១. វិភង្គវារោ

ហេតុបច្ចយោ

១. សញ្ញោជនំ ធម្មំ បដិច្ច សញ្ញោជនោ ធម្មោ ឧប្បជ្ជតិ ហេតុបច្ចយា – កាមរាគសញ្ញោជនំ បដិច្ច ទិដ្ឋិសញ្ញោជនំ អវិជ្ជាសញ្ញោជនំ, កាមរាគសញ្ញោជនំ បដិច្ច សីលព្ពតបរាមាសសញ្ញោជនំ អវិជ្ជាសញ្ញោជនំ, កាមរាគសញ្ញោជនំ បដិច្ច មានសញ្ញោជនំ អវិជ្ជាសញ្ញោជនំ, កាមរាគសញ្ញោជនំ បដិច្ច អវិជ្ជាសញ្ញោជនំ, បដិឃសញ្ញោជនំ បដិច្ច ឥស្សាសញ្ញោជនំ អវិជ្ជាសញ្ញោជនំ, បដិឃសញ្ញោជនំ បដិច្ច មច្ឆរិយសញ្ញោជនំ អវិជ្ជាសញ្ញោជនំ, បដិឃសញ្ញោជនំ បដិច្ច អវិជ្ជាសញ្ញោជនំ, មានសញ្ញោជនំ បដិច្ច ភវរាគសញ្ញោជនំ អវិជ្ជាសញ្ញោជនំ, ភវរាគសញ្ញោជនំ បដិច្ច អវិជ្ជាសញ្ញោជនំ, វិចិកិច្ឆាសញ្ញោជនំ បដិច្ច អវិជ្ជាសញ្ញោជនំ. (១)

សញ្ញោជនំ ធម្មំ បដិច្ច នោសញ្ញោជនោ ធម្មោ ឧប្បជ្ជតិ ហេតុបច្ចយា – សញ្ញោជនេ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ. (២)

សញ្ញោជនំ ធម្មំ បដិច្ច សញ្ញោជនោ ច នោសញ្ញោជនោ ច ធម្មា ឧប្បជ្ជន្តិ ហេតុបច្ចយា – កាមរាគសញ្ញោជនំ បដិច្ច ទិដ្ឋិសញ្ញោជនំ អវិជ្ជាសញ្ញោជនំ សម្បយុត្តកា ច ខន្ធា ចិត្តសមុដ្ឋានញ្ច រូបំ (ចក្កំ ពន្ធិតព្ពំ). (៣)

២. នោសញ្ញោជនំ ធម្មំ បដិច្ច នោសញ្ញោជនោ ធម្មោ ឧប្បជ្ជតិ ហេតុបច្ចយា – នោសញ្ញោជនំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា, ឯកំ មហាភូតំ…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ. (១)

នោសញ្ញោជនំ ធម្មំ បដិច្ច សញ្ញោជនោ ធម្មោ ឧប្បជ្ជតិ ហេតុបច្ចយា – នោសញ្ញោជនេ ខន្ធេ បដិច្ច សញ្ញោជនា. (២)

នោសញ្ញោជនំ ធម្មំ បដិច្ច សញ្ញោជនោ ច នោសញ្ញោជនោ ច ធម្មា ឧប្បជ្ជន្តិ ហេតុបច្ចយា – នោសញ្ញោជនំ ឯកំ ខន្ធំ បដិច្ច តយោ ខន្ធា សញ្ញោជនា ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

៣. សញ្ញោជនញ្ច នោសញ្ញោជនញ្ច ធម្មំ បដិច្ច សញ្ញោជនោ ធម្មោ ឧប្បជ្ជតិ ហេតុបច្ចយា – កាមរាគសញ្ញោជនញ្ច សម្បយុត្តកេ ច ខន្ធេ បដិច្ច ទិដ្ឋិសញ្ញោជនំ អវិជ្ជាសញ្ញោជនំ (ចក្កំ ពន្ធិតព្ពំ). (១)

សញ្ញោជនញ្ច នោសញ្ញោជនញ្ច ធម្មំ បដិច្ច នោសញ្ញោជនោ ធម្មោ ឧប្បជ្ជតិ ហេតុបច្ចយា – នោសញ្ញោជនំ ឯកំ ខន្ធញ្ច សញ្ញោជនេ ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ ច…បេ…. (២)

សញ្ញោជនញ្ច នោសញ្ញោជនញ្ច ធម្មំ បដិច្ច សញ្ញោជនោ ច នោសញ្ញោជនោ ច ធម្មា ឧប្បជ្ជន្តិ ហេតុបច្ចយា – នោសញ្ញោជនំ ឯកំ ខន្ធញ្ច កាមរាគសញ្ញោជនញ្ច បដិច្ច តយោ ខន្ធា ទិដ្ឋិសញ្ញោជនំ អវិជ្ជាសញ្ញោជនំ ចិត្តសមុដ្ឋានញ្ច រូបំ…បេ… (ចក្កំ ពន្ធិតព្ពំ). (៣)

(អារម្មណបច្ចយេ រូបំ នត្ថិ. អធិបតិបច្ចយោ ហេតុសទិសោ, វិចិកិច្ឆាសញ្ញោជនំ នត្ថិ.) អនន្តរបច្ចយា…បេ… អវិគតបច្ចយា.