១. វិភង្គវារោ

ហេតុបច្ចយោ

៦៩. គន្ថសម្បយុត្តោ ធម្មោ គន្ថសម្បយុត្តស្ស ធម្មស្ស ហេតុបច្ចយេន បច្ចយោ – គន្ថសម្បយុត្តា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (១)

គន្ថសម្បយុត្តោ ធម្មោ គន្ថវិប្បយុត្តស្ស ធម្មស្ស ហេតុបច្ចយេន បច្ចយោ – គន្ថសម្បយុត្តា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ; ទិដ្ឋិគតវិប្បយុត្តលោភសហគតោ ហេតុ លោភស្ស ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; ទោមនស្សសហគតោ ហេតុ បដិឃស្ស ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (២)

គន្ថសម្បយុត្តោ ធម្មោ គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស ហេតុបច្ចយេន បច្ចយោ – គន្ថសម្បយុត្តា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; ទិដ្ឋិគតវិប្បយុត្តលោភសហគតោ ហេតុ សម្បយុត្តកានំ ខន្ធានំ លោភស្ស ច ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; ទោមនស្សសហគតោ ហេតុ សម្បយុត្តកានំ ខន្ធានំ បដិឃស្ស ច ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

៧០. គន្ថវិប្បយុត្តោ ធម្មោ គន្ថវិប្បយុត្តស្ស ធម្មស្ស ហេតុបច្ចយេន បច្ចយោ – គន្ថវិប្បយុត្តា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; ទិដ្ឋិគតវិប្បយុត្តោ លោភោ ចិត្តសមុដ្ឋានានំ រូបានំ ហេតុបច្ចយេន បច្ចយោ; បដិឃំ ចិត្តសមុដ្ឋានានំ រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

គន្ថវិប្បយុត្តោ ធម្មោ គន្ថសម្បយុត្តស្ស ធម្មស្ស ហេតុបច្ចយេន បច្ចយោ – ទិដ្ឋិគតវិប្បយុត្តោ លោភោ សម្បយុត្តកានំ ខន្ធានំ ហេតុបច្ចយេន បច្ចយោ; បដិឃំ សម្បយុត្តកានំ ខន្ធានំ ហេតុបច្ចយេន បច្ចយោ. (២)

គន្ថវិប្បយុត្តោ ធម្មោ គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស ហេតុបច្ចយេន បច្ចយោ – ទិដ្ឋិគតវិប្បយុត្តោ លោភោ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិឃំ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

៧១. គន្ថសម្បយុត្តោ ច គន្ថវិប្បយុត្តោ ច ធម្មា គន្ថសម្បយុត្តស្ស ធម្មស្ស ហេតុបច្ចយេន បច្ចយោ – ទិដ្ឋិគតវិប្បយុត្តលោភសហគតោ ហេតុ ច លោភោ ច សម្បយុត្តកានំ ខន្ធានំ ហេតុបច្ចយេន បច្ចយោ; ទោមនស្សសហគតោ ហេតុ ច បដិឃញ្ច សម្បយុត្តកានំ ខន្ធានំ ហេតុបច្ចយេន បច្ចយោ. (១)

គន្ថសម្បយុត្តោ ច គន្ថវិប្បយុត្តោ ច ធម្មា គន្ថវិប្បយុត្តស្ស ធម្មស្ស ហេតុបច្ចយេន បច្ចយោ – ទិដ្ឋិគតវិប្បយុត្តលោភសហគតោ ហេតុ ច លោភោ ច ចិត្តសមុដ្ឋានានំ រូបានំ ហេតុបច្ចយេន បច្ចយោ; ទោមនស្សសហគតោ ហេតុ ច បដិឃញ្ច ចិត្តសមុដ្ឋានានំ រូបានំ ហេតុបច្ចយេន បច្ចយោ. (២)

គន្ថសម្បយុត្តោ ច គន្ថវិប្បយុត្តោ ច ធម្មា គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស ហេតុបច្ចយេន បច្ចយោ – ទិដ្ឋិគតវិប្បយុត្តលោភសហគតោ ហេតុ ច លោភោ ច សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; ទោមនស្សសហគតោ ហេតុ ច បដិឃញ្ច សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

អារម្មណបច្ចយោ

៧២. គន្ថសម្បយុត្តោ ធម្មោ គន្ថសម្បយុត្តស្ស ធម្មស្ស អារម្មណបច្ចយេន បច្ចយោ – គន្ថសម្បយុត្តេ ខន្ធេ អារព្ភ គន្ថសម្បយុត្តកា ខន្ធា ឧប្បជ្ជន្តិ. (តីសុបិ មូលា បុច្ឆិតព្ពា) គន្ថសម្បយុត្តេ ខន្ធេ អារព្ភ គន្ថវិប្បយុត្តា ខន្ធា ឧប្បជ្ជន្តិ, គន្ថសម្បយុត្តេ ខន្ធេ អារព្ភ ទិដ្ឋិគតវិប្បយុត្តលោភសហគតា ខន្ធា ច លោភោ ច ឧប្បជ្ជន្តិ, ទោមនស្សសហគតា ខន្ធា ច បដិឃញ្ច ឧប្បជ្ជន្តិ. (៣)

