១. វិភង្គវារោ

ហេតុបច្ចយោ

៩០. វិបាកោ ធម្មោ វិបាកស្ស ធម្មស្ស ហេតុបច្ចយេន បច្ចយោ – វិបាកា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ; បដិសន្ធិក្ខណេ វិបាកា ហេតូ សប្បយុត្តកានំ ខន្ធានំ ហេតុបច្ចយេន បច្ចយោ. (១)

វិបាកោ ធម្មោ នេវវិបាកនវិបាកធម្មធម្មស្ស ហេតុបច្ចយេន បច្ចយោ – វិបាកា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ; បដិសន្ធិក្ខណេ វិបាកា ហេតូ កដត្តារូបានំ ហេតុបច្ចយេន បច្ចយោ. (២)

វិបាកោ ធម្មោ វិបាកស្ស ច នេវវិបាកនវិបាកធម្មធម្មស្ស ច ហេតុបច្ចយេន បច្ចយោ – វិបាកា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ; បដិសន្ធិក្ខណេ វិបាកា ហេតូ សម្បយុត្តកានំ ខន្ធានំ កដត្តា ច រូបានំ ហេតុបច្ចយេន បច្ចយោ. (៣)

៩១. វិបាកធម្មធម្មោ វិបាកធម្មធម្មស្ស ហេតុបច្ចយេន បច្ចយោ – វិបាកធម្មធម្មា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (១)

វិបាកធម្មធម្មោ នេវវិបាកនវិបាកធម្មធម្មស្ស ហេតុបច្ចយេន បច្ចយោ – វិបាកធម្មធម្មា ហេតូ ចិត្តសមុដ្ឋានានំ រូបានំ ហេតុបច្ចយេន បច្ចយោ. (២)

វិបាកធម្មធម្មោ វិបាកធម្មធម្មស្ស ច នេវវិបាកនវិបាកធម្មធម្មស្ស ច ហេតុបច្ចយេន បច្ចយោ – វិបាកធម្មធម្មា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ. (៣)

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស ហេតុបច្ចយេន បច្ចយោ – នេវវិបាកនវិបាកធម្មធម្មា ហេតូ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ហេតុបច្ចយេន បច្ចយោ.

អារម្មណបច្ចយោ

៩២. វិបាកោ ធម្មោ វិបាកស្ស ធម្មស្ស អារម្មណបច្ចយេន បច្ចយោ – វិបាកេ ខន្ធេ អនិច្ចតោ ទុក្ខតោ អនត្តតោ វិបស្សតិ, អស្សាទេតិ អភិនន្ទតិ; តំ អារព្ភ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ, ទោមនស្សំ ឧប្បជ្ជតិ, កុសលាកុសលេ និរុទ្ធេ វិបាកោ តទារម្មណតា ឧប្បជ្ជតិ. (១)

វិបាកោ ធម្មោ វិបាកធម្មធម្មស្ស អារម្មណបច្ចយេន បច្ចយោ – សេក្ខា ផលំ បច្ចវេក្ខន្តិ, វិបាកេ ខន្ធេ អនិច្ចតោ ទុក្ខតោ អនត្តតោ វិបស្សន្តិ, អស្សាទេន្តិ អភិនន្ទន្តិ; តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ, ចេតោបរិយញាណេន វិបាកចិត្តសមង្គិស្ស ចិត្តំ ជានន្តិ. វិបាកា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, អនាគតំសញាណស្ស អារម្មណបច្ចយេន បច្ចយោ. (២)

វិបាកោ ធម្មោ នេវវិបាកនវិបាកធម្មធម្មស្ស អារម្មណបច្ចយេន បច្ចយោ – អរហា ផលំ បច្ចវេក្ខតិ, វិបាកេ ខន្ធេ អនិច្ចតោ ទុក្ខតោ អនត្តតោ វិបស្សតិ, ចេតោបរិយញាណេន វិបាកចិត្តសមង្គិស្ស ចិត្តំ ជានាតិ. វិបាកា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (៣)

៩៣. វិបាកធម្មធម្មោ វិបាកធម្មធម្មស្ស អារម្មណបច្ចយេន បច្ចយោ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ បច្ចវេក្ខតិ, បុព្ពេ សុចិណ្ណានិ បច្ចវេក្ខតិ, ឈានា វុដ្ឋហិត្វា ឈានំ បច្ចវេក្ខតិ, សេក្ខា គោត្រភុំ បច្ចវេក្ខន្តិ, វោទានំ បច្ចវេក្ខន្តិ, សេក្ខា មគ្គា វុដ្ឋហិត្វា មគ្គំ បច្ចវេក្ខន្តិ, សេក្ខា បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ, វិបាកធម្មធម្មេ ខន្ធេ អនិច្ចតោ ទុក្ខតោ អនត្តតោ វិបស្សន្តិ, អស្សាទេន្តិ អភិនន្ទន្តិ; តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ, ចេតោបរិយញាណេន វិបាកធម្មធម្មចិត្តសមង្គិស្ស ចិត្តំ ជានន្តិ. អាកាសានញ្ចាយតនកុសលំ វិញ្ញាណញ្ចាយតនកុសលស្ស អារម្មណបច្ចយេន បច្ចយោ. អាកិញ្ចញ្ញាយតនកុសលំ នេវសញ្ញានាសញ្ញាយតនកុសលស្ស អារម្មណបច្ចយេន បច្ចយោ. វិបាកធម្មធម្មា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស អារម្មណបច្ចយេន បច្ចយោ. (១)

វិបាកធម្មធម្មោ វិបាកស្ស ធម្មស្ស អារម្មណបច្ចយេន បច្ចយោ – វិបាកធម្មធម្មេ ខន្ធេ អនិច្ចតោ ទុក្ខតោ អនត្តតោ វិបស្សន្តិ, អស្សាទេន្តិ អភិនន្ទន្តិ; តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ, កុសលាកុសលេ និរុទ្ធេ វិបាកោ តទារម្មណតា ឧប្បជ្ជតិ. អាកាសានញ្ចាយតនកុសលំ វិញ្ញាណញ្ចាយតនវិបាកស្ស អារម្មណបច្ចយេន បច្ចយោ. អាកិញ្ចញ្ញាយតនកុសលំ នេវសញ្ញានាសញ្ញាយតនវិបាកស្ស អារម្មណបច្ចយេន បច្ចយោ. (២)

វិបាកធម្មធម្មោ នេវវិបាកនវិបាកធម្មធម្មស្ស អារម្មណបច្ចយេន បច្ចយោ – អរហា មគ្គា វុដ្ឋហិត្វា មគ្គំ បច្ចវេក្ខតិ, បុព្ពេ សុចិណ្ណានិ បច្ចវេក្ខតិ. អរហា បហីនេ កិលេសេ បច្ចវេក្ខតិ, បុព្ពេ សមុទាចិណ្ណេ កិលេសេ ជានាតិ, វិបាកធម្មធម្មេ ខន្ធេ អនិច្ចតោ ទុក្ខតោ អនត្តតោ វិបស្សតិ, ចេតោបរិយញាណេន វិបាកធម្មធម្មចិត្តសមង្គិស្ស ចិត្តំ ជានាតិ. អាកាសានញ្ចាយតនកុសលំ វិញ្ញាណញ្ចាយតនកិរិយស្ស អារម្មណបច្ចយេន បច្ចយោ. អាកិញ្ចញ្ញាយតនកុសលំ នេវសញ្ញានាសញ្ញាយតនកិរិយស្ស អារម្មណបច្ចយេន បច្ចយោ. វិបាកធម្មធម្មា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (៣)

