១. តិកំ

១៥២. រូបក្ខន្ធោ អព្យាកតោ. ចត្តារោ ខន្ធា សិយា កុសលា, សិយា អកុសលា, សិយា អព្យាកតា. ទ្វេ ខន្ធា ន វត្តព្ពា – ‘‘សុខាយ វេទនាយ សម្បយុត្តា’’តិបិ, ‘‘ទុក្ខាយ វេទនាយ សម្បយុត្តា’’តិបិ, ‘‘អទុក្ខមសុខាយ វេទនាយ សម្បយុត្តា’’តិបិ. តយោ ខន្ធា សិយា សុខាយ វេទនាយ សម្បយុត្តា, សិយា ទុក្ខាយ វេទនាយ សម្បយុត្តា, សិយា អទុក្ខមសុខាយ វេទនាយ សម្បយុត្តា. រូបក្ខន្ធោ នេវវិបាកនវិបាកធម្មធម្មោ. ចត្តារោ ខន្ធា សិយា វិបាកា, សិយា វិបាកធម្មធម្មា, សិយា នេវវិបាកនវិបាកធម្មធម្មា. រូបក្ខន្ធោ សិយា ឧបាទិន្នុបាទានិយោ, សិយា អនុបាទិន្នុបាទានិយោ. ចត្តារោ ខន្ធា សិយា ឧបាទិន្នុបាទានិយា, សិយា អនុបាទិន្នុបាទានិយា, សិយា អនុបាទិន្នអនុបាទានិយា.

រូបក្ខន្ធោ អសំកិលិដ្ឋសំកិលេសិកោ. ចត្តារោ ខន្ធា សិយា សំកិលិដ្ឋសំកិលេសិកា, សិយា អសំកិលិដ្ឋសំកិលេសិកា, សិយា អសំកិលិដ្ឋអសំកិលេសិកា. រូបក្ខន្ធោ អវិតក្កអវិចារោ. តយោ ខន្ធា សិយា សវិតក្កសវិចារា, សិយា អវិតក្កវិចារមត្តា, សិយា អវិតក្កអវិចារា. សង្ខារក្ខន្ធោ សិយា សវិតក្កសវិចារោ, សិយា អវិតក្កវិចារមត្តោ, សិយា អវិតក្កអវិចារោ, សិយា ន វត្តព្ពោ – ‘‘សវិតក្កសវិចារោ’’តិបិ, ‘‘អវិតក្កវិចារមត្តោ’’តិបិ, ‘‘អវិតក្កអវិចារោ’’តិបិ. រូបក្ខន្ធោ ន វត្តព្ពោ – ‘‘បីតិសហគតោ’’តិបិ, ‘‘សុខសហគតោ’’តិបិ, ‘‘ឧបេក្ខាសហគតោ’’តិបិ. វេទនាក្ខន្ធោ សិយា បីតិសហគតោ ន សុខសហគតោ ន ឧបេក្ខាសហគតោ, សិយា ន វត្តព្ពោ – ‘‘បីតិសហគតោ’’តិ. តយោ ខន្ធា សិយា បីតិសហគតា, សិយា សុខសហគតា, សិយា ឧបេក្ខាសហគតា, សិយា ន វត្តព្ពា – ‘‘បីតិសហគតា’’តិបិ, ‘‘សុខសហគតា’’តិបិ, ‘‘ឧបេក្ខាសហគតា’’តិបិ.