៧៣. គន្ថវិប្បយុត្តោ ធម្មោ គន្ថវិប្បយុត្តស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ…បេ… ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ បច្ចវេក្ខតិ, ឈានា វុដ្ឋហិត្វា ឈានំ បច្ចវេក្ខតិ, អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ បច្ចវេក្ខន្តិ, និព្ពានំ បច្ចវេក្ខន្តិ, និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ; អរិយា គន្ថវិប្បយុត្តេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ, ចក្ខុំ…បេ… វត្ថុំ គន្ថវិប្បយុត្តេ ខន្ធេ ច លោភញ្ច បដិឃញ្ច អនិច្ចតោ…បេ… វិបស្សតិ, អស្សាទេតិ អភិនន្ទតិ, តំ អារព្ភ គន្ថវិប្បយុត្តោ រាគោ ឧប្បជ្ជតិ, វិចិកិច្ឆា…បេ… ឧទ្ធច្ចំ…បេ… ទោមនស្សំ ឧប្បជ្ជតិ, ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, ចេតោបរិយញាណេន គន្ថវិប្បយុត្តចិត្តសមង្គិស្ស ចិត្តំ ជានាតិ, អាកាសានញ្ចាយតនំ វិញ្ញាណញ្ចាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស…បេ… រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… គន្ថវិប្បយុត្តា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

គន្ថវិប្បយុត្តោ ធម្មោ គន្ថសម្បយុត្តស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ…បេ… ឧបោសថកម្មំ…បេ… បុព្ពេ…បេ… ឈានា…បេ… តំ អស្សាទេតិ អភិនន្ទតិ, តំ អារព្ភ គន្ថសម្បយុត្តោ រាគោ ឧប្បជ្ជតិ… ទិដ្ឋិ ឧប្បជ្ជតិ… ទោមនស្សំ ឧប្បជ្ជតិ (សំខិត្តំ). (២)

គន្ថវិប្បយុត្តោ ធម្មោ គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស អារម្មណបច្ចយេន បច្ចយោ – ចក្ខុំ…បេ… វត្ថុំ គន្ថវិប្បយុត្តេ ខន្ធេ ច លោភញ្ច បដិឃញ្ច អារព្ភ ទិដ្ឋិគតវិប្បយុត្តលោភសហគតា ខន្ធា ច លោភោ ច ទោមនស្សសហគតា ខន្ធា ច បដិឃញ្ច ឧប្បជ្ជន្តិ. (៣)

៧៤. គន្ថសម្បយុត្តោ ច គន្ថវិប្បយុត្តោ ច ធម្មា គន្ថសម្បយុត្តស្ស ធម្មស្ស អារម្មណបច្ចយេន បច្ចយោ – ទិដ្ឋិគតវិប្បយុត្តលោភសហគតេ ខន្ធេ ច លោភញ្ច ទោមនស្សសហគតេ ខន្ធេ ច បដិឃញ្ច អារព្ភ គន្ថសម្បយុត្តកា ខន្ធា ឧប្បជ្ជន្តិ. (មូលំ បុច្ឆិតព្ពំ) ទិដ្ឋិគតវិប្បយុត្តលោភសហគតេ ខន្ធេ ច លោភញ្ច ទោមនស្សសហគតេ ខន្ធេ ច បដិឃញ្ច អារព្ភ គន្ថវិប្បយុត្តា ខន្ធា ឧប្បជ្ជន្តិ, ទិដ្ឋិគតវិប្បយុត្តលោភសហគតេ ខន្ធេ ច លោភញ្ច ទោមនស្សសហគតេ ខន្ធេ ច បដិឃញ្ច អារព្ភ ទិដ្ឋិគតវិប្បយុត្តលោភសហគតា ខន្ធា ច លោភោ ច ទោមនស្សសហគតា ខន្ធា ច បដិឃញ្ច ឧប្បជ្ជន្តិ. (៣)

អធិបតិបច្ចយោ

៧៥. គន្ថសម្បយុត្តោ ធម្មោ គន្ថសម្បយុត្តស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – គន្ថសម្បយុត្តេ ខន្ធេ គរុំ កត្វា គន្ថសម្បយុត្តកា ខន្ធា ឧប្បជ្ជន្តិ. សហជាតាធិបតិ – គន្ថសម្បយុត្តាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

គន្ថសម្បយុត្តោ ធម្មោ គន្ថវិប្បយុត្តស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – គន្ថសម្បយុត្តេ ខន្ធេ គរុំ កត្វា ទិដ្ឋិគតវិប្បយុត្តោ លោភោ ឧប្បជ្ជតិ. សហជាតាធិបតិ – គន្ថសម្បយុត្តាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ; ទិដ្ឋិគតវិប្បយុត្តលោភសហគតាធិបតិ លោភស្ស ច ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ; ទោមនស្សសហគតាធិបតិ បដិឃស្ស ច ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (២)

