៣. អាសវគោច្ឆកំ

១៤. អាសវទុកំ

១. បដិច្ចវារោ

១. បច្ចយានុលោមំ

១. វិភង្គវារោ

ហេតុបច្ចយោ

១. អាសវំ ធម្មំ បដិច្ច អាសវោ ធម្មោ ឧប្បជ្ជតិ ហេតុបច្ចយា – កាមាសវំ បដិច្ច ទិដ្ឋាសវោ អវិជ្ជាសវោ, ទិដ្ឋាសវំ បដិច្ច កាមាសវោ អវិជ្ជាសវោ, អវិជ្ជាសវំ បដិច្ច កាមាសវោ ទិដ្ឋាសវោ, ភវាសវំ បដិច្ច អវិជ្ជាសវោ, ទិដ្ឋាសវំ បដិច្ច អវិជ្ជាសវោ (ឯកេកម្បិ ចក្កំ កាតព្ពំ). (១)

អាសវំ ធម្មំ បដិច្ច នោអាសវោ ធម្មោ ឧប្បជ្ជតិ ហេតុបច្ចយា – អាសវំ បដិច្ច អាសវសម្បយុត្តកា ខន្ធា ចិត្តសមុដ្ឋានញ្ច រូបំ. (២)

អាសវំ ធម្មំ បដិច្ច អាសវោ ច នោអាសវោ ច ធម្មា ឧប្បជ្ជន្តិ ហេតុបច្ចយា – កាមាសវំ បដិច្ច ទិដ្ឋាសវោ អវិជ្ជាសវោ សម្បយុត្តកា ច ខន្ធា ចិត្តសមុដ្ឋានញ្ច រូបំ (ចក្កំ). (៣)

២. នោអាសវំ ធម្មំ បដិច្ច នោអាសវោ ធម្មោ ឧប្បជ្ជតិ ហេតុបច្ចយា – នោអាសវំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានំ រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា, ឯកំ មហាភូតំ…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ. (១)

នោអាសវំ ធម្មំ បដិច្ច អាសវោ ធម្មោ ឧប្បជ្ជតិ ហេតុបច្ចយា – នោអាសវេ ខន្ធេ បដិច្ច អាសវា. (២)

នោអាសវំ ធម្មំ បដិច្ច អាសវោ ច នោអាសវោ ច ធម្មា ឧប្បជ្ជន្តិ ហេតុបច្ចយា – នោអាសវំ ឯកំ ខន្ធំ បដិច្ច តយោ ខន្ធា អាសវា ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

៣. អាសវញ្ច នោអាសវញ្ច ធម្មំ បដិច្ច អាសវោ ធម្មោ ឧប្បជ្ជតិ ហេតុបច្ចយា – កាមាសវញ្ច សម្បយុត្តកេ ច ខន្ធេ បដិច្ច ទិដ្ឋាសវោ អវិជ្ជាសវោ (ចក្កំ ពន្ធិតព្ពំ). (១)

អាសវញ្ច នោអាសវញ្ច ធម្មំ បដិច្ច នោអាសវោ ធម្មោ ឧប្បជ្ជតិ ហេតុបច្ចយា – នោអាសវំ ឯកំ ខន្ធញ្ច អាសវេ ច បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (២)

អាសវញ្ច នោអាសវញ្ច ធម្មំ បដិច្ច អាសវោ ច នោអាសវោ ច ធម្មា ឧប្បជ្ជន្តិ ហេតុបច្ចយា – នោអាសវំ ឯកំ ខន្ធញ្ច កាមាសវញ្ច បដិច្ច តយោ ខន្ធា ទិដ្ឋាសវោ អវិជ្ជាសវោ ចិត្តសមុដ្ឋានញ្ច រូបំ…បេ… ទ្វេ ខន្ធេ ច…បេ… (ចក្កំ. សំខិត្តំ). (៣)

១. បច្ចយានុលោមំ

២. សង្ខ្យាវារោ

៤. ហេតុយា នវ, អារម្មណេ នវ (សព្ពត្ថ នវ), វិបាកេ ឯកំ, អាហារេ នវ…បេ… អវិគតេ នវ.

អនុលោមំ.

