១. វិភង្គវារោ

នហេតុបច្ចយោ

១០៤. រូបិំ ធម្មំ បច្ចយា រូបី ធម្មោ ឧប្បជ្ជតិ នហេតុបច្ចយា – ឯកំ មហាភូតំ…បេ… អសញ្ញសត្តានំ ឯកំ មហាភូតំ…បេ…. (១)

រូបិំ ធម្មំ បច្ចយា អរូបី ធម្មោ ឧប្បជ្ជតិ នហេតុបច្ចយា – ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ, វត្ថុំ បច្ចយា អហេតុកា អរូបិនោ ខន្ធា; អហេតុកបដិសន្ធិក្ខណេ…បេ… វត្ថុំ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (២)

រូបិំ ធម្មំ បច្ចយា រូបី ច អរូបី ច ធម្មា ឧប្បជ្ជន្តិ នហេតុបច្ចយា (បវត្តិបដិសន្ធិ កាតព្ពា). (៣)

១០៥. អរូបិំ ធម្មំ បច្ចយា អរូបី ធម្មោ ឧប្បជ្ជតិ នហេតុបច្ចយា – អហេតុកំ អរូបិំ ឯកំ ខន្ធំ…បេ… បដិសន្ធិក្ខណេ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

អរូបិំ ធម្មំ បច្ចយា រូបី ធម្មោ ឧប្បជ្ជតិ នហេតុបច្ចយា – អហេតុកេ អរូបិនោ ខន្ធេ បច្ចយា ចិត្តសមុដ្ឋានំ រូបំ; បដិសន្ធិក្ខណេ…បេ…. (២)

អរូបិំ ធម្មំ បច្ចយា រូបី ច អរូបី ច ធម្មា ឧប្បជ្ជន្តិ នហេតុបច្ចយា – អហេតុកំ អរូបិំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ…. (៣)

១០៦. រូបិញ្ច អរូបិញ្ច ធម្មំ បច្ចយា រូបី ធម្មោ ឧប្បជ្ជតិ នហេតុបច្ចយា – អហេតុកេ អរូបិនោ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ; បដិសន្ធិក្ខណេ…បេ…. (១)

រូបិញ្ច អរូបិញ្ច ធម្មំ បច្ចយា អរូបី ធម្មោ ឧប្បជ្ជតិ នហេតុបច្ចយា – ចក្ខុវិញ្ញាណសហគតំ ឯកំ ខន្ធញ្ច ចក្ខាយតនញ្ច បច្ចយា តយោ ខន្ធា…បេ… ទ្វេ ខន្ធេ…បេ… កាយវិញ្ញាណសហគតំ…បេ… អរូបិំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (២)

រូបិញ្ច អរូបិញ្ច ធម្មំ បច្ចយា រូបី ច អរូបី ច ធម្មា ឧប្បជ្ជន្តិ នហេតុបច្ចយា – អហេតុកំ អរូបិំ ឯកំ ខន្ធញ្ច វត្ថុញ្ច បច្ចយា តយោ ខន្ធា…បេ… ទ្វេ ខន្ធេ…បេ… អរូបិនោ ខន្ធេ ច មហាភូតេ ច បច្ចយា ចិត្តសមុដ្ឋានំ រូបំ; បដិសន្ធិក្ខណេ…បេ…. (៣)