១១. ឧបាទានគោច្ឆកំ

៦៩. ឧបាទានទុកំ

១. បដិច្ចវារោ

១. បច្ចយានុលោមំ

១. វិភង្គវារោ

ហេតុបច្ចយោ

១. ឧបាទានំ ធម្មំ បដិច្ច ឧបាទានោ ធម្មោ ឧប្បជ្ជតិ ហេតុបច្ចយា – ទិដ្ឋុបាទានំ បដិច្ច កាមុបាទានំ, កាមុបាទានំ បដិច្ច ទិដ្ឋុបាទានំ, សីលព្ពតុបាទានំ បដិច្ច កាមុបាទានំ, កាមុបាទានំ បដិច្ច សីលព្ពតុបាទានំ, អត្តវាទុបាទានំ បដិច្ច កាមុបាទានំ, កាមុបាទានំ បដិច្ច អត្តវាទុបាទានំ. (១)

ឧបាទានំ ធម្មំ បដិច្ច នោឧបាទានោ ធម្មោ ឧប្បជ្ជតិ ហេតុបច្ចយា – ឧបាទានេ បដិច្ច សម្បយុត្តកា ខន្ធា ចិត្តសមុដ្ឋានញ្ច រូបំ. (២)

ឧបាទានំ ធម្មំ បដិច្ច ឧបាទានោ ច នោឧបាទានោ ច ធម្មា ឧប្បជ្ជន្តិ ហេតុបច្ចយា – ទិដ្ឋុបាទានំ បដិច្ច កាមុបាទានំ សម្បយុត្តកា ច ខន្ធា ចិត្តសមុដ្ឋានញ្ច រូបំ, កាមុបាទានំ…បេ… (សព្ពំ ចក្កំ កាតព្ពំ). (៣)

២. នោឧបាទានំ ធម្មំ បដិច្ច នោឧបាទានោ ធម្មោ ឧប្បជ្ជតិ ហេតុបច្ចយា – នោឧបាទានំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ នោឧបាទានំ ឯកំ ខន្ធំ បដិច្ច តយោ ខន្ធា កដត្តា ច រូបំ…បេ… ទ្វេ ខន្ធេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា, ឯកំ មហាភូតំ…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ. (១)

នោឧបាទានំ ធម្មំ បដិច្ច ឧបាទានោ ធម្មោ ឧប្បជ្ជតិ ហេតុបច្ចយា – នោឧបាទានេ ខន្ធេ បដិច្ច ឧបាទានា. (២)

នោឧបាទានំ ធម្មំ បដិច្ច ឧបាទានោ ច នោឧបាទានោ ច ធម្មា ឧប្បជ្ជន្តិ ហេតុបច្ចយា – នោឧបាទានំ ឯកំ ខន្ធំ បដិច្ច តយោ ខន្ធា ឧបាទានា ច ចិត្តសមុដ្ឋានញ្ច រូបំ…បេ… ទ្វេ ខន្ធេ បដិច្ច ទ្វេ ខន្ធា ឧបាទានា ច ចិត្តសមុដ្ឋានញ្ច រូបំ. (៣)

៣. ឧបាទានញ្ច នោឧបាទានញ្ច ធម្មំ បដិច្ច ឧបាទានោ ធម្មោ ឧប្បជ្ជតិ ហេតុបច្ចយា – ទិដ្ឋុបាទានញ្ច សម្បយុត្តកេ ច ខន្ធេ បដិច្ច កាមុបាទានំ (សព្ពេ ចក្កា កាតព្ពា). (១)

ឧបាទានញ្ច នោឧបាទានញ្ច ធម្មំ បដិច្ច នោឧបាទានោ ធម្មោ ឧប្បជ្ជតិ ហេតុបច្ចយា – នោឧបាទានំ ឯកំ ខន្ធញ្ច ឧបាទានញ្ច បដិច្ច តយោ ខន្ធា ចិត្តសមុដ្ឋានញ្ច រូបំ, ទ្វេ ខន្ធេ ច…បេ… ឧបាទានញ្ច មហាភូតេ ច បដិច្ច ចិត្តសមុដ្ឋានំ រូបំ. (២)

ឧបាទានញ្ច នោឧបាទានញ្ច ធម្មំ បដិច្ច ឧបាទានោ ច នោឧបាទានោ ច ធម្មា ឧប្បជ្ជន្តិ ហេតុបច្ចយា – នោឧបាទានំ ឯកំ ខន្ធញ្ច ទិដ្ឋុបាទានញ្ច បដិច្ច តយោ ខន្ធា កាមុបាទានញ្ច ចិត្តសមុដ្ឋានំ រូបំ, ទ្វេ ខន្ធេ ច…បេ… (ចក្កំ កាតព្ពំ). (៣)

អារម្មណបច្ចយោ

៤. ឧបាទានំ ធម្មំ បដិច្ច ឧបាទានោ ធម្មោ ឧប្បជ្ជតិ អារម្មណបច្ចយា (នវបិ បញ្ហា កាតព្ពា, រូបំ ឆឌ្ឌេតព្ពំ).

១. បច្ចយានុលោមំ

២. សង្ខ្យាវារោ

៥. ហេតុយា នវ, អារម្មណេ នវ, អធិបតិយា នវ (សព្ពត្ថ នវ), វិបាកេ ឯកំ…បេ… អវិគតេ នវ.

