៧. បញ្ហាវារោ

បច្ចយចតុក្កំ

ហេតុបច្ចយោ

៥៤. ហេតុ អព្យាកតោ ធម្មោ ហេតុស្ស អព្យាកតស្ស ធម្មស្ស ហេតុបច្ចយេន បច្ចយោ. ហេតុ អព្យាកតោ ធម្មោ នហេតុស្ស អព្យាកតស្ស ធម្មស្ស ហេតុបច្ចយេន បច្ចយោ. ហេតុ អព្យាកតោ ធម្មោ ហេតុស្ស អព្យាកតស្ស ច នហេតុស្ស អព្យាកតស្ស ច ធម្មស្ស ហេតុបច្ចយេន បច្ចយោ. (៣)

អារម្មណបច្ចយាទិ

៥៥. ហេតុ អព្យាកតោ ធម្មោ ហេតុស្ស អព្យាកតស្ស ធម្មស្ស អារម្មណបច្ចយេន បច្ចយោ… នវ.

៥៦. ហេតុ អព្យាកតោ ធម្មោ ហេតុស្ស អព្យាកតស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ… តីណិ.

នហេតុ អព្យាកតោ ធម្មោ នហេតុស្ស អព្យាកតស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ… តីណិ.

ហេតុ អព្យាកតោ ច នហេតុ អព្យាកតោ ច ធម្មា ហេតុស្ស អព្យាកតស្ស ធម្មស្ស អធិបតិបច្ចយេន បច្ចយោ – អារម្មណាធិបតិ… តីណិ…បេ….

បុរេជាតបច្ចយាទិ

៥៧. នហេតុ អព្យាកតោ ធម្មោ នហេតុស្ស អព្យាកតស្ស ធម្មស្ស បុរេជាតបច្ចយេន បច្ចយោ… តីណិ.

៥៨. ហេតុ អព្យាកតោ ធម្មោ នហេតុស្ស អព្យាកតស្ស ធម្មស្ស បច្ឆាជាតបច្ចយេន បច្ចយោ. (១)

នហេតុ អព្យាកតោ ធម្មោ នហេតុស្ស អព្យាកតស្ស ធម្មស្ស បច្ឆាជាតបច្ចយេន បច្ចយោ. (១)

ហេតុ អព្យាកតោ ច នហេតុ អព្យាកតោ ច ធម្មា នហេតុស្ស អព្យាកតស្ស ធម្មស្ស បច្ឆាជាតបច្ចយេន បច្ចយោ. (១)

៥៩. នហេតុ អព្យាកតោ ធម្មោ នហេតុស្ស អព្យាកតស្ស ធម្មស្ស កម្មបច្ចយេន បច្ចយោ… តីណិ.

៦០. ហេតុ អព្យាកតោ ធម្មោ ហេតុស្ស អព្យាកតស្ស ធម្មស្ស វិបាកបច្ចយេន បច្ចយោ… នវ.

៦១. នហេតុ អព្យាកតោ ធម្មោ នហេតុស្ស អព្យាកតស្ស ធម្មស្ស អាហារបច្ចយេន បច្ចយោ… ឥន្ទ្រិយបច្ចយេន បច្ចយោ… ឈានបច្ចយេន បច្ចយោ… មគ្គបច្ចយេន បច្ចយោ… សម្បយុត្តបច្ចយេន បច្ចយោ.

វិប្បយុត្តបច្ចយោ

៦២. ហេតុ អព្យាកតោ ធម្មោ នហេតុស្ស អព្យាកតស្ស ធម្មស្ស វិប្បយុត្តបច្ចយេន បច្ចយោ. (១)

នហេតុ អព្យាកតោ ធម្មោ នហេតុស្ស អព្យាកតស្ស ធម្មស្ស វិប្បយុត្តបច្ចយេន បច្ចយោ… តីណិ.

ហេតុ អព្យាកតោ ច នហេតុ អព្យាកតោ ច ធម្មា នហេតុស្ស អព្យាកតស្ស ធម្មស្ស វិប្បយុត្តបច្ចយេន បច្ចយោ. (១) (សំខិត្តំ.)

៦៣. ហេតុយា តីណិ, អារម្មណេ នវ, អធិបតិយា នវ, អនន្តរេ នវ, សមនន្តរេ នវ, សហជាតេ នវ, អញ្ញមញ្ញេ នវ, និស្សយេ នវ, ឧបនិស្សយេ នវ, បុរេជាតេ តីណិ, បច្ឆាជាតេ តីណិ, អាសេវនេ នវ, កម្មេ តីណិ, វិបាកេ នវ, អាហារេ តីណិ, ឥន្ទ្រិយេ នវ, ឈានេ តីណិ, មគ្គេ នវ, សម្បយុត្តេ នវ, វិប្បយុត្តេ បញ្ច, អត្ថិយា នវ, នត្ថិយា នវ, វិគតេ នវ, អវិគតេ នវ.

បច្ចនីយុទ្ធារោ

៦៤. ហេតុ អព្យាកតោ ធម្មោ ហេតុស្ស អព្យាកតស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ. ហេតុ អព្យាកតោ ធម្មោ នហេតុស្ស អព្យាកតស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ… បច្ឆាជាតបច្ចយេន បច្ចយោ. ហេតុ អព្យាកតោ ធម្មោ ហេតុស្ស អព្យាកតស្ស ច នហេតុស្ស អព្យាកតស្ស ច ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ. (៣)

៦៥. នហេតុ អព្យាកតោ ធម្មោ នហេតុស្ស អព្យាកតស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ… បុរេជាតបច្ចយេន បច្ចយោ… បច្ឆាជាតបច្ចយេន បច្ចយោ… អាហារបច្ចយេន បច្ចយោ… ឥន្ទ្រិយបច្ចយេន បច្ចយោ.

៦៦. នហេតុយា នវ, នអារម្មណេ នវ, នអធិបតិយា នវ (សំខិត្តំ, បច្ចនីយំ).

ហេតុបច្ចយា នអារម្មណេ តីណិ (សំខិត្តំ, អនុលោមបច្ចនីយំ).

នហេតុបច្ចយា អារម្មណេ នវ (សំខិត្តំ, បច្ចនីយានុលោមំ).

(យថា កុសលត្តិកេ បញ្ហាវារស្ស អនុលោមម្បិ បច្ចនីយម្បិ អនុលោមបច្ចនីយម្បិ បច្ចនីយានុលោមម្បិ គណិតំ, ឯវំ គណេតព្ពំ.)

ហេតុទុកកុសលត្តិកំ និដ្ឋិតំ.