១. វិភង្គវារោ

ហេតុបច្ចយោ

១១. គន្ថំ ធម្មំ បច្ចយា គន្ថោ ធម្មោ ឧប្បជ្ជតិ ហេតុបច្ចយា… តីណិ (បដិច្ចវារសទិសោ).

នោគន្ថំ ធម្មំ បច្ចយា នោគន្ថោ ធម្មោ ឧប្បជ្ជតិ ហេតុបច្ចយា – នោគន្ថំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… ខន្ធេ បច្ចយា វត្ថុ, វត្ថុំ បច្ចយា ខន្ធា. ឯកំ មហាភូតំ…បេ… វត្ថុំ បច្ចយា នោគន្ថា ខន្ធា. (១)

នោគន្ថំ ធម្មំ បច្ចយា គន្ថោ ធម្មោ ឧប្បជ្ជតិ ហេតុបច្ចយា – នោគន្ថេ ខន្ធេ បច្ចយា គន្ថា, វត្ថុំ បច្ចយា គន្ថា. (២)

នោគន្ថំ ធម្មំ បច្ចយា គន្ថោ ច នោគន្ថោ ច ធម្មា ឧប្បជ្ជន្តិ ហេតុបច្ចយា – នោគន្ថំ ឯកំ ខន្ធំ បច្ចយា តយោ ខន្ធា គន្ថា ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… វត្ថុំ បច្ចយា គន្ថា សម្បយុត្តកា ច ខន្ធា. (៣)

១២. គន្ថញ្ច នោគន្ថញ្ច ធម្មំ បច្ចយា គន្ថោ ធម្មោ ឧប្បជ្ជតិ ហេតុបច្ចយា – សីលព្ពតបរាមាសំ កាយគន្ថញ្ច សម្បយុត្តកេ ច ខន្ធេ បច្ចយា អភិជ្ឈាកាយគន្ថោ (ចក្កំ). សីលព្ពតបរាមាសំ កាយគន្ថញ្ច វត្ថុញ្ច បច្ចយា អភិជ្ឈាកាយគន្ថោ (ចក្កំ). (១)

គន្ថញ្ច នោគន្ថញ្ច ធម្មំ បច្ចយា នោគន្ថោ ធម្មោ ឧប្បជ្ជតិ ហេតុបច្ចយា – នោគន្ថំ ឯកំ ខន្ធញ្ច គន្ថេ ច បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… គន្ថេ ច វត្ថុញ្ច បច្ចយា នោគន្ថា ខន្ធា. (២)

គន្ថញ្ច នោគន្ថញ្ច ធម្មំ បច្ចយា គន្ថោ ច នោគន្ថោ ច ធម្មា ឧប្បជ្ជន្តិ ហេតុបច្ចយា – នោគន្ថំ ឯកំ ខន្ធញ្ច សីលព្ពតបរាមាសំ កាយគន្ថញ្ច បច្ចយា តយោ ខន្ធា អភិជ្ឈាកាយគន្ថោ ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… (ចក្កំ). សីលព្ពតបរាមាសំ កាយគន្ថញ្ច វត្ថុញ្ច បច្ចយា អភិជ្ឈាកាយគន្ថោ ច សម្បយុត្តកា ច ខន្ធា (ចក្កំ). (៣)