គន្ថសម្បយុត្តោ ធម្មោ គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – គន្ថសម្បយុត្តេ ខន្ធេ គរុំ កត្វា ទិដ្ឋិគតវិប្បយុត្តលោភសហគតា ខន្ធា ច លោភោ ច ឧប្បជ្ជន្តិ. សហជាតាធិបតិ – ទិដ្ឋិគតវិប្បយុត្តលោភសហគតាធិបតិ សម្បយុត្តកានំ ខន្ធានំ លោភស្ស ច ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ; ទោមនស្សសហគតាធិបតិ សម្បយុត្តកានំ ខន្ធានំ បដិឃស្ស ច ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ.(៣)

៧៦. គន្ថវិប្បយុត្តោ ធម្មោ គន្ថវិប្បយុត្តស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ កត្វា តំ គរុំ កត្វា បច្ចវេក្ខតិ, បុព្ពេ សុចិណ្ណានិ គរុំ កត្វា បច្ចវេក្ខតិ, ឈានា វុដ្ឋហិត្វា ឈានំ គរុំ កត្វា បច្ចវេក្ខតិ, អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ, ផលា វុដ្ឋហិត្វា ផលំ គរុំ កត្វា បច្ចវេក្ខន្តិ, និព្ពានំ គរុំ កត្វា បច្ចវេក្ខន្តិ, និព្ពានំ គោត្រភុស្ស, វោទានស្ស, មគ្គស្ស, ផលស្ស អធិបតិបច្ចយេន បច្ចយោ; ចក្ខុំ…បេ… វត្ថុំ គន្ថវិប្បយុត្តេ ខន្ធេ ច លោភញ្ច គរុំ កត្វា អស្សាទេតិ អភិនន្ទតិ, តំ គរុំ កត្វា គន្ថវិប្បយុត្តោ រាគោ ឧប្បជ្ជតិ. សហជាតាធិបតិ – គន្ថវិប្បយុត្តាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

គន្ថវិប្បយុត្តោ ធម្មោ គន្ថសម្បយុត្តស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ទានំ…បេ… សីលំ…បេ… ឧបោសថកម្មំ…បេ… បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ…បេ… ចក្ខុំ…បេ… វត្ថុំ គន្ថវិប្បយុត្តេ ខន្ធេ ច លោភញ្ច គរុំ កត្វា អស្សាទេតិ អភិនន្ទតិ, តំ គរុំ កត្វា គន្ថសម្បយុត្តោ រាគោ ឧប្បជ្ជតិ… ទិដ្ឋិ ឧប្បជ្ជតិ. (២)

គន្ថវិប្បយុត្តោ ធម្មោ គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស អធិបតិបច្ចយេន បច្ចយោ. អារម្មណាធិបតិ – ចក្ខុំ…បេ… វត្ថុំ គន្ថវិប្បយុត្តេ ខន្ធេ ច លោភញ្ច គរុំ កត្វា ទិដ្ឋិគតវិប្បយុត្តលោភសហគតា ខន្ធា ច លោភោ ច ឧប្បជ្ជន្តិ. (៣)

៧៧. គន្ថសម្បយុត្តោ ច គន្ថវិប្បយុត្តោ ច ធម្មា គន្ថសម្បយុត្តស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ទិដ្ឋិគតវិប្បយុត្តលោភសហគតេ ខន្ធេ ច លោភញ្ច គរុំ កត្វា គន្ថសម្បយុត្តកា ខន្ធា ឧប្បជ្ជន្តិ. (មូលា បុច្ឆិតព្ពា) ទិដ្ឋិគតវិប្បយុត្តលោភសហគតេ ខន្ធេ ច លោភញ្ច គរុំ កត្វា ទិដ្ឋិគតវិប្បយុត្តោ លោភោ ឧប្បជ្ជតិ. (មូលា បុច្ឆិតព្ពា) ទិដ្ឋិគតវិប្បយុត្តលោភសហគតេ ខន្ធេ ច លោភញ្ច គរុំ កត្វា ទិដ្ឋិគតវិប្បយុត្តលោភសហគតា ខន្ធា ច លោភោ ច ឧប្បជ្ជន្តិ. (៣)

