១-៥៥. កុសលត្តិក-សារម្មណទុកំ

៣១. កុសលំ សារម្មណំ ធម្មំ បដិច្ច នកុសលោ នសារម្មណោ ធម្មោ ឧប្បជ្ជតិ ហេតុបច្ចយា. កុសលំ សារម្មណំ ធម្មំ បដិច្ច នអកុសលោ នសារម្មណោ ធម្មោ ឧប្បជ្ជតិ ហេតុបច្ចយា. កុសលំ សារម្មណំ ធម្មំ បដិច្ច នកុសលោ នសារម្មណោ ច នអកុសលោ នសារម្មណោ ច ធម្មា ឧប្បជ្ជន្តិ ហេតុបច្ចយា. តីណិ.

អកុសលំ សារម្មណំ ធម្មំ បដិច្ច នអកុសលោ នសារម្មណោ ធម្មោ ឧប្បជ្ជតិ ហេតុបច្ចយា. អកុសលំ សារម្មណំ ធម្មំ បដិច្ច នកុសលោ នសារម្មណោ ធម្មោ ឧប្បជ្ជតិ ហេតុបច្ចយា. អកុសលំ សារម្មណំ ធម្មំ បដិច្ច នកុសលោ នសារម្មណោ ច នអកុសលោ នសារម្មណោ ច ធម្មា ឧប្បជ្ជន្តិ ហេតុបច្ចយា. តីណិ.

អព្យាកតំ សារម្មណំ ធម្មំ បដិច្ច នកុសលោ នសារម្មណោ ធម្មោ ឧប្បជ្ជតិ ហេតុបច្ចយា. តីណិ.

ហេតុយា នវ.

៣២. អព្យាកតំ អនារម្មណំ ធម្មំ បដិច្ច នកុសលោ នអនារម្មណោ ធម្មោ ឧប្បជ្ជតិ ហេតុបច្ចយា. អព្យាកតំ អនារម្មណំ ធម្មំ បដិច្ច នអកុសលោ នអនារម្មណោ ធម្មោ ឧប្បជ្ជតិ ហេតុបច្ចយា. អព្យាកតំ អនារម្មណំ ធម្មំ បដិច្ច នកុសលោ នអនារម្មណោ ច នអកុសលោ នអនារម្មណោ ច ធម្មា ឧប្បជ្ជន្តិ ហេតុបច្ចយា. (សំខិត្តំ.) ហេតុយា តីណិ.