២. បច្ចយបច្ចនីយំ

១. វិភង្គវារោ

នហេតុបច្ចយោ

៥. នោអាសវំ ធម្មំ បដិច្ច នោអាសវោ ធម្មោ ឧប្បជ្ជតិ នហេតុបច្ចយា – អហេតុកំ នោអាសវំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា, ឯកំ មហាភូតំ…បេ… (យាវ អសញ្ញសត្តា). (១)

នោអាសវំ ធម្មំ បដិច្ច អាសវោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (២)

នអារម្មណបច្ចយោ

៦. អាសវំ ធម្មំ បដិច្ច នោអាសវោ ធម្មោ ឧប្បជ្ជតិ នអារម្មណបច្ចយា – អាសវេ បដិច្ច ចិត្តសមុដ្ឋានំ រូបំ. (១)

នោអាសវំ ធម្មំ បដិច្ច នោអាសវោ ធម្មោ ឧប្បជ្ជតិ នអារម្មណបច្ចយា – នោអាសវេ ខន្ធេ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ… ខន្ធេ បដិច្ច វត្ថុ, ឯកំ មហាភូតំ…បេ… (យាវ អសញ្ញសត្តា). (១)

អាសវញ្ច នោអាសវញ្ច ធម្មំ បដិច្ច នោអាសវោ ធម្មោ ឧប្បជ្ជតិ នអារម្មណបច្ចយា – អាសវេ ច សម្បយុត្តកេ ច ខន្ធេ បដិច្ច ចិត្តសមុដ្ឋានំ រូបំ (សំខិត្តំ). (១)

២. បច្ចយបច្ចនីយំ

២. សង្ខ្យាវារោ

សុទ្ធំ

៧. នហេតុយា ទ្វេ, នអារម្មណេ តីណិ, នអធិបតិយា នវ, នអនន្តរេ តីណិ, នសមនន្តរេ តីណិ, នអញ្ញមញ្ញេ តីណិ, នឧបនិស្សយេ តីណិ, នបុរេជាតេ នវ, នបច្ឆាជាតេ នវ, នអាសេវនេ នវ, នកម្មេ តីណិ, នវិបាកេ នវ, នអាហារេ ឯកំ, នឥន្ទ្រិយេ ឯកំ, នឈានេ ឯកំ, នមគ្គេ ឯកំ, នសម្បយុត្តេ តីណិ, នវិប្បយុត្តេ នវ, នោនត្ថិយា តីណិ, នោវិគតេ តីណិ.

បច្ចនីយំ.

៣. បច្ចយានុលោមបច្ចនីយំ

ហេតុទុកំ

៨. ហេតុបច្ចយា នអារម្មណេ តីណិ, នអធិបតិយា នវ, នអនន្តរេ តីណិ, នសមនន្តរេ តីណិ, នអញ្ញមញ្ញេ តីណិ, នឧបនិស្សយេ តីណិ, នបុរេជាតេ នវ, នបច្ឆាជាតេ នវ, នអាសេវនេ នវ, នកម្មេ តីណិ, នវិបាកេ នវ, នសម្បយុត្តេ តីណិ, នវិប្បយុត្តេ នវ, នោនត្ថិយា តីណិ, នោវិគតេ តីណិ.

អនុលោមបច្ចនីយំ.

៤. បច្ចយបច្ចនីយានុលោមំ

នហេតុទុកំ

៩. នហេតុបច្ចយា អារម្មណេ ទ្វេ, អនន្តរេ ទ្វេ…បេ… វិបាកេ ឯកំ…បេ… មគ្គេ ឯកំ…បេ… អវិគតេ ទ្វេ.

បច្ចនីយានុលោមំ.

២. សហជាតវារោ

(សហជាតវារោ បដិច្ចវារសទិសោ.)

៣. បច្ចយវារោ

១. បច្ចយានុលោមំ

១. វិភង្គវារោ

ហេតុបច្ចយោ

១០. អាសវំ ធម្មំ បច្ចយា អាសវោ ធម្មោ ឧប្បជ្ជតិ ហេតុបច្ចយា (អាសវមូលកំ តីណិ, បដិច្ចសទិសា).

