១. វិភង្គវារោ

ហេតុបច្ចយោ

៦៦. នីវរណសម្បយុត្តោ ធម្មោ នីវរណសម្បយុត្តស្ស ធម្មស្ស ហេតុបច្ចយេន បច្ចយោ – នីវរណសម្បយុត្តា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (មូលំ បុច្ឆិតព្ពំ) នីវរណសម្បយុត្តា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ. (មូលំ បុច្ឆិតព្ពំ) នីវរណសម្បយុត្តា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

នីវរណវិប្បយុត្តោ ធម្មោ នីវរណវិប្បយុត្តស្ស ធម្មស្ស ហេតុបច្ចយេន បច្ចយោ – នីវរណវិប្បយុត្តា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

អារម្មណបច្ចយោ

៦៧. នីវរណសម្បយុត្តោ ធម្មោ នីវរណសម្បយុត្តស្ស ធម្មស្ស អារម្មណបច្ចយេន បច្ចយោ – រាគំ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ…បេ… វិចិកិច្ឆា…បេ… ឧទ្ធច្ចំ…បេ… ទោមនស្សំ ឧប្បជ្ជតិ; ទិដ្ឋិំ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ…បេ… វិចិកិច្ឆា…បេ… ឧទ្ធច្ចំ…បេ… ទោមនស្សំ ឧប្បជ្ជតិ; វិចិកិច្ឆំ អារព្ភ វិចិកិច្ឆា…បេ… ទិដ្ឋិ…បេ… ឧទ្ធច្ចំ…បេ… ទោមនស្សំ ឧប្បជ្ជតិ; ឧទ្ធច្ចំ អារព្ភ ឧទ្ធច្ចំ ឧប្បជ្ជតិ, ទិដ្ឋិ…បេ… វិចិកិច្ឆា, ទោមនស្សំ ឧប្បជ្ជតិ; ទោមនស្សំ អារព្ភ ទោមនស្សំ ឧប្បជ្ជតិ; ទិដ្ឋិ …បេ… វិចិកិច្ឆា…បេ… ឧទ្ធច្ចំ ឧប្បជ្ជតិ. (១)

នីវរណសម្បយុត្តោ ធម្មោ នីវរណវិប្បយុត្តស្ស ធម្មស្ស អារម្មណបច្ចយេន បច្ចយោ – អរិយា នីវរណសម្បយុត្តេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ; នីវរណសម្បយុត្តេ ខន្ធេ អនិច្ចតោ ទុក្ខតោ អនត្តតោ វិបស្សតិ, ចេតោបរិយញាណេន នីវរណសម្បយុត្តចិត្តសមង្គិស្ស ចិត្តំ ជានាតិ; នីវរណសម្បយុត្តា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (២)

៦៨. នីវរណវិប្បយុត្តោ ធម្មោ នីវរណវិប្បយុត្តស្ស ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ…បេ… អរិយា មគ្គា វុដ្ឋហិត្វា មគ្គំ…បេ… ផលំ…បេ… និព្ពានំ…បេ… និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ; ចក្ខុំ…បេ… វត្ថុំ នីវរណវិប្បយុត្តេ ខន្ធេ អនិច្ចតោ ទុក្ខតោ អនត្តតោ វិបស្សតិ, ទិព្ពេន ចក្ខុនា រូបំ បស្សតិ (យាវ អាវជ្ជនាយ). (១)

នីវរណវិប្បយុត្តោ ធម្មោ នីវរណសម្បយុត្តស្ស ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ…បេ… បុព្ពេ…បេ… ឈានា…បេ… ចក្ខុំ…បេ… វត្ថុំ នីវរណវិប្បយុត្តេ ខន្ធេ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ…បេ… វិចិកិច្ឆា…បេ… ឧទ្ធច្ចំ…បេ… ទោមនស្សំ ឧប្បជ្ជតិ. (២)