៩៤. នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស អារម្មណបច្ចយេន បច្ចយោ – អរហា និព្ពានំ បច្ចវេក្ខតិ. និព្ពានំ អាវជ្ជនាយ អារម្មណបច្ចយេន បច្ចយោ. អរហា ចក្ខុំ អនិច្ចតោ ទុក្ខតោ អនត្តតោ វិបស្សតិ. សោតំ… ឃានំ… ជិវ្ហំ… កាយំ… រូបេ… សទ្ទេ… គន្ធេ… រសេ … ផោដ្ឋព្ពេ… វត្ថុំ… នេវវិបាកនវិបាកធម្មធម្មេ ខន្ធេ អនិច្ចតោ ទុក្ខតោ អនត្តតោ វិបស្សតិ, ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, ចេតោបរិយញាណេន នេវវិបាកនវិបាកធម្មធម្មចិត្តសមង្គិស្ស ចិត្តំ ជានាតិ. អាកាសានញ្ចាយតនកិរិយំ វិញ្ញាណញ្ចាយតនកិរិយស្ស អារម្មណបច្ចយេន បច្ចយោ. អាកិញ្ចញ្ញាយតនកិរិយំ នេវសញ្ញានាសញ្ញាយតនកិរិយស្ស អារម្មណបច្ចយេន បច្ចយោ. នេវវិបាកនវិបាកធម្មធម្មា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. (១)

នេវវិបាកនវិបាកធម្មធម្មោ វិបាកស្ស ធម្មស្ស អារម្មណបច្ចយេន បច្ចយោ – និព្ពានំ ផលស្ស អារម្មណបច្ចយេន បច្ចយោ. សេក្ខា វា បុថុជ្ជនា វា ចក្ខុំ អនិច្ចតោ ទុក្ខតោ អនត្តតោ វិបស្សន្តិ, អស្សាទេន្តិ អភិនន្ទន្តិ; តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. កុសលាកុសលេ និរុទ្ធេ វិបាកោ តទារម្មណតា ឧប្បជ្ជតិ. សោតំ… ឃានំ… ជិវ្ហំ… កាយំ… រូបេ… សទ្ទេ… គន្ធេ… រសេ… ផោដ្ឋព្ពេ… វត្ថុំ… នេវវិបាកនវិបាកធម្មធម្មេ ខន្ធេ អនិច្ចតោ ទុក្ខតោ អនត្តតោ វិបស្សន្តិ, អស្សាទេន្តិ អភិនន្ទន្តិ; តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. កុសលាកុសលេ និរុទ្ធេ វិបាកោ តទារម្មណតា ឧប្បជ្ជតិ. រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស អារម្មណបច្ចយេន បច្ចយោ. (២)

នេវវិបាកនវិបាកធម្មធម្មោ វិបាកធម្មធម្មស្ស អារម្មណបច្ចយេន បច្ចយោ – សេក្ខា និព្ពានំ បច្ចវេក្ខន្តិ; និព្ពានំ គោត្រភុស្ស, វោទានស្ស, មគ្គស្ស អារម្មណបច្ចយេន បច្ចយោ. សេក្ខា វា បុថុជ្ជនា វា ចក្ខុំ អនិច្ចតោ ទុក្ខតោ អនត្តតោ វិបស្សន្តិ, អស្សាទេន្តិ អភិនន្ទតិ; តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. សោតំ…បេ… នេវវិបាកនវិបាកធម្មធម្មេ ខន្ធេ អនិច្ចតោ ទុក្ខតោ អនត្តតោ វិបស្សន្តិ, អស្សាទេន្តិ អភិនន្ទន្តិ…បេ… ទិព្ពេន ចក្ខុនា រូបំ បស្សន្តិ, ទិព្ពាយ សោតធាតុយា សទ្ទំ សុណន្តិ, ចេតោបរិយញាណេន នេវវិបាកនវិបាកធម្មធម្មចិត្តសមង្គិស្ស ចិត្តំ ជានន្តិ. នេវវិបាកនវិបាកធម្មធម្មា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, អនាគតំសញាណស្ស អារម្មណបច្ចយេន បច្ចយោ. (៣)

អធិបតិបច្ចយោ

៩៥. វិបាកោ ធម្មោ វិបាកស្ស ធម្មស្ស អធិបតិបច្ចយេន បច្ចយោ. សហជាតាធិបតិ – វិបាកាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

វិបាកោ ធម្មោ វិបាកធម្មធម្មស្ស អធិបតិបច្ចយេន បច្ចយោ. អារម្មណាធិបតិ – សេក្ខា ផលំ គរុំ កត្វា បច្ចវេក្ខន្តិ, វិបាកេ ខន្ធេ គរុំ កត្វា អស្សាទេន្តិ អភិនន្ទន្តិ; តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. (២)

វិបាកោ ធម្មោ នេវវិបាកនវិបាកធម្មធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អរហា ផលំ គរុំ កត្វា បច្ចវេក្ខតិ. សហជាតាធិបតិ – វិបាកាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (៣)

វិបាកោ ធម្មោ វិបាកស្ស ច នេវវិបាកនវិបាកធម្មធម្មស្ស ច អធិបតិបច្ចយេន បច្ចយោ. សហជាតាធិបតិ – វិបាកាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៤)

៩៦. វិបាកធម្មធម្មោ វិបាកធម្មធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – ទានំ ទត្វា សីលំ សមាទិយិត្វា ឧបោសថកម្មំ កត្វា តំ គរុំ កត្វា បច្ចវេក្ខតិ, បុព្ពេ សុចិណ្ណានិ គរុំ កត្វា បច្ចវេក្ខតិ, ឈានា វុដ្ឋហិត្វា ឈានំ គរុំ កត្វា បច្ចវេក្ខតិ, សេក្ខា គោត្រភុំ គរុំ កត្វា បច្ចវេក្ខន្តិ, វោទានំ គរុំ កត្វា បច្ចវេក្ខន្តិ, សេក្ខា មគ្គា វុដ្ឋហិត្វា មគ្គំ គរុំ កត្វា បច្ចវេក្ខន្តិ, វិបាកធម្មធម្មេ ខន្ធេ គរុំ កត្វា អស្សាទេន្តិ អភិនន្ទន្តិ; តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ,. សហជាតាធិបតិ – វិបាកធម្មធម្មាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

វិបាកធម្មធម្មោ នេវវិបាកនវិបាកធម្មធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អរហា មគ្គា វុដ្ឋហិត្វា មគ្គំ គរុំ កត្វា បច្ចវេក្ខតិ. សហជាតាធិបតិ – វិបាកធម្មធម្មាធិបតិ ចិត្តសមុដ្ឋានានំ រូបានំ អធិបតិបច្ចយេន បច្ចយោ. (២)

វិបាកធម្មធម្មោ វិបាកធម្មធម្មស្ស ច នេវវិបាកនវិបាកធម្មធម្មស្ស ច អធិបតិបច្ចយេន បច្ចយោ. សហជាតាធិបតិ – វិបាកធម្មធម្មាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (៣)

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ. អារម្មណាធិបតិ – អរហា និព្ពានំ គរុំ កត្វា បច្ចវេក្ខតិ. សហជាតាធិបតិ – នេវវិបាកនវិបាកធម្មធម្មាធិបតិ សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ អធិបតិបច្ចយេន បច្ចយោ. (១)