អនន្តរបច្ចយោ

៧៨. គន្ថសម្បយុត្តោ ធម្មោ គន្ថសម្បយុត្តស្ស ធម្មស្ស អនន្តរបច្ចយេន បច្ចយោ – បុរិមា បុរិមា គន្ថសម្បយុត្តា ខន្ធា បច្ឆិមានំ បច្ឆិមានំ គន្ថសម្បយុត្តកានំ ខន្ធានំ អនន្តរបច្ចយេន បច្ចយោ. (មូលា បុច្ឆិតព្ពា) បុរិមា បុរិមា ទិដ្ឋិគតវិប្បយុត្តលោភសហគតា ខន្ធា បច្ឆិមស្ស បច្ឆិមស្ស ទិដ្ឋិគតវិប្បយុត្តស្ស លោភស្ស អនន្តរបច្ចយេន បច្ចយោ; បុរិមា បុរិមា ទោមនស្សសហគតា ខន្ធា បច្ឆិមស្ស បច្ឆិមស្ស បដិឃស្ស អនន្តរបច្ចយេន បច្ចយោ; គន្ថសម្បយុត្តា ខន្ធា វុដ្ឋានស្ស អនន្តរបច្ចយេន បច្ចយោ. (មូលា បុច្ឆិតព្ពា) បុរិមា បុរិមា ទិដ្ឋិគតវិប្បយុត្តលោភសហគតា ខន្ធា បច្ឆិមានំ បច្ឆិមានំ ទិដ្ឋិគតវិប្បយុត្តលោភសហគតានំ ខន្ធានំ លោភស្ស ច អនន្តរបច្ចយេន បច្ចយោ; បុរិមា បុរិមា ទោមនស្សសហគតា ខន្ធា បច្ឆិមានំ បច្ឆិមានំ ទោមនស្សសហគតានំ ខន្ធានំ បដិឃស្ស ច អនន្តរបច្ចយេន បច្ចយោ. (៣)

៧៩. គន្ថវិប្បយុត្តោ ធម្មោ គន្ថវិប្បយុត្តស្ស ធម្មស្ស អនន្តរបច្ចយេន បច្ចយោ – បុរិមោ បុរិមោ ទិដ្ឋិគតវិប្បយុត្តោ លោភោ បច្ឆិមស្ស បច្ឆិមស្ស ទិដ្ឋិគតវិប្បយុត្តស្ស លោភស្ស អនន្តរបច្ចយេន បច្ចយោ; បុរិមំ បុរិមំ បដិឃំ បច្ឆិមស្ស បច្ឆិមស្ស បដិឃស្ស អនន្តរបច្ចយេន បច្ចយោ; បុរិមា បុរិមា គន្ថវិប្បយុត្តា ខន្ធា បច្ឆិមានំ បច្ឆិមានំ គន្ថវិប្បយុត្តានំ ខន្ធានំ អនន្តរបច្ចយេន បច្ចយោ; អនុលោមំ គោត្រភុស្ស…បេ… ផលសមាបត្តិយា អនន្តរបច្ចយេន បច្ចយោ. (១)

គន្ថវិប្បយុត្តោ ធម្មោ គន្ថសម្បយុត្តស្ស ធម្មស្ស អនន្តរបច្ចយេន បច្ចយោ – បុរិមោ បុរិមោ ទិដ្ឋិគតវិប្បយុត្តោ លោភោ បច្ឆិមានំ បច្ឆិមានំ ទិដ្ឋិគតវិប្បយុត្តលោភសហគតានំ ខន្ធានំ អនន្តរបច្ចយេន បច្ចយោ; បុរិមំ បុរិមំ បដិឃំ បច្ឆិមានំ បច្ឆិមានំ ទោមនស្សសហគតានំ ខន្ធានំ អនន្តរបច្ចយេន បច្ចយោ; អាវជ្ជនា គន្ថសម្បយុត្តកានំ ខន្ធានំ អនន្តរបច្ចយេន បច្ចយោ. (២)

គន្ថវិប្បយុត្តោ ធម្មោ គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស អនន្តរបច្ចយេន បច្ចយោ – បុរិមោ បុរិមោ ទិដ្ឋិគតវិប្បយុត្តោ លោភោ បច្ឆិមានំ បច្ឆិមានំ ទិដ្ឋិគតវិប្បយុត្តលោភសហគតានំ ខន្ធានំ លោភស្ស ច អនន្តរបច្ចយេន បច្ចយោ; បុរិមំ បុរិមំ បដិឃំ បច្ឆិមានំ បច្ឆិមានំ ទោមនស្សសហគតានំ ខន្ធានំ បដិឃស្ស ច អនន្តរបច្ចយេន បច្ចយោ; អាវជ្ជនា ទិដ្ឋិគតវិប្បយុត្តលោភសហគតានំ ខន្ធានំ លោភស្ស ច ទោមនស្សសហគតានំ ខន្ធានំ បដិឃស្ស ច អនន្តរបច្ចយេន បច្ចយោ. (៣)

