១. វិភង្គវារោ

នហេតុបច្ចយោ

៥. សញ្ញោជនំ ធម្មំ បដិច្ច សញ្ញោជនោ ធម្មោ ឧប្បជ្ជតិ នហេតុបច្ចយា – វិចិកិច្ឆាសញ្ញោជនំ បដិច្ច អវិជ្ជាសញ្ញោជនំ. (១)

នោសញ្ញោជនំ ធម្មំ បដិច្ច នោសញ្ញោជនោ ធម្មោ ឧប្បជ្ជតិ នហេតុបច្ចយា – អហេតុកំ នោសញ្ញោជនំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… (យាវ អសញ្ញសត្តា). (១)

នោសញ្ញោជនំ ធម្មំ បដិច្ច សញ្ញោជនោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច អវិជ្ជាសញ្ញោជនំ. (២)

សញ្ញោជនញ្ច នោសញ្ញោជនញ្ច ធម្មំ បដិច្ច សញ្ញោជនោ ធម្មោ ឧប្បជ្ជតិ នហេតុបច្ចយា – វិចិកិច្ឆាសញ្ញោជនញ្ច សម្បយុត្តកេ ច ខន្ធេ បដិច្ច អវិជ្ជាសញ្ញោជនំ. (៣)

(សំខិត្តំ. អាសវគោច្ឆកសទិសំ. នអារម្មណាបិ សព្ពេ ឧទ្ធរិតព្ពា.)