អធិបតិបច្ចយោ

៦៩. នីវរណសម្បយុត្តោ ធម្មោ នីវរណសម្បយុត្តស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – រាគំ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ; ទិដ្ឋិំ គរុំ កត្វា អស្សាទេតិ…បេ…. សហជាតាធិបតិ – នីវរណសម្បយុត្តាធិបតិ នីវរណសម្បយុត្តកានំ ខន្ធានំ អធិបតិបច្ចយេន បច្ចយោ. (១)

នីវរណសម្បយុត្តោ ធម្មោ នីវរណវិប្បយុត្តស្ស ធម្មស្ស អធិបតិបច្ចយេន បច្ចយោ. សហជាតាធិបតិ – នីវរណសម្បយុត្តាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (មូលំ បុច្ឆិតព្ពំ) នីវរណសម្បយុត្តាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

៧០. នីវរណវិប្បយុត្តោ ធម្មោ នីវរណវិប្បយុត្តស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ កត្វា តំ គរុំ កត្វា បច្ចវេក្ខតិ, បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ…បេ… អរិយា មគ្គា វុដ្ឋហិត្វា មគ្គំ គរុំ កត្វា…បេ… ផលំ…បេ… និព្ពានំ…បេ… និព្ពានំ គោត្រភុស្ស, វោទានស្ស, មគ្គស្ស, ផលស្ស អធិបតិបច្ចយេន បច្ចយោ. សហជាតាធិបតិ – នីវរណវិប្បយុត្តាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

នីវរណវិប្បយុត្តោ ធម្មោ នីវរណសម្បយុត្តស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ទានំ…បេ… សីលំ…បេ… បុព្ពេ…បេ… ឈានំ…បេ… ចក្ខុំ…បេ… វត្ថុំ នីវរណវិប្បយុត្តេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. (២)

អនន្តរបច្ចយោ

៧១. នីវរណសម្បយុត្តោ ធម្មោ នីវរណសម្បយុត្តស្ស ធម្មស្ស អនន្តរបច្ចយេន បច្ចយោ – បុរិមា បុរិមា នីវរណសម្បយុត្តា ខន្ធា បច្ឆិមានំ បច្ឆិមានំ នីវរណសម្បយុត្តកានំ ខន្ធានំ អនន្តរបច្ចយេន បច្ចយោ. (មូលំ បុច្ឆិតព្ពំ) នីវរណសម្បយុត្តា ខន្ធា វុដ្ឋានស្ស អនន្តរបច្ចយេន បច្ចយោ (ឥធ បុរិមា បុរិមាតិ នត្ថិ). (២)

(មូលំ បុច្ឆិតព្ពំ) បុរិមា បុរិមា នីវរណវិប្បយុត្តា ខន្ធា បច្ឆិមានំ បច្ឆិមានំ នីវរណវិប្បយុត្តានំ ខន្ធានំ អនន្តរបច្ចយេន បច្ចយោ; អនុលោមំ គោត្រភុស្ស…បេ… ផលសមាបត្តិយា អនន្តរបច្ចយេន បច្ចយោ. (១)

នីវរណវិប្បយុត្តោ ធម្មោ នីវរណសម្បយុត្តស្ស ធម្មស្ស អនន្តរបច្ចយេន បច្ចយោ – អាវជ្ជនា នីវរណសម្បយុត្តកានំ ខន្ធានំ អនន្តរបច្ចយេន បច្ចយោ. (២)

សមនន្តរបច្ចយាទិ

៧២. នីវរណសម្បយុត្តោ ធម្មោ នីវរណសម្បយុត្តស្ស ធម្មស្ស សមនន្តរបច្ចយេន បច្ចយោ… សហជាតបច្ចយេន បច្ចយោ… អញ្ញមញ្ញបច្ចយេន បច្ចយោ… និស្សយបច្ចយេន បច្ចយោ.