២. បច្ចយបច្ចនីយំ

១. វិភង្គវារោ

នហេតុបច្ចយោ

៦. នោឧបាទានំ ធម្មំ បដិច្ច នោឧបាទានោ ធម្មោ ឧប្បជ្ជតិ នហេតុបច្ចយា – អហេតុកំ នោឧបាទានំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… ខន្ធេ បដិច្ច វត្ថុ, វត្ថុំ បដិច្ច ខន្ធា, ឯកំ មហាភូតំ…បេ… មហាភូតេ បដិច្ច ចិត្តសមុដ្ឋានំ រូបំ កដត្តារូបំ ឧបាទារូបំ; ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

នអារម្មណបច្ចយាទិ

៧. ឧបាទានំ ធម្មំ បដិច្ច នោឧបាទានោ ធម្មោ ឧប្បជ្ជតិ នអារម្មណបច្ចយា – ឧបាទានេ បដិច្ច ចិត្តសមុដ្ឋានំ រូបំ. (១)

នោឧបាទានំ ធម្មំ បដិច្ច នោឧបាទានោ ធម្មោ ឧប្បជ្ជតិ នអារម្មណបច្ចយា – នោឧបាទានេ ខន្ធេ បដិច្ច ចិត្តសមុដ្ឋានំ រូបំ; បដិសន្ធិក្ខណេ នោឧបាទានេ ខន្ធេ បដិច្ច កដត្តារូបំ, ខន្ធេ បដិច្ច វត្ថុ, ឯកំ មហាភូតំ…បេ… (យាវ អសញ្ញសត្តា). (១)

ឧបាទានញ្ច នោឧបាទានំ ច ធម្មំ បដិច្ច នោឧបាទានោ ធម្មោ ឧប្បជ្ជតិ នអារម្មណបច្ចយា – ឧបាទានេ ច សម្បយុត្តកេ ច ខន្ធេ បដិច្ច ចិត្តសមុដ្ឋានំ រូបំ, ឧបាទានេ ច មហាភូតេ ច បដិច្ច ចិត្តសមុដ្ឋានំ រូបំ. (១)

នអធិបតិបច្ចយា… នអនន្តរបច្ចយា…បេ… នឧបនិស្សយបច្ចយា.

នបុរេជាតបច្ចយោ

៨. ឧបាទានំ ធម្មំ បដិច្ច ឧបាទានោ ធម្មោ ឧប្បជ្ជតិ នបុរេជាតបច្ចយា – អរូបេ អត្តវាទុបាទានំ បដិច្ច កាមុបាទានំ, កាមុបាទានំ បដិច្ច អត្តវាទុបាទានំ. (១)

ឧបាទានំ ធម្មំ បដិច្ច នោឧបាទានោ ធម្មោ ឧប្បជ្ជតិ នបុរេជាតបច្ចយា – អរូបេ ឧបាទានេ បដិច្ច សម្បយុត្តកា ខន្ធា, ឧបាទានេ បដិច្ច ចិត្តសមុដ្ឋានំ រូបំ (សំខិត្តំ, នវបិ បញ្ហា អរូបេ ទ្វេ ឧបាទានា).

២. បច្ចយបច្ចនីយំ

២. សង្ខ្យាវារោ

សុទ្ធំ

៩. នហេតុយា ឯកំ, នអារម្មណេ តីណិ, នអធិបតិយា នវ, នអនន្តរេ តីណិ…បេ… នឧបនិស្សយេ តីណិ, នបុរេជាតេ នវ, នបច្ឆាជាតេ នវ, នអាសេវនេ នវ, នកម្មេ តីណិ, នវិបាកេ នវ, នអាហារេ ឯកំ, នឥន្ទ្រិយេ ឯកំ, នឈានេ ឯកំ, នមគ្គេ ឯកំ, នសម្បយុត្តេ តីណិ, នវិប្បយុត្តេ នវ, នោនត្ថិយា តីណិ, នោវិគតេ តីណិ.

៣. បច្ចយានុលោមបច្ចនីយំ

១០. ហេតុបច្ចយា នអារម្មណេ តីណិ, នអធិបតិយា នវ…បេ… នឧបនិស្សយេ តីណិ, នបុរេជាតេ នវ, នបច្ឆាជាតេ នវ, នអាសេវនេ នវ, នកម្មេ តីណិ, នវិបាកេ នវ, នសម្បយុត្តេ តីណិ, នវិប្បយុត្តេ នវ, នោនត្ថិយា តីណិ, នោវិគតេ តីណិ.

៤. បច្ចយបច្ចនីយានុលោមំ

១១. នហេតុបច្ចយា អារម្មណេ ឯកំ (សព្ពត្ថ ឯកំ), មគ្គេ ឯកំ…បេ… អវិគតេ ឯកំ.

២. សហជាតវារោ

(សហជាតវារោ បដិច្ចវារសទិសោ វិភជន្តេន ទិដ្ឋុបាទានំ ‘‘សហជាតំ កាមុបាទាន’’ន្តិ កាតព្ពំ.)

៣. បច្ចយវារោ

១-៤. បច្ចយានុលោមាទិ

ហេតុបច្ចយោ

១២. ឧបាទានំ ធម្មំ បច្ចយា ឧបាទានោ ធម្មោ ឧប្បជ្ជតិ ហេតុបច្ចយា – ទិដ្ឋុបាទានំ បច្ចយា កាមុបាទានំ… តីណិ (បដិច្ចសទិសា).