នេវវិបាកនវិបាកធម្មធម្មោ វិបាកស្ស ធម្មស្ស អធិបតិបច្ចយេន បច្ចយោ. អារម្មណាធិបតិ – និព្ពានំ ផលស្ស អធិបតិបច្ចយេន បច្ចយោ. (២)

នេវវិបាកនវិបាកធម្មធម្មោ វិបាកធម្មធម្មស្ស អធិបតិបច្ចយេន បច្ចយោ. អារម្មណាធិបតិ – សេក្ខា និព្ពានំ គរុំ កត្វា បច្ចវេក្ខន្តិ. និព្ពានំ គោត្រភុស្ស, វោទានស្ស, មគ្គស្ស អធិបតិបច្ចយេន បច្ចយោ. ចក្ខុំ គរុំ កត្វា អស្សាទេតិ អភិនន្ទតិ; តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. សោតំ…បេ… នេវវិបាកនវិបាកធម្មធម្មេ ខន្ធេ គរុំ កត្វា អស្សាទេតិ អភិនន្ទតិ; តំ គរុំ កត្វា រាគោ ឧប្បជ្ជតិ, ទិដ្ឋិ ឧប្បជ្ជតិ. (៣)

អនន្តរបច្ចយោ

៩៧. វិបាកោ ធម្មោ វិបាកស្ស ធម្មស្ស អនន្តរបច្ចយេន បច្ចយោ – បុរិមា បុរិមា វិបាកា ខន្ធា បច្ឆិមានំ បច្ឆិមានំ វិបាកានំ ខន្ធានំ អនន្តរបច្ចយេន បច្ចយោ. បញ្ចវិញ្ញាណំ វិបាកមនោធាតុយា អនន្តរបច្ចយេន បច្ចយោ. វិបាកមនោធាតុ វិបាកមនោវិញ្ញាណធាតុយា អនន្តរបច្ចយេន បច្ចយោ. (១)

វិបាកោ ធម្មោ នេវវិបាកនវិបាកធម្មធម្មស្ស អនន្តរបច្ចយេន បច្ចយោ. ភវង្គំ អាវជ្ជនាយ អនន្តរបច្ចយេន បច្ចយោ. វិបាកមនោវិញ្ញាណធាតុ កិរិយមនោវិញ្ញាណធាតុយា អនន្តរបច្ចយេន បច្ចយោ. (២)

វិបាកធម្មធម្មោ វិបាកធម្មធម្មស្ស អនន្តរបច្ចយេន បច្ចយោ – បុរិមា បុរិមា វិបាកធម្មធម្មា ខន្ធា បច្ឆិមានំ បច្ឆិមានំ វិបាកធម្មធម្មានំ ខន្ធានំ អនន្តរបច្ចយេន បច្ចយោ. អនុលោមំ គោត្រភុស្ស … អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស អនន្តរបច្ចយេន បច្ចយោ. (១)

វិបាកធម្មធម្មោ វិបាកស្ស ធម្មស្ស អនន្តរបច្ចយេន បច្ចយោ – វិបាកធម្មធម្មា ខន្ធា វុដ្ឋានស្ស… មគ្គោ ផលស្ស… សេក្ខានំ អនុលោមំ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនកុសលំ ផលសមាបត្តិយា អនន្តរបច្ចយេន បច្ចយោ. (២)

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស អនន្តរបច្ចយេន បច្ចយោ – បុរិមា បុរិមា នេវវិបាកនវិបាកធម្មធម្មា ខន្ធា បច្ឆិមានំ បច្ឆិមានំ នេវវិបាកនវិបាកធម្មធម្មានំ ខន្ធានំ អនន្តរបច្ចយេន បច្ចយោ. (១)

នេវវិបាកនវិបាកធម្មធម្មោ វិបាកស្ស ធម្មស្ស អនន្តរបច្ចយេន បច្ចយោ – អាវជ្ជនា បញ្ចន្នំ វិញ្ញាណានំ អនន្តរបច្ចយេន បច្ចយោ. នេវវិបាកនវិបាកធម្មធម្មា ខន្ធា វុដ្ឋានស្ស, អរហតោ អនុលោមំ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនកិរិយំ ផលសមាបត្តិយា អនន្តរបច្ចយេន បច្ចយោ. (២)

នេវវិបាកនវិបាកធម្មធម្មោ វិបាកធម្មធម្មស្ស អនន្តរបច្ចយេន បច្ចយោ – អាវជ្ជនា វិបាកធម្មធម្មានំ ខន្ធានំ អនន្តរបច្ចយេន បច្ចយោ. (៣)

សមនន្តរបច្ចយោ

៩៨. វិបាកោ ធម្មោ វិបាកស្ស ធម្មស្ស សមនន្តរបច្ចយេន បច្ចយោ (អនន្តរសទិសំ).

សហជាតបច្ចយោ

៩៩. វិបាកោ ធម្មោ វិបាកស្ស ធម្មស្ស សហជាតបច្ចយេន បច្ចយោ – វិបាកោ ឯកោ ខន្ធោ…បេ… តីណិ.

វិបាកធម្មធម្មោ វិបាកធម្មធម្មស្ស សហជាតបច្ចយេន បច្ចយោ… តីណិ.

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស សហជាតបច្ចយេន បច្ចយោ – នេវវិបាកនវិបាកធម្មធម្មោ ឯកោ ខន្ធោ…បេ… ឯកំ មហាភូតំ…បេ… ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ…បេ…. (១)

នេវវិបាកនវិបាកធម្មធម្មោ វិបាកស្ស ធម្មស្ស សហជាតបច្ចយេន បច្ចយោ – បដិសន្ធិក្ខណេ វត្ថុ វិបាកានំ ខន្ធានំ សហជាតបច្ចយេន បច្ចយោ. (២)

វិបាកោ ច នេវវិបាកនវិបាកធម្មធម្មោ ច ធម្មា វិបាកស្ស ធម្មស្ស សហជាតបច្ចយេន បច្ចយោ – បដិសន្ធិក្ខណេ វិបាកោ ឯកោ ខន្ធោ ច វត្ថុ ច តិណ្ណន្នំ ខន្ធានំ…បេ…. (១)

វិបាកោ ច នេវវិបាកនវិបាកធម្មធម្មោ ច ធម្មា នេវវិបាកនវិបាកធម្មធម្មស្ស សហជាតបច្ចយេន បច្ចយោ – វិបាកា ខន្ធា ច មហាភូតា ច ចិត្តសមុដ្ឋានានំ រូបានំ…បេ… បដិសន្ធិក្ខណេ វិបាកា ខន្ធា ច មហាភូតា ច កដត្តារូបានំ សហជាតបច្ចយេន បច្ចយោ. (២)

វិបាកធម្មធម្មោ ច នេវវិបាកនវិបាកធម្មធម្មោ ច ធម្មា នេវវិបាកនវិបាកធម្មធម្មស្ស សហជាតបច្ចយេន បច្ចយោ – វិបាកធម្មធម្មា ខន្ធា ច មហាភូតា ច ចិត្តសមុដ្ឋានានំ រូបានំ សហជាតបច្ចយេន បច្ចយោ. (១)

អញ្ញមញ្ញបច្ចយោ

១០០. វិបាកោ ធម្មោ វិបាកស្ស ធម្មស្ស អញ្ញមញ្ញបច្ចយេន បច្ចយោ – វិបាកោ ឯកោ ខន្ធោ…បេ… បដិសន្ធិក្ខណេ…បេ…. (១)

