្តោ. ចត្តារោ ខន្ធា សិយា គន្ថសម្បយុត្តា, សិយា គន្ថវិប្បយុត្តា. រូបក្ខន្ធោ ន វត្តព្ពោ – ‘‘គន្ថោ ចេវ គន្ថនិយោ ចា’’តិ, ‘‘គន្ថនិយោ ចេវ នោ ច គន្ថោ’’. តយោ ខន្ធា ន វត្តព្ពា – ‘‘គន្ថា ចេវ គន្ថនិយា ចា’’តិ, សិយា គន្ថនិយា ចេវ នោ ច គន្ថា, សិយា ន វត្តព្ពា – ‘‘គន្ថនិយា ចេវ នោ ច គន្ថា’’តិ. សង្ខារក្ខន្ធោ សិយា គន្ថោ ចេវ គន្ថនិយោ ច, សិយា គន្ថនិយោ ចេវ នោ ច គន្ថោ, សិយា ន វត្តព្ពោ – ‘‘គន្ថោ ចេវ គន្ថនិយោ ចា’’តិបិ, ‘‘គន្ថនិយោ ចេវ នោ ច គន្ថោ’’តិបិ. រូបក្ខន្ធោ ន វត្តព្ពោ – ‘‘គន្ថោ ចេវ គន្ថសម្បយុត្តោ ចា’’តិបិ, ‘‘គន្ថសម្បយុត្តោ ចេវ នោ ច គន្ថោ’’តិបិ. តយោ ខន្ធា ន វត្តព្ពា – ‘‘គន្ថា ចេវ គន្ថសម្បយុត្តា ចា’’តិ, សិយា គន្ថសម្បយុត្តា ចេវ នោ ច គន្ថា, សិយា ន វត្តព្ពា – ‘‘គន្ថសម្បយុត្តា ចេវ នោ ច គន្ថា’’តិ. សង្ខារក្ខន្ធោ សិយា គន្ថោ ចេវ គន្ថសម្បយុត្តោ ច, សិយា គន្ថសម្បយុត្តោ ចេវ នោ ច គន្ថោ, សិយា ន វត្តព្ពោ – ‘‘គន្ថោ ចេវ គន្ថសម្បយុត្តោ ចា’’តិបិ, ‘‘គន្ថសម្បយុត្តោ ចេវ នោ ច គន្ថោ’’តិ បិ. រូបក្ខន្ធោ គន្ថវិប្បយុត្តគន្ថនិយោ. ចត្តារោ ខន្ធា សិយា គន្ថវិប្បយុត្តគន្ថនិយា, សិយា គន្ថវិប្បយុត្តអគន្ថនិយា, សិយា ន វត្តព្ពា – ‘‘គន្ថវិប្បយុត្តគន្ថនិយា’’តិបិ, ‘‘គន្ថវិប្បយុត្តអគន្ថនិយា’’តិបិ.

