១. វិភង្គវារោ

នហេតុបច្ចយោ

៥៧. សញ្ញោជនសម្បយុត្តំ ធម្មំ បច្ចយា សញ្ញោជនសម្បយុត្តោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ខន្ធេ បច្ចយា វិចិកិច្ឆាសហគតោ មោហោ. (១)

សញ្ញោជនសម្បយុត្តំ ធម្មំ បច្ចយា សញ្ញោជនវិប្បយុត្តោ ធម្មោ ឧប្បជ្ជតិ នហេតុបច្ចយា – ឧទ្ធច្ចសហគតេ ខន្ធេ បច្ចយា ឧទ្ធច្ចសហគតោ មោហោ. (២)

៥៨. សញ្ញោជនវិប្បយុត្តំ ធម្មំ បច្ចយា សញ្ញោជនវិប្បយុត្តោ ធម្មោ ឧប្បជ្ជតិ នហេតុបច្ចយា – អហេតុកំ សញ្ញោជនវិប្បយុត្តំ ឯកំ ខន្ធំ…បេ… (យាវ អសញ្ញសត្តា), ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ, វត្ថុំ បច្ចយា អហេតុកា សញ្ញោជនវិប្បយុត្តា ខន្ធា ច ឧទ្ធច្ចសហគតោ មោហោ ច. (១)

សញ្ញោជនវិប្បយុត្តំ ធម្មំ បច្ចយា សញ្ញោជនសម្បយុត្តោ ធម្មោ ឧប្បជ្ជតិ នហេតុបច្ចយា – វត្ថុំ បច្ចយា វិចិកិច្ឆាសហគតោ មោហោ. (២)

៥៩. សញ្ញោជនសម្បយុត្តញ្ច សញ្ញោជនវិប្បយុត្តញ្ច ធម្មំ បច្ចយា សញ្ញោជនសម្បយុត្តោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ មោហោ. (១)

សញ្ញោជនសម្បយុត្តញ្ច សញ្ញោជនវិប្បយុត្តញ្ច ធម្មំ បច្ចយា សញ្ញោជនវិប្បយុត្តោ ធម្មោ ឧប្បជ្ជតិ នហេតុបច្ចយា – ឧទ្ធច្ចសហគតេ ខន្ធេ ច វត្ថុញ្ច បច្ចយា ឧទ្ធច្ចសហគតោ មោហោ (សំខិត្តំ). (២)