១. វិភង្គវារោ

ហេតុបច្ចយោ

១៥. សញ្ញោជនោ ធម្មោ សញ្ញោជនស្ស ធម្មស្ស ហេតុបច្ចយេន បច្ចយោ – សញ្ញោជនា ហេតូ សម្បយុត្តកានំ សញ្ញោជនានំ ហេតុបច្ចយេន បច្ចយោ. (១)

សញ្ញោជនោ ធម្មោ នោសញ្ញោជនស្ស ធម្មស្ស ហេតុបច្ចយេន បច្ចយោ – សញ្ញោជនា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (២)

សញ្ញោជនោ ធម្មោ សញ្ញោជនស្ស ច នោសញ្ញោជនស្ស ច ធម្មស្ស ហេតុបច្ចយេន បច្ចយោ – សញ្ញោជនា ហេតូ សម្បយុត្តកានំ ខន្ធានំ សញ្ញោជនានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

១៦. នោសញ្ញោជនោ ធម្មោ នោសញ្ញោជនស្ស ធម្មស្ស ហេតុបច្ចយេន បច្ចយោ – នោសញ្ញោជនា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

អារម្មណបច្ចយោ

១៧. សញ្ញោជនោ ធម្មោ សញ្ញោជនស្ស ធម្មស្ស អារម្មណបច្ចយេន បច្ចយោ – សញ្ញោជនេ អារព្ភ សញ្ញោជនា ឧប្បជ្ជន្តិ. (មូលំ កាតព្ពំ) សញ្ញោជនេ អារព្ភ នោសញ្ញោជនា ខន្ធា ឧប្បជ្ជន្តិ. (មូលំ កាតព្ពំ) សញ្ញោជនេ អារព្ភ សញ្ញោជនា ច សម្បយុត្តកា ច ខន្ធា ឧប្បជ្ជន្តិ. (៣)

១៨. នោសញ្ញោជនោ ធម្មោ នោសញ្ញោជនស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ…បេ… ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ…បេ… ឈានា…បេ… អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ…បេ… និព្ពានំ បច្ចវេក្ខន្តិ, និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ; អរិយា នោសញ្ញោជនេ បហីនេ កិលេសេ…បេ… វិក្ខម្ភិតេ កិលេសេ…បេ… បុព្ពេ…បេ… ចក្ខុំ …បេ… វត្ថុំ នោសញ្ញោជនេ ខន្ធេ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, ចេតោបរិយញាណេន នោសញ្ញោជនចិត្តសមង្គិស្ស ចិត្តំ ជានាតិ, អាកាសានញ្ចាយតនំ វិញ្ញាណញ្ចាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស…បេ… រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… នោសញ្ញោជនា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

នោសញ្ញោជនោ ធម្មោ សញ្ញោជនស្ស ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ…បេ… បុព្ពេ…បេ… ឈានា…បេ… ចក្ខុំ…បេ… វត្ថុំ នោសញ្ញោជនេ ខន្ធេ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. (២)

នោសញ្ញោជនោ ធម្មោ សញ្ញោជនស្ស ច នោសញ្ញោជនស្ស ច ធម្មស្ស អារម្មណបច្ចយេន បច្ចយោ – ទានំ ទត្វា សីលំ…បេ… ឧបោសថកម្មំ…បេ… បុព្ពេ…បេ… ឈានា…បេ… ចក្ខុំ…បេ… វត្ថុំ នោសញ្ញោជនេ ខន្ធេ អស្សាទេតិ អភិនន្ទតិ, តំ អារព្ភ សញ្ញោជនា ច សញ្ញោជនសម្បយុត្តកា ច ខន្ធា ឧប្បជ្ជន្តិ. (៣)

សញ្ញោជនោ ច នោសញ្ញោជនោ ច ធម្មា សញ្ញោជនស្ស ធម្មស្ស អារម្មណបច្ចយេន បច្ចយោ… តីណិ (អារព្ភយេវ កាតព្ពា).

អធិបតិបច្ចយោ

១៩. សញ្ញោជនោ ធម្មោ សញ្ញោជនស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – សញ្ញោជនំ គរុំ កត្វា…បេ… តីណិ (គរុការម្មណា).

នោសញ្ញោជនោ ធម្មោ នោសញ្ញោជនស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ ទត្វា សីលំ…បេ… តីណិ (តិណ្ណម្បិ អារម្មណាធិបតិ, សហជាតាធិបតិបិ កាតព្ពា, វិភជិតព្ពា តីណិបិ).

សញ្ញោជនោ ច នោសញ្ញោជនោ ច ធម្មា សញ្ញោជនស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – សញ្ញោជនេ ច សម្បយុត្តកេ ច ខន្ធេ គរុំ កត្វា…បេ… តីណិ.

