១. វិភង្គវារោ

ហេតុបច្ចយោ

៦៨. អប្បដិឃោ ធម្មោ អប្បដិឃស្ស ធម្មស្ស ហេតុបច្ចយេន បច្ចយោ – អប្បដិឃា ហេតូ សម្បយុត្តកានំ ខន្ធានំ អប្បដិឃានញ្ច ចិត្តសមុដ្ឋានានំ រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

អប្បដិឃោ ធម្មោ សប្បដិឃស្ស ធម្មស្ស ហេតុបច្ចយេន បច្ចយោ – អប្បដិឃា ហេតូ សប្បដិឃានំ ចិត្តសមុដ្ឋានានំ រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (២)

អប្បដិឃោ ធម្មោ សប្បដិឃស្ស ច អប្បដិឃស្ស ច ធម្មស្ស ហេតុបច្ចយេន បច្ចយោ – អប្បដិឃា ហេតូ សម្បយុត្តកានំ ខន្ធានំ សប្បដិឃានញ្ច អប្បដិឃានញ្ច ចិត្តសមុដ្ឋានានំ រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (៣)

អារម្មណបច្ចយោ

៦៩. សប្បដិឃោ ធម្មោ អប្បដិឃស្ស ធម្មស្ស អារម្មណបច្ចយេន បច្ចយោ – ចក្ខុំ…បេ… ផោដ្ឋព្ពេ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… សប្បដិឃា ខន្ធា ឥទ្ធិវិធញាណស្ស, បុព្ពេនិវាសានុស្សតិញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

អប្បដិឃោ ធម្មោ អប្បដិឃស្ស ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ បច្ចវេក្ខតិ, ឈានា វុដ្ឋហិត្វា ឈានំ បច្ចវេក្ខតិ, អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ បច្ចវេក្ខន្តិ, និព្ពានំ បច្ចវេក្ខន្តិ; និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ; អរិយា បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ; វត្ថុំ…បេ… ឥត្ថិន្ទ្រិយំ… បុរិសិន្ទ្រិយំ… ជីវិតិន្ទ្រិយំ… អាបោធាតុំ, កពឡីការំ អាហារំ អនិច្ចតោ…បេ… ទោមនស្សំ ឧប្បជ្ជតិ; ចេតោបរិយញាណេន អប្បដិឃចិត្តសមង្គិស្ស ចិត្តំ ជានាតិ, អាកាសានញ្ចាយតនំ វិញ្ញាណញ្ចាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស…បេ… អប្បដិឃា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

អធិបតិបច្ចយោ

៧០. សប្បដិឃោ ធម្មោ អប្បដិឃស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ចក្ខុំ…បេ… ផោដ្ឋព្ពេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. (១)

អប្បដិឃោ ធម្មោ អប្បដិឃស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ កត្វា តំ គរុំ កត្វា បច្ចវេក្ខតិ, បុព្ពេ សុចិណ្ណានិ គរុំ កត្វា បច្ចវេក្ខតិ, ឈានា វុដ្ឋហិត្វា ឈានំ គរុំ កត្វា បច្ចវេក្ខតិ, អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ, ផលំ គរុំ កត្វា បច្ចវេក្ខន្តិ, និព្ពានំ គរុំ កត្វា បច្ចវេក្ខន្តិ; និព្ពានំ គោត្រភុស្ស, វោទានស្ស, មគ្គស្ស, ផលស្ស អធិបតិបច្ចយេន បច្ចយោ; វត្ថុំ…បេ… ឥត្ថិន្ទ្រិយំ… បុរិសិន្ទ្រិយំ… ជីវិតិន្ទ្រិយំ… អាបោធាតុំ, កពឡីការំ អាហារំ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – អប្បដិឃាធិបតិ សម្បយុត្តកានំ ខន្ធានំ អប្បដិឃានញ្ច ចិត្តសមុដ្ឋានានំ រូបានំ អធិបតិបច្ចយេន បច្ចយោ. (១)