ចត្តារោ ខន្ធា នោ ឱឃា…បេ… នោ យោគា…បេ… នោ នីវរណា. សង្ខារក្ខន្ធោ សិយា នីវរណំ, សិយា នោ នីវរណំ. រូបក្ខន្ធោ នីវរណិយោ. ចត្តារោ ខន្ធា សិយា នីវរណិយា, សិយា អនីវរណិយា. រូបក្ខន្ធោ នីវរណវិប្បយុត្តោ. ចត្តារោ ខន្ធា សិយា នីវរណសម្បយុត្តា, សិយា នីវរណវិប្បយុត្តា. រូបក្ខន្ធោ ន វត្តព្ពោ – ‘‘នីវរណញ្ចេវ នីវរណិយោ ចា’’តិ, ‘‘នីវរណិយោ ចេវ នោ ច នីវរណំ’’. តយោ ខន្ធា ន វត្តព្ពា – ‘‘នីវរណា ចេវ នីវរណិយា ចា’’តិ, សិយា នីវរណិយា ចេវ នោ ច នីវរណា, សិយា ន វត្តព្ពា – ‘‘នីវរណិយា ចេវ នោ ច នីវរណា’’តិ. សង្ខារក្ខន្ធោ សិយា នីវរណញ្ចេវ នីវរណិយោ ច, សិយា នីវរណិយោ ចេវ នោ ច នីវរណំ, សិយា ន វត្តព្ពោ – ‘‘នីវរណញ្ចេវ នីវរណិយោ ចា’’តិបិ, ‘‘នីវរណិយោ ចេវ នោ ច នីវរណ’’ន្តិបិ. រូបក្ខន្ធោ ន វត្តព្ពោ – ‘‘នីវរណញ្ចេវ នីវរណសម្បយុត្តោ ចា’’តិបិ, ‘‘នីវរណសម្បយុត្តោ ចេវ នោ ច នីវរណ’’ន្តិបិ. តយោ ខន្ធា ន វត្តព្ពា – ‘‘នីវរណា ចេវ នីវរណសម្បយុត្តា ចា’’តិ, សិយា នីវរណសម្បយុត្តា ចេវ នោ ច នីវរណា, សិយា ន វត្តព្ពា – ‘‘នីវរណសម្បយុត្តា ចេវ នោ ច នីវរណា’’តិ. សង្ខារក្ខន្ធោ សិយា នីវរណញ្ចេវ នីវរណសម្បយុត្តោ ច, សិយា នីវរណសម្បយុត្តោ ចេវ នោ ច នីវរណំ, សិយា ន វត្តព្ពោ – ‘‘នីវរណញ្ចេវ នីវរណសម្បយុត្តោ ចា’’តិបិ, ‘‘នីវរណសម្បយុត្តោ ចេវ នោ ច នីវរណ’’ន្តិបិ. រូបក្ខន្ធោ នីវរណវិប្បយុត្តនីវរណិយោ. ចត្តារោ ខន្ធា សិយា នីវរណវិប្បយុត្តនីវរណិយា, សិយា នីវរណវិប្បយុត្តអនីវរណិយា, សិយា ន វត្តព្ពា – ‘‘នីវរណវិប្បយុត្តនីវរណិយា’’តិបិ, ‘‘នីវរណវិប្បយុត្តអនីវរណិយា’’តិបិ.

ចត្តារោ ខន្ធា នោ បរាមាសា. សង្ខារក្ខន្ធោ សិយា បរាមាសោ, សិយា នោ បរាមាសោ. រូបក្ខន្ធោ បរាមដ្ឋោ. ចត្តារោ ខន្ធា សិយា បរាមដ្ឋា, សិយា អបរាមដ្ឋា. រូបក្ខន្ធោ បរាមាសវិប្បយុត្តោ. តយោ ខន្ធា សិយា បរាមាសសម្បយុត្តា, សិយា បរាមាសវិប្បយុត្តា. សង្ខារក្ខន្ធោ សិយា បរាមាសសម្បយុត្តោ, សិយា បរាមាសវិប្បយុត្តោ, សិយា ន វត្តព្ពោ – ‘‘បរាមាសសម្បយុត្តោ’’តិបិ, ‘‘បរាមាសវិប្បយុត្តោ’’តិបិ. រូបក្ខន្ធោ ន វត្តព្ពោ – ‘‘បរាមាសោ ចេវ បរាមដ្ឋោ ចា’’តិ, ‘‘បរាមដ្ឋោ ចេវ នោ ច បរាមាសោ’’. តយោ ខន្ធា ន វត្តព្ពា – ‘‘បរាមាសា ចេវ បរាមដ្ឋា ចា’’តិ, សិយា បរាមដ្ឋា ចេវ នោ ច បរាមាសា, សិយា ន វត្តព្ពា – ‘‘បរាមដ្ឋា ចេវ នោ ច បរាមាសា’’តិ. សង្ខារក្ខន្ធោ សិយា បរាមាសោ ចេវ បរាមដ្ឋោ ច, សិយា បរាមដ្ឋោ ចេវ នោ ច បរាមាសោ, សិយា ន វត្តព្ពោ – ‘‘បរាមាសោ ចេវ បរាមដ្ឋោ ចា’’តិបិ, ‘‘បរាមដ្ឋោ ចេវ នោ ច បរាមាសោ’’តិបិ. រូបក្ខន្ធោ បរាមាសវិប្បយុត្តបរាមដ្ឋោ. ចត្តារោ ខន្ធា សិយា បរាមាសវិប្បយុត្តបរាមដ្ឋា, សិយា បរាមាសវិប្បយុត្តអបរាមដ្ឋា, សិយា ន វត្តព្ពា – ‘‘បរាមាសវិប្បយុត្តបរាមដ្ឋា’’តិបិ, ‘‘បរាមាសវិប្បយុត្តអបរាមដ្ឋា’’តិបិ.