វិបាកោ ធម្មោ នេវវិបាកនវិបាកធម្មធម្មស្ស អញ្ញមញ្ញបច្ចយេន បច្ចយោ – បដិសន្ធិក្ខណេ វិបាកា ខន្ធា វត្ថុស្ស អញ្ញមញ្ញបច្ចយេន បច្ចយោ. (២)

វិបាកោ ធម្មោ វិបាកស្ស ច នេវវិបាកនវិបាកធម្មធម្មស្ស ច អញ្ញមញ្ញបច្ចយេន បច្ចយោ – បដិសន្ធិក្ខណេ វិបាកោ ឯកោ ខន្ធោ តិណ្ណន្នំ ខន្ធានំ វត្ថុស្ស ច អញ្ញមញ្ញបច្ចយេន បច្ចយោ…បេ…. (៣)

វិបាកធម្មធម្មោ វិបាកធម្មធម្មស្ស អញ្ញមញ្ញបច្ចយេន បច្ចយោ – វិបាកធម្មធម្មោ ឯកោ ខន្ធោ តិណ្ណន្នំ ខន្ធានំ…បេ… ទ្វេ ខន្ធា ទ្វិន្នំ ខន្ធានំ…បេ…. (១)

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស អញ្ញមញ្ញបច្ចយេន បច្ចយោ – នេវវិបាកនវិបាកធម្មធម្មោ ឯកោ ខន្ធោ តិណ្ណន្នំ ខន្ធានំ…បេ… ទ្វេ ខន្ធា ទ្វិន្នំ ខន្ធានំ…បេ…. (១)

នេវវិបាកនវិបាកធម្មធម្មោ វិបាកស្ស ធម្មស្ស អញ្ញមញ្ញបច្ចយេន បច្ចយោ – បដិសន្ធិក្ខណេ វត្ថុ វិបាកានំ ខន្ធានំ…បេ…. (២)

វិបាកោ ច នេវវិបាកនវិបាកធម្មធម្មោ ច ធម្មា វិបាកស្ស ធម្មស្ស…បេ… បដិសន្ធិក្ខណេ វិបាកោ ឯកោ ខន្ធោ ច វត្ថុ ច…បេ…. (១) (សត្ត បញ្ហា).

និស្សយបច្ចយោ

១០១. វិបាកោ ធម្មោ វិបាកស្ស ធម្មស្ស និស្សយបច្ចយេន បច្ចយោ… តីណិ. វិបាកធម្មធម្មោ វិបាកធម្មធម្មស្ស… តីណិ.

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស…បេ…. (១)

នេវវិបាកនវិបាកធម្មធម្មោ វិបាកស្ស ធម្មស្ស…បេ… ចក្ខាយតនំ ចក្ខុវិញ្ញាណស្ស និស្សយបច្ចយេន បច្ចយោ…បេ… កាយាយតនំ កាយវិញ្ញាណស្ស, វត្ថុ វិបាកានំ ខន្ធានំ…បេ… បដិសន្ធិក្ខណេ វត្ថុ វិបាកានំ ខន្ធានំ…បេ…. (២)

នេវវិបាកនវិបាកធម្មធម្មោ វិបាកធម្មធម្មស្ស និស្សយបច្ចយេន បច្ចយោ – វត្ថុ វិបាកធម្មធម្មានំ ខន្ធានំ…បេ…. (៣)

វិបាកោ ច នេវវិបាកនវិបាកធម្មធម្មោ ច ធម្មា វិបាកស្ស ធម្មស្ស និស្សយបច្ចយេន បច្ចយោ – ចក្ខុវិញ្ញាណសហគតោ ឯកោ ខន្ធោ ច ចក្ខាយតនញ្ច…បេ… កាយវិញ្ញាណសហគតោ ឯកោ ខន្ធោ ច កាយាយតនញ្ច…បេ… វិបាកោ ឯកោ ខន្ធោ ច វត្ថុ ច តិណ្ណន្នំ ខន្ធានំ… បដិសន្ធិក្ខណេ វិបាកោ ឯកោ ខន្ធោ ច វត្ថុ ច…បេ…. (១)

វិបាកោ ច នេវវិបាកនវិបាកធម្មធម្មោ ច ធម្មា នេវវិបាកនវិបាកធម្មធម្មស្ស…បេ… វិបាកា ខន្ធា ច មហាភូតា ច…បេ… (សំខិត្តំ) បដិសន្ធិក្ខណេ…បេ…. (២)

វិបាកធម្មធម្មោ ច នេវវិបាកនវិបាកធម្មធម្មោ ច ធម្មា វិបាកធម្មធម្មស្ស និស្សយបច្ចយេន បច្ចយោ – វិបាកធម្មធម្មោ ឯកោ ខន្ធោ ច វត្ថុ ច…បេ…. (១)

វិបាកធម្មធម្មោ ច នេវវិបាកនវិបាកធម្មធម្មោ ច ធម្មា នេវវិបាកនវិបាកធម្មធម្មស្ស និស្សយបច្ចយេន បច្ចយោ – វិបាកធម្មធម្មា ខន្ធា ច មហាភូតា ច ចិត្តសមុដ្ឋានានំ រូបានំ…. (២) (តេរស បញ្ហា).

ឧបនិស្សយបច្ចយោ

១០២. វិបាកោ ធម្មោ វិបាកស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – កាយិកំ សុខំ កាយិកស្ស សុខស្ស, កាយិកស្ស ទុក្ខស្ស, ផលសមាបត្តិយា ឧបនិស្សយបច្ចយេន បច្ចយោ. កាយិកំ ទុក្ខំ កាយិកស្ស សុខស្ស, កាយិកស្ស ទុក្ខស្ស, ផលសមាបត្តិយា ឧបនិស្សយបច្ចយេន បច្ចយោ. ផលសមាបត្តិ កាយិកស្ស សុខស្ស ឧបនិស្សយបច្ចយេន បច្ចយោ. (១)

វិបាកោ ធម្មោ វិបាកធម្មធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ….

បកតូបនិស្សយោ – កាយិកំ សុខំ ឧបនិស្សាយ ទានំ ទេតិ, សីលំ សមាទិយតិ…បេ… សង្ឃំ ភិន្ទតិ. កាយិកំ ទុក្ខំ ឧបនិស្សាយ ទានំ ទេតិ, សីលំ សមាទិយតិ…បេ… សង្ឃំ ភិន្ទតិ. កាយិកំ សុខំ កាយិកំ ទុក្ខំ សទ្ធាយ…បេ… បត្ថនាយ ឧបនិស្សយបច្ចយេន បច្ចយោ. (២)

វិបាកោ ធម្មោ នេវវិបាកនវិបាកធម្មធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – អរហា កាយិកំ សុខំ ឧបនិស្សាយ អនុប្បន្នំ កិរិយសមាបត្តិំ ឧប្បាទេតិ, ឧប្បន្នំ សមាបជ្ជតិ, សង្ខារេ អនិច្ចតោ ទុក្ខតោ អនត្តតោ វិបស្សតិ, កាយិកំ ទុក្ខំ ឧបនិស្សាយ អនុប្បន្នំ កិរិយសមាបត្តិំ ឧប្បាទេតិ, ឧប្បន្នំ សមាបជ្ជតិ…បេ…. (៣)