នោឧបាទានំ ធម្មំ បច្ចយា នោឧបាទានោ ធម្មោ ឧប្បជ្ជតិ ហេតុបច្ចយា – នោឧបាទានំ ឯកំ ខន្ធំ បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… បដិសន្ធិក្ខណេ…បេ… ខន្ធេ បច្ចយា វត្ថុ…បេ… (យាវ អជ្ឈត្តិកា មហាភូតា) វត្ថុំ បច្ចយា នោឧបាទានា ខន្ធា. (១)

នោឧបាទានំ ធម្មំ បច្ចយា ឧបាទានោ ធម្មោ ឧប្បជ្ជតិ ហេតុបច្ចយា – នោឧបាទានេ ខន្ធេ បច្ចយា ឧបាទានា, វត្ថុំ បច្ចយា ឧបាទានា. (២)

នោឧបាទានំ ធម្មំ បច្ចយា ឧបាទានោ ច នោឧបាទានោ ច ធម្មា ឧប្បជ្ជន្តិ ហេតុបច្ចយា – នោឧបាទានំ ឯកំ ខន្ធំ បច្ចយា តយោ ខន្ធា ឧបាទានា ច ចិត្តសមុដ្ឋានញ្ច រូបំ…បេ… ទ្វេ ខន្ធេ…បេ… វត្ថុំ បច្ចយា ឧបាទានា, មហាភូតេ បច្ចយា ចិត្តសមុដ្ឋានំ រូបំ, វត្ថុំ បច្ចយា ឧបាទានា សម្បយុត្តកា ច ខន្ធា. (៣)

១៣. ឧបាទានញ្ច នោឧបាទានញ្ច ធម្មំ បច្ចយា ឧបាទានោ ធម្មោ ឧប្បជ្ជតិ ហេតុបច្ចយា – ទិដ្ឋុបាទានញ្ច សម្បយុត្តកេ ច ខន្ធេ បច្ចយា កាមុបាទានំ, កាមុបាទានញ្ច សម្បយុត្តកេ ច ខន្ធេ បច្ចយា ទិដ្ឋុបាទានំ (ចក្កំ កាតព្ពំ). ទិដ្ឋុបាទានញ្ច វត្ថុញ្ច បច្ចយា កាមុបាទានំ (ចក្កំ កាតព្ពំ). (១)

ឧបាទានញ្ច នោឧបាទានញ្ច ធម្មំ បច្ចយា នោឧបាទានោ ធម្មោ ឧប្បជ្ជតិ ហេតុបច្ចយា – នោឧបាទានំ ឯកំ ខន្ធញ្ច ឧបាទានញ្ច បច្ចយា តយោ ខន្ធា ចិត្តសមុដ្ឋានញ្ច រូបំ…បេ… ទ្វេ ខន្ធេ ច…បេ… (ចក្កំ កាតព្ពំ). ឧបាទានេ ច មហាភូតេ ច បច្ចយា ចិត្តសមុដ្ឋានំ រូបំ, ឧបាទានញ្ច វត្ថុញ្ច បច្ចយា នោឧបាទានា ខន្ធា. (២)

ឧបាទានញ្ច នោឧបាទានញ្ច ធម្មំ បច្ចយា ឧបាទានោ ច នោឧបាទានោ ច ធម្មា ឧប្បជ្ជន្តិ ហេតុបច្ចយា – នោឧបាទានំ ឯកំ ខន្ធញ្ច ទិដ្ឋុបាទានញ្ច បច្ចយា តយោ ខន្ធា កាមុបាទានំ ចិត្តសមុដ្ឋានញ្ច រូបំ…បេ… (ចក្កំ). ទិដ្ឋុបាទានញ្ច វត្ថុញ្ច បច្ចយា កាមុបាទានំ សម្បយុត្តកា ច ខន្ធា…បេ… (ចក្កំ). (៣)

អារម្មណបច្ចយា… (អារម្មណេ នោឧបាទានមូលកេ បញ្ចាយតនញ្ច វត្ថុញ្ច កាតព្ពា).

ហេតុយា នវ, អារម្មណេ នវ, អធិបតិយា នវ (សព្ពត្ថ នវ), វិបាកេ ឯកំ…បេ… អវិគតេ នវ.

អនុលោមំ.

១៤. នោឧបាទានំ ធម្មំ បច្ចយា នោឧបាទានោ ធម្មោ ឧប្បជ្ជតិ នហេតុបច្ចយា – អហេតុកំ នោឧបាទានំ ឯកំ ខន្ធំ បច្ចយា…បេ… អហេតុកបដិសន្ធិក្ខណេ…បេ… (យាវ អសញ្ញសត្តា) ចក្ខាយតនំ បច្ចយា ចក្ខុវិញ្ញាណំ…បេ… កាយាយតនំ បច្ចយា កាយវិញ្ញាណំ, វត្ថុំ បច្ចយា អហេតុកា នោឧបាទានា ខន្ធា, វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ.

នហេតុយា ឯកំ, នអារម្មណេ តីណិ, នអធិបតិយា នវ, នអនន្តរេ តីណិ, នសមនន្តរេ តីណិ…បេ… នបុរេជាតេ នវ…បេ… នកម្មេ តីណិ, នវិបាកេ នវ (បដិច្ចសទិសំ)…បេ… នោវិគតេ តីណិ.

បច្ចនីយំ.

៤. និស្សយវារោ

(ឯវំ ឥតរេ ទ្វេ គណនាបិ និស្សយវារោបិ កាតព្ពោ.)

៥. សំសដ្ឋវារោ

១-៤. បច្ចយានុលោមាទិ

ហេតុបច្ចយោ

១៥. ឧបាទានំ ធម្មំ សំសដ្ឋោ ឧបាទានោ ធម្មោ ឧប្បជ្ជតិ ហេតុបច្ចយា – ទិដ្ឋុបាទានំ សំសដ្ឋំ កាមុបាទានំ, កាមុបាទានំ សំសដ្ឋំ ទិដ្ឋុបាទានំ (ចក្កំ. ឯវំ នវបិ បញ្ហា កាតព្ពា).

