១. វិភង្គវារោ

ហេតុបច្ចយោ

៤៥. គន្ថសម្បយុត្តំ ធម្មំ បដិច្ច គន្ថសម្បយុត្តោ ធម្មោ ឧប្បជ្ជតិ ហេតុបច្ចយា – គន្ថសម្បយុត្តំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ…. (១)

គន្ថសម្បយុត្តំ ធម្មំ បដិច្ច គន្ថវិប្បយុត្តោ ធម្មោ ឧប្បជ្ជតិ ហេតុបច្ចយា – គន្ថសម្បយុត្តេ ខន្ធេ បដិច្ច ចិត្តសមុដ្ឋានំ រូបំ, ទិដ្ឋិគតវិប្បយុត្តលោភសហគតេ ខន្ធេ បដិច្ច លោភោ ចិត្តសមុដ្ឋានញ្ច រូបំ, ទោមនស្សសហគតេ ខន្ធេ បដិច្ច បដិឃំ ចិត្តសមុដ្ឋានញ្ច រូបំ. (២)

គន្ថសម្បយុត្តំ ធម្មំ បដិច្ច គន្ថសម្បយុត្តោ ច គន្ថវិប្បយុត្តោ ច ធម្មា ឧប្បជ្ជន្តិ ហេតុបច្ចយា – គន្ថសម្បយុត្តំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… ទិដ្ឋិគតវិប្បយុត្តលោភសហគតំ ឯកំ ខន្ធំ បដិច្ច តយោ ខន្ធា លោភោ ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… ទោមនស្សសហគតំ ឯកំ ខន្ធំ បដិច្ច តយោ ខន្ធា បដិឃញ្ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

៤៦. គន្ថវិប្បយុត្តំ ធម្មំ បដិច្ច គន្ថវិប្បយុត្តោ ធម្មោ ឧប្បជ្ជតិ ហេតុបច្ចយា – គន្ថវិប្បយុត្តំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… ទិដ្ឋិគតវិប្បយុត្តំ លោភំ បដិច្ច ចិត្តសមុដ្ឋានំ រូបំ, បដិឃំ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ… ខន្ធេ បដិច្ច (សំខិត្តំ). (១)

គន្ថវិប្បយុត្តំ ធម្មំ បដិច្ច គន្ថសម្បយុត្តោ ធម្មោ ឧប្បជ្ជតិ ហេតុបច្ចយា – ទិដ្ឋិគតវិប្បយុត្តំ លោភំ បដិច្ច សម្បយុត្តកា ខន្ធា, បដិឃំ បដិច្ច សម្បយុត្តកា ខន្ធា. (២)

គន្ថវិប្បយុត្តំ ធម្មំ បដិច្ច គន្ថសម្បយុត្តោ ច គន្ថវិប្បយុត្តោ ច ធម្មា ឧប្បជ្ជន្តិ ហេតុបច្ចយា – ទិដ្ឋិគតវិប្បយុត្តំ លោភំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ, បដិឃំ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ. (៣)

៤៧. គន្ថសម្បយុត្តញ្ច គន្ថវិប្បយុត្តញ្ច ធម្មំ បដិច្ច គន្ថសម្បយុត្តោ ធម្មោ ឧប្បជ្ជតិ ហេតុបច្ចយា – ទិដ្ឋិគតវិប្បយុត្តលោភសហគតំ ឯកំ ខន្ធញ្ច លោភញ្ច បដិច្ច តយោ ខន្ធា…បេ… ទ្វេ ខន្ធេ…បេ… ទោមនស្សសហគតំ ឯកំ ខន្ធញ្ច បដិឃញ្ច បដិច្ច តយោ ខន្ធា…បេ… ទ្វេ ខន្ធេ…បេ…. (១)