៨០. គន្ថសម្បយុត្តោ ច គន្ថវិប្បយុត្តោ ច ធម្មា គន្ថសម្បយុត្តស្ស ធម្មស្ស អនន្តរបច្ចយេន បច្ចយោ – បុរិមា បុរិមា ទិដ្ឋិគតវិប្បយុត្តលោភសហគតា ខន្ធា ច លោភោ ច បច្ឆិមានំ បច្ឆិមានំ ទិដ្ឋិគតវិប្បយុត្តលោភសហគតានំ ខន្ធានំ អនន្តរបច្ចយេន បច្ចយោ; បុរិមា បុរិមា ទោមនស្សសហគតា ខន្ធា ច បដិឃញ្ច បច្ឆិមានំ បច្ឆិមានំ ទោមនស្សសហគតានំ ខន្ធានំ អនន្តរបច្ចយេន បច្ចយោ. (មូលា បុច្ឆិតព្ពា) បុរិមា បុរិមា ទិដ្ឋិគតវិប្បយុត្តលោភសហគតា ខន្ធា ច លោភោ ច បច្ឆិមស្ស បច្ឆិមស្ស ទិដ្ឋិគតវិប្បយុត្តស្ស លោភស្ស អនន្តរបច្ចយេន បច្ចយោ; បុរិមា បុរិមា ទោមនស្សសហគតា ខន្ធា ច បដិឃញ្ច បច្ឆិមស្ស បច្ឆិមស្ស បដិឃស្ស អនន្តរបច្ចយេន បច្ចយោ; ទិដ្ឋិគតវិប្បយុត្តលោភសហគតា ខន្ធា ច លោភោ ច ទោមនស្សសហគតា ខន្ធា ច បដិឃញ្ច វុដ្ឋានស្ស អនន្តរបច្ចយេន បច្ចយោ. (មូលា បុច្ឆិតព្ពា) បុរិមា បុរិមា ទិដ្ឋិគតវិប្បយុត្តលោភសហគតា ខន្ធា ច លោភោ ច បច្ឆិមានំ បច្ឆិមានំ ទិដ្ឋិគតវិប្បយុត្តលោភសហគតានំ ខន្ធានំ លោភស្ស ច អនន្តរបច្ចយេន បច្ចយោ; បុរិមា បុរិមា ទោមនស្សសហគតា ខន្ធា ច បដិឃញ្ច បច្ឆិមានំ បច្ឆិមានំ ទោមនស្សសហគតានំ ខន្ធានំ បដិឃស្ស ច អនន្តរបច្ចយេន បច្ចយោ. (៣)

សមនន្តរបច្ចយាទិ

៨១. គន្ថសម្បយុត្តោ ធម្មោ គន្ថសម្បយុត្តស្ស ធម្មស្ស សមនន្តរបច្ចយេន បច្ចយោ… សហជាតបច្ចយេន បច្ចយោ… អញ្ញមញ្ញបច្ចយេន បច្ចយោ… និស្សយបច្ចយេន បច្ចយោ.

ឧបនិស្សយបច្ចយោ

៨២. គន្ថសម្បយុត្តោ ធម្មោ គន្ថសម្បយុត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – គន្ថសម្បយុត្តា ខន្ធា គន្ថសម្បយុត្តកានំ ខន្ធានំ ឧបនិស្សយបច្ចយេន បច្ចយោ. (មូលំ បុច្ឆិតព្ពំ, តីណិបិ ឧបនិស្សយា) គន្ថសម្បយុត្តា ខន្ធា គន្ថវិប្បយុត្តានំ ខន្ធានំ ឧបនិស្សយបច្ចយេន បច្ចយោ. (មូលំ, តីណិបិ ឧបនិស្សយា) គន្ថសម្បយុត្តា ខន្ធា ទិដ្ឋិគតវិប្បយុត្តលោភសហគតានំ ខន្ធានំ លោភស្ស ច ឧបនិស្សយបច្ចយេន បច្ចយោ; ទោមនស្សសហគតានំ ខន្ធានំ បដិឃស្ស ច ឧបនិស្សយបច្ចយេន បច្ចយោ. (៣)

៨៣. គន្ថវិប្បយុត្តោ ធម្មោ គន្ថវិប្បយុត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ… មានំ ជប្បេតិ… សីលំ…បេ… បញ្ញំ … រាគំ… ទោសំ… មោហំ… មានំ… បត្ថនំ… កាយិកំ សុខំ… កាយិកំ ទុក្ខំ… ឧតុំ… ភោជនំ… សេនាសនំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ… បាណំ ហនតិ…បេ… សង្ឃំ ភិន្ទតិ; សទ្ធា…បេ… បញ្ញា, រាគោ…បេ… បត្ថនា…បេ… សេនាសនំ សទ្ធាយ…បេ… បញ្ញាយ… រាគស្ស… ទោសស្ស… មោហស្ស… មានស្ស… បត្ថនាយ…បេ… ផលសមាបត្តិយា ឧបនិស្សយបច្ចយេន បច្ចយោ. (១)

គន្ថវិប្បយុត្តោ ធម្មោ គន្ថសម្បយុត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ មានំ ជប្បេតិ, ទិដ្ឋិំ គណ្ហាតិ; សីលំ…បេ… បញ្ញំ… រាគំ…បេ… មានំ… បត្ថនំ…បេ… សេនាសនំ ឧបនិស្សាយ បាណំ ហនតិ…បេ… សង្ឃំ ភិន្ទតិ; សទ្ធា…បេ… សេនាសនំ រាគស្ស… ទោសស្ស … មោហស្ស… មានស្ស… ទិដ្ឋិយា… បត្ថនាយ ឧបនិស្សយបច្ចយេន បច្ចយោ. (២)

