១. វិភង្គវារោ

ហេតុបច្ចយោ

៨៦. បរាមាសញ្ចេវ បរាមដ្ឋញ្ច ធម្មំ បដិច្ច បរាមដ្ឋោ ចេវ នោ ច បរាមាសោ ធម្មោ ឧប្បជ្ជតិ ហេតុបច្ចយា – បរាមាសំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ. (១)

បរាមដ្ឋញ្ចេវ នោ ច បរាមាសំ ធម្មំ បដិច្ច បរាមដ្ឋោ ចេវ នោ ច បរាមាសោ ធម្មោ ឧប្បជ្ជតិ ហេតុបច្ចយា – បរាមដ្ឋញ្ចេវ នោ ច បរាមាសំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… (យាវ អជ្ឈត្តិកា មហាភូតា). (១)

បរាមដ្ឋញ្ចេវ នោ ច បរាមាសំ ធម្មំ បដិច្ច បរាមាសោ ចេវ បរាមដ្ឋោ ច ធម្មោ ឧប្បជ្ជតិ ហេតុបច្ចយា – បរាមដ្ឋេ ចេវ នោ ច បរាមាសេ ខន្ធេ បដិច្ច បរាមាសោ. (២)

បរាមដ្ឋញ្ចេវ នោ ច បរាមាសំ ធម្មំ បដិច្ច បរាមាសោ ចេវ បរាមដ្ឋោ ច បរាមដ្ឋោ ចេវ នោ ច បរាមាសោ ច ធម្មា ឧប្បជ្ជន្តិ ហេតុបច្ចយា – បរាមដ្ឋញ្ចេវ នោ ច បរាមាសំ ឯកំ ខន្ធំ បដិច្ច តយោ ខន្ធា បរាមាសោ ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

បរាមាសញ្ចេវ បរាមដ្ឋញ្ច បរាមដ្ឋញ្ចេវ នោ ច បរាមាសញ្ច ធម្មំ បដិច្ច បរាមដ្ឋោ ចេវ នោ ច បរាមាសោ ធម្មោ ឧប្បជ្ជតិ ហេតុបច្ចយា – បរាមដ្ឋញ្ចេវ នោ ច បរាមាសំ ឯកំ ខន្ធញ្ច បរាមាសញ្ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ ច…បេ… (សំខិត្តំ).