១០៣. វិបាកធម្មធម្មោ វិបាកធម្មធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – សទ្ធំ ឧបនិស្សាយ ទានំ ទេតិ…បេ… មានំ ជប្បេតិ… ទិដ្ឋិំ គណ្ហាតិ. សីលំ… សុតំ… ចាគំ… បញ្ញំ ឧបនិស្សាយ ទានំ ទេតិ…បេ… ទិដ្ឋិំ គណ្ហាតិ. រាគំ… ទោសំ… មោហំ… មានំ… ទិដ្ឋិំ… បត្ថនំ ឧបនិស្សាយ ទានំ ទេតិ…បេ… សមាបត្តិំ ឧប្បាទេតិ, បាណំ ហនតិ…បេ… សង្ឃំ ភិន្ទតិ…បេ… សទ្ធា…បេ… បត្ថនា សទ្ធាយ… សីលស្ស…បេ… បត្ថនាយ ឧបនិស្សយបច្ចយេន បច្ចយោ. បឋមស្ស ឈានស្ស បរិកម្មំ បឋមស្ស…បេ… នេវសញ្ញានាសញ្ញាយតនស្ស បរិកម្មំ នេវសញ្ញានាសញ្ញាយតនស្ស…បេ… បឋមំ ឈានំ ទុតិយស្ស…បេ… អាកិញ្ចញ្ញាយតនំ នេវសញ្ញានាសញ្ញាយតនស្ស…បេ… បឋមស្ស មគ្គស្ស បរិកម្មំ បឋមស្ស…បេ… ចតុត្ថស្ស មគ្គស្ស បរិកម្មំ ចតុត្ថស្ស…បេ… បឋមោ មគ្គោ ទុតិយស្ស…បេ… តតិយោ មគ្គោ ចតុត្ថស្ស មគ្គស្ស ឧបនិស្សយបច្ចយេន បច្ចយោ. សេក្ខា មគ្គំ ឧបនិស្សាយ អនុប្បន្នំ កុសលសមាបត្តិំ ឧប្បាទេន្តិ…បេ… មគ្គោ សេក្ខានំ អត្ថប្បដិសម្ភិទាយ…បេ… ឋានាឋានកោសល្លស្ស ឧបនិស្សយបច្ចយេន បច្ចយោ. បាណាតិបាតោ បាណាតិបាតស្ស…បេ… មិច្ឆាទិដ្ឋិយា ឧបនិស្សយបច្ចយេន បច្ចយោ…បេ… មិច្ឆាទិដ្ឋិ មិច្ឆាទិដ្ឋិយា…បេ… ព្យាបាទស្ស…បេ… មាតុឃាតិកម្មំ មាតុឃាតិកម្មស្ស…បេ… និយតមិច្ឆាទិដ្ឋិយា…បេ… និយតមិច្ឆាទិដ្ឋិ និយតមិច្ឆាទិដ្ឋិយា…បេ… សង្ឃភេទកកម្មស្ស ឧបនិស្សយបច្ចយេន បច្ចយោ. (១)

វិបាកធម្មធម្មោ វិបាកស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – សទ្ធំ ឧបនិស្សាយ អត្តានំ អាតាបេតិ បរិតាបេតិ, បរិយិដ្ឋិមូលកំ ទុក្ខំ បច្ចនុភោតិ…បេ… បត្ថនំ ឧបនិស្សាយ អត្តានំ អាតាបេតិ បរិតាបេតិ …បេ… សទ្ធា…បេ… បត្ថនា កាយិកស្ស សុខស្ស, កាយិកស្ស ទុក្ខស្ស, ផលសមាបត្តិយា ឧបនិស្សយបច្ចយេន បច្ចយោ. កុសលាកុសលំ កម្មំ វិបាកស្ស [កម្មវិបាកស្ស (ស្យា.)] ឧបនិស្សយបច្ចយេន បច្ចយោ. មគ្គោ ផលសមាបត្តិយា ឧបនិស្សយបច្ចយេន បច្ចយោ. (២)

វិបាកធម្មធម្មោ នេវវិបាកនវិបាកធម្មធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, បកតូបនិស្សយោ…បេ….

បកតូបនិស្សយោ – អរហា មគ្គំ ឧបនិស្សាយ អនុប្បន្នំ កិរិយសមាបត្តិំ ឧប្បាទេតិ, ឧប្បន្នំ សមាបជ្ជតិ, សង្ខារេ អនិច្ចតោ ទុក្ខតោ អនត្តតោ វិបស្សតិ. មគ្គោ អរហតោ អត្ថប្បដិសម្ភិទាយ…បេ… ឋានាឋានកោសល្លស្ស ឧបនិស្សយបច្ចយេន បច្ចយោ. (៣)

១០៤. នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – អរហា ឧតុំ… ភោជនំ… សេនាសនំ ឧបនិស្សាយ អនុប្បន្នំ កិរិយសមាបត្តិំ ឧប្បាទេតិ…បេ…. (១)

នេវវិបាកនវិបាកធម្មធម្មោ វិបាកស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – ឧតុ… ភោជនំ… សេនាសនំ, កាយិកស្ស សុខស្ស, កាយិកស្ស ទុក្ខស្ស, ផលសមាបត្តិយា ឧបនិស្សយបច្ចយេន បច្ចយោ. (២)

នេវវិបាកនវិបាកធម្មធម្មោ វិបាកធម្មធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ …បេ….

បកតូបនិស្សយោ – ឧតុំ ឧបនិស្សាយ ទានំ ទេតិ…បេ… សង្ឃំ ភិន្ទតិ. ភោជនំ… សេនាសនំ ឧបនិស្សាយ ទានំ ទេតិ…បេ… សង្ឃំ ភិន្ទតិ. ឧតុ… ភោជនំ… សេនាសនំ សទ្ធាយ…បេ… បត្ថនាយ ឧបនិស្សយបច្ចយេន បច្ចយោ. (៣)

បុរេជាតបច្ចយោ

១០៥. នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ.

អារម្មណបុរេជាតំ – អរហា ចក្ខុំ អនិច្ចតោ…បេ… កាយំ… រូបេ… ផោដ្ឋព្ពេ… វត្ថុំ អនិច្ចតោ…បេ… ទិព្ពេន ចក្ខុនា រូបំ…បេ… ទិព្ពាយ សោតធាតុយា សទ្ទំ…បេ…. វត្ថុបុរេជាតំ – វត្ថុ នេវវិបាកនវិបាកធម្មធម្មានំ ខន្ធានំ បុរេជាតបច្ចយេន បច្ចយោ. (១)

នេវវិបាកនវិបាកធម្មធម្មោ វិបាកស្ស ធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ.

អារម្មណបុរេជាតំ – សេក្ខា វា បុថុជ្ជនា វា ចក្ខុំ អនិច្ចតោ ទុក្ខតោ អនត្តតោ វិបស្សន្តិ, អស្សាទេន្តិ អភិនន្ទន្តិ; តំ អារព្ភ រាគោ ឧប្បជ្ជតិ…បេ… ទោមនស្សំ ឧប្បជ្ជតិ. កុសលាកុសលេ និរុទ្ធេ វិបាកោ តទារម្មណតា ឧប្បជ្ជតិ. សោតំ…បេ… វត្ថុំ អនិច្ចតោ…បេ… តទារម្មណតា ឧប្បជ្ជតិ. រូបាយតនំ ចក្ខុវិញ្ញាណស្ស បុរេជាត…បេ… ផោដ្ឋព្ពាយតនំ កាយវិញ្ញាណស្ស…បេ…. វត្ថុបុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ វិបាកានំ ខន្ធានំ បុរេជាតបច្ចយេន បច្ចយោ. (២)

នេវវិបាកនវិបាកធម្មធម្មោ វិបាកធម្មធម្មស្ស បុរេជាតបច្ចយេន បច្ចយោ – អារម្មណបុរេជាតំ, វត្ថុបុរេជាតំ.

