១. វិភង្គវារោ

ហេតុបច្ចយោ

៩៣. រូបិំ ធម្មំ បដិច្ច រូបី ធម្មោ ឧប្បជ្ជតិ ហេតុបច្ចយា – ឯកំ មហាភូតំ បដិច្ច តយោ មហាភូតា…បេ… ទ្វេ មហាភូតេ…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ. (១)

រូបិំ ធម្មំ បដិច្ច អរូបី ធម្មោ ឧប្បជ្ជតិ ហេតុបច្ចយា – បដិសន្ធិក្ខណេ វត្ថុំ បដិច្ច អរូបិនោ ខន្ធា. (២)

រូបិំ ធម្មំ បដិច្ច រូបី ច អរូបី ច ធម្មា ឧប្បជ្ជន្តិ ហេតុបច្ចយា – បដិសន្ធិក្ខណេ វត្ថុំ បដិច្ច អរូបិនោ ខន្ធា, មហាភូតេ បដិច្ច កដត្តារូបំ. (៣)

៩៤. អរូបិំ ធម្មំ បដិច្ច អរូបី ធម្មោ ឧប្បជ្ជតិ ហេតុបច្ចយា – អរូបិំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ…. (១)

អរូបិំ ធម្មំ បដិច្ច រូបី ធម្មោ ឧប្បជ្ជតិ ហេតុបច្ចយា – អរូបិនោ ខន្ធេ បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ…. (២)

អរូបិំ ធម្មំ បដិច្ច រូបី ច អរូបី ច ធម្មា ឧប្បជ្ជន្តិ ហេតុបច្ចយា – អរូបិំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ…. (៣)

៩៥. រូបិញ្ច អរូបិញ្ច ធម្មំ បដិច្ច រូបី ធម្មោ ឧប្បជ្ជតិ ហេតុបច្ចយា – អរូបិនោ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ; បដិសន្ធិក្ខណេ…បេ…. (១)

រូបិញ្ច អរូបិញ្ច ធម្មំ បដិច្ច អរូបី ធម្មោ ឧប្បជ្ជតិ ហេតុបច្ចយា – បដិសន្ធិក្ខណេ អរូបិំ ឯកំ ខន្ធញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ…បេ…. (២)

រូបិញ្ច អរូបិញ្ច ធម្មំ បដិច្ច រូបី ច អរូបី ច ធម្មា ឧប្បជ្ជន្តិ ហេតុបច្ចយា – បដិសន្ធិក្ខណេ អរូបិំ ឯកំ ខន្ធញ្ច វត្ថុញ្ច បដិច្ច តយោ ខន្ធា…បេ… ទ្វេ ខន្ធេ…បេ… អរូបិនោ ខន្ធេ ច មហាភូតេ ច បដិច្ច កដត្តារូបំ (សំខិត្តំ). (៣)