២-១. វេទនាត្តិក-ហេតុទុកំ

៦៥. សុខាយ វេទនាយ សម្បយុត្តំ ហេតុំ ធម្មំ បដិច្ច នសុខាយ វេទនាយ សម្បយុត្តោ នហេតុ ធម្មោ ឧប្បជ្ជតិ ហេតុបច្ចយា. សុខាយ វេទនាយ សម្បយុត្តំ ហេតុំ ធម្មំ បដិច្ច នទុក្ខាយ វេទនាយ សម្បយុត្តោ នហេតុ ធម្មោ ឧប្បជ្ជតិ ហេតុបច្ចយា. សុខាយ វេទនាយ សម្បយុត្តំ ហេតុំ ធម្មំ បដិច្ច នអទុក្ខមសុខាយ វេទនាយ សម្បយុត្តោ នហេតុ ធម្មោ ឧប្បជ្ជតិ ហេតុបច្ចយា…បេ… សត្ត បញ្ហា.

ទុក្ខាយ វេទនាយ សម្បយុត្តំ ហេតុំ ធម្មំ បដិច្ច នទុក្ខាយ វេទនាយ សម្បយុត្តោ នហេតុ ធម្មោ ឧប្បជ្ជតិ ហេតុបច្ចយា… សត្ត បញ្ហា.

អទុក្ខមសុខាយ វេទនាយ សម្បយុត្តំ ហេតុំ ធម្មំ បដិច្ច នអទុក្ខមសុខាយ វេទនាយ សម្បយុត្តោ នហេតុ ធម្មោ ឧប្បជ្ជតិ ហេតុបច្ចយា… សត្ត បញ្ហា. ហេតុយា ឯកវីស…បេ… អវិគតេ ឯកវីស. (សព្ពត្ថ ឯកវីស.)

៦៦. សុខាយ វេទនាយ សម្បយុត្តំ នហេតុំ ធម្មំ បដិច្ច នទុក្ខាយ វេទនាយ សម្បយុត្តោ ននហេតុ ធម្មោ ឧប្បជ្ជតិ ហេតុបច្ចយា. សុខាយ វេទនាយ សម្បយុត្តំ នហេតុំ ធម្មំ បដិច្ច នអទុក្ខមសុខាយ វេទនាយ សម្បយុត្តោ ននហេតុ ធម្មោ ឧប្បជ្ជតិ ហេតុបច្ចយា. សុខាយ វេទនាយ សម្បយុត្តំ នហេតុំ ធម្មំ បដិច្ច នទុក្ខាយ វេទនាយ សម្បយុត្តោ ននហេតុ ច នអទុក្ខមសុខាយ វេទនាយ សម្បយុត្តោ ននហេតុ ច ធម្មា ឧប្បជ្ជន្តិ ហេតុបច្ចយា. តីណិ.

ទុក្ខាយ វេទនាយ សម្បយុត្តំ នហេតុំ ធម្មំ បដិច្ច នសុខាយ វេទនាយ សម្បយុត្តោ ននហេតុ ធម្មោ ឧប្បជ្ជតិ ហេតុបច្ចយា… តីណិ.

អទុក្ខមសុខាយ វេទនាយ សម្បយុត្តំ នហេតុំ ធម្មំ បដិច្ច នសុខាយ វេទនាយ សម្បយុត្តោ ននហេតុ ធម្មោ ឧប្បជ្ជតិ ហេតុបច្ចយា… តីណិ… ហេតុយា នវ.