នោអាសវំ ធម្មំ បច្ចយា នោអាសវោ ធម្មោ ឧប្បជ្ជតិ ហេតុបច្ចយា – នោអាសវំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… ខន្ធេ បច្ចយា វត្ថុ, វត្ថុំ បច្ចយា ខន្ធា, មហាភូតេ បច្ចយា ចិត្តសមុដ្ឋានំ រូបំ កដត្តារូបំ ឧបាទារូបំ, វត្ថុំ បច្ចយា នោអាសវា ខន្ធា. (១)

នោអាសវំ ធម្មំ បច្ចយា អាសវោ ធម្មោ ឧប្បជ្ជតិ ហេតុបច្ចយា – នោអាសវេ ខន្ធេ បច្ចយា អាសវា, វត្ថុំ បច្ចយា អាសវា. (២)

នោអាសវំ ធម្មំ បច្ចយា អាសវោ ច នោអាសវោ ច ធម្មា ឧប្បជ្ជន្តិ ហេតុបច្ចយា – នោអាសវំ ឯកំ ខន្ធំ បច្ចយា តយោ ខន្ធា អាសវា ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… វត្ថុំ បច្ចយា អាសវា សម្បយុត្តកា ច ខន្ធា. (៣)

១១. អាសវញ្ច នោអាសវញ្ច ធម្មំ បច្ចយា អាសវោ ធម្មោ ឧប្បជ្ជតិ ហេតុបច្ចយា – កាមាសវញ្ច សម្បយុត្តកេ ច ខន្ធេ បច្ចយា ទិដ្ឋាសវោ អវិជ្ជាសវោ (ចក្កំ). កាមាសវញ្ច វត្ថុញ្ច បច្ចយា ទិដ្ឋាសវោ អវិជ្ជាសវោ (ចក្កំ). (១)

អាសវញ្ច នោអាសវញ្ច ធម្មំ បច្ចយា នោអាសវោ ធម្មោ ឧប្បជ្ជតិ ហេតុបច្ចយា – នោអាសវំ ឯកំ ខន្ធញ្ច អាសវេ ច បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… អាសវញ្ច វត្ថុញ្ច បច្ចយា នោអាសវា ខន្ធា. (២)

អាសវញ្ច នោអាសវញ្ច ធម្មំ បច្ចយា អាសវោ ច នោអាសវោ ច ធម្មា ឧប្បជ្ជន្តិ ហេតុបច្ចយា – នោអាសវំ ឯកំ ខន្ធញ្ច កាមាសវញ្ច បច្ចយា តយោ ខន្ធា ទិដ្ឋាសវោ អវិជ្ជាសវោ ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… (ចក្កំ). កាមាសវញ្ច វត្ថុញ្ច បច្ចយា ទិដ្ឋាសវោ អវិជ្ជាសវោ សម្បយុត្តកា ច ខន្ធា (ចក្កំ. សំខិត្តំ). (៣)

១. បច្ចយានុលោមំ

២. សង្ខ្យាវារោ

១២. ហេតុយា នវ, អារម្មណេ នវ, អធិបតិយា នវ…បេ… វិបាកេ ឯកំ…បេ… អវិគតេ នវ.

អនុលោមំ.

២. បច្ចយបច្ចនីយំ

១. វិភង្គវារោ

នហេតុបច្ចយោ

១៣. នោអាសវំ ធម្មំ បច្ចយា នោអាសវោ ធម្មោ ឧប្បជ្ជតិ នហេតុបច្ចយា – អហេតុកំ នោអាសវំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… (យាវ អសញ្ញសត្តា) ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ… វត្ថុំ បច្ចយា អហេតុកា នោអាសវា ខន្ធា. (១)

នោអាសវំ ធម្មំ បច្ចយា អាសវោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (២)

២. បច្ចយបច្ចនីយំ

២. សង្ខ្យាវារោ

១៤. នហេតុយា ទ្វេ, នអារម្មណេ តីណិ, នអធិបតិយា នវ…បេ… នកម្មេ តីណិ…បេ… នវិប្បយុត្តេ នវ, នោនត្ថិយា តីណិ, នោវិគតេ តីណិ (ឯវំ សព្ពេ គណនា គណេតព្ពា).

៤. និស្សយវារោ

(និស្សយវារោ បច្ចយវារសទិសោ.)

៥. សំសដ្ឋវារោ

១-៤. បច្ចយានុលោមាទិ

១៥. អាសវំ ធម្មំ សំសដ្ឋោ អាសវោ ធម្មោ ឧប្បជ្ជតិ ហេតុបច្ចយា – កាមាសវំ សំសដ្ឋោ ទិដ្ឋាសវោ អវិជ្ជាសវោ (ចក្កំ. សំខិត្តំ).

