១. វិភង្គវារោ

ហេតុបច្ចយោ

១. នីវរណំ ធម្មំ បដិច្ច នីវរណោ ធម្មោ ឧប្បជ្ជតិ ហេតុបច្ចយា – កាមច្ឆន្ទនីវរណំ បដិច្ច ថិនមិទ្ធនីវរណំ [ថីនមិទ្ធនីវរណំ (ស្យា.)] ឧទ្ធច្ចនីវរណំ អវិជ្ជានីវរណំ, កាមច្ឆន្ទនីវរណំ បដិច្ច ឧទ្ធច្ចនីវរណំ អវិជ្ជានីវរណំ, ព្យាបាទនីវរណំ បដិច្ច ថិនមិទ្ធនីវរណំ ឧទ្ធច្ចនីវរណំ អវិជ្ជានីវរណំ, ព្យាបាទនីវរណំ បដិច្ច ឧទ្ធច្ចនីវរណំ អវិជ្ជានីវរណំ, ព្យាបាទនីវរណំ បដិច្ច ថិនមិទ្ធនីវរណំ ឧទ្ធច្ចនីវរណំ កុក្កុច្ចនីវរណំ អវិជ្ជានីវរណំ, ព្យាបាទនីវរណំ បដិច្ច ឧទ្ធច្ចនីវរណំ កុក្កុច្ចនីវរណំ អវិជ្ជានីវរណំ, វិចិកិច្ឆានីវរណំ បដិច្ច ឧទ្ធច្ចនីវរណំ, ឧទ្ធច្ចនីវរណំ បដិច្ច អវិជ្ជានីវរណំ. (១)

នីវរណំ ធម្មំ បដិច្ច នោនីវរណោ ធម្មោ ឧប្បជ្ជតិ ហេតុបច្ចយា – នីវរណេ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ. (២)

នីវរណំ ធម្មំ បដិច្ច នីវរណោ ច នោនីវរណោ ច ធម្មា ឧប្បជ្ជន្តិ ហេតុបច្ចយា – កាមច្ឆន្ទនីវរណំ បដិច្ច ថិនមិទ្ធនីវរណំ ឧទ្ធច្ចនីវរណំ អវិជ្ជានីវរណំ សម្បយុត្តកា ច ខន្ធា ចិត្តសមុដ្ឋានញ្ច រូបំ (ចក្កំ). (៣)

២. នោនីវរណំ ធម្មំ បដិច្ច នោនីវរណោ ធម្មោ ឧប្បជ្ជតិ ហេតុបច្ចយា – នោនីវរណំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ…. (១)

នោនីវរណំ ធម្មំ បដិច្ច នីវរណោ ធម្មោ ឧប្បជ្ជតិ ហេតុបច្ចយា – នោនីវរណេ ខន្ធេ បដិច្ច នីវរណា. (២)

នោនីវរណំ ធម្មំ បដិច្ច នីវរណោ ច នោនីវរណោ ច ធម្មា ឧប្បជ្ជន្តិ ហេតុបច្ចយា – នោនីវរណំ ឯកំ ខន្ធំ បដិច្ច តយោ ខន្ធា នីវរណា ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

៣. នីវរណញ្ច នោនីវរណញ្ច ធម្មំ បដិច្ច នីវរណោ ធម្មោ ឧប្បជ្ជតិ ហេតុបច្ចយា – កាមច្ឆន្ទនីវរណញ្ច សម្បយុត្តកេ ច ខន្ធេ បដិច្ច ថិនមិទ្ធនីវរណំ ឧទ្ធច្ចនីវរណំ អវិជ្ជានីវរណំ (ចក្កំ). (១)

នីវរណញ្ច នោនីវរណញ្ច ធម្មំ បដិច្ច នោនីវរណោ ធម្មោ ឧប្បជ្ជតិ ហេតុបច្ចយា – នោនីវរណំ ឯកំ ខន្ធញ្ច នីវរណញ្ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ ច…បេ… នីវរណេ ច មហាភូតេ ច បដិច្ច ចិត្តសមុដ្ឋានំ រូបំ. (២)

នីវរណញ្ច នោនីវរណញ្ច ធម្មំ បដិច្ច នីវរណោ ច នោនីវរណោ ច ធម្មា ឧប្បជ្ជន្តិ ហេតុបច្ចយា – នោនីវរណំ ឯកំ ខន្ធញ្ច កាមច្ឆន្ទនីវរណញ្ច បដិច្ច តយោ ខន្ធា ថិនមិទ្ធនីវរណំ ឧទ្ធច្ចនីវរណំ អវិជ្ជានីវរណំ…បេ… ទ្វេ ខន្ធេ ច…បេ… (ចក្កំ. សំខិត្តំ). (៣)