អារម្មណបុរេជាតំ – សេក្ខា វា បុថុជ្ជនា វា ចក្ខុំ…បេ… អារព្ភ រាគោ…បេ… ទោមនស្សំ ឧប្បជ្ជតិ. សោតំ…បេ… វត្ថុំ អនិច្ចតោ…បេ… ទោមនស្សំ…បេ… ទិព្ពេន ចក្ខុនា រូបំ…បេ… ទិព្ពាយ សោតធាតុយា សទ្ទំ…បេ….

វត្ថុបុរេជាតំ – វត្ថុ វិបាកធម្មធម្មានំ ខន្ធានំ បុរេជាតបច្ចយេន បច្ចយោ. (៣)

បច្ឆាជាតបច្ចយោ

១០៦. វិបាកោ ធម្មោ នេវវិបាកនវិបាកធម្មធម្មស្ស បច្ឆាជាតបច្ចយេន បច្ចយោ – បច្ឆាជាតា វិបាកា ខន្ធា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ. (១)

វិបាកធម្មធម្មោ នេវវិបាកនវិបាកធម្មធម្មស្ស បច្ឆាជាតបច្ចយេន បច្ចយោ…. (១)

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស បច្ឆាជាតបច្ចយេន បច្ចយោ…. (១)

អាសេវនបច្ចយោ

១០៧. វិបាកធម្មធម្មោ វិបាកធម្មធម្មស្ស អាសេវនបច្ចយេន បច្ចយោ – បុរិមា បុរិមា វិបាកធម្មធម្មា ខន្ធា បច្ឆិមានំ បច្ឆិមានំ វិបាកធម្មធម្មានំ ខន្ធានំ…បេ… អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស អាសេវនបច្ចយេន បច្ចយោ. (១)

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស អាសេវនបច្ចយេន បច្ចយោ – បុរិមា បុរិមា…បេ… បច្ចយោ. (១)

កម្មបច្ចយោ

១០៨. វិបាកោ ធម្មោ វិបាកស្ស ធម្មស្ស កម្មបច្ចយេន បច្ចយោ – វិបាកា ចេតនា សម្បយុត្តកានំ ខន្ធានំ កម្មបច្ចយេន បច្ចយោ; បដិសន្ធិក្ខណេ វិបាកា ចេតនា…បេ…. (១)

វិបាកោ ធម្មោ នេវវិបាកនវិបាកធម្មធម្មស្ស កម្មបច្ចយេន បច្ចយោ – វិបាកា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ; បដិសន្ធិក្ខណេ វិបាកា ចេតនា កដត្តារូបានំ…បេ… ចេតនា វត្ថុស្ស កម្មបច្ចយេន បច្ចយោ. (២)

វិបាកោ ធម្មោ វិបាកស្ស ច នេវវិបាកនវិបាកធម្មធម្មស្ស ច ធម្មស្ស កម្មបច្ចយេន បច្ចយោ – វិបាកា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ; បដិសន្ធិក្ខណេ វិបាកា ចេតនា សម្បយុត្តកានំ ខន្ធានំ កដត្តា ច រូបានំ កម្មបច្ចយេន បច្ចយោ. (៣)

វិបាកធម្មធម្មោ វិបាកធម្មធម្មស្ស កម្មបច្ចយេន បច្ចយោ – វិបាកធម្មធម្មា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. (១)

វិបាកធម្មធម្មោ វិបាកស្ស ធម្មស្ស កម្មបច្ចយេន បច្ចយោ. នានាក្ខណិកា – វិបាកធម្មធម្មា ចេតនា វិបាកានំ ខន្ធានំ កម្មបច្ចយេន បច្ចយោ. (២)

វិបាកធម្មធម្មោ នេវវិបាកនវិបាកធម្មធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – វិបាកធម្មធម្មា ចេតនា ចិត្តសមុដ្ឋានានំ រូបានំ កម្មបច្ចយេន បច្ចយោ. នានាក្ខណិកា – វិបាកធម្មធម្មា ចេតនា កដត្តារូបានំ កម្មបច្ចយេន បច្ចយោ. (៣)

វិបាកធម្មធម្មោ វិបាកស្ស ច នេវវិបាកនវិបាកធម្មធម្មស្ស ច ធម្មស្ស កម្មបច្ចយេន បច្ចយោ. នានាក្ខណិកា – វិបាកធម្មធម្មា ចេតនា វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. (៤)

វិបាកធម្មធម្មោ វិបាកធម្មធម្មស្ស ច នេវវិបាកនវិបាកធម្មធម្មស្ស ច ធម្មស្ស កម្មបច្ចយេន បច្ចយោ – វិបាកធម្មធម្មា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (៥)

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស កម្មបច្ចយេន បច្ចយោ – នេវវិបាកនវិបាកធម្មធម្មា ចេតនា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ កម្មបច្ចយេន បច្ចយោ. (១)

វិបាកបច្ចយោ

១០៩. វិបាកោ ធម្មោ វិបាកស្ស ធម្មស្ស វិបាកបច្ចយេន បច្ចយោ – វិបាកោ ឯកោ ខន្ធោ តិណ្ណន្នំ ខន្ធានំ វិបាកបច្ចយេន បច្ចយោ; បដិសន្ធិក្ខណេ…បេ…. (១)

វិបាកោ ធម្មោ នេវវិបាកនវិបាកធម្មធម្មស្ស វិបាកបច្ចយេន បច្ចយោ – វិបាកា ខន្ធា ចិត្តសមុដ្ឋានានំ រូបានំ វិបាកបច្ចយេន បច្ចយោ; បដិសន្ធិក្ខណេ វិបាកា ខន្ធា កដត្តារូបានំ វិបាកបច្ចយេន បច្ចយោ. ខន្ធា វត្ថុស្ស…បេ…. (២)

វិបាកោ ធម្មោ វិបាកស្ស ច នេវវិបាកនវិបាកធម្មធម្មស្ស ច វិបាកបច្ចយេន បច្ចយោ – វិបាកោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ វិបាកបច្ចយេន បច្ចយោ; បដិសន្ធិក្ខណេ វិបាកោ ឯកោ ខន្ធោ តិណ្ណន្នំ ខន្ធានំ កដត្តា ច រូបានំ វិបាកបច្ចយេន បច្ចយោ. (៣)

អាហារបច្ចយោ

១១០. វិបាកោ ធម្មោ វិបាកស្ស ធម្មស្ស អាហារបច្ចយេន បច្ចយោ – វិបាកា អាហារា សម្បយុត្តកានំ ខន្ធានំ… តីណិ. (បដិសន្ធិបិ ឥមេសំ តិណ្ណន្នំ កាតព្ពា.)

វិបាកធម្មធម្មោ វិបាកធម្មធម្មស្ស អាហារបច្ចយេន បច្ចយោ… តីណិ.

