១. វិភង្គវារោ

ហេតុបច្ចយោ

៥៥. គន្ថសម្បយុត្តំ ធម្មំ បច្ចយា គន្ថសម្បយុត្តោ ធម្មោ ឧប្បជ្ជតិ ហេតុបច្ចយា… តីណិ (បដិច្ចសទិសា).

គន្ថវិប្បយុត្តំ ធម្មំ បច្ចយា គន្ថវិប្បយុត្តោ ធម្មោ ឧប្បជ្ជតិ ហេតុបច្ចយា – គន្ថវិប្បយុត្តំ ឯកំ ខន្ធំ បច្ចយា…បេ… បដិសន្ធិក្ខណេ…បេ… ខន្ធេ បច្ចយា វត្ថុ, វត្ថុំ បច្ចយា ខន្ធា, ឯកំ មហាភូតំ…បេ… វត្ថុំ បច្ចយា គន្ថវិប្បយុត្តា ខន្ធា. (១)

គន្ថវិប្បយុត្តំ ធម្មំ បច្ចយា គន្ថសម្បយុត្តោ ធម្មោ ឧប្បជ្ជតិ ហេតុបច្ចយា – វត្ថុំ បច្ចយា គន្ថសម្បយុត្តកា ខន្ធា, ទិដ្ឋិគតវិប្បយុត្តំ លោភំ បច្ចយា សម្បយុត្តកា ខន្ធា, បដិឃំ បច្ចយា សម្បយុត្តកា ខន្ធា. (២)

គន្ថវិប្បយុត្តំ ធម្មំ បច្ចយា គន្ថសម្បយុត្តោ ច គន្ថវិប្បយុត្តោ ច ធម្មា ឧប្បជ្ជន្តិ ហេតុបច្ចយា – វត្ថុំ បច្ចយា គន្ថសម្បយុត្តកា ខន្ធា, មហាភូតេ បច្ចយា ចិត្តសមុដ្ឋានំ រូបំ, ទិដ្ឋិគតវិប្បយុត្តំ លោភំ បច្ចយា សម្បយុត្តកា ខន្ធា ចិត្តសមុដ្ឋានញ្ច រូបំ, បដិឃំ បច្ចយា សម្បយុត្តកា ខន្ធា ចិត្តសមុដ្ឋានញ្ច រូបំ, វត្ថុំ បច្ចយា ទិដ្ឋិគតវិប្បយុត្តលោភសហគតា ខន្ធា ច លោភោ ច, វត្ថុំ បច្ចយា ទោមនស្សសហគតា ខន្ធា ច បដិឃញ្ច. (៣)

៥៦. គន្ថសម្បយុត្តញ្ច គន្ថវិប្បយុត្តញ្ច ធម្មំ បច្ចយា គន្ថសម្បយុត្តោ ធម្មោ ឧប្បជ្ជតិ ហេតុបច្ចយា – គន្ថសម្បយុត្តំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ…បេ… ទិដ្ឋិគតវិប្បយុត្តលោភសហគតំ ឯកំ ខន្ធញ្ច វត្ថុញ្ច លោភញ្ច បច្ចយា តយោ ខន្ធា …បេ… ទ្វេ ខន្ធេ…បេ… ទោមនស្សសហគតំ ឯកំ ខន្ធញ្ច វត្ថុញ្ច បដិឃញ្ច បច្ចយា តយោ ខន្ធា…បេ… ទ្វេ ខន្ធេ…បេ…. (១)

គន្ថសម្បយុត្តញ្ច គន្ថវិប្បយុត្តញ្ច ធម្មំ បច្ចយា គន្ថវិប្បយុត្តោ ធម្មោ ឧប្បជ្ជតិ ហេតុបច្ចយា – គន្ថសម្បយុត្តេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ, ទិដ្ឋិគតវិប្បយុត្តលោភសហគតេ ខន្ធេ ច លោភញ្ច បច្ចយា ចិត្តសមុដ្ឋានំ រូបំ, ទោមនស្សសហគតេ ខន្ធេ ច បដិឃញ្ច បច្ចយា ចិត្តសមុដ្ឋានំ រូបំ, ទិដ្ឋិគតវិប្បយុត្តលោភសហគតេ ខន្ធេ ច វត្ថុញ្ច បច្ចយា លោភោ, ទោមនស្សសហគតេ ខន្ធេ ច វត្ថុញ្ច បច្ចយា បដិឃំ. (២)

គន្ថសម្បយុត្តញ្ច គន្ថវិប្បយុត្តញ្ច ធម្មំ បច្ចយា គន្ថសម្បយុត្តោ ច គន្ថវិប្បយុត្តោ ច ធម្មា ឧប្បជ្ជន្តិ ហេតុបច្ចយា – គន្ថសម្បយុត្តំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ…បេ… គន្ថសម្បយុត្តេ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ, ទិដ្ឋិគតវិប្បយុត្តលោភសហគតំ ឯកំ ខន្ធញ្ច លោភញ្ច បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… ទោមនស្សសហគតំ ឯកំ ខន្ធញ្ច បដិឃញ្ច បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… ទិដ្ឋិគតវិប្បយុត្តលោភសហគតំ ឯកំ ខន្ធញ្ច វត្ថុញ្ច បច្ចយា តយោ ខន្ធា លោភោ ច…បេ… ទ្វេ ខន្ធេ…បេ… ទោមនស្សសហគតំ ឯកំ ខន្ធញ្ច វត្ថុញ្ច បច្ចយា តយោ ខន្ធា បដិឃញ្ច…បេ… ទ្វេ ខន្ធេ…បេ… (សំខិត្តំ). (៣)