ហេតុយា នវ, អារម្មណេ នវ, អធិបតិយា នវ (សព្ពត្ថ នវ), វិបាកេ ឯកំ…បេ… វិគតេ នវ, អវិគតេ នវ.

អនុលោមំ.

១៦. នោឧបាទានំ ធម្មំ សំសដ្ឋោ នោឧបាទានោ ធម្មោ ឧប្បជ្ជតិ នហេតុបច្ចយា – អហេតុកំ នោឧបាទានំ ឯកំ ខន្ធំ សំសដ្ឋា តយោ ខន្ធា…បេ… ទ្វេ ខន្ធេ…បេ… អហេតុកបដិសន្ធិក្ខណេ…បេ… វិចិកិច្ឆាសហគតេ ឧទ្ធច្ចសហគតេ ខន្ធេ សំសដ្ឋោ វិចិកិច្ឆាសហគតោ ឧទ្ធច្ចសហគតោ មោហោ.

នហេតុយា ឯកំ, នអធិបតិយា នវ, នបុរេជាតេ នវ, នបច្ឆាជាតេ នវ, នអាសេវនេ នវ, នកម្មេ តីណិ, នវិបាកេ នវ, នឈានេ ឯកំ, នមគ្គេ ឯកំ, នវិប្បយុត្តេ នវ.

បច្ចនីយំ.

៦. សម្បយុត្តវារោ

(ឯវំ ឥតរេ ទ្វេ គណនាបិ សម្បយុត្តវារោបិ កាតព្ពោ.)

៧. បញ្ហាវារោ

១. បច្ចយានុលោមំ

១. វិភង្គវារោ

ហេតុបច្ចយោ

១៧. ឧបាទានោ ធម្មោ ឧបាទានស្ស ធម្មស្ស ហេតុបច្ចយេន បច្ចយោ – ឧបាទានា ហេតូ សម្បយុត្តកានំ ឧបាទានានំ ហេតុបច្ចយេន បច្ចយោ. (មូលំ កាតព្ពំ) ឧបាទានា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (មូលំ កាតព្ពំ) ឧបាទានា ហេតូ សម្បយុត្តកានំ ខន្ធានំ ឧបាទានានញ្ច ចិត្តសមុដ្ឋានានំ រូបានំ ហេតុបច្ចយេន បច្ចយោ. (៣)

១៨. នោឧបាទានោ ធម្មោ នោឧបាទានស្ស ធម្មស្ស ហេតុបច្ចយេន បច្ចយោ – នោឧបាទានា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ…បេ…. (១)

នោឧបាទានោ ធម្មោ ឧបាទានស្ស ធម្មស្ស ហេតុបច្ចយេន បច្ចយោ – នោឧបាទានា ហេតូ សម្បយុត្តកានំ ឧបាទានានំ ហេតុបច្ចយេន បច្ចយោ. (មូលំ កាតព្ពំ) នោឧបាទានា ហេតូ សម្បយុត្តកានំ ខន្ធានំ ឧបាទានានញ្ច ចិត្តសមុដ្ឋានានំ រូបានំ ហេតុបច្ចយេន បច្ចយោ. (៣)

១៩. ឧបាទានោ ច នោឧបាទានោ ច ធម្មា ឧបាទានស្ស ធម្មស្ស ហេតុបច្ចយេន បច្ចយោ – ឧបាទានា ច នោឧបាទានា ច ហេតូ សម្បយុត្តកានំ ឧបាទានានំ ហេតុបច្ចយេន បច្ចយោ. (មូលំ កាតព្ពំ) ឧបាទានា ច នោឧបាទានា ច ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (មូលំ កាតព្ពំ) ឧបាទានា ច នោឧបាទានា ច ហេតូ សម្បយុត្តកានំ ខន្ធានំ ឧបាទានានញ្ច ចិត្តសមុដ្ឋានានំ រូបានំ ហេតុបច្ចយេន បច្ចយោ. (៣)

អារម្មណបច្ចយោ

២០. ឧបាទានោ ធម្មោ ឧបាទានស្ស ធម្មស្ស អារម្មណបច្ចយេន បច្ចយោ – ឧបាទានេ អារព្ភ ឧបាទានា ឧប្បជ្ជន្តិ… តីណិ (អារព្ភ កាតព្ពា).

នោឧបាទានោ ធម្មោ នោឧបាទានស្ស ធម្មស្ស អារម្មណបច្ចយេន បច្ចយោ – ទានំ ទត្វា សីលំ…បេ… ឧបោសថកម្មំ កត្វា តំ បច្ចវេក្ខតិ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ; វិចិកិច្ឆា…បេ… ឧទ្ធច្ចំ…បេ… ទោមនស្សំ ឧប្បជ្ជតិ; បុព្ពេ សុចិណ្ណានិ…បេ… ឈានា វុដ្ឋហិត្វា ឈានំ បច្ចវេក្ខតិ, អរិយា មគ្គា វុដ្ឋហិត្វា មគ្គំ បច្ចវេក្ខន្តិ, ផលំ…បេ… និព្ពានំ បច្ចវេក្ខន្តិ; និព្ពានំ គោត្រភុស្ស, វោទានស្ស, មគ្គស្ស, ផលស្ស, អាវជ្ជនាយ អារម្មណបច្ចយេន បច្ចយោ. អរិយា នោឧបាទានេ បហីនេ កិលេសេ …បេ… វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ…បេ… ចក្ខុំ…បេ… វត្ថុំ នោឧបាទានេ ខន្ធេ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. ចេតោបរិយញាណេន នោឧបាទានចិត្តសមង្គិស្ស ចិត្តំ ជានាតិ, អាកាសានញ្ចាយតនំ វិញ្ញាណញ្ចាយតនស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស…បេ… រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… នោឧបាទានា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