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស អាហារបច្ចយេន បច្ចយោ – នេវវិបាកនវិបាកធម្មធម្មា អាហារា សម្បយុត្តកានំ ខន្ធានំ ចិត្តសមុដ្ឋានញ្ច រូបានំ អាហារបច្ចយេន បច្ចយោ; កពឡីការោ អាហារោ ឥមស្ស កាយស្ស អាហារបច្ចយេន បច្ចយោ. (១)

ឥន្ទ្រិយបច្ចយោ

១១១. វិបាកោ ធម្មោ វិបាកស្ស ធម្មស្ស ឥន្ទ្រិយបច្ចយេន បច្ចយោ… តីណិ (បដិសន្ធិ កាតព្ពា [កាតព្ពំ (សី.)].) វិបាកធម្មធម្មោ វិបាកធម្មធម្មស្ស ឥន្ទ្រិយបច្ចយេន បច្ចយោ… តីណិ.

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស ឥន្ទ្រិយបច្ចយេន បច្ចយោ – នេវវិបាកនវិបាកធម្មធម្មា ឥន្ទ្រិយា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ឥន្ទ្រិយបច្ចយេន បច្ចយោ; រូបជីវិតិន្ទ្រិយំ កដត្តារូបានំ ឥន្ទ្រិយបច្ចយេន បច្ចយោ. (១)

នេវវិបាកនវិបាកធម្មធម្មោ វិបាកស្ស ធម្មស្ស ឥន្ទ្រិយបច្ចយេន បច្ចយោ – ចក្ខុន្ទ្រិយំ ចក្ខុវិញ្ញាណស្ស ឥន្ទ្រិយបច្ចយេន បច្ចយោ; កាយិន្ទ្រិយំ…បេ…. (២)

វិបាកោ ច នេវវិបាកនវិបាកធម្មធម្មោ ច ធម្មា វិបាកស្ស ធម្មស្ស ឥន្ទ្រិយបច្ចយេន បច្ចយោ – ចក្ខុន្ទ្រិយញ្ច ចក្ខុវិញ្ញាណញ្ច ចក្ខុវិញ្ញាណសហគតានំ ខន្ធានំ ឥន្ទ្រិយបច្ចយេន បច្ចយោ…បេ… កាយិន្ទ្រិយញ្ច កាយវិញ្ញាណញ្ច កាយវិញ្ញាណសហគតានំ ខន្ធានំ ឥន្ទ្រិយបច្ចយេន បច្ចយោ. (១)

ឈានបច្ចយោ

១១២. វិបាកោ ធម្មោ វិបាកស្ស ធម្មស្ស ឈានបច្ចយេន បច្ចយោ… តីណិ. វិបាកធម្មធម្មោ វិបាកធម្មធម្មស្ស ឈានបច្ចយេន បច្ចយោ … តីណិ.

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស ឈានបច្ចយេន បច្ចយោ – នេវវិបាកនវិបាកធម្មធម្មា ឈានង្គា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ ឈានបច្ចយេន បច្ចយោ.

មគ្គបច្ចយោ

១១៣. វិបាកោ ធម្មោ វិបាកស្ស ធម្មស្ស មគ្គបច្ចយេន បច្ចយោ… តីណិ. វិបាកធម្មធម្មោ វិបាកធម្មធម្មស្ស មគ្គបច្ចយេន បច្ចយោ… តីណិ. នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស មគ្គបច្ចយេន បច្ចយោ. នេវវិបាកនវិបាកធម្មធម្មា មគ្គង្គា សម្បយុត្តកានំ ខន្ធានំ ចិត្តសមុដ្ឋានានញ្ច រូបានំ មគ្គបច្ចយេន បច្ចយោ.

សម្បយុត្តបច្ចយោ

១១៤. វិបាកោ ធម្មោ វិបាកស្ស ធម្មស្ស សម្បយុត្តបច្ចយេន បច្ចយោ – វិបាកោ ឯកោ ខន្ធោ តិណ្ណន្នំ…បេ… ទ្វេ ខន្ធា ទ្វិន្នំ…បេ… បដិសន្ធិក្ខណេ…បេ… វិបាកធម្មធម្មោ វិបាកធម្មធម្មស្ស សម្បយុត្តបច្ចយេន បច្ចយោ; នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស សម្បយុត្តបច្ចយេន បច្ចយោ; ទ្វេ ខន្ធា ទ្វិន្នំ ខន្ធានំ សម្បយុត្តបច្ចយេន បច្ចយោ.

វិប្បយុត្តបច្ចយោ

១១៥. វិបាកោ ធម្មោ នេវវិបាកនវិបាកធម្មធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – វិបាកា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ; បដិសន្ធិក្ខណេ វិបាកា ខន្ធា កដត្តារូបានំ វិប្បយុត្តបច្ចយេន បច្ចយោ; ខន្ធា វត្ថុស្ស វិប្បយុត្តបច្ចយេន បច្ចយោ. បច្ឆាជាតា – វិបាកា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

វិបាកធម្មធម្មោ នេវវិបាកនវិបាកធម្មធម្មស្ស វិប្បយុត្តបច្ចយេន បច្ចយោ – សហជាតំ, បច្ឆាជាតំ. សហជាតា – វិបាកធម្មធម្មា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បច្ឆាជាតា – វិបាកធម្មធម្មា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ, បច្ឆាជាតំ. សហជាតា – នេវវិបាកនវិបាកធម្មធម្មា ខន្ធា ចិត្តសមុដ្ឋានានំ រូបានំ វិប្បយុត្តបច្ចយេន បច្ចយោ. បុរេជាតំ – វត្ថុ នេវវិបាកនវិបាកធម្មធម្មានំ ខន្ធានំ វិប្បយុត្តបច្ចយេន បច្ចយោ. បច្ឆាជាតា – នេវវិបាកនវិបាកធម្មធម្មា ខន្ធា បុរេជាតស្ស ឥមស្ស កាយស្ស វិប្បយុត្តបច្ចយេន បច្ចយោ. (១)

នេវវិបាកនវិបាកធម្មធម្មោ វិបាកស្ស ធម្មស្ស វិប្បយុត្តបច្ចយេន បច្ចយោ – សហជាតំ, បុរេជាតំ. សហជាតំ – បដិសន្ធិក្ខណេ វត្ថុ វិបាកានំ ខន្ធានំ វិប្បយុត្តបច្ចយេន បច្ចយោ. បុរេជាតំ – ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ វិបាកានំ ខន្ធានំ វិប្បយុត្តបច្ចយេន បច្ចយោ. (២)

នេវវិបាកនវិបាកធម្មធម្មោ វិបាកធម្មធម្មស្ស វិប្បយុត្តបច្ចយេន បច្ចយោ. បុរេជាតំ – វត្ថុ វិបាកធម្មធម្មានំ ខន្ធានំ វិប្បយុត្តបច្ចយេន បច្ចយោ. (៣)

អត្ថិបច្ចយោ

១១៦. វិបាកោ ធម្មោ វិបាកស្ស ធម្មស្ស អត្ថិបច្ចយេន បច្ចយោ – វិបាកោ ឯកោ ខន្ធោ តិណ្ណន្នំ…បេ… បដិសន្ធិក្ខណេ វិបាកោ ឯកោ ខន្ធោ តិណ្ណន្នំ…បេ…. (១)