គន្ថវិប្បយុត្តោ ធម្មោ គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស ឧបនិស្សយបច្ចយេន បច្ចយោ (តីណិ ឧបនិស្សយា); សទ្ធំ ឧបនិស្សាយ មានំ ជប្បេតិ; សីលំ…បេ… បញ្ញំ… រាគំ… ទោសំ… មោហំ… មានំ… បត្ថនំ… កាយិកំ សុខំ…បេ… សេនាសនំ ឧបនិស្សាយ បាណំ ហនតិ…បេ… សង្ឃំ ភិន្ទតិ; សទ្ធា…បេ… បញ្ញា… រាគោ… ទោសោ… មោហោ… មានោ… បត្ថនា…បេ… សេនាសនំ ទិដ្ឋិគតវិប្បយុត្តលោភសហគតានំ ខន្ធានំ លោភស្ស ច ទោមនស្សសហគតានំ ខន្ធានំ បដិឃស្ស ច ឧបនិស្សយបច្ចយេន បច្ចយោ. (៣)

៨៤. គន្ថសម្បយុត្តោ ច គន្ថវិប្បយុត្តោ ច ធម្មា គន្ថសម្បយុត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ …បេ…. បកតូបនិស្សយោ – ទិដ្ឋិគតវិប្បយុត្តលោភសហគតា ខន្ធា ច លោភោ ច ទោមនស្សសហគតា ខន្ធា ច បដិឃញ្ច គន្ថសម្បយុត្តកានំ ខន្ធានំ ឧបនិស្សយបច្ចយេន បច្ចយោ. (មូលំ កាតព្ពំ) ទិដ្ឋិគតវិប្បយុត្តលោភសហគតា ខន្ធា ច លោភោ ច ទោមនស្សសហគតា ខន្ធា ច បដិឃញ្ច គន្ថវិប្បយុត្តានំ ខន្ធានំ ទិដ្ឋិគតវិប្បយុត្តលោភស្ស ច បដិឃស្ស ច ឧបនិស្សយបច្ចយេន បច្ចយោ. (មូលំ បុច្ឆិតព្ពំ) ទិដ្ឋិគតវិប្បយុត្តលោភសហគតា ខន្ធា ច លោភោ ច ទោមនស្សសហគតា ខន្ធា ច បដិឃញ្ច ទិដ្ឋិគតវិប្បយុត្តលោភសហគតានំ ខន្ធានំ លោភស្ស ច ទោមនស្សសហគតានំ ខន្ធានំ បដិឃស្ស ច ឧបនិស្សយបច្ចយេន បច្ចយោ. (៣)

បុរេជាតបច្ចយោ

៨៥. គន្ថវិប្បយុត្តោ ធម្មោ គន្ថវិប្បយុត្តស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ វិបស្សតិ, អស្សាទេតិ អភិនន្ទតិ, តំ អារព្ភ គន្ថវិប្បយុត្តោ រាគោ ឧប្បជ្ជតិ, វិចិកិច្ឆា…បេ… ឧទ្ធច្ចំ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ…. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ គន្ថវិប្បយុត្តានំ ខន្ធានំ ទិដ្ឋិគតវិប្បយុត្តស្ស លោភស្ស ច បដិឃស្ស ច បុរេជាតបច្ចយេន បច្ចយោ. (១)

គន្ថវិប្បយុត្តោ ធម្មោ គន្ថសម្បយុត្តស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អស្សាទេតិ អភិនន្ទតិ, តំ អារព្ភ គន្ថសម្បយុត្តោ រាគោ ឧប្បជ្ជតិ, ទិដ្ឋិ…បេ… ទោមនស្សំ ឧប្បជ្ជតិ. វត្ថុបុរេជាតំ – វត្ថុ គន្ថសម្បយុត្តកានំ ខន្ធានំ បុរេជាតបច្ចយេន បច្ចយោ. (២)

គន្ថវិប្បយុត្តោ ធម្មោ គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អារព្ភ ទិដ្ឋិគតវិប្បយុត្តលោភសហគតា ខន្ធា ច លោភោ ច ទោមនស្សសហគតា ខន្ធា ច បដិឃញ្ច ឧប្បជ្ជន្តិ. វត្ថុបុរេជាតំ – វត្ថុ ទិដ្ឋិគតវិប្បយុត្តលោភសហគតានំ ខន្ធានំ លោភស្ស ច ទោមនស្សសហគតានំ ខន្ធានំ បដិឃស្ស ច បុរេជាតបច្ចយេន បច្ចយោ. (៣)

បច្ឆាជាតបច្ចយោ

៨៦. គន្ថសម្បយុត្តោ ធម្មោ គន្ថវិប្បយុត្តស្ស ធម្មស្ស បច្ឆាជាតបច្ចយេន បច្ចយោ… ឯកំ.

គន្ថវិប្បយុត្តោ ធម្មោ គន្ថវិប្បយុត្តស្ស ធម្មស្ស បច្ឆាជាតបច្ចយេន បច្ចយោ… ឯកំ.

