បច្ចយចតុក្កំ

ហេតុ-អារម្មណបច្ចយា

៨. កុសលោ ធម្មោ នកុសលស្ស ធម្មស្ស ហេតុបច្ចយេន បច្ចយោ. កុសលោ ធម្មោ នអកុសលស្ស ធម្មស្ស ហេតុបច្ចយេន បច្ចយោ. កុសលោ ធម្មោ នអព្យាកតស្ស ធម្មស្ស ហេតុបច្ចយេន បច្ចយោ. កុសលោ ធម្មោ នអកុសលស្ស ច នអព្យាកតស្ស ច ធម្មស្ស ហេតុបច្ចយេន បច្ចយោ. កុសលោ ធម្មោ នកុសលស្ស ច នអកុសលស្ស ច ធម្មស្ស ហេតុបច្ចយេន បច្ចយោ. (៥)

៩. អកុសលោ ធម្មោ នអកុសលស្ស ធម្មស្ស ហេតុបច្ចយេន បច្ចយោ. អកុសលោ ធម្មោ នកុសលស្ស ធម្មស្ស ហេតុបច្ចយេន បច្ចយោ. អកុសលោ ធម្មោ នអព្យាកតស្ស ធម្មស្ស ហេតុបច្ចយេន បច្ចយោ. អកុសលោ ធម្មោ នកុសលស្ស ច នអព្យាកតស្ស ច ធម្មស្ស ហេតុបច្ចយេន បច្ចយោ. អកុសលោ ធម្មោ នកុសលស្ស ច នអកុសលស្ស ច ធម្មស្ស ហេតុបច្ចយេន បច្ចយោ. (៥)

អព្យាកតោ ធម្មោ នកុសលស្ស ធម្មស្ស ហេតុបច្ចយេន បច្ចយោ. អព្យាកតោ ធម្មោ នអកុសលស្ស ធម្មស្ស ហេតុបច្ចយេន បច្ចយោ. អព្យាកតោ ធម្មោ នកុសលស្ស ច នអកុសលស្ស ច ធម្មស្ស ហេតុបច្ចយេន បច្ចយោ. (៣)

១០. កុសលោ ធម្មោ នកុសលស្ស ធម្មស្ស អារម្មណបច្ចយេន បច្ចយោ…. (ឆ បញ្ហា.)

អកុសលោ ធម្មោ នអកុសលស្ស ធម្មស្ស អារម្មណបច្ចយេន បច្ចយោ …. (ឆ បញ្ហា.)

អព្យាកតោ ធម្មោ នអព្យាកតស្ស ធម្មស្ស អារម្មណបច្ចយេន បច្ចយោ…. (ឆ បញ្ហា, សំខិត្តំ.)

១១. ហេតុយា តេរស, អារម្មណេ អដ្ឋារស, អធិបតិយា សត្តរស, អនន្តរេ សោឡស, សមនន្តរេ សោឡស, សហជាតេ ឯកូនវីស, អញ្ញមញ្ញេ នវ, និស្សយេ ឆព្ពីស, ឧបនិស្សយេ អដ្ឋារស, បុរេជាតេ ឆ, បច្ឆាជាតេ នវ, អាសេវនេ នវ, កម្មេ តេរស, វិបាកេ តីណិ, អាហារេ តេរស…បេ… មគ្គេ តេរស, សម្បយុត្តេ នវ, វិប្បយុត្តេ ទ្វាទស…បេ… អវិគតេ ឆព្ពីស. (បញ្ហាវារំ វិត្ថារេតព្ពំ.)