១. វិភង្គវារោ

ហេតុបច្ចយោ

១៣. នីវរណំ ធម្មំ បច្ចយា នីវរណោ ធម្មោ ឧប្បជ្ជតិ ហេតុបច្ចយា… តីណិ.

នោនីវរណំ ធម្មំ បច្ចយា នោនីវរណោ ធម្មោ ឧប្បជ្ជតិ ហេតុបច្ចយា – នោនីវរណំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… (យាវ អជ្ឈត្តិកា មហាភូតា), វត្ថុំ បច្ចយា នោនីវរណា ខន្ធា. (១)

នោនីវរណំ ធម្មំ បច្ចយា នីវរណោ ធម្មោ ឧប្បជ្ជតិ ហេតុបច្ចយា – នោនីវរណេ ខន្ធេ បច្ចយា នីវរណា, វត្ថុំ បច្ចយា នីវរណា. (២)

នោនីវរណំ ធម្មំ បច្ចយា នីវរណោ ច នោនីវរណោ ច ធម្មា ឧប្បជ្ជន្តិ ហេតុបច្ចយា – នោនីវរណំ ឯកំ ខន្ធំ បច្ចយា តយោ ខន្ធា នីវរណា ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… វត្ថុំ បច្ចយា នីវរណា, មហាភូតេ បច្ចយា ចិត្តសមុដ្ឋានំ រូបំ, វត្ថុំ បច្ចយា នីវរណា ច សម្បយុត្តកា ច ខន្ធា. (៣)

១៤. នីវរណញ្ច នោនីវរណញ្ច ធម្មំ បច្ចយា នីវរណោ ធម្មោ ឧប្បជ្ជតិ ហេតុបច្ចយា – កាមច្ឆន្ទនីវរណញ្ច សម្បយុត្តកេ ច ខន្ធេ បច្ចយា ថិនមិទ្ធនីវរណំ ឧទ្ធច្ចនីវរណំ អវិជ្ជានីវរណំ (ចក្កំ). កាមច្ឆន្ទនីវរណញ្ច វត្ថុញ្ច បច្ចយា ថិនមិទ្ធនីវរណំ ឧទ្ធច្ចនីវរណំ អវិជ្ជានីវរណំ (ចក្កំ). (១)

នីវរណញ្ច នោនីវរណញ្ច ធម្មំ បច្ចយា នោនីវរណោ ធម្មោ ឧប្បជ្ជតិ ហេតុបច្ចយា – នោនីវរណំ ឯកំ ខន្ធញ្ច នីវរណញ្ច បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… នីវរណញ្ច វត្ថុញ្ច បច្ចយា សម្បយុត្តកា ខន្ធា, នីវរណញ្ច សម្បយុត្តកេ ច ខន្ធេ បច្ចយា ចិត្តសមុដ្ឋានំ រូបំ, នីវរណេ ច មហាភូតេ ច បច្ចយា ចិត្តសមុដ្ឋានំ រូបំ. (២)

នីវរណញ្ច នោនីវរណញ្ច ធម្មំ បច្ចយា នីវរណោ ច នោនីវរណោ ច ធម្មា ឧប្បជ្ជន្តិ ហេតុបច្ចយា – នោនីវរណំ ឯកំ ខន្ធញ្ច កាមច្ឆន្ទនីវរណញ្ច បច្ចយា តយោ ខន្ធា ថិនមិទ្ធនីវរណំ ឧទ្ធច្ចនីវរណំ អវិជ្ជានីវរណំ…បេ… ទ្វេ ខន្ធេ …បេ… (ចក្កំ). កាមច្ឆន្ទនីវរណញ្ច វត្ថុញ្ច បច្ចយា ថិនមិទ្ធនីវរណំ ឧទ្ធច្ចនីវរណំ អវិជ្ជានីវរណំ សម្បយុត្តកា ច ខន្ធា (ចក្កំ. សំខិត្តំ). (៣)