រូបក្ខន្ធោ អនារម្មណោ. ចត្តារោ ខន្ធា សារម្មណា. វិញ្ញាណក្ខន្ធោ ចិត្តំ. ចត្តារោ ខន្ធា នោ ចិត្តា. តយោ ខន្ធា ចេតសិកា. ទ្វេ ខន្ធា អចេតសិកា. តយោ ខន្ធា ចិត្តសម្បយុត្តា. រូបក្ខន្ធោ ចិត្តវិប្បយុត្តោ. វិញ្ញាណក្ខន្ធោ ន វត្តព្ពោ – ‘‘ចិត្តេន សម្បយុត្តោ’’តិបិ, ‘‘ចិត្តេន វិប្បយុត្តោ’’តិបិ. តយោ ខន្ធា ចិត្តសំសដ្ឋា. រូបក្ខន្ធោ ចិត្តវិសំសដ្ឋោ. វិញ្ញាណក្ខន្ធោ ន វត្តព្ពោ – ‘‘ចិត្តេន សំសដ្ឋោ’’តិបិ, ‘‘ចិត្តេន វិសំសដ្ឋោ’’តិបិ. តយោ ខន្ធា ចិត្តសមុដ្ឋានា. វិញ្ញាណក្ខន្ធោ នោ ចិត្តសមុដ្ឋានោ. រូបក្ខន្ធោ សិយា ចិត្តសមុដ្ឋានោ, សិយា នោ ចិត្តសមុដ្ឋានោ. តយោ ខន្ធា ចិត្តសហភុនោ. វិញ្ញាណក្ខន្ធោ នោ ចិត្តសហភូ. រូបក្ខន្ធោ សិយា ចិត្តសហភូ, សិយា នោ ចិត្តសហភូ. តយោ ខន្ធា ចិត្តានុបរិវត្តិនោ. វិញ្ញាណក្ខន្ធោ នោ ចិត្តានុបរិវត្តិ. រូបក្ខន្ធោ សិយា ចិត្តានុបរិវត្តិ, សិយា នោ ចិត្តានុបរិវត្តិ. តយោ ខន្ធា ចិត្តសំសដ្ឋសមុដ្ឋានា. ទ្វេ ខន្ធា នោ ចិត្តសំសដ្ឋសមុដ្ឋានា. តយោ ខន្ធា ចិត្តសំសដ្ឋសមុដ្ឋានសហភុនោ. ទ្វេ ខន្ធា នោ ចិត្តសំសដ្ឋសមុដ្ឋានសហភុនោ. តយោ ខន្ធា ចិត្តសំសដ្ឋសមុដ្ឋានានុបរិវត្តិនោ. ទ្វេ ខន្ធា នោ ចិត្តសំសដ្ឋសមុដ្ឋានានុបរិវត្តិនោ.

