១. បច្ចយានុលោមំ

១. វិភង្គវារោ

(បញ្ហាវារេ ហេតុបច្ចយេបិ អារម្មណបច្ចយេបិ លោកុត្តរំ ន កាតព្ពំ, សេខា គោត្រភុំ បច្ចវេក្ខន្តិ, វោទានំ បច្ចវេក្ខន្តីតិ កាតព្ពា. អធិបតិបច្ចយម្បិ សព្ពំ ជានិត្វា កាតព្ពំ.)

អនន្តរបច្ចយោ

១១២. អាសវោ ចេវ សាសវោ ច ធម្មោ អាសវស្ស ចេវ សាសវស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា អាសវា បច្ឆិមានំ បច្ឆិមានំ អាសវានំ អនន្តរបច្ចយេន បច្ចយោ. (១)

អាសវោ ចេវ សាសវោ ច ធម្មោ សាសវស្ស ចេវ នោ ច អាសវស្ស ធម្មស្ស អនន្តរបច្ចយេន បច្ចយោ – បុរិមា បុរិមា អាសវា បច្ឆិមានំ បច្ឆិមានំ សាសវញ្ចេវ នោ ច អាសវានំ ខន្ធានំ អនន្តរបច្ចយេន បច្ចយោ; អាសវា វុដ្ឋានស្ស អនន្តរបច្ចយេន បច្ចយោ. (២)

អាសវោ ចេវ សាសវោ ច ធម្មោ អាសវស្ស ចេវ សាសវស្ស ច សាសវស្ស ចេវ នោ ច អាសវស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា អាសវា បច្ឆិមានំ បច្ឆិមានំ អាសវានំ សម្បយុត្តកានញ្ច ខន្ធានំ អនន្តរបច្ចយេន បច្ចយោ. (៣)

១១៣. សាសវោ ចេវ នោ ច អាសវោ ធម្មោ សាសវស្ស ចេវ នោ ច អាសវស្ស ធម្មស្ស អនន្តរបច្ចយេន បច្ចយោ – បុរិមា បុរិមា សាសវា ចេវ នោ ច អាសវា ខន្ធា បច្ឆិមានំ បច្ឆិមានំ សាសវានញ្ចេវ នោ ច អាសវានំ ខន្ធានំ អនន្តរបច្ចយេន បច្ចយោ; អនុលោមំ គោត្រភុស្ស, អនុលោមំ វោទានស្ស, អាវជ្ជនា សាសវានញ្ចេវ នោ ច អាសវានំ ខន្ធានំ អនន្តរបច្ចយេន បច្ចយោ. (១)

សាសវោ ចេវ នោ ច អាសវោ ធម្មោ អាសវស្ស ចេវ សាសវស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា សាសវា ចេវ នោ ច អាសវា ខន្ធា បច្ឆិមានំ បច្ឆិមានំ អាសវានំ អនន្តរបច្ចយេន បច្ចយោ; អាវជ្ជនា អាសវានំ អនន្តរបច្ចយេន បច្ចយោ. (២)

សាសវោ ចេវ នោ ច អាសវោ ធម្មោ អាសវស្ស ចេវ សាសវស្ស ច សាសវស្ស ចេវ នោ ច អាសវស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា សាសវា ចេវ នោ ច អាសវា ខន្ធា បច្ឆិមានំ បច្ឆិមានំ អាសវានំ សម្បយុត្តកានញ្ច ខន្ធានំ អនន្តរបច្ចយេន បច្ចយោ; អាវជ្ជនា អាសវានំ សម្បយុត្តកានញ្ច ខន្ធានំ អនន្តរបច្ចយេន បច្ចយោ. (៣)

១១៤. អាសវោ ចេវ សាសវោ ច សាសវោ ចេវ នោ ច អាសវោ ច ធម្មា អាសវស្ស ចេវ សាសវស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា អាសវា ច សម្បយុត្តកា ច ខន្ធា បច្ឆិមានំ បច្ឆិមានំ អាសវានំ អនន្តរបច្ចយេន បច្ចយោ. (១)

អាសវោ ចេវ សាសវោ ច សាសវោ ចេវ នោ ច អាសវោ ច ធម្មា សាសវស្ស ចេវ នោ ច អាសវស្ស ធម្មស្ស អនន្តរបច្ចយេន បច្ចយោ – បុរិមា បុរិមា អាសវា ច សម្បយុត្តកា ច ខន្ធា បច្ឆិមានំ បច្ឆិមានំ សាសវានញ្ចេវ នោ ច អាសវានំ ខន្ធានំ អនន្តរបច្ចយេន បច្ចយោ; អាសវា ច សម្បយុត្តកា ច ខន្ធា វុដ្ឋានស្ស អនន្តរបច្ចយេន បច្ចយោ. (២)

អាសវោ ចេវ សាសវោ ច សាសវោ ចេវ នោ ច អាសវោ ច ធម្មា អាសវស្ស ចេវ សាសវស្ស ច សាសវស្ស ចេវ នោ ច អាសវស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា អាសវា ច សម្បយុត្តកា ច ខន្ធា បច្ឆិមានំ បច្ឆិមានំ អាសវានំ សម្បយុត្តកានញ្ច ខន្ធានំ អនន្តរបច្ចយេន បច្ចយោ (ឯវំ សព្ពំ វិត្ថារេតព្ពំ). (៣)

(អាសវទុកេបិ អនន្តរំ ឥមិនា សទិសំ កាតព្ពំ. អាវជ្ជនាបិ វុដ្ឋានម្បិ ឯវំ សមុទ្ទិដ្ឋំ សំខិត្តំ. សព្ពំ បរិបុណ្ណំ. អាសវទុកសទិសំ កាតព្ពំ, និន្នានំ.)

អាសវសាសវទុកំ និដ្ឋិតំ.