ហេតុយា នវ, អារម្មណេ នវ (សព្ពត្ថ នវ), វិបាកេ ឯកំ…បេ… អវិគតេ នវ.

នហេតុយា ទ្វេ, នអធិបតិយា នវ, នបុរេជាតេ នវ, នបច្ឆាជាតេ នវ, នអាសេវនេ នវ, នកម្មេ តីណិ, នវិបាកេ នវ, នឈានេ ឯកំ, នមគ្គេ ឯកំ, នវិប្បយុត្តេ នវ.

៦. សម្បយុត្តវារោ

(គណនាបិ សម្បយុត្តវារោបិ សំសដ្ឋវារសទិសោ.)

៧. បញ្ហាវារោ

១. បច្ចយានុលោមំ

១. វិភង្គវារោ

ហេតុបច្ចយោ

១៦. អាសវោ ធម្មោ អាសវស្ស ធម្មស្ស ហេតុបច្ចយេន បច្ចយោ – កាមាសវោ ទិដ្ឋាសវស្ស អវិជ្ជាសវស្ស ហេតុបច្ចយេន បច្ចយោ; ភវាសវោ អវិជ្ជាសវស្ស ហេតុបច្ចយេន បច្ចយោ (ចក្កំ). (១)

អាសវោ ធម្មោ នោអាសវស្ស ធម្មស្ស ហេតុបច្ចយេន បច្ចយោ – អាសវា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (២)

អាសវោ ធម្មោ អាសវស្ស ច នោអាសវស្ស ច ធម្មស្ស ហេតុបច្ចយេន បច្ចយោ – កាមាសវោ ទិដ្ឋាសវស្ស អវិជ្ជាសវស្ស សម្បយុត្តកានញ្ច ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

១៧. នោអាសវោ ធម្មោ នោអាសវស្ស ធម្មស្ស ហេតុបច្ចយេន បច្ចយោ – នោអាសវា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

នោអាសវោ ធម្មោ អាសវស្ស ធម្មស្ស ហេតុបច្ចយេន បច្ចយោ – នោអាសវា ហេតូ សម្បយុត្តកានំ អាសវានំ ហេតុបច្ចយេន បច្ចយោ. (២)

នោអាសវោ ធម្មោ អាសវស្ស ច នោអាសវស្ស ច ធម្មស្ស ហេតុបច្ចយេន បច្ចយោ – នោអាសវា ហេតូ សម្បយុត្តកានំ ខន្ធានំ អាសវានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

អាសវោ ច នោអាសវោ ច ធម្មា នោអាសវស្ស ធម្មស្ស ហេតុបច្ចយេន បច្ចយោ – អាសវា ច នោអាសវា ច ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (១)

អារម្មណបច្ចយោ

១៨. អាសវោ ធម្មោ អាសវស្ស ធម្មស្ស អារម្មណបច្ចយេន បច្ចយោ – អាសវេ អារព្ភ អាសវា ឧប្បជ្ជន្តិ. (១)

អាសវោ ធម្មោ នោអាសវស្ស ធម្មស្ស អារម្មណបច្ចយេន បច្ចយោ – អាសវេ អារព្ភ នោអាសវា ខន្ធា ឧប្បជ្ជន្តិ. (២)

អាសវោ ធម្មោ អាសវស្ស ច នោអាសវស្ស ច ធម្មស្ស អារម្មណបច្ចយេន បច្ចយោ – អាសវេ អារព្ភ អាសវា ច សម្បយុត្តកា ច ខន្ធា ឧប្បជ្ជន្តិ. (៣)

១៩. នោអាសវោ ធម្មោ នោអាសវស្ស ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ…បេ… បុព្ពេ…បេ… ឈានា…បេ… អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ បច្ចវេក្ខន្តិ, និព្ពានំ បច្ចវេក្ខន្តិ; និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ; អរិយា នោអាសវេ បហីនេ កិលេសេ…បេ… វិក្ខម្ភិតេ កិលេសេ…បេ… បុព្ពេ សមុទាចិណ្ណេ កិលេសេ ជានន្តិ, ចក្ខុំ…បេ… វត្ថុំ នោអាសវេ ខន្ធេ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, ចេតោបរិយញាណេន នោអាសវចិត្តសមង្គិស្ស ចិត្តំ ជានាតិ, អាកាសានញ្ចាយតនំ វិញ្ញាណញ្ចាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស…បេ… រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… នោអាសវា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