នោឧបាទានោ ធម្មោ ឧបាទានស្ស ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ កត្វា តំ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ; បុព្ពេ សុចិណ្ណានិ…បេ… ឈានា…បេ… ចក្ខុំ…បេ… វត្ថុំ នោឧបាទានេ ខន្ធេ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ. (២)

នោឧបាទានោ ធម្មោ ឧបាទានស្ស ច នោឧបាទានស្ស ច ធម្មស្ស អារម្មណបច្ចយេន បច្ចយោ – ទានំ…បេ… សីលំ…បេ… ឧបោសថកម្មំ កត្វា…បេ… បុព្ពេ សុចិណ្ណានិ …បេ… ឈានា វុដ្ឋហិត្វា ឈានំ…បេ… ចក្ខុំ…បេ… វត្ថុំ នោឧបាទានេ ខន្ធេ អស្សាទេតិ អភិនន្ទតិ, តំ អារព្ភ ឧបាទានា ច សម្បយុត្តកា ច ខន្ធា ឧប្បជ្ជន្តិ. (៣)

ឧបាទានោ ច នោឧបាទានោ ច ធម្មា ឧបាទានស្ស ធម្មស្ស អារម្មណបច្ចយេន បច្ចយោ… តីណិ (អារព្ភ កាតព្ពា).

អធិបតិបច្ចយោ

២១. ឧបាទានោ ធម្មោ ឧបាទានស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – ឧបាទានេ គរុំ កត្វា ឧបាទានា ឧប្បជ្ជន្តិ… តីណិ (អារម្មណាធិបតិយេវ).

២២. នោឧបាទានោ ធម្មោ នោឧបាទានស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ ទត្វា សីលំ…បេ… ឧបោសថកម្មំ…បេ… បុព្ពេ…បេ… ឈានា វុដ្ឋហិត្វា ឈានំ គរុំ កត្វា បច្ចវេក្ខតិ, អស្សាទេតិ អភិនន្ទតិ, អរិយា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ…បេ… ផលស្ស អធិបតិបច្ចយេន បច្ចយោ; ចក្ខុំ…បេ… វត្ថុំ នោឧបាទានេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – នោឧបាទានាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

នោឧបាទានោ ធម្មោ ឧបាទានស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ កត្វា តំ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ; បុព្ពេ…បេ… ឈានា…បេ… ចក្ខុំ…បេ… វត្ថុំ នោឧបាទានេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សហជាតាធិបតិ – នោឧបាទានាធិបតិ សម្បយុត្តកានំ ឧបាទានានំ អធិបតិបច្ចយេន បច្ចយោ. (២)

នោឧបាទានោ ធម្មោ ឧបាទានស្ស ច នោឧបាទានស្ស ច ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… សីលំ…បេ… ឧបោសថកម្មំ…បេ… បុព្ពេ…បេ… ឈានំ…បេ… ចក្ខុំ…បេ… វត្ថុំ នោឧបាទានេ ខន្ធេ គរុំ កត្វា អស្សាទេតិ អភិនន្ទតិ, តំ គរុំ កត្វា ឧបាទានា ច សម្បយុត្តកា ច ខន្ធា ឧប្បជ្ជន្តិ. សហជាតាធិបតិ – នោឧបាទានាធិបតិ សម្បយុត្តកានំ ខន្ធានំ ឧបាទានានញ្ច ចិត្តសមុដ្ឋានានំ រូបានំ អធិបតិបច្ចយេន បច្ចយោ. (៣)

ឧបាទានោ ច នោឧបាទានោ ច ធម្មា ឧបាទានស្ស ធម្មស្ស អធិបតិបច្ចយេន បច្ចយោ… តីណិ… អារម្មណាធិបតិ… តីណិ (អារព្ភ កាតព្ពា, អារម្មណាធិបតិយេវ).

អនន្តរបច្ចយាទិ

២៣. ឧបាទានោ ធម្មោ ឧបាទានស្ស ធម្មស្ស អនន្តរបច្ចយេន បច្ចយោ – បុរិមា បុរិមា ឧបាទានា បច្ឆិមានំ បច្ឆិមានំ ឧបាទានានំ អនន្តរបច្ចយេន បច្ចយោ. (មូលំ កាតព្ពំ) បុរិមា បុរិមា ឧបាទានា បច្ឆិមានំ បច្ឆិមានំ នោឧបាទានានំ ខន្ធានំ អនន្តរបច្ចយេន បច្ចយោ; ឧបាទានំ វុដ្ឋានស្ស អនន្តរបច្ចយេន បច្ចយោ. (មូលំ កាតព្ពំ) បុរិមា បុរិមា ឧបាទានា បច្ឆិមានំ បច្ឆិមានំ ឧបាទានានំ សម្បយុត្តកានញ្ច ខន្ធានំ អនន្តរបច្ចយេន បច្ចយោ. (៣)

២៤. នោឧបាទានោ ធម្មោ នោឧបាទានស្ស ធម្មស្ស អនន្តរបច្ចយេន បច្ចយោ – បុរិមា បុរិមា នោឧបាទានា ខន្ធា បច្ឆិមានំ បច្ឆិមានំ នោឧបាទានានំ ខន្ធានំ អនន្តរបច្ចយេន បច្ចយោ; អនុលោមំ គោត្រភុស្ស…បេ… ផលសមាបត្តិយា អនន្តរបច្ចយេន បច្ចយោ. (១)

