១-៤. បច្ចយានុលោមាទិ

ហេតុបច្ចយោ

១១៦. ឧបាទានវិប្បយុត្តំ ឧបាទានិយំ ធម្មំ បដិច្ច ឧបាទានវិប្បយុត្តោ ឧបាទានិយោ ធម្មោ ឧប្បជ្ជតិ ហេតុបច្ចយា – ឧបាទានវិប្បយុត្តំ ឧបាទានិយំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… ឯកំ មហាភូតំ…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ. (១)

ឧបាទានវិប្បយុត្តំ អនុបាទានិយំ ធម្មំ បដិច្ច ឧបាទានវិប្បយុត្តោ អនុបាទានិយោ ធម្មោ ឧប្បជ្ជតិ ហេតុបច្ចយា – ឧបាទានវិប្បយុត្តំ អនុបាទានិយំ ឯកំ ខន្ធំ បដិច្ច តយោ ខន្ធា…បេ… ទ្វេ ខន្ធេ…បេ…. (១)

ឧបាទានវិប្បយុត្តំ អនុបាទានិយំ ធម្មំ បដិច្ច ឧបាទានវិប្បយុត្តោ ឧបាទានិយោ ធម្មោ ឧប្បជ្ជតិ ហេតុបច្ចយា – ឧបាទានវិប្បយុត្តេ អនុបាទានិយេ ខន្ធេ បដិច្ច ចិត្តសមុដ្ឋានំ រូបំ. (២)

ឧបាទានវិប្បយុត្តំ អនុបាទានិយំ ធម្មំ បដិច្ច ឧបាទានវិប្បយុត្តោ ឧបាទានិយោ ច ឧបាទានវិប្បយុត្តោ អនុបាទានិយោ ច ធម្មា ឧប្បជ្ជន្តិ ហេតុបច្ចយា – ឧបាទានវិប្បយុត្តំ អនុបាទានិយំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ…. (៣)

ឧបាទានវិប្បយុត្តំ ឧបាទានិយញ្ច ឧបាទានវិប្បយុត្តំ អនុបាទានិយញ្ច ធម្មំ បដិច្ច ឧបាទានវិប្បយុត្តោ ឧបាទានិយោ ធម្មោ ឧប្បជ្ជតិ ហេតុបច្ចយា – ឧបាទានវិប្បយុត្តេ អនុបាទានិយេ ខន្ធេ ច មហាភូតេ ច បដិច្ច ចិត្តសមុដ្ឋានំ រូបំ. (១)

ហេតុយា បញ្ច, អារម្មណេ ទ្វេ…បេ… អវិគតេ បញ្ច.

(ឥមំ ទុកំ ចូឡន្តរទុកេ លោកិយទុកសទិសំ, និន្នានាករណំ.)

ឧបាទានវិប្បយុត្តឧបាទានិយទុកំ និដ្ឋិតំ.

ឧបាទានគោច្ឆកំ និដ្ឋិតំ.

តតិយោ ភាគោ និដ្ឋិតោ.