១. វិភង្គវារោ

ហេតុបច្ចយោ

៨. សប្បច្ចយោ ធម្មោ សប្បច្ចយស្ស ធម្មស្ស ហេតុបច្ចយេន បច្ចយោ – សប្បច្ចយា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ….

អារម្មណបច្ចយោ

៩. សប្បច្ចយោ ធម្មោ សប្បច្ចយស្ស ធម្មស្ស អារម្មណបច្ចយេន បច្ចយោ – ទានំ ទត្វា, សីលំ សមាទិយិត្វា, ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ…បេ… ឈានា វុដ្ឋហិត្វា…បេ… អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ បច្ចវេក្ខន្តិ; បហីនេ កិលេសេ…បេ… វិក្ខម្ភិតេ កិលេសេ…បេ… បុព្ពេ សមុទាចិណ្ណេ កិលេសេ ជានន្តិ, ចក្ខុំ…បេ… វត្ថុំ… សប្បច្ចយេ ខន្ធេ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. ចេតោបរិយញាណេន សប្បច្ចយចិត្តសមង្គិស្ស ចិត្តំ ជានាតិ, អាកាសានញ្ចាយតនំ វិញ្ញាណញ្ចាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស…បេ… រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… សប្បច្ចយា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

អប្បច្ចយោ ធម្មោ សប្បច្ចយស្ស ធម្មស្ស អារម្មណបច្ចយេន បច្ចយោ – អរិយា និព្ពានំ បច្ចវេក្ខន្តិ; និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ. (១)

អធិបតិបច្ចយោ

១០. សប្បច្ចយោ ធម្មោ សប្បច្ចយស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ ទត្វា សីលំ…បេ… ឧបោសថកម្មំ កត្វា តំ គរុំ កត្វា បច្ចវេក្ខតិ, បុព្ពេ…បេ… ឈានា…បេ… អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ, ផលំ គរុំ កត្វា…បេ… ចក្ខុំ…បេ… វត្ថុំ… សប្បច្ចយេ ខន្ធេ គរុំ កត្វា អស្សាទេតិ អភិនន្ទតិ; តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – សប្បច្ចយាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

អប្បច្ចយោ ធម្មោ សប្បច្ចយស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – អរិយា និព្ពានំ គរុំ កត្វា បច្ចវេក្ខន្តិ; និព្ពានំ គោត្រភុស្ស, វោទានស្ស, មគ្គស្ស, ផលស្ស អធិបតិបច្ចយេន បច្ចយោ. (១)

អនន្តរបច្ចយាទិ

១១. សប្បច្ចយោ ធម្មោ សប្បច្ចយស្ស ធម្មស្ស អនន្តរបច្ចយេន បច្ចយោ…បេ… ឧបនិស្សយបច្ចយេន បច្ចយោ…បេ… (ទ្វេ បញ្ហា ឧបនិស្សយមូលំ) បុរេជាតបច្ចយេន បច្ចយោ…បេ… អវិគតបច្ចយេន បច្ចយោ (សព្ពត្ថ ឯកាយេវ បញ្ហា).