នោឧបាទានោ ធម្មោ ឧបាទានស្ស ធម្មស្ស អនន្តរបច្ចយេន បច្ចយោ – បុរិមា បុរិមា នោឧបាទានា ខន្ធា បច្ឆិមានំ បច្ឆិមានំ ឧបាទានានំ ខន្ធានំ អនន្តរបច្ចយេន បច្ចយោ; អាវជ្ជនា ឧបាទានានំ អនន្តរបច្ចយេន បច្ចយោ. (២)

នោឧបាទានោ ធម្មោ ឧបាទានស្ស ច នោឧបាទានស្ស ច ធម្មស្ស អនន្តរបច្ចយេន បច្ចយោ – បុរិមា បុរិមា នោឧបាទានា ខន្ធា បច្ឆិមានំ បច្ឆិមានំ ឧបាទានានំ សម្បយុត្តកានញ្ច ខន្ធានំ អនន្តរបច្ចយេន បច្ចយោ; អាវជ្ជនា ឧបាទានានំ សម្បយុត្តកានញ្ច ខន្ធានំ អនន្តរបច្ចយេន បច្ចយោ. (៣)

២៥. ឧបាទានោ ច នោឧបាទានោ ច ធម្មា ឧបាទានស្ស ធម្មស្ស អនន្តរបច្ចយេន បច្ចយោ – បុរិមា បុរិមា ឧបាទានា ច សម្បយុត្តកា ច ខន្ធា បច្ឆិមានំ បច្ឆិមានំ ឧបាទានានំ អនន្តរបច្ចយេន បច្ចយោ. (មូលំ កាតព្ពំ) បុរិមា បុរិមា ឧបាទានា ច សម្បយុត្តកា ច ខន្ធា បច្ឆិមានំ បច្ឆិមានំ នោឧបាទានានំ ខន្ធានំ អនន្តរបច្ចយេន បច្ចយោ; ឧបាទានា ច សម្បយុត្តកា ច ខន្ធា វុដ្ឋានស្ស អនន្តរបច្ចយេន បច្ចយោ. (មូលំ កាតព្ពំ) បុរិមា បុរិមា ឧបាទានា ច សម្បយុត្តកា ច ខន្ធា បច្ឆិមានំ បច្ឆិមានំ ឧបាទានានំ សម្បយុត្តកានញ្ច ខន្ធានំ អនន្តរបច្ចយេន បច្ចយោ. (៣)

សមនន្តរបច្ចយេន បច្ចយោ… សហជាតបច្ចយេន បច្ចយោ (បដិច្ចសទិសំ)… អញ្ញមញ្ញបច្ចយេន បច្ចយោ (បដិច្ចសទិសំ)… និស្សយបច្ចយេន បច្ចយោ (បច្ចយសទិសំ).

ឧបនិស្សយបច្ចយោ

២៦. ឧបាទានោ ធម្មោ ឧបាទានស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ …បេ…. បកតូបនិស្សយោ – ឧបាទានា ឧបាទានានំ ឧបនិស្សយបច្ចយេន បច្ចយោ… តីណិ.

២៧. នោឧបាទានោ ធម្មោ នោឧបាទានស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ – សទ្ធំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ; សីលំ…បេ… បញ្ញំ… រាគំ…បេ… បត្ថនំ… កាយិកំ សុខំ…បេ… សេនាសនំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ; បាណំ ហនតិ…បេ… សង្ឃំ ភិន្ទតិ, សទ្ធា…បេ… សេនាសនំ សទ្ធាយ…បេ… ផលសមាបត្តិយា ឧបនិស្សយបច្ចយេន បច្ចយោ. (១)

នោឧបាទានោ ធម្មោ ឧបាទានស្ស ធម្មស្ស ឧបនិស្សយបច្ចយេន បច្ចយោ. បកតូបនិស្សយោ – សទ្ធំ ឧបនិស្សាយ មានំ ជប្បេតិ, ទិដ្ឋិំ គណ្ហាតិ; សីលំ…បេ… សេនាសនំ ឧបនិស្សាយ អទិន្នំ…បេ… មុសា…បេ… បិសុណំ…បេ… សម្ផំ…បេ… សន្ធិំ…បេ… និល្លោបំ…បេ… ឯកាគារិកំ…បេ… បរិបន្ថេ…បេ… បរទារំ…បេ… គាមឃាតំ…បេ… និគមឃាតំ ករោតិ; សទ្ធា…បេ… សេនាសនំ ឧបាទានានំ ឧបនិស្សយបច្ចយេន បច្ចយោ. (មូលំ កាតព្ពំ) សទ្ធំ ឧបនិស្សាយ មានំ ជប្បេតិ, ទិដ្ឋិំ គណ្ហាតិ; សីលំ…បេ… សេនាសនំ ឧបនិស្សាយ អទិន្នំ អាទិយតិ, មុសា…បេ… បិសុណំ…បេ… សម្ផំ…បេ… សន្ធិំ…បេ… និល្លោបំ…បេ… ឯកាគារិកំ…បេ… បរិបន្ថេ…បេ… បរទារំ…បេ… គាមឃាតំ…បេ… និគមឃាតំ ករោតិ; សទ្ធា…បេ… សេនាសនំ ឧបាទានានំ សម្បយុត្តកានញ្ច ខន្ធានំ ឧបនិស្សយបច្ចយេន បច្ចយោ. (៣)

ឧបាទានោ ច នោឧបាទានោ ច ធម្មា ឧបាទានស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ…. បកតូបនិស្សយោ… តីណិ.

