១. វិភង្គវារោ

នហេតុបច្ចយោ

៥. នោគន្ថំ ធម្មំ បដិច្ច នោគន្ថោ ធម្មោ ឧប្បជ្ជតិ នហេតុបច្ចយា – អហេតុកំ នោគន្ថំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… អហេតុកបដិសន្ធិក្ខណេ (យាវ អសញ្ញសត្តា), វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

នអារម្មណបច្ចយាទិ

៦. គន្ថំ ធម្មំ បដិច្ច នោគន្ថោ ធម្មោ ឧប្បជ្ជតិ នអារម្មណបច្ចយា – គន្ថេ បដិច្ច ចិត្តសមុដ្ឋានំ រូបំ. (១)

នោគន្ថំ ធម្មំ បដិច្ច នោគន្ថោ ធម្មោ ឧប្បជ្ជតិ នអារម្មណបច្ចយា – នោគន្ថេ ខន្ធេ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ… (យាវ អសញ្ញសត្តា). (១)

គន្ថញ្ច នោគន្ថញ្ច ធម្មំ បដិច្ច នោគន្ថោ ធម្មោ ឧប្បជ្ជតិ នអារម្មណបច្ចយា – គន្ថេ ច សម្បយុត្តកេ ច ខន្ធេ បដិច្ច ចិត្តសមុដ្ឋានំ រូបំ (សំខិត្តំ).

នអធិបតិបច្ចយា… នវ, នអនន្តរបច្ចយា… តីណិ, នសមនន្តរបច្ចយា… តីណិ, នអញ្ញមញ្ញបច្ចយា… តីណិ, នឧបនិស្សយបច្ចយា… តីណិ.

នបុរេជាតបច្ចយាទិ

៧. គន្ថំ ធម្មំ បដិច្ច គន្ថោ ធម្មោ ឧប្បជ្ជតិ នបុរេជាតបច្ចយា – អរូបេ ឥទំសច្ចាភិនិវេសំ កាយគន្ថំ បដិច្ច អភិជ្ឈាកាយគន្ថោ, អភិជ្ឈាកាយគន្ថំ បដិច្ច ឥទំសច្ចាភិនិវេសោ កាយគន្ថោ (អរូបេ សីលព្ពតបរាមាសោ នត្ថិ, ឯវំ នវ បញ្ហា កាតព្ពា), នបច្ឆាជាតេ នវ, នអាសេវនេ នវ, នកម្មេ តីណិ, នវិបាកេ នវ, នអាហារេ ឯកំ, នឥន្ទ្រិយេ ឯកំ, នឈានេ ឯកំ, នមគ្គេ ឯកំ, នសម្បយុត្តេ តីណិ, នវិប្បយុត្តេ នវ, នោនត្ថិយា តីណិ, នោវិគតេ តីណិ.