នមោ តស្ស ភគវតោ អរហតោ សម្មាសម្ពុទ្ធស្ស

អភិធម្មបិដកេ

បដ្ឋានបាឡិ

(បឋមោ ភាគោ)

ធម្មានុលោមេ

តិកបដ្ឋានំ

(១) បច្ចយុទ្ទេសោ

ហេតុបច្ចយោ, អារម្មណបច្ចយោ, អធិបតិបច្ចយោ, អនន្តរបច្ចយោ, សមនន្តរបច្ចយោ, សហជាតបច្ចយោ, អញ្ញមញ្ញបច្ចយោ, និស្សយបច្ចយោ, ឧបនិស្សយបច្ចយោ, បុរេជាតបច្ចយោ, បច្ឆាជាតបច្ចយោ, អាសេវនបច្ចយោ, កម្មបច្ចយោ, វិបាកបច្ចយោ, អាហារបច្ចយោ, ឥន្ទ្រិយបច្ចយោ, ឈានបច្ចយោ, មគ្គបច្ចយោ, សម្បយុត្តបច្ចយោ, វិប្បយុត្តបច្ចយោ, អត្ថិបច្ចយោ, នត្ថិបច្ចយោ, វិគតបច្ចយោ, អវិគតបច្ចយោតិ.

(២) បច្ចយនិទ្ទេសោ

១. ហេតុបច្ចយោតិ – ហេតូ ហេតុសម្បយុត្តកានំ ធម្មានំ តំសមុដ្ឋានានញ្ច រូបានំ ហេតុបច្ចយេន បច្ចយោ [បច្ចយោតិ (ស្យា.)].

២. អារម្មណបច្ចយោតិ – រូបាយតនំ ចក្ខុវិញ្ញាណធាតុយា តំសម្បយុត្តកានញ្ច ធម្មានំ អារម្មណបច្ចយេន បច្ចយោ. សទ្ទាយតនំ សោតវិញ្ញាណធាតុយា តំសម្បយុត្តកានញ្ច ធម្មានំ អារម្មណបច្ចយេន បច្ចយោ. គន្ធាយតនំ ឃានវិញ្ញាណធាតុយា តំសម្បយុត្តកានញ្ច ធម្មានំ អារម្មណបច្ចយេន បច្ចយោ. រសាយតនំ ជិវ្ហាវិញ្ញាណធាតុយា តំសម្បយុត្តកានញ្ច ធម្មានំ អារម្មណបច្ចយេន បច្ចយោ. ផោដ្ឋព្ពាយតនំ កាយវិញ្ញាណធាតុយា តំសម្បយុត្តកានញ្ច ធម្មានំ អារម្មណបច្ចយេន បច្ចយោ. រូបាយតនំ សទ្ទាយតនំ គន្ធាយតនំ រសាយតនំ ផោដ្ឋព្ពាយតនំ មនោធាតុយា តំសម្បយុត្តកានញ្ច ធម្មានំ អារម្មណបច្ចយេន បច្ចយោ. សព្ពេ ធម្មា មនោវិញ្ញាណធាតុយា តំសម្បយុត្តកានញ្ច ធម្មានំ អារម្មណបច្ចយេន បច្ចយោ.

យំ យំ ធម្មំ អារព្ភ យេ យេ ធម្មា ឧប្បជ្ជន្តិ ចិត្តចេតសិកា ធម្មា, តេ តេ ធម្មា តេសំ តេសំ ធម្មានំ អារម្មណបច្ចយេន បច្ចយោ.

៣. អធិបតិបច្ចយោតិ – ឆន្ទាធិបតិ ឆន្ទសម្បយុត្តកានំ ធម្មានំ តំសមុដ្ឋានានញ្ច រូបានំ អធិបតិបច្ចយេន បច្ចយោ. វីរិយាធិបតិ វីរិយសម្បយុត្តកានំ ធម្មានំ តំសមុដ្ឋានានញ្ច រូបានំ អធិបតិបច្ចយេន បច្ចយោ. ចិត្តាធិបតិ ចិត្តសម្បយុត្តកានំ ធម្មានំ តំសមុដ្ឋានានញ្ច រូបានំ អធិបតិបច្ចយេន បច្ចយោ. វីមំសាធិបតិ វីមំសសម្បយុត្តកានំ ធម្មានំ តំសមុដ្ឋានានញ្ច រូបានំ អធិបតិបច្ចយេន បច្ចយោ.

យំ យំ ធម្មំ គរុំ កត្វា យេ យេ ធម្មា ឧប្បជ្ជន្តិ ចិត្តចេតសិកា ធម្មា, តេ តេ ធម្មា តេសំ តេសំ ធម្មានំ អធិបតិបច្ចយេន បច្ចយោ.