វិបាកោ ធម្មោ នេវវិបាកនវិបាកធម្មធម្មស្ស…បេ… សហជាតំ, បច្ឆាជាតំ. សហជាតា – វិបាកា ខន្ធា ចិត្តសមុដ្ឋានានំ រូបានំ អត្ថិបច្ចយេន បច្ចយោ; បដិសន្ធិខណេ វិបាកា ខន្ធា កដត្តារូបានំ អត្ថិបច្ចយេន បច្ចយោ. បច្ឆាជាតា – វិបាកា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. (២)

វិបាកោ ធម្មោ វិបាកស្ស ច នេវវិបាកនវិបាកធម្មធម្មស្ស ច អត្ថិបច្ចយេន បច្ចយោ – វិបាកោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ… បដិសន្ធិក្ខណេ…បេ…. (៣)

១១៧. វិបាកធម្មធម្មោ វិបាកធម្មធម្មស្ស អត្ថិបច្ចយេន បច្ចយោ… ទ្វេ ខន្ធា ទ្វិន្នំ ខន្ធានំ អត្ថិបច្ចយេន បច្ចយោ. (១)

វិបាកធម្មធម្មោ នេវវិបាកនវិបាកធម្មធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ. សហជាតា – វិបាកធម្មធម្មា ខន្ធា ចិត្តសមុដ្ឋានានំ រូបានំ អត្ថិបច្ចយេន បច្ចយោ. បច្ឆាជាតា – វិបាកធម្មធម្មា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ. (២)

វិបាកធម្មធម្មោ វិបាកធម្មធម្មស្ស ច នេវវិបាកនវិបាកធម្មធម្មស្ស ច…បេ… វិបាកធម្មធម្មោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…. (៣)

នេវវិបាកនវិបាកធម្មធម្មោ នេវវិបាកនវិបាកធម្មធម្មស្ស …បេ… សហជាតំ, បុរេជាតំ, បច្ឆាជាតំ, អាហារំ, ឥន្ទ្រិយំ. សហជាតោ – នេវវិបាកនវិបាកធម្មធម្មោ ឯកោ ខន្ធោ តិណ្ណន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ…បេ… ទ្វេ ខន្ធា ទ្វិន្នំ ខន្ធានំ ចិត្តសមុដ្ឋានានញ្ច រូបានំ អត្ថិបច្ចយេន បច្ចយោ; ឯកំ មហាភូតំ…បេ… មហាភូតា ចិត្តសមុដ្ឋានានំ រូបានំ កដត្តារូបានំ ឧបាទារូបានំ អត្ថិបច្ចយេន បច្ចយោ. ពាហិរំ… អាហារសមុដ្ឋានំ… ឧតុសមុដ្ឋានំ… អសញ្ញសត្តានំ ឯកំ មហាភូតំ…បេ….

បុរេជាតំ – អរហា ចក្ខុំ អនិច្ចតោ…បេ… សោតំ…បេ… វត្ថុំ អនិច្ចតោ…បេ… ទិព្ពេន ចក្ខុនា រូបំ បស្សតិ, ទិព្ពាយ សោតធាតុយា សទ្ទំ សុណាតិ, វត្ថុ នេវវិបាកនវិបាកធម្មធម្មានំ ខន្ធានំ អត្ថិបច្ចយេន បច្ចយោ.

បច្ឆាជាតា – នេវវិបាកនវិបាកធម្មធម្មា ខន្ធា បុរេជាតស្ស ឥមស្ស កាយស្ស អត្ថិបច្ចយេន បច្ចយោ; កពឡីការោ អាហារោ ឥមស្ស កាយស្ស អត្ថិបច្ចយេន បច្ចយោ; រូបជីវិតិន្ទ្រិយំ កដត្តារូបានំ អត្ថិបច្ចយេន បច្ចយោ. (១)

នេវវិបាកនវិបាកធម្មធម្មោ វិបាកស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតំ – បដិសន្ធិក្ខណេ វត្ថុ វិបាកានំ ខន្ធានំ អត្ថិបច្ចយេន បច្ចយោ. បុរេជាតំ – សេក្ខា វា បុថុជ្ជនា វា ចក្ខុំ អនិច្ចតោ…បេ… អស្សាទេន្តិ; តំ អារព្ភ រាគោ…បេ… ទោមនស្សំ…បេ… កុសលាកុសលេ និរុទ្ធេ វិបាកោ តទារម្មណតា…បេ… សោតំ…បេ… វត្ថុំ…បេ… វិបាកោ តទារម្មណតា…បេ… រូបាយតនំ ចក្ខុវិញ្ញាណស្ស…បេ… ផោដ្ឋព្ពាយតនំ កាយវិញ្ញាណស្ស…បេ… ចក្ខាយតនំ ចក្ខុវិញ្ញាណស្ស…បេ… កាយាយតនំ កាយវិញ្ញាណស្ស…បេ… វត្ថុ វិបាកានំ ខន្ធានំ អត្ថិបច្ចយេន បច្ចយោ. (២)

នេវវិបាកនវិបាកធម្មធម្មោ វិបាកធម្មធម្មស្ស អត្ថិបច្ចយេន បច្ចយោ. បុរេជាតំ – សេក្ខា វា បុថុជ្ជនា វា ចក្ខុំ អនិច្ចតោ…បេ… អស្សាទេន្តិ…បេ… ទោមនស្សំ ឧប្បជ្ជតិ. សោតំ…បេ… វត្ថុំ អនិច្ចតោ…បេ… ទោមនស្សំ ឧប្បជ្ជតិ. ទិព្ពេន ចក្ខុនា…បេ… វត្ថុ វិបាកធម្មធម្មានំ ខន្ធានំ អត្ថិបច្ចយេន បច្ចយោ. (៣)

១១៨. វិបាកោ ច នេវវិបាកនវិបាកធម្មធម្មោ ច ធម្មា វិបាកស្ស ធម្មស្ស អត្ថិបច្ចយេន បច្ចយោ – សហជាតំ, បុរេជាតំ. សហជាតោ – ចក្ខុវិញ្ញាណសហគតោ ឯកោ ខន្ធោ ច ចក្ខាយតនញ្ច តិណ្ណន្នំ…បេ… កាយវិញ្ញាណសហគតោ…បេ… វិបាកោ ឯកោ ខន្ធោ ច វត្ថុ ច តិណ្ណន្នំ ខន្ធានំ…បេ… បដិសន្ធិក្ខណេ វិបាកោ ឯកោ ខន្ធោ ច វត្ថុ ច តិណ្ណន្នំ…បេ…. (១)

វិបាកោ ច នេវវិបាកនវិបាកធម្មធម្មោ ច ធម្មា នេវវិបាកនវិបាកធម្មធម្មស្ស អត្ថិបច្ចយេន បច្ចយោ – សហជាតំ, បច្ឆាជាតំ, អាហារំ, ឥន្ទ្រិយំ. សហជាតា – វិបាកា ខន្ធា ច មហាភូតា ច ចិត្តសមុដ្ឋានានំ រូបានំ អត្ថិបច្ចយេន បច្ចយោ. បដិសន្ធិក្ខណេ វិបាកា ខន្ធា ច មហាភូតា ច កដត្តារូបានំ អត្ថិបច្ចយេន បច្ចយោ.

បច្ឆាជាតា – វិបាកា ខន្ធា ច កពឡីការោ អាហារោ ច ឥមស្ស កាយស្ស…បេ… បច្ឆាជាតា វិបាកា ខន្ធា ច រូបជីវិតិន្ទ្រិយញ្ច កដត្តារូបានំ អត្ថិបច្ចយេន បច្ចយោ. (២)