គន្ថសម្បយុត្តោ ច គន្ថវិប្បយុត្តោ ច ធម្មា គន្ថវិប្បយុត្តស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា ទិដ្ឋិគតវិប្បយុត្តលោភសហគតា ខន្ធា ច លោភោ ច ទោមនស្សសហគតា ខន្ធា ច បដិឃញ្ច បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អាសេវនបច្ចយោ

៨៧. គន្ថសម្បយុត្តោ ធម្មោ គន្ថសម្បយុត្តស្ស ធម្មស្ស អាសេវនបច្ចយេន បច្ចយោ (អនន្តរសទិសំ, អាវជ្ជនាបិ វុដ្ឋានម្បិ នត្ថិ).

កម្មបច្ចយោ

៨៨. គន្ថសម្បយុត្តោ ធម្មោ គន្ថសម្បយុត្តស្ស ធម្មស្ស កម្មបច្ចយេន បច្ចយោ – គន្ថសម្បយុត្តា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. (១)

គន្ថសម្បយុត្តោ ធម្មោ គន្ថវិប្បយុត្តស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – គន្ថសម្បយុត្តា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ; ទិដ្ឋិគតវិប្បយុត្តលោភសហគតា ចេតនា លោភស្ស ច ចិត្តសមុដ្ឋានានញ្ច រូបានំ កម្មបច្ចយេន បច្ចយោ; ទោមនស្សសហគតា ចេតនា បដិឃស្ស ច ចិត្តសមុដ្ឋានានញ្ច រូបានំ កម្មបច្ចយេន បច្ចយោ. នានាក្ខណិកា – គន្ថសម្បយុត្តា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (២)

គន្ថសម្បយុត្តោ ធម្មោ គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស កម្មបច្ចយេន បច្ចយោ – គន្ថសម្បយុត្តា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ; ទិដ្ឋិគតវិប្បយុត្តលោភសហគតា ចេតនា សម្បយុត្តកានំ ខន្ធានំ លោភស្ស ច ចិត្តសមុដ្ឋានានញ្ច រូបានំ កម្មបច្ចយេន បច្ចយោ; ទោមនស្សសហគតា ចេតនា សម្បយុត្តកានំ ខន្ធានំ បដិឃស្ស ច ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

៨៩. គន្ថវិប្បយុត្តោ ធម្មោ គន្ថវិប្បយុត្តស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – គន្ថវិប្បយុត្តា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – គន្ថវិប្បយុត្តា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (១)

វិបាកបច្ចយាទិ

៩០. គន្ថវិប្បយុត្តោ ធម្មោ គន្ថវិប្បយុត្តស្ស ធម្មស្ស វិបាកបច្ចយេន បច្ចយោ… ឯកំ.

គន្ថសម្បយុត្តោ ធម្មោ គន្ថសម្បយុត្តស្ស ធម្មស្ស អាហារបច្ចយេន បច្ចយោ… ចត្តារិ… ឥន្ទ្រិយបច្ចយេន បច្ចយោ… ចត្តារិ… ឈានបច្ចយេន បច្ចយោ… ចត្តារិ… មគ្គបច្ចយេន បច្ចយោ … ចត្តារិ… សម្បយុត្តបច្ចយេន បច្ចយោ… ឆ.

វិប្បយុត្តបច្ចយោ

៩១. គន្ថសម្បយុត្តោ ធម្មោ គន្ថវិប្បយុត្តស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (សំខិត្តំ, វិភជិតព្ពំ). (១)

គន្ថវិប្បយុត្តោ ធម្មោ គន្ថវិប្បយុត្តស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ (សំខិត្តំ). (១)

គន្ថវិប្បយុត្តោ ធម្មោ គន្ថសម្បយុត្តស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ គន្ថសម្បយុត្តកានំ ខន្ធានំ វិប្បយុត្តបច្ចយេន បច្ចយោ. (២)

គន្ថវិប្បយុត្តោ ធម្មោ គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ ទិដ្ឋិគតវិប្បយុត្តលោភសហគតានំ ខន្ធានំ លោភស្ស ច ទោមនស្សសហគតានំ ខន្ធានំ បដិឃស្ស ច វិប្បយុត្តបច្ចយេន បច្ចយោ. (៣)

៩២. គន្ថសម្បយុត្តោ ច គន្ថវិប្បយុត្តោ ច ធម្មា គន្ថវិប្បយុត្តស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – ទិដ្ឋិគតវិប្បយុត្តលោភសហគតា ខន្ធា ច លោភោ ច ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ; ទោមនស្សសហគតា ខន្ធា ច បដិឃញ្ច ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បច្ឆាជាតា – ទិដ្ឋិគតវិប្បយុត្តលោភសហគតា ខន្ធា ច លោភោ ច ទោមនស្សសហគតា ខន្ធា ច បដិឃញ្ច បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

អត្ថិបច្ចយោ

៩៣. គន្ថសម្បយុត្តោ ធម្មោ គន្ថសម្បយុត្តស្ស ធម្មស្ស អត្ថិបច្ចយេន បច្ចយោ… ឯកំ (បដិច្ចសទិសំ). (១)

គន្ថសម្បយុត្តោ ធម្មោ គន្ថវិប្បយុត្តស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ (សំខិត្តំ, វិភជិតព្ពំ). (២)

គន្ថសម្បយុត្តោ ធម្មោ គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស អត្ថិបច្ចយេន បច្ចយោ… ឯកំ (បដិច្ចសទិសំ). (៣)

