២. សង្ខ្យាវារោ

សុទ្ធំ

១១១. ហេតុយា នវ, អារម្មណេ នវ, អធិបតិយា នវ, អនន្តរេ នវ, សមនន្តរេ នវ, សហជាតេ នវ, អញ្ញមញ្ញេ នវ, និស្សយេ នវ, ឧបនិស្សយេ នវ, អាសេវនេ នវ, កម្មេ តីណិ, អាហារេ តីណិ, ឥន្ទ្រិយេ តីណិ, ឈានេ តីណិ, មគ្គេ នវ, សម្បយុត្តេ នវ, អត្ថិយា នវ, នត្ថិយា នវ, វិគតេ នវ, អវិគតេ នវ.

បច្ចនីយុទ្ធារោ

១១២. ឧបាទានោ ចេវ ឧបាទានសម្បយុត្តោ ច ធម្មោ ឧបាទានស្ស ចេវ ឧបាទានសម្បយុត្តស្ស ច ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ. (១)

ឧបាទានោ ចេវ ឧបាទានសម្បយុត្តោ ច ធម្មោ ឧបាទានសម្បយុត្តស្ស ចេវ នោ ច ឧបាទានស្ស ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ. (២)

ឧបាទានោ ចេវ ឧបាទានសម្បយុត្តោ ច ធម្មោ ឧបាទានស្ស ចេវ ឧបាទានសម្បយុត្តស្ស ច ឧបាទានសម្បយុត្តស្ស ចេវ នោ ច ឧបាទានស្ស ច ធម្មស្ស អារម្មណបច្ចយេន បច្ចយោ… សហជាតបច្ចយេន បច្ចយោ… ឧបនិស្សយបច្ចយេន បច្ចយោ (ឯវំ នវបិ កាតព្ពា, ឯកេកស្ស មូលេ តីណិ តីណិ បញ្ហា).