អប្បដិឃោ ធម្មោ សប្បដិឃស្ស ធម្មស្ស អធិបតិបច្ចយេន បច្ចយោ. សហជាតាធិបតិ – អប្បដិឃាធិបតិ សប្បដិឃានំ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (១)

អប្បដិឃោ ធម្មោ សប្បដិឃស្ស ច អប្បដិឃស្ស ច ធម្មស្ស អធិបតិបច្ចយេន បច្ចយោ. សហជាតាធិបតិ – អប្បដិឃាធិបតិ សម្បយុត្តកានំ ខន្ធានំ សប្បដិឃានញ្ច អប្បដិឃានញ្ច ចិត្តសមុដ្ឋានានំ រូបានំ អធិបតិបច្ចយេន បច្ចយោ. (៣)

អនន្តរបច្ចយោ

៧១. អប្បដិឃោ ធម្មោ អប្បដិឃស្ស ធម្មស្ស អនន្តរបច្ចយេន បច្ចយោ – បុរិមា បុរិមា អប្បដិឃា ខន្ធា…បេ… ផលសមាបត្តិយា អនន្តរបច្ចយេន បច្ចយោ.

សមនន្តរបច្ចយោ

៧២. អប្បដិឃោ ធម្មោ អប្បដិឃស្ស ធម្មស្ស សមនន្តរបច្ចយេន បច្ចយោ…បេ….

សហជាតបច្ចយាទិ

៧៣. សប្បដិឃោ ធម្មោ សប្បដិឃស្ស ធម្មស្ស សហជាតបច្ចយេន បច្ចយោ… នវ… អញ្ញមញ្ញបច្ចយេន បច្ចយោ… ឆ… និស្សយបច្ចយេន បច្ចយោ… នវ.

ឧបនិស្សយបច្ចយោ

៧៤. សប្បដិឃោ ធម្មោ អប្បដិឃស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ…. បកតូបនិស្សយោ – ឧតុំ, សេនាសនំ ឧបនិស្សាយ ទានំ ទេតិ…បេ… សង្ឃំ ភិន្ទតិ; ឧតុ, សេនាសនំ សទ្ធាយ…បេ… ផលសមាបត្តិយា ឧបនិស្សយបច្ចយេន បច្ចយោ. (១)

អប្បដិឃោ ធម្មោ អប្បដិឃស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទានំ ទេតិ…បេ… ទិដ្ឋិំ គណ្ហាតិ; សីលំ…បេ… កាយិកំ សុខំ, កាយិកំ ទុក្ខំ, ភោជនំ ឧបនិស្សាយ ទានំ ទេតិ…បេ… សង្ឃំ ភិន្ទតិ; សទ្ធា…បេ… ភោជនំ សទ្ធាយ…បេ… ផលសមាបត្តិយា ឧបនិស្សយបច្ចយេន បច្ចយោ. (១)

បុរេជាតបច្ចយោ

៧៥. សប្បដិឃោ ធម្មោ អប្បដិឃស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… ផោដ្ឋព្ពេ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស បុរេជាតបច្ចយេន បច្ចយោ. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស បុរេជាតបច្ចយេន បច្ចយោ. (១)

អប្បដិឃោ ធម្មោ អប្បដិឃស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – វត្ថុំ…បេ… ឥត្ថិន្ទ្រិយំ, បុរិសិន្ទ្រិយំ, ជីវិតិន្ទ្រិយំ, អាបោធាតុំ, កពឡីការំ អាហារំ អនិច្ចតោ …បេ… ទោមនស្សំ ឧប្បជ្ជតិ. វត្ថុបុរេជាតំ – វត្ថុ អប្បដិឃានំ ខន្ធានំ បុរេជាតបច្ចយេន បច្ចយោ. (១)