៩៤. គន្ថវិប្បយុត្តោ ធម្មោ គន្ថវិប្បយុត្តស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ (សំខិត្តំ, វិភជិតព្ពំ). (១)

គន្ថវិប្បយុត្តោ ធម្មោ គន្ថសម្បយុត្តស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – ទិដ្ឋិគតវិប្បយុត្តោ លោភោ សម្បយុត្តកានំ ខន្ធានំ អត្ថិបច្ចយេន បច្ចយោ; ទោមនស្សសហគតំ បដិឃំ សម្បយុត្តកានំ ខន្ធានំ អត្ថិបច្ចយេន បច្ចយោ. បុរេជាតំ – ចក្ខុំ…បេ… វត្ថុំ អស្សាទេតិ អភិនន្ទតិ, តំ អារព្ភ គន្ថសម្បយុត្តោ រាគោ…បេ… ទិដ្ឋិ…បេ… ទោមនស្សំ ឧប្បជ្ជតិ, វត្ថុ គន្ថសម្បយុត្តកានំ ខន្ធានំ អត្ថិបច្ចយេន បច្ចយោ. (២)

គន្ថវិប្បយុត្តោ ធម្មោ គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – ទិដ្ឋិគតវិប្បយុត្តោ លោភោ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ; បដិឃំ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ. បុរេជាតំ – ចក្ខុំ…បេ… វត្ថុំ អារព្ភ ទិដ្ឋិគតវិប្បយុត្តលោភសហគតា ខន្ធា ច លោភោ ច ទោមនស្សសហគតា ខន្ធា ច បដិឃញ្ច ឧប្បជ្ជន្តិ, វត្ថុ ទិដ្ឋិគតវិប្បយុត្តលោភសហគតានំ ខន្ធានំ លោភស្ស ច ទោមនស្សសហគតានំ ខន្ធានំ បដិឃស្ស ច អត្ថិបច្ចយេន បច្ចយោ. (៣)

៩៥. គន្ថសម្បយុត្តោ ច គន្ថវិប្បយុត្តោ ច ធម្មា គន្ថសម្បយុត្តស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – គន្ថសម្បយុត្តោ ឯកោ ខន្ធោ ច វត្ថុ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ…. សហជាតោ – ទិដ្ឋិគតវិប្បយុត្តលោភសហគតោ ឯកោ ខន្ធោ ច លោភោ ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ… ទោមនស្សសហគតោ ឯកោ ខន្ធោ ច បដិឃញ្ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ…. (១)

គន្ថសម្បយុត្តោ ច គន្ថវិប្បយុត្តោ ច ធម្មា គន្ថវិប្បយុត្តស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតា – គន្ថសម្បយុត្តា ខន្ធា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. សហជាតា – ទិដ្ឋិគតវិប្បយុត្តលោភសហគតា ខន្ធា ច លោភោ ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. សហជាតា – ទោមនស្សសហគតា ខន្ធា ច បដិឃញ្ច ចិត្តសមុដ្ឋានានំ រូបានំ អត្ថិបច្ចយេន បច្ចយោ; ទិដ្ឋិគតវិប្បយុត្តលោភសហគតា ខន្ធា ច វត្ថុ ច លោភស្ស អត្ថិបច្ចយេន បច្ចយោ; ទោមនស្សសហគតា ខន្ធា ច វត្ថុ ច បដិឃស្ស អត្ថិបច្ចយេន បច្ចយោ. បច្ឆាជាតា – ទិដ្ឋិគតវិប្បយុត្តលោភសហគតា ខន្ធា ច លោភោ ច ទោមនស្សសហគតា ខន្ធា ច បដិឃញ្ច បុរេជាតស្ស ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – គន្ថសម្បយុត្តា ខន្ធា ច កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – គន្ថសម្បយុត្តា ខន្ធា ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (២)

គន្ថសម្បយុត្តោ ច គន្ថវិប្បយុត្តោ ច ធម្មា គន្ថសម្បយុត្តស្ស ច គន្ថវិប្បយុត្តស្ស ច ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – ទិដ្ឋិគតវិប្បយុត្តលោភសហគតោ ឯកោ ខន្ធោ ច លោភោ ច តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ…. សហជាតោ – ទោមនស្សសហគតោ ឯកោ ខន្ធោ ច បដិឃញ្ច តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ…. សហជាតោ – ទិដ្ឋិគតវិប្បយុត្តលោភសហគតោ ឯកោ ខន្ធោ ច វត្ថុ ច តិណ្ណន្នំ ខន្ធានំ លោភស្ស ច អត្ថិបច្ចយេន បច្ចយោ…បេ… ទ្វេ ខន្ធា ច…បេ…. សហជាតោ – ទោមនស្សសហគតោ ឯកោ ខន្ធោ ច វត្ថុ ច តិណ្ណន្នំ ខន្ធានំ បដិឃស្ស ច អត្ថិបច្ចយេន បច្ចយោ…បេ… ទ្វេ ខន្ធា ច…បេ…. (៣)