នោអាសវោ ធម្មោ អាសវស្ស ធម្មស្ស អារម្មណបច្ចយេន បច្ចយោ – ទានំ ទត្វា…បេ… តំ អស្សាទេតិ អភិនន្ទតិ, តំ អារព្ភ អាសវា ឧប្បជ្ជន្តិ, សីលំ…បេ… ឧបោសថកម្មំ…បេ… បុព្ពេ…បេ… ឈានា…បេ… ចក្ខុំ…បេ… វត្ថុំ នោអាសវេ ខន្ធេ អស្សាទេតិ អភិនន្ទតិ, តំ អារព្ភ អាសវា ឧប្បជ្ជន្តិ. (២)

នោអាសវោ ធម្មោ អាសវស្ស ច នោអាសវស្ស ច ធម្មស្ស អារម្មណបច្ចយេន បច្ចយោ – ទានំ ទត្វា…បេ… (ទុតិយគមនំ) នោអាសវេ ខន្ធេ អស្សាទេតិ អភិនន្ទតិ, តំ អារព្ភ អាសវា ច សម្បយុត្តកា ច ខន្ធា ឧប្បជ្ជន្តិ. (៣)

២០. អាសវោ ច នោអាសវោ ច ធម្មា អាសវស្ស ធម្មស្ស អារម្មណបច្ចយេន បច្ចយោ – អាសវេ ច សម្បយុត្តកេ ច ខន្ធេ អារព្ភ អាសវា ឧប្បជ្ជន្តិ. (១)

អាសវោ ច នោអាសវោ ច ធម្មា នោអាសវស្ស ធម្មស្ស អារម្មណបច្ចយេន បច្ចយោ – អាសវេ ច សម្បយុត្តកេ ច ខន្ធេ អារព្ភ នោអាសវា ខន្ធា ឧប្បជ្ជន្តិ. (២)

អាសវោ ច នោអាសវោ ច ធម្មា អាសវស្ស ច នោអាសវស្ស ច ធម្មស្ស អារម្មណបច្ចយេន បច្ចយោ – អាសវេ ច សម្បយុត្តកេ ច ខន្ធេ អារព្ភ អាសវា ច សម្បយុត្តកា ច ខន្ធា ឧប្បជ្ជន្តិ. (៣)

អធិបតិបច្ចយោ

២១. អាសវោ ធម្មោ អាសវស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – អាសវេ គរុំ កត្វា អាសវា ឧប្បជ្ជន្តិ (តីណិ អារម្មណសទិសា, គរុការម្មណា កាតព្ពា).

នោអាសវោ ធម្មោ នោអាសវស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ…បេ… បុព្ពេ…បេ… ឈានា…បេ… អរិយា មគ្គា…បេ… ផលំ…បេ… និព្ពានំ គរុំ…បេ… និព្ពានំ គោត្រភុស្ស, វោទានស្ស, មគ្គស្ស, ផលស្ស អធិបតិបច្ចយេន បច្ចយោ; ចក្ខុំ…បេ… វត្ថុំ នោអាសវេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – នោអាសវា អធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

នោអាសវោ ធម្មោ អាសវស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… នោអាសវេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា អាសវា ឧប្បជ្ជន្តិ. សហជាតាធិបតិ – នោអាសវា អធិបតិ សម្បយុត្តកានំ អាសវានំ អធិបតិបច្ចយេន បច្ចយោ. (២)

នោអាសវោ ធម្មោ អាសវស្ស ច នោអាសវស្ស ច ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… នោអាសវេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – នោអាសវា អធិបតិ សម្បយុត្តកានំ ខន្ធានំ អាសវានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

អាសវោ ច នោអាសវោ ច ធម្មា អាសវស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – អាសវេ ច សម្បយុត្តកេ ច ខន្ធេ គរុំ កត្វា អស្សាទេតិ…បេ… អាសវា ឧប្បជ្ជន្តិ (តីណិ, គរុការម្មណា).

