១. វិភង្គវារោ

ហេតុបច្ចយោ

៩៧. សញ្ញោជនញ្ចេវ សញ្ញោជនិយញ្ច ធម្មំ បដិច្ច សញ្ញោជនោ ចេវ សញ្ញោជនិយោ ច ធម្មា ឧប្បជ្ជន្តិ ហេតុបច្ចយា – កាមរាគសញ្ញោជនំ បដិច្ច ទិដ្ឋិសញ្ញោជនំ អវិជ្ជាសញ្ញោជនំ (ចក្កំ). (១)

សញ្ញោជនញ្ចេវ សញ្ញោជនិយញ្ច ធម្មំ បដិច្ច សញ្ញោជនិយោ ចេវ នោ ច សញ្ញោជនោ ធម្មោ ឧប្បជ្ជតិ ហេតុបច្ចយា – សញ្ញោជនេ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ. (២)

សញ្ញោជនញ្ចេវ សញ្ញោជនិយញ្ច ធម្មំ បដិច្ច សញ្ញោជនោ ចេវ សញ្ញោជនិយោ ច សញ្ញោជនិយោ ចេវ នោ ច សញ្ញោជនោ ច ធម្មា ឧប្បជ្ជន្តិ ហេតុបច្ចយា – កាមរាគសញ្ញោជនំ បដិច្ច ទិដ្ឋិសញ្ញោជនំ អវិជ្ជាសញ្ញោជនំ សម្បយុត្តកា ខន្ធា ចិត្តសមុដ្ឋានញ្ច រូបំ (ចក្កំ). (៣)

៩៨. សញ្ញោជនិយញ្ចេវ នោ ច សញ្ញោជនំ ធម្មំ បដិច្ច សញ្ញោជនិយោ ចេវ នោ ច សញ្ញោជនោ ធម្មោ ឧប្បជ្ជតិ ហេតុបច្ចយា – សញ្ញោជនិយញ្ចេវ នោ ច សញ្ញោជនំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… (យាវ មហាភូតា). (១)

សញ្ញោជនិយញ្ចេវ នោ ច សញ្ញោជនំ ធម្មំ បដិច្ច សញ្ញោជនោ ចេវ សញ្ញោជនិយោ ច ធម្មោ ឧប្បជ្ជតិ ហេតុបច្ចយា – សញ្ញោជនិយេ ចេវ នោ ច សញ្ញោជនេ ខន្ធេ បដិច្ច សញ្ញោជនា. (២)

សញ្ញោជនិយញ្ចេវ នោ ច សញ្ញោជនំ ធម្មំ បដិច្ច សញ្ញោជនោ ចេវ សញ្ញោជនិយោ ច សញ្ញោជនិយោ ចេវ នោ ច សញ្ញោជនោ ច ធម្មា ឧប្បជ្ជន្តិ ហេតុបច្ចយា – សញ្ញោជនិយញ្ចេវ នោ ច សញ្ញោជនំ ឯកំ ខន្ធំ បដិច្ច តយោ ខន្ធា សញ្ញោជនា ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

៩៩. សញ្ញោជនញ្ចេវ សញ្ញោជនិយញ្ច សញ្ញោជនិយញ្ចេវ នោ ច សញ្ញោជនំ ធម្មំ បដិច្ច សញ្ញោជនោ ចេវ សញ្ញោជនិយោ ច ធម្មោ ឧប្បជ្ជតិ ហេតុបច្ចយា – កាមរាគសញ្ញោជនញ្ច សម្បយុត្តកេ ច ខន្ធេ បដិច្ច ទិដ្ឋិសញ្ញោជនំ អវិជ្ជាសញ្ញោជនំ (ចក្កំ). (១)

សញ្ញោជនញ្ចេវ សញ្ញោជនិយញ្ច សញ្ញោជនិយញ្ចេវ នោ ច សញ្ញោជនញ្ច ធម្មំ បដិច្ច សញ្ញោជនិយោ ចេវ នោ ច សញ្ញោជនោ ធម្មោ ឧប្បជ្ជតិ ហេតុបច្ចយា – សញ្ញោជនិយញ្ចេវ នោ ច សញ្ញោជនំ ឯកំ ខន្ធញ្ច សញ្ញោជនេ ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (២)

សញ្ញោជនញ្ចេវ សញ្ញោជនិយញ្ច សញ្ញោជនិយញ្ចេវ នោ ច សញ្ញោជនញ្ច ធម្មំ បដិច្ច សញ្ញោជនោ ចេវ សញ្ញោជនិយោ ច សញ្ញោជនិយោ ចេវ នោ ច សញ្ញោជនោ ច ធម្មា ឧប្បជ្ជន្តិ ហេតុបច្ចយា – សញ្ញោជនិយញ្ចេវ នោ ច សញ្ញោជនំ ឯកំ ខន្ធញ្ច កាមរាគសញ្ញោជនញ្ច បដិច្ច តយោ ខន្ធា ទិដ្ឋិសញ្ញោជនំ អវិជ្ជាសញ្ញោជនំ ចិត្តសមុដ្ឋានញ្ច រូបំ…បេ… ទ្វេ ខន្ធេ ច…បេ… (ចក្កំ ពន្ធិតព្ពំ). (៣)

(សញ្ញោជនគោច្ឆកេ បឋមទុកសទិសំ.)

(ឯវំ ឥមម្បិ ទុកំ វិត្ថារេតព្ពំ, និន្នានាករណំ ឋបេត្វា លោកុត្តរំ).

សញ្ញោជនសញ្ញោជនិយទុកំ និដ្ឋិតំ.