១. វិភង្គវារោ

ហេតុបច្ចយោ

១០៦. សញ្ញោជនោ ចេវ សញ្ញោជនសម្បយុត្តោ ច ធម្មោ សញ្ញោជនស្ស ចេវ សញ្ញោជនសម្បយុត្តស្ស ច ធម្មស្ស ហេតុបច្ចយេន បច្ចយោ – កាមរាគសញ្ញោជនោ ទិដ្ឋិសញ្ញោជនស្ស អវិជ្ជាសញ្ញោជនស្ស ហេតុបច្ចយេន បច្ចយោ (ចក្កំ). (១)

សញ្ញោជនោ ចេវ សញ្ញោជនសម្បយុត្តោ ច ធម្មោ សញ្ញោជនសម្បយុត្តស្ស ចេវ នោ ច សញ្ញោជនស្ស ធម្មស្ស ហេតុបច្ចយេន បច្ចយោ – សញ្ញោជនា ចេវ សញ្ញោជនសម្បយុត្តា ច ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (២)

សញ្ញោជនោ ចេវ សញ្ញោជនសម្បយុត្តោ ច ធម្មោ សញ្ញោជនស្ស ចេវ សញ្ញោជនសម្បយុត្តស្ស ច សញ្ញោជនសម្បយុត្តស្ស ចេវ នោ ច សញ្ញោជនស្ស ច ធម្មស្ស ហេតុបច្ចយេន បច្ចយោ – កាមរាគសញ្ញោជនោ ទិដ្ឋិសញ្ញោជនស្ស អវិជ្ជាសញ្ញោជនស្ស សម្បយុត្តកានញ្ច ខន្ធានំ ហេតុបច្ចយេន បច្ចយោ (ចក្កំ). (៣)

អារម្មណបច្ចយោ

១០៧. សញ្ញោជនោ ចេវ សញ្ញោជនសម្បយុត្តោ ច ធម្មោ សញ្ញោជនស្ស ចេវ សញ្ញោជនសម្បយុត្តស្ស ច ធម្មស្ស អារម្មណបច្ចយេន បច្ចយោ – សញ្ញោជនេ អារព្ភ សញ្ញោជនា ឧប្បជ្ជន្តិ. (មូលំ កាតព្ពំ) សញ្ញោជនេ អារព្ភ សញ្ញោជនសម្បយុត្តា ចេវ នោ ច សញ្ញោជនា ខន្ធា ឧប្បជ្ជន្តិ. (មូលំ កាតព្ពំ) សញ្ញោជនេ អារព្ភ សញ្ញោជនា ច សញ្ញោជនសម្បយុត្តកា ច ខន្ធា ឧប្បជ្ជន្តិ. (១)

សញ្ញោជនសម្បយុត្តោ ចេវ នោ ច សញ្ញោជនោ ធម្មោ សញ្ញោជនសម្បយុត្តស្ស ចេវ នោ ច សញ្ញោជនស្ស ធម្មស្ស អារម្មណបច្ចយេន បច្ចយោ – សញ្ញោជនសម្បយុត្តេ ចេវ នោ ច សញ្ញោជនេ ខន្ធេ អារព្ភ សញ្ញោជនសម្បយុត្តា ចេវ នោ ច សញ្ញោជនា ខន្ធា ឧប្បជ្ជន្តិ. (១)

សញ្ញោជនសម្បយុត្តោ ចេវ នោ ច សញ្ញោជនោ ធម្មោ សញ្ញោជនស្ស ចេវ សញ្ញោជនសម្បយុត្តស្ស ច ធម្មស្ស អារម្មណបច្ចយេន បច្ចយោ – សញ្ញោជនសម្បយុត្តេ ចេវ នោ ច សញ្ញោជនេ ខន្ធេ អារព្ភ សញ្ញោជនា ឧប្បជ្ជន្តិ. (២)