អនន្តរបច្ចយោ

២២. អាសវោ ធម្មោ អាសវស្ស ធម្មស្ស អនន្តរបច្ចយេន បច្ចយោ – បុរិមា បុរិមា អាសវា បច្ឆិមានំ បច្ឆិមានំ អាសវានំ អនន្តរបច្ចយេន បច្ចយោ. (១)

អាសវោ ធម្មោ នោអាសវស្ស ធម្មស្ស អនន្តរបច្ចយេន បច្ចយោ – បុរិមា បុរិមា អាសវា បច្ឆិមានំ បច្ឆិមានំ នោអាសវានំ ខន្ធានំ អនន្តរបច្ចយេន បច្ចយោ; អាសវា វុដ្ឋានស្ស អនន្តរបច្ចយេន បច្ចយោ. (២)

អាសវោ ធម្មោ អាសវស្ស ច នោអាសវស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា អាសវា បច្ឆិមានំ បច្ឆិមានំ អាសវានំ សម្បយុត្តកានញ្ច ខន្ធានំ អនន្តរបច្ចយេន បច្ចយោ. (៣)

២៣. នោអាសវោ ធម្មោ នោអាសវស្ស ធម្មស្ស អនន្តរបច្ចយេន បច្ចយោ – បុរិមា បុរិមា នោអាសវា ខន្ធា បច្ឆិមានំ បច្ឆិមានំ នោអាសវានំ ខន្ធានំ អនន្តរបច្ចយេន បច្ចយោ; អនុលោមំ គោត្រភុស្ស…បេ… ផលសមាបត្តិយា អនន្តរបច្ចយេន បច្ចយោ. (១)

នោអាសវោ ធម្មោ អាសវស្ស ធម្មស្ស អនន្តរបច្ចយេន បច្ចយោ – បុរិមា បុរិមា នោអាសវា ខន្ធា បច្ឆិមានំ បច្ឆិមានំ អាសវានំ អនន្តរបច្ចយេន បច្ចយោ; អាវជ្ជនា អាសវានំ អនន្តរបច្ចយេន បច្ចយោ. (២)

នោអាសវោ ធម្មោ អាសវស្ស ច នោអាសវស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា នោអាសវា ខន្ធា បច្ឆិមានំ បច្ឆិមានំ អាសវានំ សម្បយុត្តកានញ្ច ខន្ធានំ អនន្តរបច្ចយេន បច្ចយោ. (៣)

២៤. អាសវោ ច នោអាសវោ ច ធម្មា អាសវស្ស ធម្មស្ស អនន្តរបច្ចយេន បច្ចយោ… តីណិ.

សមនន្តរបច្ចយាទិ

២៥. អាសវោ ធម្មោ អាសវស្ស ធម្មស្ស សមនន្តរបច្ចយេន បច្ចយោ… សហជាតបច្ចយេន បច្ចយោ… នវ… អញ្ញមញ្ញបច្ចយេន បច្ចយោ… នវ… និស្សយបច្ចយេន បច្ចយោ… នវ (វត្ថុ ច ទស្សេតព្ពំ).

ឧបនិស្សយបច្ចយោ

២៦. អាសវោ ធម្មោ អាសវស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – អាសវា អាសវានំ ឧបនិស្សយបច្ចយេន បច្ចយោ (តីណិ).

២៧. នោអាសវោ ធម្មោ នោអាសវស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ; សីលំ…បេ… សេនាសនំ ឧបនិស្សាយ ទានំ ទេតិ…បេ… សង្ឃំ ភិន្ទតិ; សទ្ធា…បេ… សេនាសនំ សទ្ធាយ…បេ… ផលសមាបត្តិយា ឧបនិស្សយបច្ចយេន បច្ចយោ. (១)

នោអាសវោ ធម្មោ អាសវស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ មានំ ជប្បេតិ, ទិដ្ឋិំ គណ្ហាតិ; សីលំ…បេ… សង្ឃំ ភិន្ទតិ, សទ្ធា…បេ… សេនាសនំ រាគស្ស…បេ… បត្ថនាយ ឧបនិស្សយបច្ចយេន បច្ចយោ. (២)

នោអាសវោ ធម្មោ អាសវស្ស ច នោអាសវស្ស ច ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ មានំ ជប្បេតិ, ទិដ្ឋិំ គណ្ហាតិ; សីលំ…បេ… សេនាសនំ ឧបនិស្សាយ…បេ… បាណំ ហនតិ…បេ… សង្ឃំ ភិន្ទតិ, សទ្ធា…បេ… សេនាសនំ រាគស្ស…បេ… បត្ថនាយ ឧបនិស្សយបច្ចយេន បច្ចយោ. (៣)

អាសវោ ច នោអាសវោ ច ធម្មា អាសវស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ… តីណិ.