៤. អនន្តរបច្ចយោតិ – ចក្ខុវិញ្ញាណធាតុ តំសម្បយុត្តកា ច ធម្មា មនោធាតុយា តំសម្បយុត្តកានញ្ច ធម្មានំ អនន្តរបច្ចយេន បច្ចយោ. មនោធាតុ តំសម្បយុត្តកា ច ធម្មា មនោវិញ្ញាណធាតុយា តំសម្បយុត្តកានញ្ច ធម្មានំ អនន្តរបច្ចយេន បច្ចយោ.

សោតវិញ្ញាណធាតុ តំសម្បយុត្តកា ច ធម្មា មនោធាតុយា តំសម្បយុត្តកានញ្ច ធម្មានំ អនន្តរបច្ចយេន បច្ចយោ. មនោធាតុ តំសម្បយុត្តកា ច ធម្មា មនោវិញ្ញាណធាតុយា តំសម្បយុត្តកានញ្ច ធម្មានំ អនន្តរបច្ចយេន បច្ចយោ.

ឃានវិញ្ញាណធាតុ តំសម្បយុត្តកា ច ធម្មា មនោធាតុយា តំសម្បយុត្តកានញ្ច ធម្មានំ អនន្តរបច្ចយេន បច្ចយោ. មនោធាតុ តំសម្បយុត្តកា ច ធម្មា មនោវិញ្ញាណធាតុយា តំសម្បយុត្តកានញ្ច ធម្មានំ អនន្តរបច្ចយេន បច្ចយោ.

ជិវ្ហាវិញ្ញាណធាតុ តំសម្បយុត្តកា ច ធម្មា មនោធាតុយា តំសម្បយុត្តកានញ្ច ធម្មានំ អនន្តរបច្ចយេន បច្ចយោ. មនោធាតុ តំសម្បយុត្តកា ច ធម្មា មនោវិញ្ញាណធាតុយា តំសម្បយុត្តកានញ្ច ធម្មានំ អនន្តរបច្ចយេន បច្ចយោ.

កាយវិញ្ញាណធាតុ តំសម្បយុត្តកា ច ធម្មា មនោធាតុយា តំសម្បយុត្តកានញ្ច ធម្មានំ អនន្តរបច្ចយេន បច្ចយោ. មនោធាតុ តំសម្បយុត្តកា ច ធម្មា មនោវិញ្ញាណធាតុយា តំសម្បយុត្តកានញ្ច ធម្មានំ អនន្តរបច្ចយេន បច្ចយោ.

បុរិមា បុរិមា កុសលា ធម្មា បច្ឆិមានំ បច្ឆិមានំ កុសលានំ ធម្មានំ អនន្តរបច្ចយេន បច្ចយោ. បុរិមា បុរិមា កុសលា ធម្មា បច្ឆិមានំ បច្ឆិមានំ អព្យាកតានំ ធម្មានំ អនន្តរបច្ចយេន បច្ចយោ.

បុរិមា បុរិមា អកុសលា ធម្មា បច្ឆិមានំ បច្ឆិមានំ អកុសលានំ ធម្មានំ អនន្តរបច្ចយេន បច្ចយោ. បុរិមា បុរិមា អកុសលា ធម្មា បច្ឆិមានំ បច្ឆិមានំ អព្យាកតានំ ធម្មានំ អនន្តរបច្ចយេន បច្ចយោ.

បុរិមា បុរិមា អព្យាកតា ធម្មា បច្ឆិមានំ បច្ឆិមានំ អព្យាកតានំ ធម្មានំ អនន្តរបច្ចយេន បច្ចយោ. បុរិមា បុរិមា អព្យាកតា ធម្មា បច្ឆិមានំ បច្ឆិមានំ កុសលានំ ធម្មានំ អនន្តរបច្ចយេន បច្ចយោ. បុរិមា បុរិមា អព្យាកតា ធម្មា បច្ឆិមានំ បច្ឆិមានំ អកុសលានំ ធម្មានំ អនន្តរបច្ចយេន បច្ចយោ.

យេសំ យេសំ ធម្មានំ អនន្តរា យេ យេ ធម្មា ឧប្បជ្ជន្តិ ចិត្តចេតសិកា ធម្មា, តេ តេ ធម្មា តេសំ តេសំ ធម្មានំ អនន្តរបច្ចយេន បច្ចយោ.

៥. សមនន្តរបច្ចយោតិ – ចក្ខុវិញ្ញាណធាតុ តំសម្បយុត្តកា ច ធម្មា មនោធាតុយា តំសម្បយុត្តកានញ្ច ធម្មានំ សមនន្តរបច្ចយេន បច្ចយោ. មនោធាតុ តំសម្បយុត្តកា ច ធម្មា មនោវិញ្ញាណធាតុយា តំសម្បយុត្តកានញ្ច ធម្មានំ សមនន្តរបច្ចយេន បច្ចយោ.

