១. វិភង្គវារោ

ហេតុបច្ចយោ

១០៤. គន្ថោ ចេវ គន្ថនិយោ ច ធម្មោ គន្ថស្ស ចេវ គន្ថនិយស្ស ច ធម្មស្ស ហេតុបច្ចយេន បច្ចយោ – គន្ថា ហេតូ សម្បយុត្តកានំ គន្ថានំ ហេតុបច្ចយេន បច្ចយោ (ឯវំ នវ បញ្ហា វិត្ថារេតព្ពា).

អារម្មណបច្ចយោ

១០៥. គន្ថោ ចេវ គន្ថនិយោ ច ធម្មោ គន្ថស្ស ចេវ គន្ថនិយស្ស ច ធម្មស្ស អារម្មណបច្ចយេន បច្ចយោ – គន្ថេ អារព្ភ គន្ថា ឧប្បជ្ជន្តិ. (មូលំ បុច្ឆិតព្ពំ) គន្ថេ អារព្ភ គន្ថនិយា ចេវ នោ ច គន្ថា ខន្ធា ឧប្បជ្ជន្តិ. (មូលំ បុច្ឆិតព្ពំ) គន្ថេ អារព្ភ គន្ថា ច សម្បយុត្តកា ច ខន្ធា ឧប្បជ្ជន្តិ. (៣)

១០៦. គន្ថនិយោ ចេវ នោ ច គន្ថោ ធម្មោ គន្ថនិយស្ស ចេវ នោ ច គន្ថស្ស ច ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ…បេ… ឈានា…បេ… អរិយា គោត្រភុំ បច្ចវេក្ខន្តិ, វោទានំ បច្ចវេក្ខន្តិ, បហីនេ កិលេសេ…បេ… វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ, ចក្ខុំ…បេ… វត្ថុំ គន្ថនិយេ ចេវ នោ ច គន្ថេ ខន្ធេ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. (សព្ពំ វិត្ថារេតព្ពំ) អាវជ្ជនាយ អារម្មណបច្ចយេន បច្ចយោ. (១)

គន្ថនិយោ ចេវ នោ ច គន្ថោ ធម្មោ គន្ថស្ស ចេវ គន្ថនិយស្ស ច ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ កត្វា តំ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ…បេ… វិចិកិច្ឆា…បេ… ទោមនស្សំ ឧប្បជ្ជតិ; បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ…បេ… ចក្ខុំ…បេ… វត្ថុំ គន្ថនិយេ ចេវ នោ ច គន្ថេ ខន្ធេ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ…បេ… ទោមនស្សំ ឧប្បជ្ជតិ. (២)

គន្ថនិយោ ចេវ នោ ច គន្ថោ ធម្មោ គន្ថស្ស ចេវ គន្ថនិយស្ស ច គន្ថនិយស្ស ចេវ នោ ច គន្ថស្ស ច ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ…បេ… បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ…បេ… ចក្ខុំ…បេ… វត្ថុំ គន្ថនិយេ ចេវ នោ ច គន្ថេ ខន្ធេ អស្សាទេតិ អភិនន្ទតិ, តំ អារព្ភ គន្ថា ច សម្បយុត្តកា ច ខន្ធា ឧប្បជ្ជន្តិ (ឯវំ ឥតរេបិ តីណិ វិត្ថារេតព្ពា). (៣)

(អារព្ភ កាតព្ពា. ឥមស្មិំ ទុកេ លោកុត្តរំ នត្ថិ, គន្ថទុកសទិសំ, និន្នានាករណំ. ‘‘គន្ថនិយ’’ន្តិ និយាមេតព្ពំ, មគ្គេ នវ បញ្ហា កាតព្ពា.)

គន្ថគន្ថនិយទុកំ និដ្ឋិតំ.