១-៦. បដិច្ចវារាទិ

បច្ចយចតុក្កំ

ហេតុបច្ចយោ

៥០៩. ហេតុំ អជ្ឈត្តំ ធម្មំ បដិច្ច ហេតុ អជ្ឈត្តោ ធម្មោ ឧប្បជ្ជតិ ហេតុបច្ចយា… តីណិ.

នហេតុំ អជ្ឈត្តំ ធម្មំ បដិច្ច នហេតុ អជ្ឈត្តោ ធម្មោ ឧប្បជ្ជតិ ហេតុបច្ចយា… តីណិ.

ហេតុំ អជ្ឈត្តញ្ច នហេតុំ អជ្ឈត្តញ្ច ធម្មំ បដិច្ច ហេតុ អជ្ឈត្តោ ធម្មោ ឧប្បជ្ជតិ ហេតុបច្ចយា… តីណិ (សំខិត្តំ).

៥១០. ហេតុយា នវ, អារម្មណេ នវ, អធិបតិយា នវ…បេ… កម្មេ នវ, វិបាកេ នវ, អាហារេ នវ…បេ… អវិគតេ នវ (សំខិត្តំ).

នហេតុបច្ចយាទិ

៥១១. នហេតុំ អជ្ឈត្តំ ធម្មំ បដិច្ច នហេតុ អជ្ឈត្តោ ធម្មោ ឧប្បជ្ជតិ នហេតុបច្ចយា. នហេតុំ អជ្ឈត្តំ ធម្មំ បដិច្ច ហេតុ អជ្ឈត្តោ ធម្មោ ឧប្បជ្ជតិ នហេតុបច្ចយា. (២)

ហេតុំ អជ្ឈត្តំ ធម្មំ បដិច្ច នហេតុ អជ្ឈត្តោ ធម្មោ ឧប្បជ្ជតិ នអារម្មណបច្ចយា. (១)

នហេតុំ អជ្ឈត្តំ ធម្មំ បដិច្ច នហេតុ អជ្ឈត្តោ ធម្មោ ឧប្បជ្ជតិ នអារម្មណបច្ចយា. (១)

ហេតុំ អជ្ឈត្តញ្ច នហេតុំ អជ្ឈត្តញ្ច ធម្មំ បដិច្ច នហេតុ អជ្ឈត្តោ ធម្មោ ឧប្បជ្ជតិ នអារម្មណបច្ចយា. (១)

ហេតុំ អជ្ឈត្តំ ធម្មំ បដិច្ច ហេតុ អជ្ឈត្តោ ធម្មោ ឧប្បជ្ជតិ នអធិបតិបច្ចយា (សំខិត្តំ).

៥១២. នហេតុយា ទ្វេ, នអារម្មណេ តីណិ, នអធិបតិយា នវ, នអនន្តរេ តីណិ, នសមនន្តរេ តីណិ, នអញ្ញមញ្ញេ តីណិ, នឧបនិស្សយេ តីណិ, នបុរេជាតេ នវ, នបច្ឆាជាតេ នវ, នអាសេវនេ នវ, នកម្មេ តីណិ, នវិបាកេ នវ, នអាហារេ ឯកំ, នឥន្ទ្រិយេ ឯកំ, នឈានេ ឯកំ, នមគ្គេ ឯកំ, នសម្បយុត្តេ តីណិ, នវិប្បយុត្តេ នវ, នោនត្ថិយា តីណិ, នោវិគតេ តីណិ (សំខិត្តំ).

ហេតុបច្ចយា នអារម្មណេ តីណិ (សំខិត្តំ).

នហេតុបច្ចយា អារម្មណេ ទ្វេ (សំខិត្តំ).

(សហជាតវារោបិ បច្ចយវារោបិ និស្សយវារោបិ សំសដ្ឋវារោបិ សម្បយុត្តវារោបិ បដិច្ចវារសទិសា វិត្ថារេតព្ពា.)