ឧបនិស្សយបច្ចយោ

៧៣. នីវរណសម្បយុត្តោ ធម្មោ នីវរណសម្បយុត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – រាគំ ឧបនិស្សាយ បាណំ ហនតិ…បេ… សង្ឃំ ភិន្ទតិ; ទោសំ… មោហំ… មានំ… ទិដ្ឋិំ… បត្ថនំ ឧបនិស្សាយ បាណំ ហនតិ…បេ… សង្ឃំ ភិន្ទតិ; រាគោ…បេ… បត្ថនា រាគស្ស…បេ… បត្ថនាយ ឧបនិស្សយបច្ចយេន បច្ចយោ. (១)

នីវរណសម្បយុត្តោ ធម្មោ នីវរណវិប្បយុត្តស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – រាគំ ឧបនិស្សាយ ទានំ ទេតិ…បេ… សីលំ…បេ… ឧបោសថកម្មំ…បេ… ឈានំ…បេ… វិបស្សនំ… មគ្គំ… អភិញ្ញំ… សមាបត្តិំ ឧប្បាទេតិ; ទោសំ…បេ… បត្ថនំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ; រាគោ…បេ… បត្ថនា សទ្ធាយ …បេ… បញ្ញាយ… កាយិកស្ស សុខស្ស, កាយិកស្ស ទុក្ខស្ស, មគ្គស្ស, ផលសមាបត្តិយា ឧបនិស្សយបច្ចយេន បច្ចយោ. (២)

៧៤. នីវរណវិប្បយុត្តោ ធម្មោ នីវរណវិប្បយុត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទានំ ទេតិ, សីលំ…បេ… មគ្គំ…បេ… អភិញ្ញំ…បេ… សមាបត្តិំ ឧប្បាទេតិ, សីលំ…បេ… បញ្ញំ…បេ… សេនាសនំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ; សទ្ធា…បេ… សេនាសនំ សទ្ធាយ…បេ… បញ្ញាយ…បេ… មគ្គស្ស ផលសមាបត្តិយា ឧបនិស្សយបច្ចយេន បច្ចយោ. (១)

នីវរណវិប្បយុត្តោ ធម្មោ នីវរណសម្បយុត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ មានំ ជប្បេតិ, ទិដ្ឋិំ គណ្ហាតិ; សីលំ…បេ… បញ្ញំ, កាយិកំ សុខំ…បេ… សេនាសនំ ឧបនិស្សាយ បាណំ ហនតិ…បេ… សង្ឃំ ភិន្ទតិ; សទ្ធា…បេ… សេនាសនំ រាគស្ស… ទោសស្ស… មោហស្ស… មានស្ស… ទិដ្ឋិយា… បត្ថនាយ ឧបនិស្សយបច្ចយេន បច្ចយោ. (២)

បុរេជាតបច្ចយោ

៧៥. នីវរណវិប្បយុត្តោ ធម្មោ នីវរណវិប្បយុត្តស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ ទុក្ខតោ អនត្តតោ វិបស្សតិ. ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ…. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ នីវរណវិប្បយុត្តានំ ខន្ធានំ បុរេជាតបច្ចយេន បច្ចយោ. (១)

នីវរណវិប្បយុត្តោ ធម្មោ នីវរណសម្បយុត្តស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អស្សាទេតិ អភិនន្ទតិ, តំ អារព្ភ រាគោ… ទោសោ… មោហោ…. វត្ថុបុរេជាតំ – វត្ថុ នីវរណសម្បយុត្តានំ ខន្ធានំ បុរេជាតបច្ចយេន បច្ចយោ. (២)

បច្ឆាជាតាសេវនបច្ចយា

៧៦. នីវរណសម្បយុត្តោ ធម្មោ នីវរណវិប្បយុត្តស្ស ធម្មស្ស បច្ឆាជាតបច្ចយេន បច្ចយោ… ទ្វេ, អាសេវនបច្ចយេន បច្ចយោ… ទ្វេ.

កម្មបច្ចយាទិ

៧៧. នីវរណសម្បយុត្តោ ធម្មោ នីវរណសម្បយុត្តស្ស ធម្មស្ស កម្មបច្ចយេន បច្ចយោ – នីវរណសម្បយុត្តា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. (មូលំ កាតព្ពំ) សហជាតា, នានាក្ខណិកា. សហជាតា – នីវរណសម្បយុត្តា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. នានាក្ខណិកា – នីវរណសម្បយុត្តា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (មូលំ កាតព្ពំ) នីវរណសម្បយុត្តា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

នីវរណវិប្បយុត្តោ ធម្មោ នីវរណវិប្បយុត្តស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា (សំខិត្តំ). វិបាកបច្ចយា… ឯកំ.