សប្បដិឃោ ច អប្បដិឃោ ច ធម្មា អប្បដិឃស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. ចក្ខាយតនញ្ច វត្ថុ ច…បេ… ផោដ្ឋព្ពាយតនញ្ច វត្ថុ ច អប្បដិឃានំ ខន្ធានំ បុរេជាតបច្ចយេន បច្ចយោ. (១)

បច្ឆាជាតបច្ចយោ

៧៦. អប្បដិឃោ ធម្មោ អប្បដិឃស្ស ធម្មស្ស បច្ឆាជាតបច្ចយេន បច្ចយោ – បច្ឆាជាតា អប្បដិឃា ខន្ធា បុរេជាតស្ស ឥមស្ស អប្បដិឃស្ស កាយស្ស បច្ឆាជាតបច្ចយេន បច្ចយោ. (មូលំ កាតព្ពំ) បច្ឆាជាតា អប្បដិឃា ខន្ធា បុរេជាតស្ស ឥមស្ស សប្បដិឃស្ស កាយស្ស បច្ឆាជាតបច្ចយេន បច្ចយោ. (មូលំ កាតព្ពំ) បច្ឆាជាតា អប្បដិឃា ខន្ធា បុរេជាតស្ស ឥមស្ស សប្បដិឃស្ស ច អប្បដិឃស្ស ច កាយស្ស បច្ឆាជាតបច្ចយេន បច្ចយោ (ទ្វិន្នម្បិ មូលា កាតព្ពា). (៣)

អាសេវនបច្ចយោ

៧៧. អប្បដិឃោ ធម្មោ អប្បដិឃស្ស ធម្មស្ស អាសេវនបច្ចយេន បច្ចយោ – បុរិមា បុរិមា អប្បដិឃា ខន្ធា…បេ… វោទានំ មគ្គស្ស អាសេវនបច្ចយេន បច្ចយោ. (១)

កម្មបច្ចយោ

៧៨. អប្បដិឃោ ធម្មោ អប្បដិឃស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – អប្បដិឃា ចេតនា សម្បយុត្តកានំ ខន្ធានំ អប្បដិឃានញ្ច ចិត្តសមុដ្ឋានានំ រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – អប្បដិឃា ចេតនា វិបាកានំ ខន្ធានំ អប្បដិឃានញ្ច កដត្តារូបានំ កម្មបច្ចយេន បច្ចយោ. (១)

អប្បដិឃោ ធម្មោ សប្បដិឃស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – អប្បដិឃា ចេតនា សប្បដិឃានំ ចិត្តសមុដ្ឋានានំ រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – អប្បដិឃា ចេតនា សប្បដិឃានំ កដត្តារូបានំ កម្មបច្ចយេន បច្ចយោ. (២)

អប្បដិឃោ ធម្មោ សប្បដិឃស្ស ច អប្បដិឃស្ស ច ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – អប្បដិឃា ចេតនា សម្បយុត្តកានំ ខន្ធានំ សប្បដិឃានញ្ច អប្បដិឃានញ្ច ចិត្តសមុដ្ឋានានំ រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – អប្បដិឃា ចេតនា វិបាកានំ ខន្ធានំ សប្បដិឃានញ្ច អប្បដិឃានញ្ច កដត្តារូបានំ កម្មបច្ចយេន បច្ចយោ. (៣)

វិបាកបច្ចយោ

៧៩. អប្បដិឃោ ធម្មោ អប្បដិឃស្ស ធម្មស្ស វិបាកបច្ចយេន បច្ចយោ – វិបាកោ អប្បដិឃោ…បេ… តីណិ.

