១. វិភង្គវារោ

ហេតុបច្ចយោ

៩០. នីវរណោ ចេវ នីវរណិយោ ច ធម្មោ នីវរណស្ស ចេវ នីវរណិយស្ស ច ធម្មស្ស ហេតុបច្ចយេន បច្ចយោ – នីវរណា ចេវ នីវរណិយា ច ហេតូ សម្បយុត្តកានំ នីវរណានំ ហេតុបច្ចយេន បច្ចយោ. (១)

នីវរណោ ចេវ នីវរណិយោ ច ធម្មោ នីវរណិយស្ស ចេវ នោ ច នីវរណស្ស ធម្មស្ស ហេតុបច្ចយេន បច្ចយោ – នីវរណា ចេវ នីវរណិយា ច ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (២)

នីវរណោ ចេវ នីវរណិយោ ច ធម្មោ នីវរណស្ស ចេវ នីវរណិយស្ស ច នីវរណិយស្ស ចេវ នោ ច នីវរណស្ស ច ធម្មស្ស ហេតុបច្ចយេន បច្ចយោ – នីវរណា ចេវ នីវរណិយា ច ហេតូ សម្បយុត្តកានំ ខន្ធានំ នីវរណានញ្ច ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

នីវរណិយោ ចេវ នោ ច នីវរណោ ធម្មោ នីវរណិយស្ស ចេវ នោ ច នីវរណស្ស ធម្មស្ស ហេតុបច្ចយេន បច្ចយោ – នីវរណិយា ចេវ នោ ច នីវរណា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

អារម្មណបច្ចយោ

៩១. នីវរណោ ចេវ នីវរណិយោ ច ធម្មោ នីវរណស្ស ចេវ នីវរណិយស្ស ច ធម្មស្ស អារម្មណបច្ចយេន បច្ចយោ – នីវរណេ អារព្ភ នីវរណា ឧប្បជ្ជន្តិ. (មូលំ បុច្ឆិតព្ពំ) នីវរណេ អារព្ភ នីវរណិយា ចេវ នោ ច នីវរណា ខន្ធា ឧប្បជ្ជន្តិ. (មូលំ បុច្ឆិតព្ពំ) នីវរណេ អារព្ភ នីវរណា ច សម្បយុត្តកា ច ខន្ធា ឧប្បជ្ជន្តិ. (៣)

នីវរណិយោ ចេវ នោ ច នីវរណោ ធម្មោ នីវរណិយស្ស ចេវ នោ ច នីវរណស្ស ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ កត្វា តំ បច្ចវេក្ខតិ, អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ… វិចិកិច្ឆា… ឧទ្ធច្ចំ… ទោមនស្សំ ឧប្បជ្ជតិ; បុព្ពេ សុចិណ្ណានិ…បេ… ឈានា…បេ… អរិយា គោត្រភុំ បច្ចវេក្ខន្តិ, វោទានំ…បេ… បហីនេ កិលេសេ …បេ… វិក្ខម្ភិតេ កិលេសេ…បេ… បុព្ពេ សមុទាចិណ្ណេ…បេ… ចក្ខុំ…បេ… វត្ថុំ នីវរណិយេ ចេវ នោ ច នីវរណេ ខន្ធេ អនិច្ចតោ…បេ… វិបស្សតិ, អស្សាទេតិ អភិនន្ទតិ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ…បេ… (យាវ អាវជ្ជនា តាវ កាតព្ពា). (១)

នីវរណិយោ ចេវ នោ ច នីវរណោ ធម្មោ នីវរណស្ស ចេវ នីវរណិយស្ស ច ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ…បេ… បុព្ពេ សុចិណ្ណានិ…បេ… ឈានា…បេ… ចក្ខុំ…បេ… វត្ថុំ នីវរណិយេ ចេវ នោ ច នីវរណេ ខន្ធេ អស្សាទេតិ អភិនន្ទតិ, តំ អារព្ភ រាគោ…បេ… ទិដ្ឋិ… វិចិកិច្ឆា… ឧទ្ធច្ចំ… ទោមនស្សំ ឧប្បជ្ជតិ. (២)

នីវរណិយោ ចេវ នោ ច នីវរណោ ធម្មោ នីវរណស្ស ចេវ នីវរណិយស្ស ច នីវរណិយស្ស ចេវ នោ ច នីវរណស្ស ច ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ…បេ… បុព្ពេ សុចិណ្ណានិ…បេ… ឈានា …បេ… ចក្ខុំ…បេ… វត្ថុំ នីវរណិយេ ចេវ នោ ច នីវរណេ ខន្ធេ អស្សាទេតិ អភិនន្ទតិ, តំ អារព្ភ នីវរណា ច សម្បយុត្តកា ច ខន្ធា ឧប្បជ្ជន្តិ (ឯវំ ឥតរេបិ តីណិ កាតព្ពា). (៣)

(អារម្មណសទិសា អធិបតិបច្ចយា, បុរេជាតម្បិ អារម្មណសទិសំ. ឧបនិស្សយេបិ លោកុត្តរំ ន កាតព្ពំ. សំខិត្តំ, ឯវំ វិត្ថារេតព្ពំ យថា នីវរណទុកំ, ឯវំ បច្ចវេក្ខិត្វា កាតព្ពំ.)

នីវរណនីវរណិយទុកំ និដ្ឋិតំ.