បុរេជាតបច្ចយោ

២៨. នោឧបាទានោ ធម្មោ នោឧបាទានស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ; ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ…. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ នោឧបាទានានំ ខន្ធានំ បុរេជាតបច្ចយេន បច្ចយោ. (១)

នោឧបាទានោ ធម្មោ ឧបាទានស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ. វត្ថុបុរេជាតំ – វត្ថុ ឧបាទានានំ បុរេជាតបច្ចយេន បច្ចយោ. (២)

នោឧបាទានោ ធម្មោ ឧបាទានស្ស ច នោឧបាទានស្ស ច ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ. អារម្មណបុរេជាតំ – ចក្ខុំ…បេ… វត្ថុំ អស្សាទេតិ អភិនន្ទតិ, តំ អារព្ភ ឧបាទានា ច សម្បយុត្តកា ច ខន្ធា ឧប្បជ្ជន្តិ. វត្ថុបុរេជាតំ – វត្ថុ ឧបាទានានំ សម្បយុត្តកានញ្ច ខន្ធានំ បុរេជាតបច្ចយេន បច្ចយោ. (៣)

បច្ឆាជាតាសេវនបច្ចយា

២៩. ឧបាទានោ ធម្មោ នោឧបាទានស្ស ធម្មស្ស បច្ឆាជាតបច្ចយេន បច្ចយោ (សំខិត្តំ). (១)

នោឧបាទានោ ធម្មោ នោឧបាទានស្ស ធម្មស្ស បច្ឆាជាតបច្ចយេន បច្ចយោ (សំខិត្តំ). (១)

ឧបាទានោ ច នោឧបាទានោ ច ធម្មា នោឧបាទានស្ស ធម្មស្ស បច្ឆាជាតបច្ចយេន បច្ចយោ (សំខិត្តំ). (១) …អាសេវនបច្ចយេន បច្ចយោ.

កម្មបច្ចយោ

៣០. នោឧបាទានោ ធម្មោ នោឧបាទានស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – នោឧបាទានា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ; បដិសន្ធិក្ខណេ…បេ…. នានាក្ខណិកា – នោឧបាទានា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (១)

នោឧបាទានោ ធម្មោ ឧបាទានស្ស ធម្មស្ស កម្មបច្ចយេន បច្ចយោ – នោឧបាទានា ចេតនា សម្បយុត្តកានំ ឧបាទានានំ កម្មបច្ចយេន បច្ចយោ. (២)

នោឧបាទានោ ធម្មោ ឧបាទានស្ស ច នោឧបាទានស្ស ច ធម្មស្ស កម្មបច្ចយេន បច្ចយោ – នោឧបាទានា ចេតនា សម្បយុត្តកានំ ខន្ធានំ ឧបាទានានញ្ច ចិត្តសមុដ្ឋានានំ រូបានំ កម្មបច្ចយេន បច្ចយោ. (៣)

វិបាកបច្ចយាទិ

៣១. នោឧបាទានោ ធម្មោ នោឧបាទានស្ស ធម្មស្ស វិបាកបច្ចយេន បច្ចយោ – វិបាកោ នោឧបាទានោ ឯកោ ខន្ធោ…បេ… ឯកំ.

នោឧបាទានោ ធម្មោ នោឧបាទានស្ស ធម្មស្ស អាហារបច្ចយេន បច្ចយោ… តីណិ (ឯកោយេវ កពឡីការោ អាហារោ)… ឥន្ទ្រិយបច្ចយេន បច្ចយោ… តីណិ (រូបជីវិតិន្ទ្រិយំ ឯកំយេវ)… ឈានបច្ចយេន បច្ចយោ… តីណិ.

ឧបាទានោ ធម្មោ ឧបាទានស្ស ធម្មស្ស មគ្គបច្ចយេន បច្ចយោ – ឧបាទានានិ មគ្គង្គានិ សម្បយុត្តកានំ ឧបាទានានំ មគ្គបច្ចយេន បច្ចយោ (ឥមិនា ការណេន នវ បញ្ហា កាតព្ពា)… សម្បយុត្តបច្ចយេន បច្ចយោ… នវ.

វិប្បយុត្តបច្ចយោ

៣២. ឧបាទានោ ធម្មោ នោឧបាទានស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – ឧបាទានា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បច្ឆាជាតំ – បច្ឆាជាតា ឧបាទានា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

នោឧបាទានោ ធម្មោ នោឧបាទានស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ (សំខិត្តំ). (១)

នោឧបាទានោ ធម្មោ ឧបាទានស្ស ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ ឧបាទានានំ វិប្បយុត្តបច្ចយេន បច្ចយោ. (២)

នោឧបាទានោ ធម្មោ ឧបាទានស្ស ច នោឧបាទានស្ស ច ធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ ឧបាទានានំ សម្បយុត្តកានញ្ច ខន្ធានំ វិប្បយុត្តបច្ចយេន បច្ចយោ. (៣)

៣៣. ឧបាទានោ ច នោឧបាទានោ ច ធម្មា នោឧបាទានស្ស ធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – ឧបាទានា ច សម្បយុត្តកា ច ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បច្ឆាជាតា – ឧបាទានា ច សម្បយុត្តកា ច ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

អត្ថិបច្ចយោ

៣៤. ឧបាទានោ ធម្មោ ឧបាទានស្ស ធម្មស្ស អត្ថិបច្ចយេន បច្ចយោ – ទិដ្ឋុបាទានំ កាមុបាទានស្ស អត្ថិបច្ចយេន បច្ចយោ (ចក្កំ). (១)

ឧបាទានោ ធម្មោ នោឧបាទានស្ស ធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ. សហជាតា – ឧបាទានា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ. បច្ឆាជាតា – ឧបាទានា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. (២)