អាហារបច្ចយាទិ

៧៨. នីវរណសម្បយុត្តោ ធម្មោ នីវរណសម្បយុត្តស្ស ធម្មស្ស អាហារបច្ចយេន បច្ចយោ… ឥន្ទ្រិយបច្ចយេន បច្ចយោ… ឈានបច្ចយេន បច្ចយោ… មគ្គបច្ចយេន បច្ចយោ… សម្បយុត្តបច្ចយេន បច្ចយោ… ទ្វេ.

វិប្បយុត្តបច្ចយោ

៧៩. នីវរណសម្បយុត្តោ ធម្មោ នីវរណវិប្បយុត្តស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (សំខិត្តំ). (១)

នីវរណវិប្បយុត្តោ ធម្មោ នីវរណវិប្បយុត្តស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ (សំខិត្តំ). (១)

នីវរណវិប្បយុត្តោ ធម្មោ នីវរណសម្បយុត្តស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ នីវរណសម្បយុត្តកានំ ខន្ធានំ វិប្បយុត្តបច្ចយេន បច្ចយោ. (២)

អត្ថិបច្ចយោ

៨០. នីវរណសម្បយុត្តោ ធម្មោ នីវរណសម្បយុត្តស្ស ធម្មស្ស អត្ថិបច្ចយេន បច្ចយោ – នីវរណសម្បយុត្តោ ឯកោ ខន្ធោ តិណ្ណន្នំ ខន្ធានំ អត្ថិបច្ចយេន បច្ចយោ…បេ…. (១)

នីវរណសម្បយុត្តោ ធម្មោ នីវរណវិប្បយុត្តស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ. សហជាតា – នីវរណសម្បយុត្តា ខន្ធា ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ. បច្ឆាជាតា – នីវរណសម្បយុត្តា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. (២)

នីវរណសម្បយុត្តោ ធម្មោ នីវរណសម្បយុត្តស្ស ច នីវរណវិប្បយុត្តស្ស ច ធម្មស្ស អត្ថិបច្ចយេន បច្ចយោ – នីវរណសម្បយុត្តោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា ទ្វិន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ. (៣)

៨១. នីវរណវិប្បយុត្តោ ធម្មោ នីវរណវិប្បយុត្តស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ (សំខិត្តំ). (១)

នីវរណវិប្បយុត្តោ ធម្មោ នីវរណសម្បយុត្តស្ស ធម្មស្ស អត្ថិបច្ចយេន បច្ចយោ. បុរេជាតំ – ចក្ខុំ…បេ… វត្ថុំ អស្សាទេតិ អភិនន្ទតិ, តំ អារព្ភ រាគោ…បេ… ទិដ្ឋិ…បេ… វិចិកិច្ឆា…បេ… ឧទ្ធច្ចំ…បេ… ទោមនស្សំ ឧប្បជ្ជតិ; វត្ថុ នីវរណសម្បយុត្តកានំ ខន្ធានំ អត្ថិបច្ចយេន បច្ចយោ. (២)

៨២. នីវរណសម្បយុត្តោ ច នីវរណវិប្បយុត្តោ ច ធម្មា នីវរណសម្បយុត្តស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – នីវរណសម្បយុត្តោ ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច វត្ថុ ច ទ្វិន្នំ ខន្ធានំ អត្ថិបច្ចយេន បច្ចយោ. (១)

នីវរណសម្បយុត្តោ ច នីវរណវិប្បយុត្តោ ច ធម្មា នីវរណវិប្បយុត្តស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតា – នីវរណសម្បយុត្តា ខន្ធា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. បច្ឆាជាតា – នីវរណសម្បយុត្តា ខន្ធា ច កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – នីវរណសម្បយុត្តា ខន្ធា ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (២)