អាហារបច្ចយោ

៨០. អប្បដិឃោ ធម្មោ អប្បដិឃស្ស ធម្មស្ស អាហារបច្ចយេន បច្ចយោ – អប្បដិឃា អាហារា សម្បយុត្តកានំ ខន្ធានំ អប្បដិឃានញ្ច ចិត្តសមុដ្ឋានានំ រូបានំ អាហារបច្ចយេន បច្ចយោ; បដិសន្ធិក្ខណេ…បេ… កពឡីការោ អាហារោ ឥមស្ស អប្បដិឃស្ស កាយស្ស អាហារបច្ចយេន បច្ចយោ (អវសេសា ទ្វេបិ បញ្ហា កាតព្ពា, បដិសន្ធិ កពឡីការោ អាហារោ ទ្វីសុបិ កាតព្ពោ អគ្គេ). (៣)

ឥន្ទ្រិយបច្ចយាទិ

៨១. សប្បដិឃោ ធម្មោ អប្បដិឃស្ស ធម្មស្ស ឥន្ទ្រិយបច្ចយេន បច្ចយោ – ចក្ខុន្ទ្រិយំ ចក្ខុវិញ្ញាណស្ស…បេ… កាយិន្ទ្រិយំ កាយវិញ្ញាណស្ស ឥន្ទ្រិយបច្ចយេន បច្ចយោ. (១)

អប្បដិឃោ ធម្មោ អប្បដិឃស្ស ធម្មស្ស ឥន្ទ្រិយបច្ចយេន បច្ចយោ… តីណិ (តីសុបិ ជីវិតិន្ទ្រិយំ អគ្គេ កាតព្ពំ). (៣)

សប្បដិឃោ ច អប្បដិឃោ ច ធម្មា អប្បដិឃស្ស ធម្មស្ស ឥន្ទ្រិយបច្ចយេន បច្ចយោ – ចក្ខុន្ទ្រិយញ្ច ចក្ខុវិញ្ញាណញ្ច ចក្ខុវិញ្ញាណសហគតានំ ខន្ធានំ ឥន្ទ្រិយបច្ចយេន បច្ចយោ…បេ… កាយិន្ទ្រិយញ្ច កាយវិញ្ញាណញ្ច កាយវិញ្ញាណសហគតានំ ខន្ធានំ ឥន្ទ្រិយបច្ចយេន បច្ចយោ… ឈានបច្ចយេន បច្ចយោ… តីណិ… មគ្គបច្ចយេន បច្ចយោ… តីណិ… សម្បយុត្តបច្ចយេន បច្ចយោ… ឯកំ.

វិប្បយុត្តបច្ចយោ

៨២. សប្បដិឃោ ធម្មោ អប្បដិឃស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស វិប្បយុត្តបច្ចយេន បច្ចយោ. (១)

អប្បដិឃោ ធម្មោ អប្បដិឃស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ. សហជាតា – អប្បដិឃា ខន្ធា អប្បដិឃានំ ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ; បដិសន្ធិក្ខណេ…បេ… ខន្ធា វត្ថុស្ស វិប្បយុត្តបច្ចយេន បច្ចយោ, វត្ថុ ខន្ធានំ វិប្បយុត្តបច្ចយេន បច្ចយោ. បុរេជាតំ – វត្ថុ អប្បដិឃានំ ខន្ធានំ វិប្បយុត្តបច្ចយេន បច្ចយោ. បច្ឆាជាតា – អប្បដិឃា ខន្ធា បុរេជាតស្ស ឥមស្ស អប្បដិឃស្ស កាយស្ស វិប្បយុត្តបច្ចយេន បច្ចយោ. (១)

អប្បដិឃោ ធម្មោ សប្បដិឃស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – អប្បដិឃា ខន្ធា សប្បដិឃានំ ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ; បដិសន្ធិក្ខណេ…បេ…. បច្ឆាជាតា – អប្បដិឃា ខន្ធា បុរេជាតស្ស ឥមស្ស សប្បដិឃស្ស កាយស្ស វិប្បយុត្តបច្ចយេន បច្ចយោ. (២)