អនន្តរបច្ចយោ

២០. សញ្ញោជនោ ធម្មោ សញ្ញោជនស្ស ធម្មស្ស អនន្តរបច្ចយេន បច្ចយោ – បុរិមា បុរិមា សញ្ញោជនា បច្ឆិមានំ បច្ឆិមានំ សញ្ញោជនានំ អនន្តរបច្ចយេន បច្ចយោ… តីណិ.

នោសញ្ញោជនោ ធម្មោ នោសញ្ញោជនស្ស ធម្មស្ស អនន្តរបច្ចយេន បច្ចយោ – បុរិមា បុរិមា នោសញ្ញោជនា ខន្ធា បច្ឆិមានំ…បេ… ផលសមាបត្តិយា អនន្តរបច្ចយេន បច្ចយោ. (១)

នោសញ្ញោជនោ ធម្មោ សញ្ញោជនស្ស ធម្មស្ស អនន្តរបច្ចយេន បច្ចយោ – បុរិមា បុរិមា នោសញ្ញោជនា ខន្ធា បច្ឆិមានំ បច្ឆិមានំ សញ្ញោជនានំ អនន្តរបច្ចយេន បច្ចយោ; អាវជ្ជនា សញ្ញោជនានំ អនន្តរបច្ចយេន បច្ចយោ (ឯវំ ទ្វេបិ កាតព្ពា). (៣)

សញ្ញោជនោ ច នោសញ្ញោជនោ ច ធម្មា សញ្ញោជនស្ស ធម្មស្ស អនន្តរបច្ចយេន បច្ចយោ… តីណិ.

សមនន្តរបច្ចយាទិ

២១. សញ្ញោជនោ ធម្មោ សញ្ញោជនស្ស ធម្មស្ស សមនន្តរបច្ចយេន បច្ចយោ… នវ… សហជាតបច្ចយេន បច្ចយោ… នវ… អញ្ញមញ្ញបច្ចយេន បច្ចយោ… នវ… និស្សយបច្ចយេន បច្ចយោ… នវ.

ឧបនិស្សយបច្ចយោ

២២. សញ្ញោជនោ ធម្មោ សញ្ញោជនស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សញ្ញោជនា សញ្ញោជនានំ ឧបនិស្សយបច្ចយេន បច្ចយោ (ឯវំ តីណិបិ).

២៣. នោសញ្ញោជនោ ធម្មោ នោសញ្ញោជនស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ; សីលំ…បេ… បញ្ញំ, រាគំ…បេ… បត្ថនំ…បេ… សេនាសនំ ឧបនិស្សាយ ទានំ ទេតិ…បេ… សង្ឃំ ភិន្ទតិ; សទ្ធា…បេ… សេនាសនំ សទ្ធាយ…បេ… ផលសមាបត្តិយា ឧបនិស្សយបច្ចយេន បច្ចយោ. (១)

នោសញ្ញោជនោ ធម្មោ សញ្ញោជនស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ មានំ ជប្បេតិ, ទិដ្ឋិំ គណ្ហាតិ; សីលំ…បេ… សេនាសនំ ឧបនិស្សាយ បាណំ ហនតិ…បេ… សង្ឃំ ភិន្ទតិ; សទ្ធា…បេ… សេនាសនំ រាគស្ស…បេ… បត្ថនាយ ឧបនិស្សយបច្ចយេន បច្ចយោ. (២)

នោសញ្ញោជនោ ធម្មោ សញ្ញោជនស្ស ច នោសញ្ញោជនស្ស ច ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ មានំ ជប្បេតិ, ទិដ្ឋិំ គណ្ហាតិ; សីលំ…បេ… សេនាសនំ ឧបនិស្សាយ បាណំ ហនតិ…បេ… សង្ឃំ ភិន្ទតិ; សទ្ធា…បេ… សេនាសនំ សញ្ញោជនានំ សម្បយុត្តកានញ្ច ខន្ធានំ ឧបនិស្សយបច្ចយេន បច្ចយោ. (៣)

សញ្ញោជនោ ច នោសញ្ញោជនោ ច ធម្មា សញ្ញោជនស្ស ធម្មស្ស ឧបនិស្សយបច្ចយេន បច្ចយោ… តីណិ.

បុរេជាតបច្ចយោ

២៤. នោសញ្ញោជនោ ធម្មោ នោសញ្ញោជនស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ…. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ នោសញ្ញោជនានំ ខន្ធានំ បុរេជាតបច្ចយេន បច្ចយោ. (១)

នោសញ្ញោជនោ ធម្មោ សញ្ញោជនស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. វត្ថុបុរេជាតំ – វត្ថុ សញ្ញោជនានំ បុរេជាតបច្ចយេន បច្ចយោ. (២)

នោសញ្ញោជនោ ធម្មោ សញ្ញោជនស្ស ច នោសញ្ញោជនស្ស ច ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អស្សាទេតិ, អភិនន្ទតិ, តំ អារព្ភ សញ្ញោជនា ច សម្បយុត្តកា ច ខន្ធា ឧប្បជ្ជន្តិ. វត្ថុបុរេជាតំ – វត្ថុ សញ្ញោជនានំ សម្បយុត្តកានញ្ច ខន្ធានំ បុរេជាតបច្ចយេន បច្ចយោ. (៣)

បច្ឆាជាតបច្ចយោ

២៥. សញ្ញោជនោ ធម្មោ នោសញ្ញោជនស្ស ធម្មស្ស បច្ឆាជាតបច្ចយេន បច្ចយោ… ឯកំ.