វិញ្ញាណក្ខន្ធោ អជ្ឈត្តិកោ. តយោ ខន្ធា ពាហិរា. រូបក្ខន្ធោ សិយា អជ្ឈត្តិកោ, សិយា ពាហិរោ. ចត្តារោ ខន្ធា នោ ឧបាទា. រូបក្ខន្ធោ សិយា ឧបាទា, សិយា នោ ឧបាទា, សិយា ឧបាទិន្នា, សិយា អនុបាទិន្នា. ចត្តារោ ខន្ធា នោ ឧបាទានា. សង្ខារក្ខន្ធោ សិយា ឧបាទានំ, សិយា នោ ឧបាទានំ. រូបក្ខន្ធោ ឧបាទានិយោ. ចត្តារោ ខន្ធា សិយា ឧបាទានិយា, សិយា អនុបាទានិយា. រូបក្ខន្ធោ ឧបាទានវិប្បយុត្តោ. ចត្តារោ ខន្ធា សិយា ឧបាទានសម្បយុត្តា, សិយា ឧបាទានវិប្បយុត្តា. រូបក្ខន្ធោ ន វត្តព្ពោ – ‘‘ឧបាទានញ្ចេវ ឧបាទានិយោ ចា’’តិ, ‘‘ឧបាទានិយោ ចេវ នោ ច ឧបាទានំ’’. តយោ ខន្ធា ន វត្តព្ពា – ‘‘ឧបាទានញ្ចេវ ឧបាទានិយា ចា’’តិ, សិយា ឧបាទានិយា ចេវ នោ ច ឧបាទានា, សិយា ន វត្តព្ពា – ‘‘ឧបាទានិយា ចេវ នោ ច ឧបាទានា’’តិ. សង្ខារក្ខន្ធោ សិយា ឧបាទានញ្ចេវ ឧបាទានិយោ ច, សិយា ឧបាទានិយោ ចេវ នោ ច ឧបាទានំ, សិយា ន វត្តព្ពោ – ‘‘ឧបាទានញ្ចេវ ឧបាទានិយោ ចា’’តិបិ, ‘‘ឧបាទានិយោ ចេវ នោ ច ឧបាទាន’’ន្តិបិ. រូបក្ខន្ធោ ន វត្តព្ពោ – ‘‘ឧបាទានញ្ចេវ ឧបាទានសម្បយុត្តោ ចា’’តិបិ, ‘‘ឧបាទានសម្បយុត្តោ ចេវ នោ ច ឧបាទាន’’ន្តិបិ. តយោ ខន្ធា ន វត្តព្ពា – ‘‘ឧបាទានា ចេវ ឧបាទានសម្បយុត្តា ចា’’តិ, សិយា ឧបាទានសម្បយុត្តា ចេវ នោ ច ឧបាទានា, សិយា ន វត្តព្ពា – ‘‘ឧបាទានសម្បយុត្តា ចេវ នោ ច ឧបាទានា’’តិ. សង្ខារក្ខន្ធោ សិយា ឧបាទានញ្ចេវ ឧបាទានសម្បយុត្តោ ច, សិយា ឧបាទានសម្បយុត្តោ ចេវ នោ ច ឧបាទានំ, សិយា ន វត្តព្ពោ – ‘‘ឧបាទានញ្ចេវ ឧបាទានសម្បយុត្តោ ចា’’តិបិ, ‘‘ឧបាទានសម្បយុត្តោ ចេវ នោ ច ឧបាទាន’’ន្តិបិ. រូបក្ខន្ធោ ឧបាទានវិប្បយុត្តឧបាទានិយោ. ចត្តារោ ខន្ធា សិយា ឧបាទានវិប្បយុត្តឧបាទានិយា, សិយា ឧបាទានវិប្បយុត្តអនុបាទានិយា, សិយា ន វត្តព្ពា – ‘‘ឧបាទានវិប្បយុត្តឧបាទានិយា’’តិបិ, ‘‘ឧបាទានវិប្បយុត្តអនុបាទានិយា’’តិបិ.