គន្ថសម្បយុត្តញ្ច គន្ថវិប្បយុត្តញ្ច ធម្មំ បដិច្ច គន្ថវិប្បយុត្តោ ធម្មោ ឧប្បជ្ជតិ ហេតុបច្ចយា – គន្ថសម្បយុត្តេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ, ទិដ្ឋិគតវិប្បយុត្តលោភសហគតេ ខន្ធេ ច លោភញ្ច បដិច្ច ចិត្តសមុដ្ឋានំ រូបំ, ទោមនស្សសហគតេ ខន្ធេ ច បដិឃញ្ច បដិច្ច ចិត្តសមុដ្ឋានំ រូបំ. (២)

គន្ថសម្បយុត្តញ្ច គន្ថវិប្បយុត្តញ្ច ធម្មំ បដិច្ច គន្ថសម្បយុត្តោ ច គន្ថវិប្បយុត្តោ ច ធម្មា ឧប្បជ្ជន្តិ ហេតុបច្ចយា – ទិដ្ឋិគតវិប្បយុត្តលោភសហគតំ ឯកំ ខន្ធញ្ច លោភញ្ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… ទោមនស្សសហគតំ ឯកំ ខន្ធញ្ច បដិឃញ្ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

អារម្មណបច្ចយោ

៤៨. គន្ថសម្បយុត្តំ ធម្មំ បដិច្ច គន្ថសម្បយុត្តោ ធម្មោ ឧប្បជ្ជតិ អារម្មណបច្ចយា – គន្ថសម្បយុត្តំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ…. (១)

គន្ថសម្បយុត្តំ ធម្មំ បដិច្ច គន្ថវិប្បយុត្តោ ធម្មោ ឧប្បជ្ជតិ អារម្មណបច្ចយា – ទិដ្ឋិគតវិប្បយុត្តលោភសហគតេ ខន្ធេ បដិច្ច លោភោ, ទោមនស្សសហគតេ ខន្ធេ បដិច្ច បដិឃំ. (២)

គន្ថសម្បយុត្តំ ធម្មំ បដិច្ច គន្ថសម្បយុត្តោ ច គន្ថវិប្បយុត្តោ ច ធម្មា ឧប្បជ្ជន្តិ អារម្មណបច្ចយា – ទិដ្ឋិគតវិប្បយុត្តលោភសហគតំ ឯកំ ខន្ធំ បដិច្ច តយោ ខន្ធា លោភោ ច…បេ… ទ្វេ ខន្ធេ…បេ… ទោមនស្សសហគតំ ឯកំ ខន្ធំ បដិច្ច តយោ ខន្ធា បដិឃញ្ច…បេ… ទ្វេ ខន្ធេ…បេ…. (៣)

៤៩. គន្ថវិប្បយុត្តំ ធម្មំ បដិច្ច គន្ថវិប្បយុត្តោ ធម្មោ ឧប្បជ្ជតិ អារម្មណបច្ចយា – គន្ថវិប្បយុត្តំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ… វត្ថុំ បដិច្ច ខន្ធា. (១)

គន្ថវិប្បយុត្តំ ធម្មំ បដិច្ច គន្ថសម្បយុត្តោ ធម្មោ ឧប្បជ្ជតិ អារម្មណបច្ចយា – ទិដ្ឋិគតវិប្បយុត្តំ លោភំ បដិច្ច សម្បយុត្តកា ខន្ធា, បដិឃំ បដិច្ច សម្បយុត្តកា ខន្ធា. (២)

គន្ថសម្បយុត្តញ្ច គន្ថវិប្បយុត្តញ្ច ធម្មំ បដិច្ច គន្ថសម្បយុត្តោ ធម្មោ ឧប្បជ្ជតិ អារម្មណបច្ចយា – ទិដ្ឋិគតវិប្បយុត្តលោភសហគតំ ឯកំ ខន្ធញ្ច លោភញ្ច បដិច្ច តយោ ខន្ធា…បេ… ទ្វេ ខន្ធេ…បេ… ទោមនស្សសហគតំ ឯកំ ខន្ធញ្ច បដិឃញ្ច បដិច្ច តយោ ខន្ធា…បេ… ទ្វេ ខន្ធេ…បេ… (សំខិត្តំ). (១)