ឧបាទានោ ធម្មោ ឧបាទានស្ស ច នោឧបាទានស្ស ច ធម្មស្ស អត្ថិបច្ចយេន បច្ចយោ (សំខិត្តំ, បដិច្ចសទិសំ). (៣)

៣៥. នោឧបាទានោ ធម្មោ នោឧបាទានស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ (សំខិត្តំ, វិត្ថារេតព្ពំ). (១)

នោឧបាទានោ ធម្មោ ឧបាទានស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតំ (សហជាតសទិសំ). បុរេជាតំ (បុរេជាតសទិសំ). (២)

នោឧបាទានោ ធម្មោ ឧបាទានស្ស ច នោឧបាទានស្ស ច ធម្មស្ស អត្ថិបច្ចយេន បច្ចយោ – សហជាតំ, បុរេជាតំ (សំខិត្តំ, សហជាតសទិសំ សហជាតំ វិភជិតព្ពំ, បុរេជាតសទិសំ បុរេជាតំ). (៣)

៣៦. ឧបាទានោ ច នោឧបាទានោ ច ធម្មា ឧបាទានស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតំ – ទិដ្ឋុបាទានញ្ច សម្បយុត្តកា ច ខន្ធា កាមុបាទានស្ស អត្ថិបច្ចយេន បច្ចយោ (ចក្កំ). សហជាតំ – ទិដ្ឋុបាទានញ្ច វត្ថុ ច កាមុបាទានស្ស អត្ថិបច្ចយេន បច្ចយោ (ចក្កំ). (១)

ឧបាទានោ ច នោឧបាទានោ ច ធម្មា នោឧបាទានស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតោ – នោឧបាទានោ ឯកោ ខន្ធោ ច ឧបាទានា ច តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ…. សហជាតា – ឧបាទានា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. សហជាតា – ឧបាទានា ច វត្ថុ ច នោឧបាទានានំ ខន្ធានំ អត្ថិបច្ចយេន បច្ចយោ. បច្ឆាជាតា – ឧបាទានា ច សម្បយុត្តកា ច ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – ឧបាទានា ច សម្បយុត្តកា ច ខន្ធា កពឡីការោ អាហារោ ច ឥមស្ស កាយស្ស អត្ថិបច្ចយេន បច្ចយោ. បច្ឆាជាតា – ឧបាទានា ច សម្បយុត្តកា ច ខន្ធា រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (២)

ឧបាទានោ ច នោឧបាទានោ ច ធម្មា ឧបាទានស្ស ច នោឧបាទានស្ស ច ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – នោឧបាទានោ ឯកោ ខន្ធោ ច ទិដ្ឋុបាទានញ្ច តិណ្ណន្នំ ខន្ធានំ កាមុបាទានស្ស ច ចិត្តសមុដ្ឋានានំ រូបានំ អត្ថិបច្ចយេន បច្ចយោ…បេ… ទ្វេ ខន្ធា ច…បេ… (ចក្កំ). សហជាតំ – ទិដ្ឋុបាទានញ្ច វត្ថុ ច កាមុបាទានស្ស សម្បយុត្តកានញ្ច ខន្ធានំ អត្ថិបច្ចយេន បច្ចយោ (ចក្កំ). (៣)

១. បច្ចយានុលោមំ

២. សង្ខ្យាវារោ

សុទ្ធំ

៣៧. ហេតុយា នវ, អារម្មណេ នវ, អធិបតិយា នវ, អនន្តរេ នវ, សមនន្តរេ នវ, សហជាតេ នវ, អញ្ញមញ្ញេ នវ, និស្សយេ នវ, ឧបនិស្សយេ នវ, បុរេជាតេ តីណិ, បច្ឆាជាតេ តីណិ, អាសេវនេ នវ, កម្មេ តីណិ, វិបាកេ ឯកំ, អាហារេ តីណិ, ឥន្ទ្រិយេ តីណិ, ឈានេ តីណិ, មគ្គេ នវ, សម្បយុត្តេ នវ, វិប្បយុត្តេ បញ្ច, អត្ថិយា នវ, នត្ថិយា នវ, វិគតេ នវ, អវិគតេ នវ.

អនុលោមំ.

២. បច្ចនីយុទ្ធារោ

៣៨. ឧបាទានោ ធម្មោ ឧបាទានស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ. (១)

ឧបាទានោ ធម្មោ នោឧបាទានស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ… បច្ឆាជាតបច្ចយេន បច្ចយោ. (២)

ឧបាទានោ ធម្មោ ឧបាទានស្ស ច នោឧបាទានស្ស ច ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ. (៣)

៣៩. នោឧបាទានោ ធម្មោ នោឧបាទានស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ… បុរេជាតបច្ចយេន បច្ចយោ… បច្ឆាជាតបច្ចយេន បច្ចយោ… កម្មបច្ចយេន បច្ចយោ… អាហារបច្ចយេន បច្ចយោ… ឥន្ទ្រិយបច្ចយេន បច្ចយោ. (១)

នោឧបាទានោ ធម្មោ ឧបាទានស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ… បុរេជាតបច្ចយេន បច្ចយោ. (២)

នោឧបាទានោ ធម្មោ ឧបាទានស្ស ច នោឧបាទានស្ស ច ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ… បុរេជាតបច្ចយេន បច្ចយោ. (៣)

៤០. ឧបាទានោ ច នោឧបាទានោ ច ធម្មា ឧបាទានស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ. (១)

ឧបាទានោ ច នោឧបាទានោ ច ធម្មា នោឧបាទានស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ… បច្ឆាជាតបច្ចយេន បច្ចយោ. (២)

ឧបាទានោ ច នោឧបាទានោ ច ធម្មា ឧបាទានស្ស ច នោឧបាទានស្ស ច ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ. (៣)