១. វិភង្គវារោ

ហេតុបច្ចយោ

៩៨. ឧបាទានោ ចេវ ឧបាទានិយោ ច ធម្មោ ឧបាទានស្ស ចេវ ឧបាទានិយស្ស ច ធម្មស្ស ហេតុបច្ចយេន បច្ចយោ – ឧបាទានា ចេវ ឧបាទានិយា ច ហេតូ សម្បយុត្តកានំ ឧបាទានានំ ហេតុបច្ចយេន បច្ចយោ. (១)

ឧបាទានោ ចេវ ឧបាទានិយោ ច ធម្មោ ឧបាទានិយស្ស ចេវ នោ ច ឧបាទានស្ស ធម្មស្ស ហេតុបច្ចយេន បច្ចយោ – ឧបាទានា ចេវ ឧបាទានិយា ច ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ (ឧបាទានទុកសទិសា និន្នានា, នវ បញ្ហា).

អារម្មណបច្ចយោ

៩៩. ឧបាទានោ ចេវ ឧបាទានិយោ ច ធម្មោ ឧបាទានស្ស ចេវ ឧបាទានិយស្ស ច ធម្មស្ស អារម្មណបច្ចយេន បច្ចយោ – ឧបាទានេ អារព្ភ ឧបាទានា ឧប្បជ្ជន្តិ… តីណិ.

ឧបាទានិយោ ចេវ នោ ច ឧបាទានោ ធម្មោ ឧបាទានិយស្ស ចេវ នោ ច ឧបាទានស្ស ធម្មស្ស អារម្មណបច្ចយេន បច្ចយោ – ទានំ…បេ… ឈានា វុដ្ឋហិត្វា ឈានំ បច្ចវេក្ខតិ, អស្សាទេតិ អភិនន្ទតិ, តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧទ្ធច្ចំ ទោមនស្សំ ឧប្បជ្ជតិ; អរិយា គោត្រភុំ បច្ចវេក្ខន្តិ, វោទានំ បច្ចវេក្ខន្តិ, បហីនេ កិលេសេ…បេ… វិក្ខម្ភិតេ កិលេសេ…បេ… បុព្ពេ សមុទាចិណ្ណេ…បេ… ចក្ខុំ…បេ… វត្ថុំ…បេ… (សំខិត្តំ) អនាគតំសញាណស្ស អាវជ្ជនាយ អារម្មណបច្ចយេន បច្ចយោ. (១)

ឧបាទានិយោ ចេវ នោ ច ឧបាទានោ ធម្មោ ឧបាទានស្ស ចេវ ឧបាទានិយស្ស ច ធម្មស្ស អារម្មណបច្ចយេន បច្ចយោ (សំខិត្តំ, ឥតរេ ទ្វេ ឧបាទានទុកសទិសា). (៣)

ឧបាទានោ ចេវ ឧបាទានិយោ ច ឧបាទានិយោ ចេវ នោ ច ឧបាទានោ ច ធម្មា ឧបាទានស្ស ចេវ ឧបាទានិយស្ស ច ធម្មស្ស អារម្មណបច្ចយេន បច្ចយោ… តីណិ (ហេដ្ឋា អធិបតិ តីណិ, ឧបាទានទុកសទិសា).

អធិបតិបច្ចយោ

១០០. ឧបាទានិយោ ចេវ នោ ច ឧបាទានោ ធម្មោ ឧបាទានិយស្ស ចេវ នោ ច ឧបាទានស្ស ច ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ…បេ… ឈានា វុដ្ឋហិត្វា ឈានំ គរុំ កត្វា បច្ចវេក្ខតិ, អស្សាទេតិ អភិនន្ទតិ, តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ; សេក្ខា គោត្រភុំ គរុំ កត្វា…បេ… វោទានំ…បេ… ចក្ខុំ…បេ… វត្ថុំ ឧបាទានិយេ ចេវ នោ ច ឧបាទានេ ខន្ធេ គរុំ កត្វា ឧបាទានិយា ចេវ នោ ច ឧបាទានា ខន្ធា ឧប្បជ្ជន្តិ. សហជាតាធិបតិ – ឧបាទានិយា ចេវ នោ ច ឧបាទានាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ (អវសេសា ទ្វេបិ អារម្មណាធិបតិ សហជាតាធិបតិបិ ឧបាទានទុកសទិសា). (៣)

(ឃដនា អធិបតិ តីណិ, ឧបាទានទុកសទិសា. សព្ពេ បច្ចយា ឧបាទានទុកសទិសា. ឧបាទានិយេ លោកុត្តរំ នត្ថិ, បច្ចនីយម្បិ ឥតរេ ទ្វេ គណនាបិ ឧបាទានទុកសទិសំ.)

ឧបាទានឧបាទានិយទុកំ និដ្ឋិតំ.