បុរេជាតបច្ចយោ

២៨. នោអាសវោ ធម្មោ នោអាសវស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ …បេ… វត្ថុំ (ឯវំ វិត្ថារេតព្ពំ), ផោដ្ឋព្ពាយតនំ កាយវិញ្ញាណស្ស បុរេជាតបច្ចយេន បច្ចយោ. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស, វត្ថុ នោអាសវានំ ខន្ធានំ បុរេជាតបច្ចយេន បច្ចយោ. (១)

នោអាសវោ ធម្មោ អាសវស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អស្សាទេតិ អភិនន្ទតិ, តំ អារព្ភ អាសវា ឧប្បជ្ជន្តិ. វត្ថុបុរេជាតំ – វត្ថុ អាសវានំ បុរេជាតបច្ចយេន បច្ចយោ. (២)

នោអាសវោ ធម្មោ អាសវស្ស ច នោអាសវស្ស ច ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អស្សាទេតិ អភិនន្ទតិ, តំ អារព្ភ អាសវា ច សម្បយុត្តកា ច ខន្ធា ឧប្បជ្ជន្តិ. វត្ថុបុរេជាតំ – វត្ថុ អាសវានញ្ច អាសវសម្បយុត្តកានញ្ច ខន្ធានំ បុរេជាតបច្ចយេន បច្ចយោ. (៣)

បច្ឆាជាតបច្ចយោ

២៩. អាសវោ ធម្មោ នោអាសវស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា អាសវា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

នោអាសវោ ធម្មោ នោអាសវស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា នោអាសវា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អាសវោ ច នោអាសវោ ច ធម្មា នោអាសវស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា អាសវា ច សម្បយុត្តកា ច ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

អាសេវនបច្ចយោ

៣០. អាសវោ ធម្មោ អាសវស្ស ធម្មស្ស អាសេវនបច្ចយេន បច្ចយោ… នវ.

កម្មបច្ចយោ

៣១. នោអាសវោ ធម្មោ នោអាសវស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នោអាសវា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – នោអាសវា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (១)

នោអាសវោ ធម្មោ អាសវស្ស ធម្មស្ស កម្មបច្ចយេន បច្ចយោ – នោអាសវា ចេតនា សម្បយុត្តកានំ អាសវានំ កម្មបច្ចយេន បច្ចយោ. (២)

នោអាសវោ ធម្មោ អាសវស្ស ច នោអាសវស្ស ច ធម្មស្ស កម្មបច្ចយេន បច្ចយោ – នោអាសវា ចេតនា សម្បយុត្តកានំ ខន្ធានំ អាសវានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៣)

វិបាកាហារបច្ចយា

៣២. នោអាសវោ ធម្មោ នោអាសវស្ស ធម្មស្ស វិបាកបច្ចយេន បច្ចយោ… ឯកំ, អាហារបច្ចយេន បច្ចយោ – នោអាសវា អាហារា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អាហារបច្ចយេន បច្ចយោ; បដិសន្ធិក្ខណេ…បេ… កពឡីការោ អាហារោ ឥមស្ស កាយស្ស អាហារបច្ចយេន បច្ចយោ. (១)

នោអាសវោ ធម្មោ អាសវស្ស ធម្មស្ស អាហារបច្ចយេន បច្ចយោ – នោអាសវា អាហារា សម្បយុត្តកានំ អាសវានំ អាហារបច្ចយេន បច្ចយោ. (២)

នោអាសវោ ធម្មោ អាសវស្ស ច នោអាសវស្ស ច ធម្មស្ស អាហារបច្ចយេន បច្ចយោ – នោអាសវា អាហារា សម្បយុត្តកានំ ខន្ធានំ អាសវានំ ចិត្តសមុដ្ឋានានញ្ច រូបានំ អាហារបច្ចយេន បច្ចយោ. (៣)