នោសញ្ញោជនោ ធម្មោ នោសញ្ញោជនស្ស ធម្មស្ស បច្ឆាជាតបច្ចយេន បច្ចយោ…បេ…. (១)

សញ្ញោជនោ ច នោសញ្ញោជនោ ច ធម្មា នោសញ្ញោជនស្ស ធម្មស្ស បច្ឆាជាតបច្ចយេន បច្ចយោ…បេ…. (១)

អាសេវនបច្ចយោ

២៦. សញ្ញោជនោ ធម្មោ សញ្ញោជនស្ស ធម្មស្ស អាសេវនបច្ចយេន បច្ចយោ… នវ.

កម្មបច្ចយាទិ

២៧. នោសញ្ញោជនោ ធម្មោ នោសញ្ញោជនស្ស ធម្មស្ស កម្មបច្ចយេន បច្ចយោ… តីណិ… វិបាកបច្ចយេន បច្ចយោ… ឯកំ… អាហារបច្ចយេន បច្ចយោ… តីណិ… ឥន្ទ្រិយបច្ចយេន បច្ចយោ… តីណិ… ឈានបច្ចយេន បច្ចយោ… តីណិ… មគ្គបច្ចយេន បច្ចយោ… នវ… សម្បយុត្តបច្ចយេន បច្ចយោ… នវ.

វិប្បយុត្តបច្ចយោ

២៨. សញ្ញោជនោ ធម្មោ នោសញ្ញោជនស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (វិភជិតព្ពំ). (១)

នោសញ្ញោជនោ ធម្មោ នោសញ្ញោជនស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ (វិភជិតព្ពំ). (១)

នោសញ្ញោជនោ ធម្មោ សញ្ញោជនស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ សញ្ញោជនានំ វិប្បយុត្តបច្ចយេន បច្ចយោ. (២)

នោសញ្ញោជនោ ធម្មោ សញ្ញោជនស្ស ច នោសញ្ញោជនស្ស ច ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ សញ្ញោជនានំ សម្បយុត្តកានញ្ច ខន្ធានំ វិប្បយុត្តបច្ចយេន បច្ចយោ. (៣)

សញ្ញោជនោ ច នោសញ្ញោជនោ ច ធម្មា នោសញ្ញោជនស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ (វិភជិតព្ពំ). (១)

អត្ថិបច្ចយោ

២៩. សញ្ញោជនោ ធម្មោ សញ្ញោជនស្ស ធម្មស្ស អត្ថិបច្ចយេន បច្ចយោ… ឯកំ (បដិច្ចសទិសំ). (១)

សញ្ញោជនោ ធម្មោ នោសញ្ញោជនស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ (សំខិត្តំ). (២)

សញ្ញោជនោ ធម្មោ សញ្ញោជនស្ស ច នោសញ្ញោជនស្ស ច ធម្មស្ស អត្ថិបច្ចយេន បច្ចយោ (បដិច្ចសទិសំ). (៣)

៣០. នោសញ្ញោជនោ ធម្មោ នោសញ្ញោជនស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ (សំខិត្តំ). (១)

នោសញ្ញោជនោ ធម្មោ សញ្ញោជនស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតា – នោសញ្ញោជនា ខន្ធា សម្បយុត្តកានំ សញ្ញោជនានំ អត្ថិបច្ចយេន បច្ចយោ. បុរេជាតំ – ចក្ខុំ…បេ… វត្ថុំ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ, វត្ថុ សញ្ញោជនានំ អត្ថិបច្ចយេន បច្ចយោ. (២)

នោសញ្ញោជនោ ធម្មោ សញ្ញោជនស្ស ច នោសញ្ញោជនស្ស ច ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – នោសញ្ញោជនោ…បេ… (សំខិត្តំ, អាសវសទិសំ). (៣)

៣១. សញ្ញោជនោ ច នោសញ្ញោជនោ ច ធម្មា សញ្ញោជនស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ (អាសវសទិសំ). (១)

សញ្ញោជនោ ច នោសញ្ញោជនោ ច ធម្មា នោសញ្ញោជនស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ (វិភជិតព្ពំ អាសវសទិសំ). (២)

សញ្ញោជនោ ច នោសញ្ញោជនោ ច ធម្មា សញ្ញោជនស្ស ច នោសញ្ញោជនស្ស ច ធម្មស្ស អត្ថិបច្ចយេន បច្ចយោ – សហជាតំ, បុរេជាតំ (វិភជិតព្ពំ អាសវសទិសំ). (៣)