១. វិភង្គវារោ

ហេតុបច្ចយោ

១៨. អនិទស្សនំ ធម្មំ បដិច្ច អនិទស្សនោ ធម្មោ ឧប្បជ្ជតិ ហេតុបច្ចយា – អនិទស្សនំ ឯកំ ខន្ធំ បដិច្ច តយោ ខន្ធា អនិទស្សនំ ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ អនិទស្សនំ ឯកំ ខន្ធំ បដិច្ច តយោ ខន្ធា អនិទស្សនំ កដត្តា ច រូបំ…បេ… ទ្វេ ខន្ធេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា; ឯកំ មហាភូតំ…បេ… មហាភូតេ បដិច្ច អនិទស្សនំ ចិត្តសមុដ្ឋានំ រូបំ កដត្តារូបំ ឧបាទារូបំ. (១)

អនិទស្សនំ ធម្មំ បដិច្ច សនិទស្សនោ ធម្មោ ឧប្បជ្ជតិ ហេតុបច្ចយា – អនិទស្សនេ ខន្ធេ បដិច្ច សនិទស្សនំ ចិត្តសមុដ្ឋានំ រូបំ; បដិសន្ធិក្ខណេ…បេ… មហាភូតេ បដិច្ច សនិទស្សនំ ចិត្តសមុដ្ឋានំ រូបំ កដត្តារូបំ ឧបាទារូបំ. (២)

អនិទស្សនំ ធម្មំ បដិច្ច សនិទស្សនោ ច អនិទស្សនោ ច ធម្មា ឧប្បជ្ជន្តិ ហេតុបច្ចយា – អនិទស្សនំ ឯកំ ខន្ធំ បដិច្ច តយោ ខន្ធា សនិទស្សនញ្ច អនិទស្សនញ្ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… មហាភូតេ បដិច្ច សនិទស្សនញ្ច អនិទស្សនញ្ច ចិត្តសមុដ្ឋានញ្ច រូបំ កដត្តារូបំ ឧបាទារូបំ. (៣)

អារម្មណបច្ចយោ

១៩. អនិទស្សនំ ធម្មំ បដិច្ច អនិទស្សនោ ធម្មោ ឧប្បជ្ជតិ អារម្មណបច្ចយា – អនិទស្សនំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ… បដិសន្ធិក្ខណេ…បេ… វត្ថុំ បដិច្ច ខន្ធា. (១)

អធិបតិបច្ចយោ

២០. អនិទស្សនំ ធម្មំ បដិច្ច អនិទស្សនោ ធម្មោ ឧប្បជ្ជតិ អធិបតិបច្ចយា – អនិទស្សនំ ឯកំ ខន្ធំ បដិច្ច តយោ ខន្ធា អនិទស្សនំ ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… ឯកំ មហាភូតំ បដិច្ច តយោ មហាភូតា…បេ… ទ្វេ មហាភូតេ…បេ… មហាភូតេ បដិច្ច អនិទស្សនំ ចិត្តសមុដ្ឋានំ រូបំ ឧបាទារូបំ. (១)

អនិទស្សនំ ធម្មំ បដិច្ច សនិទស្សនោ ធម្មោ ឧប្បជ្ជតិ អធិបតិបច្ចយា – អនិទស្សនេ ខន្ធេ បដិច្ច សនិទស្សនំ ចិត្តសមុដ្ឋានំ រូបំ, មហាភូតេ បដិច្ច សនិទស្សនំ ចិត្តសមុដ្ឋានំ រូបំ. (២)

អនិទស្សនំ ធម្មំ បដិច្ច សនិទស្សនោ ច អនិទស្សនោ ច ធម្មា ឧប្បជ្ជន្តិ អធិបតិបច្ចយា – អនិទស្សនំ ឯកំ ខន្ធំ បដិច្ច តយោ ខន្ធា សនិទស្សនញ្ច អនិទស្សនញ្ច ចិត្តសមុដ្ឋានំ រូបំ…បេ… ទ្វេ ខន្ធេ…បេ… មហាភូតេ បដិច្ច សនិទស្សនញ្ច អនិទស្សនញ្ច ចិត្តសមុដ្ឋានំ រូបំ ឧបាទារូបំ. (៣) (សំខិត្តំ, សព្ពេ កាតព្ពា.)