រូបក្ខន្ធោ នេវ ទស្សនេន ន ភាវនាយ បហាតព្ពោ. ចត្តារោ ខន្ធា សិយា ទស្សនេន បហាតព្ពា, សិយា ភាវនាយ បហាតព្ពា, សិយា នេវ ទស្សនេន ន ភាវនាយ បហាតព្ពា. រូបក្ខន្ធោ នេវ ទស្សនេន ន ភាវនាយ បហាតព្ពហេតុកោ. ចត្តារោ ខន្ធា សិយា ទស្សនេន បហាតព្ពហេតុកា, សិយា ភាវនាយ បហាតព្ពហេតុកា, សិយា នេវ ទស្សនេន ន ភាវនាយ បហាតព្ពហេតុកា. រូបក្ខន្ធោ នេវាចយគាមិនាបចយគាមី. ចត្តារោ ខន្ធា សិយា អាចយគាមិនោ, សិយា អបចយគាមិនោ, សិយា នេវាចយគាមិនាបចយគាមិនោ. រូបក្ខន្ធោ នេវសេក្ខនាសេក្ខោ. ចត្តារោ ខន្ធា សិយា សេក្ខា, សិយា អសេក្ខា, សិយា នេវសេក្ខនាសេក្ខា. រូបក្ខន្ធោ បរិត្តោ. ចត្តារោ ខន្ធា សិយា បរិត្តា, សិយា មហគ្គតា, សិយា អប្បមាណា. រូបក្ខន្ធោ អនារម្មណោ. ចត្តារោ ខន្ធា សិយា បរិត្តារម្មណា, សិយា មហគ្គតារម្មណា, សិយា អប្បមាណារម្មណា, សិយា ន វត្តព្ពា – ‘‘បរិត្តារម្មណា’’តិបិ, ‘‘មហគ្គតារម្មណា’’តិបិ, ‘‘អប្បមាណារម្មណា’’តិបិ. រូបក្ខន្ធោ មជ្ឈិមោ. ចត្តារោ ខន្ធា សិយា ហីនា, សិយា មជ្ឈិមា, សិយា បណីតា. រូបក្ខន្ធោ អនិយតោ. ចត្តារោ ខន្ធា សិយា មិច្ឆត្តនិយតា, សិយា សម្មត្តនិយតា, សិយា អនិយតា.

រូបក្ខន្ធោ អនារម្មណោ. ចត្តារោ ខន្ធា សិយា មគ្គារម្មណា, សិយា មគ្គហេតុកា, សិយា មគ្គាធិបតិនោ, សិយា ន វត្តព្ពា – ‘‘មគ្គារម្មណា’’តិបិ, ‘‘មគ្គហេតុកា’’តិបិ, ‘‘មគ្គាធិបតិនោ’’តិបិ; សិយា ឧប្បន្នា, សិយា អនុប្បន្នា, សិយា ឧប្បាទិនោ; សិយា អតីតា, សិយា អនាគតា, សិយា បច្ចុប្បន្នា. រូបក្ខន្ធោ អនារម្មណោ. ចត្តារោ ខន្ធា សិយា អតីតារម្មណា, សិយា អនាគតារម្មណា, សិយា បច្ចុប្បន្នារម្មណា, សិយា ន វត្តព្ពា – ‘‘អតីតារម្មណា’’តិបិ, ‘‘អនាគតារម្មណា’’តិបិ, ‘‘បច្ចុប្បន្នារម្មណា’’តិបិ; សិយា អជ្ឈត្តា, សិយា ពហិទ្ធា, សិយា អជ្ឈត្តពហិទ្ធា. រូបក្ខន្ធោ អនារម្មណោ. ចត្តារោ ខន្ធា សិយា អជ្ឈត្តារម្មណា, សិយា ពហិទ្ធារម្មណា, សិយា អជ្ឈត្តពហិទ្ធារម្មណា, សិយា ន វត្តព្ពា – ‘‘អជ្ឈត្តារម្មណា’’តិបិ, ‘‘ពហិទ្ធារម្មណា’’តិបិ, ‘‘អជ្ឈត្តពហិទ្ធារម្មណា’’តិបិ. ចត្តារោ ខន្ធា អនិទស្សនអប្បដិឃា. រូបក្ខន្ធោ សិយា សនិទស្សនសប្បដិឃោ, សិយា អនិទស្សនសប្បដិឃោ, សិយា អនិទស្សនអប្បដិឃោ.