១-៤. បច្ចយានុលោមាទិ

៧៣. អាសវសម្បយុត្តំ ធម្មំ សំសដ្ឋោ អាសវសម្បយុត្តោ ធម្មោ ឧប្បជ្ជតិ ហេតុបច្ចយា (សំខិត្តំ).

ហេតុយា ឆ, អារម្មណេ ឆ, អធិបតិយា ឆ (សព្ពត្ថ ឆ), វិបាកេ ឯកំ…បេ… អវិគតេ ឆ.

អាសវសម្បយុត្តំ ធម្មំ សំសដ្ឋោ អាសវវិប្បយុត្តោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ សំសដ្ឋោ វិចិកិច្ឆាសហគតោ ឧទ្ធច្ចសហគតោ មោហោ. (១)

អាសវវិប្បយុត្តំ ធម្មំ សំសដ្ឋោ អាសវវិប្បយុត្តោ ធម្មោ ឧប្បជ្ជតិ នហេតុបច្ចយា…បេ….

នហេតុយា ទ្វេ, នអធិបតិយា ឆ, នបុរេជាតេ ឆ, នបច្ឆាជាតេ ឆ, នអាសេវនេ ឆ, នកម្មេ ចត្តារិ, នវិបាកេ ឆ, នឈានេ ឯកំ, នមគ្គេ ឯកំ, នវិប្បយុត្តេ ឆ (ឯវំ ឥតរេបិ ទ្វេ គណនា កាតព្ពា).