ចត្តារោ ខន្ធា នោ កិលេសា. សង្ខារក្ខន្ធោ សិយា កិលេសោ, សិយា នោ កិលេសោ. រូបក្ខន្ធោ សំកិលេសិកោ. ចត្តារោ ខន្ធា សិយា សំកិលេសិកា, សិយា អសំកិលេសិកា. រូបក្ខន្ធោ អសំកិលិដ្ឋោ. ចត្តារោ ខន្ធា សិយា សំកិលិដ្ឋា, សិយា អសំកិលិដ្ឋា. រូបក្ខន្ធោ កិលេសវិប្បយុត្តោ. ចត្តារោ ខន្ធា សិយា កិលេសសម្បយុត្តា, សិយា កិលេសវិប្បយុត្តា. រូបក្ខន្ធោ ន វត្តព្ពោ – ‘‘កិលេសោ ចេវ សំកិលេសិកោ ចា’’តិ, ‘‘សំកិលេសិកោ ចេវ នោ ច កិលេសោ’’. តយោ ខន្ធា ន វត្តព្ពា – ‘‘កិលេសា ចេវ សំកិលេសិកា ចា’’តិ, សិយា សំកិលេសិកា ចេវ នោ ច កិលេសា, សិយា ន វត្តព្ពា – ‘‘សំកិលេសិកា ចេវ នោ ច កិលេសា’’តិ. សង្ខារក្ខន្ធោ សិយា កិលេសោ ចេវ សំកិលេសិកោ ច, សិយា សំកិលេសិកោ ចេវ នោ ច កិលេសោ, សិយា ន វត្តព្ពោ – ‘‘កិលេសោ ចេវ សំកិលេសិកោ ចា’’តិបិ, ‘‘សំកិលេសិកោ ចេវ នោ ច កិលេសោ’’តិបិ. រូបក្ខន្ធោ ន វត្តព្ពោ – ‘‘កិលេសោ ចេវ សំកិលិដ្ឋោ ចា’’តិបិ, ‘‘សំកិលិដ្ឋោ ចេវ នោ ច កិលេសោ’’តិបិ. តយោ ខន្ធា ន វត្តព្ពា – ‘‘កិលេសោ ចេវ សំកិលិដ្ឋា ចា’’តិ, សិយា សំកិលិដ្ឋា ចេវ នោ ច កិលេសា, សិយា ន វត្តព្ពា – ‘‘សំកិលិដ្ឋា ចេវ នោ ច កិលេសា’’តិ. សង្ខារក្ខន្ធោ សិយា កិលេសោ ចេវ សំកិលិដ្ឋោ ច, សិយា សំកិលិដ្ឋោ ចេវ នោ ច កិលេសោ, សិយា ន វត្តព្ពោ – ‘‘កិលេសោ ចេវ សំកិលិដ្ឋោ ចា’’តិបិ, ‘‘សំកិលិដ្ឋោ ចេវ នោ ច កិលេសោ’’តិបិ.

រូបក្ខន្ធោ ន វត្តព្ពោ – ‘‘កិលេសោ ចេវ កិលេសសម្បយុត្តោ ចា’’តិបិ, ‘‘កិលេសសម្បយុត្តោ ចេវ នោ ច កិលេសោ’’តិបិ. តយោ ខន្ធា ន វត្តព្ពា – ‘‘កិលេសា ចេវ កិលេសសម្បយុត្តា ចា’’តិ, សិយា កិលេសសម្បយុត្តា ចេវ នោ ច កិលេសា, សិយា ន វត្តព្ពា – កិលេសសម្បយុត្តា ចេវ នោ ច កិលេសា’’តិ. សង្ខារក្ខន្ធោ សិយា កិលេសោ ចេវ កិលេសសម្បយុត្តោ ច, សិយា កិលេសសម្បយុត្តោ ចេវ នោ ច កិលេសោ, សិយា ន វត្តព្ពោ – ‘‘កិលេសោ ចេវ កិលេសសម្បយុត្តោ ចា’’តិបិ, ‘‘កិលេសសម្បយុត្តោ ចេវ នោ ច កិលេសោ’’តិបិ. រូបក្ខន្ធោ កិលេសវិប្បយុត្តសំកិលេសិកោ. ចត្តារោ ខន្ធា សិយា កិលេសវិប្បយុត្តសំកិលេសិកា, សិយា កិលេសវិប្បយុត្តអសំកិលេសិកា, សិយា ន វត្តព្ពា – ‘‘កិលេសវិប្បយុត្តសំកិលេសិកា’’តិបិ, ‘‘កិលេសវិប្បយុត្តអសំកិលេសិកា’’តិបិ.

