៧. បញ្ហាវារោ

បច្ចយចតុក្កំ

ហេតុបច្ចយាទិ

៥៣៧. ហេតុ ពហិទ្ធារម្មណោ ធម្មោ ហេតុស្ស ពហិទ្ធារម្មណស្ស ធម្មស្ស ហេតុបច្ចយេន បច្ចយោ… តីណិ.

ហេតុ ពហិទ្ធារម្មណោ ធម្មោ ហេតុស្ស ពហិទ្ធារម្មណស្ស ធម្មស្ស អារម្មណបច្ចយេន បច្ចយោ… នវ.

ហេតុ ពហិទ្ធារម្មណោ ធម្មោ ហេតុស្ស ពហិទ្ធារម្មណស្ស ធម្មស្ស អធិបតិបច្ចយេន បច្ចយោ – សហជាតាធិបតិ… តីណិ.

នហេតុ ពហិទ្ធារម្មណោ ធម្មោ នហេតុស្ស ពហិទ្ធារម្មណស្ស ធម្មស្ស អធិបតិបច្ចយេន បច្ចយោ – សហជាតាធិបតិ… តីណិ (សំខិត្តំ).

៥៣៨. ហេតុយា តីណិ, អារម្មណេ នវ, អធិបតិយា ឆ, កម្មេ តីណិ, វិបាកេ នវ, អាហារេ តីណិ…បេ… អវិគតេ នវ (សំខិត្តំ).

បច្ចនីយុទ្ធារោ

៥៣៩. ហេតុ ពហិទ្ធារម្មណោ ធម្មោ ហេតុស្ស ពហិទ្ធារម្មណស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ (សំខិត្តំ).

៥៤០. នហេតុយា នវ, នអារម្មណេ នវ (សំខិត្តំ).

ហេតុបច្ចយា នអារម្មណេ តីណិ (សំខិត្តំ).

នហេតុបច្ចយា អារម្មណេ នវ (សំខិត្តំ).

(យថា កុសលត្តិកេ បញ្ហាវារស្ស អនុលោមម្បិ បច្ចនីយម្បិ អនុលោមបច្ចនីយម្បិ បច្ចនីយានុលោមម្បិ គណិតំ, ឯវំ គណេតព្ពំ.)

ហេតុទុកអជ្ឈត្តារម្មណត្តិកំ និដ្ឋិតំ.