អប្បដិឃោ ធម្មោ សប្បដិឃស្ស ច អប្បដិឃស្ស ច ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – អប្បដិឃា ខន្ធា សប្បដិឃានញ្ច អប្បដិឃានញ្ច ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ; បដិសន្ធិក្ខណេ …បេ…. បច្ឆាជាតា – អប្បដិឃា ខន្ធា បុរេជាតស្ស ឥមស្ស សប្បដិឃស្ស ច អប្បដិឃស្ស ច កាយស្ស វិប្បយុត្តបច្ចយេន បច្ចយោ. (៣)

អត្ថិបច្ចយោ

៨៣. សប្បដិឃោ ធម្មោ សប្បដិឃស្ស ធម្មស្ស អត្ថិបច្ចយេន បច្ចយោ… ឯកំ (បដិច្ចសទិសា បឋមបញ្ហា). (១)

សប្បដិឃោ ធម្មោ អប្បដិឃស្ស ធម្មស្ស អត្ថិបច្ចយេន បច្ចយោ សហជាតំ, បុរេជាតំ. សហជាតា – សប្បដិឃា មហាភូតា អាបោធាតុយា អត្ថិបច្ចយេន បច្ចយោ, សប្បដិឃា មហាភូតា អប្បដិឃានំ ចិត្តសមុដ្ឋានានំ រូបានំ កដត្តារូបានំ ឧបាទារូបានំ អត្ថិបច្ចយេន បច្ចយោ; ផោដ្ឋព្ពាយតនំ ឥត្ថិន្ទ្រិយស្ស…បេ… កពឡីការស្ស អាហារស្ស អត្ថិបច្ចយេន បច្ចយោ; ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ…. បុរេជាតំ – ចក្ខុំ…បេ… ផោដ្ឋព្ពេ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, រូបាយតនញ្ច ចក្ខាយតនញ្ច ចក្ខុវិញ្ញាណស្ស…បេ… ផោដ្ឋព្ពាយតនញ្ច កាយាយតនញ្ច កាយវិញ្ញាណស្ស អត្ថិបច្ចយេន បច្ចយោ. (២)

សប្បដិឃោ ធម្មោ សប្បដិឃស្ស ច អប្បដិឃស្ស ច ធម្មស្ស អត្ថិបច្ចយេន បច្ចយោ – សប្បដិឃំ ឯកំ មហាភូតំ ទ្វិន្នំ មហាភូតានំ អាបោធាតុយា ច អត្ថិបច្ចយេន បច្ចយោ…បេ… (បដិច្ចសទិសំ យាវ អសញ្ញសត្តា). (៣)

៨៤. អប្បដិឃោ ធម្មោ អប្បដិឃស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតោ – អប្បដិឃោ ឯកោ ខន្ធោ តិណ្ណន្នំ ខន្ធានំ…បេ… (យាវ អសញ្ញសត្តា). បុរេជាតំ – វត្ថុំ…បេ… ឥត្ថិន្ទ្រិយំ… បុរិសិន្ទ្រិយំ… ជីវិតិន្ទ្រិយំ… អាបោធាតុំ… កពឡីការំ អាហារំ អនិច្ចតោ…បេ… ទោមនស្សំ ឧប្បជ្ជតិ; វត្ថុ អប្បដិឃានំ ខន្ធានំ អត្ថិបច្ចយេន បច្ចយោ. បច្ឆាជាតា – អប្បដិឃា ខន្ធា បុរេជាតស្ស ឥមស្ស អប្បដិឃស្ស កាយស្ស អត្ថិបច្ចយេន បច្ចយោ; កពឡីការោ អាហារោ ឥមស្ស អប្បដិឃស្ស កាយស្ស អត្ថិបច្ចយេន បច្ចយោ; រូបជីវិតិន្ទ្រិយំ អប្បដិឃានំ កដត្តារូបានំ អត្ថិបច្ចយេន បច្ចយោ. (១)