ឥន្ទ្រិយបច្ចយាទិ

៣៣. នោអាសវោ ធម្មោ នោអាសវស្ស ធម្មស្ស ឥន្ទ្រិយបច្ចយេន បច្ចយោ – នោអាសវា ឥន្ទ្រិយា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ឥន្ទ្រិយបច្ចយេន បច្ចយោ; បដិសន្ធិក្ខណេ…បេ… ចក្ខុន្ទ្រិយំ ចក្ខុវិញ្ញាណស្ស…បេ… កាយិន្ទ្រិយំ កាយវិញ្ញាណស្ស…បេ… រូបជីវិតិន្ទ្រិយំ កដត្តារូបានំ ឥន្ទ្រិយបច្ចយេន បច្ចយោ… តីណិ… ឈានបច្ចយេន បច្ចយោ… តីណិ… មគ្គបច្ចយេន បច្ចយោ… នវ… សម្បយុត្តបច្ចយេន បច្ចយោ… នវ.

វិប្បយុត្តបច្ចយោ

៣៤. អាសវោ ធម្មោ នោអាសវស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – អាសវា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បច្ឆាជាតា – អាសវា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

៣៥. នោអាសវោ ធម្មោ នោអាសវស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ. សហជាតា – នោអាសវា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ; បដិសន្ធិក្ខណេ…បេ… ខន្ធា វត្ថុស្ស វិប្បយុត្តបច្ចយេន បច្ចយោ, វត្ថុ ខន្ធានំ វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ នោអាសវានំ ខន្ធានំ វិប្បយុត្តបច្ចយេន បច្ចយោ. បច្ឆាជាតា – នោអាសវា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

នោអាសវោ ធម្មោ អាសវស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ អាសវានំ វិប្បយុត្តបច្ចយេន បច្ចយោ. (២)

នោអាសវោ ធម្មោ អាសវស្ស ច នោអាសវស្ស ច ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ អាសវានំ សម្បយុត្តកានញ្ច ខន្ធានំ វិប្បយុត្តបច្ចយេន បច្ចយោ. (៣)

៣៦. អាសវោ ច នោអាសវោ ច ធម្មា នោអាសវស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – អាសវា ច សម្បយុត្តកា ច ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បច្ឆាជាតា – អាសវា ច សម្បយុត្តកា ច ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

អត្ថិបច្ចយោ

៣៧. អាសវោ ធម្មោ អាសវស្ស ធម្មស្ស អត្ថិបច្ចយេន បច្ចយោ – កាមាសវោ ទិដ្ឋាសវស្ស អវិជ្ជាសវស្ស អត្ថិបច្ចយេន បច្ចយោ (ចក្កំ). (១)

អាសវោ ធម្មោ នោអាសវស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ. សហជាតា – អាសវា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ. បច្ឆាជាតា – អាសវា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. (២)

អាសវោ ធម្មោ អាសវស្ស ច នោអាសវស្ស ច ធម្មស្ស អត្ថិបច្ចយេន បច្ចយោ – កាមាសវោ ទិដ្ឋាសវស្ស អវិជ្ជាសវស្ស សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ (ចក្កំ). (៣)

៣៨. នោអាសវោ ធម្មោ នោអាសវស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតោ – នោអាសវោ ឯកោ ខន្ធោ តិណ្ណន្នំ ខន្ធានំ…បេ… (យាវ អសញ្ញសត្តា). បុរេជាតំ – ចក្ខុំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ នោអាសវានំ ខន្ធានំ អត្ថិបច្ចយេន បច្ចយោ. បច្ឆាជាតា – នោអាសវា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ; កពឡីការោ អាហារោ ឥមស្ស កាយស្ស អត្ថិបច្ចយេន បច្ចយោ; រូបជីវិតិន្ទ្រិយំ កដត្តារូបានំ អត្ថិបច្ចយេន បច្ចយោ. (១)

នោអាសវោ ធម្មោ អាសវស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតា – នោអាសវា ខន្ធា អាសវានំ អត្ថិបច្ចយេន បច្ចយោ. បុរេជាតំ – ចក្ខុំ…បេ… វត្ថុំ អស្សាទេតិ អភិនន្ទតិ, តំ អារព្ភ អាសវា ឧប្បជ្ជន្តិ, វត្ថុ អាសវានំ អត្ថិបច្ចយេន បច្ចយោ. (២)