១. វិភង្គវារោ

ហេតុបច្ចយោ

១១៥. អាសវញ្ចេវ អាសវសម្បយុត្តញ្ច ធម្មំ បដិច្ច អាសវោ ចេវ អាសវសម្បយុត្តោ ច ធម្មោ ឧប្បជ្ជតិ ហេតុបច្ចយា – កាមាសវំ បដិច្ច ទិដ្ឋាសវោ អវិជ្ជាសវោ (ចក្កំ ពន្ធិតព្ពំ). ភវាសវំ បដិច្ច អវិជ្ជាសវោ (ចក្កំ ពន្ធិតព្ពំ). ទិដ្ឋាសវំ បដិច្ច អវិជ្ជាសវោ. (១)

អាសវញ្ចេវ អាសវសម្បយុត្តញ្ច ធម្មំ បដិច្ច អាសវសម្បយុត្តោ ចេវ នោ ច អាសវោ ធម្មោ ឧប្បជ្ជតិ ហេតុបច្ចយា – អាសវេ បដិច្ច សម្បយុត្តកា ខន្ធា. (២)

អាសវញ្ចេវ អាសវសម្បយុត្តញ្ច ធម្មំ បដិច្ច អាសវោ ចេវ អាសវសម្បយុត្តោ ច អាសវសម្បយុត្តោ ចេវ នោ ច អាសវោ ច ធម្មា ឧប្បជ្ជន្តិ ហេតុបច្ចយា – អាសវសម្បយុត្តំ កាមាសវំ បដិច្ច ទិដ្ឋាសវោ អវិជ្ជាសវោ សម្បយុត្តកា ច ខន្ធា (សព្ពំ ចក្កំ). (៣)

១១៦. អាសវសម្បយុត្តញ្ចេវ នោ ច អាសវំ ធម្មំ បដិច្ច អាសវសម្បយុត្តោ ចេវ នោ ច អាសវោ ធម្មោ ឧប្បជ្ជតិ ហេតុបច្ចយា – អាសវសម្បយុត្តញ្ចេវ នោ ច អាសវំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ…. (១)

អាសវសម្បយុត្តញ្ចេវ នោ ច អាសវំ ធម្មំ បដិច្ច អាសវោ ចេវ អាសវសម្បយុត្តោ ច ធម្មោ ឧប្បជ្ជតិ ហេតុបច្ចយា – អាសវសម្បយុត្តញ្ចេវ នោ ច អាសវេ ខន្ធេ បដិច្ច អាសវា. (២)

អាសវសម្បយុត្តញ្ចេវ នោ ច អាសវំ ធម្មំ បដិច្ច អាសវោ ចេវ អាសវសម្បយុត្តោ ច អាសវសម្បយុត្តោ ចេវ នោ ច អាសវោ ច ធម្មា ឧប្បជ្ជន្តិ ហេតុបច្ចយា – អាសវសម្បយុត្តញ្ចេវ នោ ច អាសវំ ឯកំ ខន្ធំ បដិច្ច តយោ ខន្ធា អាសវា ច…បេ… ទ្វេ ខន្ធេ…បេ…. (៣)

១១៧. អាសវញ្ចេវ អាសវសម្បយុត្តញ្ច អាសវសម្បយុត្តញ្ចេវ នោ ច អាសវញ្ច ធម្មំ បដិច្ច អាសវោ ចេវ អាសវសម្បយុត្តោ ច ធម្មោ ឧប្បជ្ជតិ ហេតុបច្ចយា – កាមាសវញ្ច សម្បយុត្តកេ ច ខន្ធេ បដិច្ច ទិដ្ឋាសវោ អវិជ្ជាសវោ (សព្ពំ ចក្កំ). (១)

អាសវញ្ចេវ អាសវសម្បយុត្តញ្ច អាសវសម្បយុត្តញ្ចេវ នោ ច អាសវញ្ច ធម្មំ បដិច្ច អាសវសម្បយុត្តោ ចេវ នោ ច អាសវោ ធម្មោ ឧប្បជ្ជតិ ហេតុបច្ចយា – អាសវសម្បយុត្តញ្ចេវ នោ ច អាសវំ ឯកំ ខន្ធញ្ច អាសវេ ច បដិច្ច តយោ ខន្ធា…បេ… ទ្វេ ខន្ធេ…បេ…. (២)

អាសវញ្ចេវ អាសវសម្បយុត្តញ្ច អាសវសម្បយុត្តញ្ចេវ នោ ច អាសវញ្ច ធម្មំ បដិច្ច អាសវោ ចេវ អាសវសម្បយុត្តោ ច អាសវសម្បយុត្តោ ចេវ នោ ច អាសវោ ច ធម្មា ឧប្បជ្ជន្តិ ហេតុបច្ចយា – អាសវសម្បយុត្តញ្ចេវ នោ ច អាសវំ ឯកំ ខន្ធញ្ច កាមាសវញ្ច បដិច្ច តយោ ខន្ធា ទិដ្ឋាសវោ អវិជ្ជាសវោ…បេ… ទ្វេ ខន្ធេ…បេ…. (៣)

(ចក្កំ. ឯវំ សព្ពេ បច្ចយា កាតព្ពា.)