សញ្ញោជនសម្បយុត្តោ ចេវ នោ ច សញ្ញោជនោ ធម្មោ សញ្ញោជនស្ស ចេវ សញ្ញោជនសម្បយុត្តស្ស ច សញ្ញោជនសម្បយុត្តស្ស ចេវ នោ ច សញ្ញោជនស្ស ច ធម្មស្ស អារម្មណបច្ចយេន បច្ចយោ – សញ្ញោជនសម្បយុត្តេ ចេវ នោ ច សញ្ញោជនេ ខន្ធេ អារព្ភ សញ្ញោជនា ច សញ្ញោជនសម្បយុត្តកា ច ខន្ធា ឧប្បជ្ជន្តិ. (៣)

សញ្ញោជនោ ចេវ សញ្ញោជនសម្បយុត្តោ ច សញ្ញោជនសម្បយុត្តោ ចេវ នោ ច សញ្ញោជនោ ច ធម្មា សញ្ញោជនស្ស ចេវ សញ្ញោជនសម្បយុត្តស្ស ច ធម្មស្ស អារម្មណបច្ចយេន បច្ចយោ… តីណិ.

អធិបតិបច្ចយោ

១០៨. សញ្ញោជនោ ចេវ សញ្ញោជនសម្បយុត្តោ ច ធម្មោ សញ្ញោជនស្ស ចេវ សញ្ញោជនសម្បយុត្តស្ស ច ធម្មស្ស អធិបតិបច្ចយេន បច្ចយោ – អារម្មណាធិបតិ… តីណិ.

សញ្ញោជនសម្បយុត្តោ ចេវ នោ ច សញ្ញោជនោ ធម្មោ សញ្ញោជនសម្បយុត្តស្ស ចេវ នោ ច សញ្ញោជនស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ… តីណិ (ឥមាសុ តីសុបិ បញ្ហាសុ អារម្មណាធិបតិបិ សហជាតាធិបតិបិ កាតព្ពា).

សញ្ញោជនោ ចេវ សញ្ញោជនសម្បយុត្តោ ច សញ្ញោជនសម្បយុត្តោ ចេវ នោ ច សញ្ញោជនោ ច ធម្មា សញ្ញោជនស្ស ចេវ សញ្ញោជនសម្បយុត្តស្ស ច ធម្មស្ស អធិបតិបច្ចយេន បច្ចយោ – អារម្មណាធិបតិ… តីណិ.

អនន្តរបច្ចយាទិ

១០៩. សញ្ញោជនោ ចេវ សញ្ញោជនសម្បយុត្តោ ច ធម្មោ សញ្ញោជនស្ស ចេវ សញ្ញោជនសម្បយុត្តស្ស ច ធម្មស្ស អនន្តរបច្ចយេន បច្ចយោ… នវ (និន្នានាករណំ, វិភជនា នត្ថិ. អារម្មណសទិសា)… សមនន្តរបច្ចយេន បច្ចយោ… នវ… សហជាតបច្ចយេន បច្ចយោ… នវ… អញ្ញមញ្ញបច្ចយេន បច្ចយោ… នវ… និស្សយបច្ចយេន បច្ចយោ… នវ… ឧបនិស្សយបច្ចយេន បច្ចយោ… នវ (អារម្មណនយេន កាតព្ពា)… អាសេវនបច្ចយេន បច្ចយោ… នវ.

កម្មបច្ចយាទិ

១១០. សញ្ញោជនសម្បយុត្តោ ចេវ នោ ច សញ្ញោជនោ ធម្មោ សញ្ញោជនសម្បយុត្តស្ស ចេវ នោ ច សញ្ញោជនស្ស ធម្មស្ស កម្មបច្ចយេន បច្ចយោ… តីណិ… អាហារបច្ចយេន បច្ចយោ… តីណិ… ឥន្ទ្រិយបច្ចយេន បច្ចយោ… តីណិ… ឈានបច្ចយេន បច្ចយោ… តីណិ… មគ្គបច្ចយេន បច្ចយោ… នវ … សម្បយុត្តបច្ចយេន បច្ចយោ… នវ… អត្ថិបច្ចយេន បច្ចយោ … នវ… នត្ថិបច្ចយេន បច្ចយោ… នវ… វិគតបច្ចយេន បច្ចយោ… នវ… អវិគតបច្ចយេន បច្ចយោ… នវ.