អប្បដិឃោ ធម្មោ សប្បដិឃស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតា – អប្បដិឃា ខន្ធា សប្បដិឃានំ ចិត្តសមុដ្ឋានានំ រូបានំ អត្ថិបច្ចយេន បច្ចយោ; បដិសន្ធិក្ខណេ…បេ… អាបោធាតុ សប្បដិឃានំ មហាភូតានំ អត្ថិបច្ចយេន បច្ចយោ; អាបោធាតុ សប្បដិឃានំ ចិត្តសមុដ្ឋានានំ រូបានំ កដត្តារូបានំ ឧបាទារូបានំ អត្ថិបច្ចយេន បច្ចយោ; អាបោធាតុ ចក្ខាយតនស្ស…បេ… ផោដ្ឋព្ពាយតនស្ស អត្ថិបច្ចយេន បច្ចយោ; ពាហិរំ, អាហារសមុដ្ឋានំ, ឧតុសមុដ្ឋានំ, អសញ្ញសត្តានំ…បេ…. បច្ឆាជាតា – អប្បដិឃា ខន្ធា បុរេជាតស្ស ឥមស្ស សប្បដិឃស្ស កាយស្ស អត្ថិបច្ចយេន បច្ចយោ; កពឡីការោ អាហារោ ឥមស្ស សប្បដិឃស្ស កាយស្ស អត្ថិបច្ចយេន បច្ចយោ; រូបជីវិតិន្ទ្រិយំ សប្បដិឃានំ កដត្តារូបានំ អត្ថិបច្ចយេន បច្ចយោ. (២)

អប្បដិឃោ ធម្មោ សប្បដិឃស្ស ច អប្បដិឃស្ស ច ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតោ – អប្បដិឃោ ឯកោ ខន្ធោ តិណ្ណន្នំ ខន្ធានំ សប្បដិឃានញ្ច អប្បដិឃានញ្ច…បេ… (បដិច្ចសទិសំ យាវ អសញ្ញសត្តា). បច្ឆាជាតា – អប្បដិឃា ខន្ធា បុរេជាតស្ស ឥមស្ស សប្បដិឃស្ស ច អប្បដិឃស្ស ច កាយស្ស អត្ថិបច្ចយេន បច្ចយោ; កពឡីការោ អាហារោ ឥមស្ស សប្បដិឃស្ស ច អប្បដិឃស្ស ច កាយស្ស អត្ថិបច្ចយេន បច្ចយោ; រូបជីវិតិន្ទ្រិយំ សប្បដិឃានញ្ច អប្បដិឃានញ្ច កដត្តារូបានំ អត្ថិបច្ចយេន បច្ចយោ. (៣)

៨៥. សប្បដិឃោ ច អប្បដិឃោ ច ធម្មា សប្បដិឃស្ស ធម្មស្ស អត្ថិបច្ចយេន បច្ចយោ (បដិច្ចសទិសំ យាវ អសញ្ញសត្តា). (១)

សប្បដិឃោ ច អប្បដិឃោ ច ធម្មា អប្បដិឃស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតា – អប្បដិឃា ខន្ធា ច មហាភូតា ច អប្បដិឃានំ ចិត្តសមុដ្ឋានានំ រូបានំ…បេ… (បដិច្ចសទិសំ យាវ អសញ្ញសត្តា). សហជាតោ – ចក្ខុវិញ្ញាណសហគតោ ឯកោ ខន្ធោ ច ចក្ខាយតនញ្ច តិណ្ណន្នំ ខន្ធានំ…បេ… ទ្វេ ខន្ធា ច…បេ… កាយវិញ្ញាណសហគតោ ឯកោ ខន្ធោ ច កាយាយតនញ្ច តិណ្ណន្នំ ខន្ធានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ…. (២)

សប្បដិឃោ ច អប្បដិឃោ ច ធម្មា សប្បដិឃស្ស ច អប្បដិឃស្ស ច ធម្មស្ស អត្ថិបច្ចយេន បច្ចយោ (បដិច្ចសទិសំ). (៣)