រូបក្ខន្ធោ ន ទស្សនេន បហាតព្ពោ. ចត្តារោ ខន្ធា សិយា ទស្សនេន បហាតព្ពា, សិយា ន ទស្សនេន បហាតព្ពា. រូបក្ខន្ធោ ន ភាវនាយ បហាតព្ពោ. ចត្តារោ ខន្ធា សិយា ភាវនាយ បហាតព្ពា, សិយា ន ភាវនាយ បហាតព្ពា. រូបក្ខន្ធោ ន ទស្សនេន បហាតព្ពហេតុកោ. ចត្តារោ ខន្ធា សិយា ទស្សនេន បហាតព្ពហេតុកា, សិយា ន ទស្សនេន បហាតព្ពហេតុកា. រូបក្ខន្ធោ ន ភាវនាយ បហាតព្ពហេតុកោ. ចត្តារោ ខន្ធា សិយា ភាវនាយ បហាតព្ពហេតុកា, សិយា ន ភាវនាយ បហាតព្ពហេតុកា. រូបក្ខន្ធោ អវិតក្កោ. ចត្តារោ ខន្ធា សិយា សវិតក្កា, សិយា អវិតក្កា. រូបក្ខន្ធោ អវិចារោ. ចត្តារោ ខន្ធា សិយា សវិចារា, សិយា អវិចារា. រូបក្ខន្ធោ អប្បីតិកោ, ចត្តារោ ខន្ធា សិយា សប្បីតិកា, សិយា អប្បីតិកា. រូបក្ខន្ធោ ន បីតិសហគតោ. ចត្តារោ ខន្ធា សិយា បីតិសហគតា, សិយា ន បីតិសហគតា. ទ្វេ ខន្ធា ន សុខសហគតា. តយោ ខន្ធា សិយា សុខសហគតា, សិយា ន សុខសហគតា. ទ្វេ ខន្ធា ន ឧបេក្ខាសហគតា. តយោ ខន្ធា សិយា ឧបេក្ខាសហគតា, សិយា ន ឧបេក្ខាសហគតា.

រូបក្ខន្ធោ កាមាវចរោ. ចត្តារោ ខន្ធា សិយា កាមាវចរា, សិយា ន កាមាវចរា. រូបក្ខន្ធោ ន រូបាវចរោ. ចត្តារោ ខន្ធា សិយា រូបាវចរា, សិយា ន រូបាវចរា. រូបក្ខន្ធោ ន អរូបាវចរោ. ចត្តារោ ខន្ធា សិយា អរូបាវចរា, សិយា ន អរូបាវចរា. រូបក្ខន្ធោ បរិយាបន្នោ. ចត្តារោ ខន្ធា សិយា បរិយាបន្នា, សិយា អបរិយាបន្នា. រូបក្ខន្ធោ អនិយ្យានិកោ. ចត្តារោ ខន្ធា សិយា និយ្យានិកា, សិយា អនិយ្យានិកា. រូបក្ខន្ធោ អនិយតោ. ចត្តារោ ខន្ធា សិយា និយតា, សិយា អនិយតា. រូបក្ខន្ធោ សឧត្តរោ. ចត្តារោ ខន្ធា សិយា សឧត្តរា, សិយា អនុត្តរា. រូបក្ខន្ធោ អរណោ. ចត្តារោ ខន្ធា សិយា សរណា, សិយា អរណាតិ.

បញ្ហាបុច្ឆកំ.

ខន្ធវិភង្គោ និដ្ឋិតោ.