សោតវិញ្ញាណធាតុ តំសម្បយុត្តកា ច ធម្មា មនោធាតុយា តំសម្បយុត្តកានញ្ច ធម្មានំ សមនន្តរបច្ចយេន បច្ចយោ. មនោធាតុ តំសម្បយុត្តកា ច ធម្មា មនោវិញ្ញាណធាតុយា តំសម្បយុត្តកានញ្ច ធម្មានំ សមនន្តរបច្ចយេន បច្ចយោ.

ឃាណវិញ្ញាណធាតុ តំសម្បយុត្តកា ច ធម្មា មនោធាតុយា តំសម្បយុត្តកានញ្ច ធម្មានំ សមនន្តរបច្ចយេន បច្ចយោ. មនោធាតុ តំសម្បយុត្តកា ច ធម្មា មនោវិញ្ញាណធាតុយា តំសម្បយុត្តកានញ្ច ធម្មានំ សមនន្តរបច្ចយេន បច្ចយោ.

ជិវ្ហាវិញ្ញាណធាតុ តំសម្បយុត្តកា ច ធម្មា មនោធាតុយា តំសម្បយុត្តកានញ្ច ធម្មានំ សមនន្តរបច្ចយេន បច្ចយោ. មនោធាតុ តំសម្បយុត្តកា ច ធម្មា មនោវិញ្ញាណធាតុយា តំសម្បយុត្តកានញ្ច ធម្មានំ សមនន្តរបច្ចយេន បច្ចយោ.

កាយវិញ្ញាណធាតុ តំសម្បយុត្តកា ច ធម្មា មនោធាតុយា តំសម្បយុត្តកានញ្ច ធម្មានំ សមនន្តរបច្ចយេន បច្ចយោ. មនោធាតុ តំសម្បយុត្តកា ច ធម្មា មនោវិញ្ញាណធាតុយា តំសម្បយុត្តកានញ្ច ធម្មានំ សមនន្តរបច្ចយេន បច្ចយោ.

បុរិមា បុរិមា កុសលា ធម្មា បច្ឆិមានំ បច្ឆិមានំ កុសលានំ ធម្មានំ សមនន្តរបច្ចយេន បច្ចយោ. បុរិមា បុរិមា កុសលា ធម្មា បច្ឆិមានំ បច្ឆិមានំ អព្យាកតានំ ធម្មានំ សមនន្តរបច្ចយេន បច្ចយោ.

បុរិមា បុរិមា អកុសលា ធម្មា បច្ឆិមានំ បច្ឆិមានំ អកុសលានំ ធម្មានំ សមនន្តរបច្ចយេន បច្ចយោ. បុរិមា បុរិមា អកុសលា ធម្មា បច្ឆិមានំ បច្ឆិមានំ អព្យាកតានំ ធម្មានំ សមនន្តរបច្ចយេន បច្ចយោ.

បុរិមា បុរិមា អព្យាកតា ធម្មា បច្ឆិមានំ បច្ឆិមានំ អព្យាកតានំ ធម្មានំ សមនន្តរបច្ចយេន បច្ចយោ. បុរិមា បុរិមា អព្យាកតា ធម្មា បច្ឆិមានំ បច្ឆិមានំ កុសលានំ ធម្មានំ សមនន្តរបច្ចយេន បច្ចយោ. បុរិមា បុរិមា អព្យាកតា ធម្មា បច្ឆិមានំ បច្ឆិមានំ អកុសលានំ ធម្មានំ សមនន្តរបច្ចយេន បច្ចយោ.

យេសំ យេសំ ធម្មានំ សមនន្តរា យេ យេ ធម្មា ឧប្បជ្ជន្តិ ចិត្តចេតសិកា ធម្មា, តេ តេ ធម្មា តេសំ តេសំ ធម្មានំ សមនន្តរបច្ចយេន បច្ចយោ.

៦. សហជាតបច្ចយោតិ – ចត្តារោ ខន្ធា អរូបិនោ អញ្ញមញ្ញំ សហជាតបច្ចយេន បច្ចយោ. ចត្តារោ មហាភូតា អញ្ញមញ្ញំ សហជាតបច្ចយេន បច្ចយោ. ឱក្កន្តិក្ខណេ នាមរូបំ អញ្ញមញ្ញំ សហជាតបច្ចយេន បច្ចយោ. ចិត្តចេតសិកា ធម្មា ចិត្តសមុដ្ឋានានំ រូបានំ សហជាតបច្ចយេន បច្ចយោ. មហាភូតា ឧបាទារូបានំ សហជាតបច្ចយេន បច្ចយោ. រូបិនោ ធម្មា អរូបីនំ ធម្មានំ កិញ្ចិ កាលេ [កញ្ចិ កាលំ (ស្យា.)] សហជាតបច្ចយេន បច្ចយោ, កិញ្ចិ កាលេ ន សហជាតបច្ចយេន បច្ចយោ.

៧. អញ្ញមញ្ញបច្ចយោតិ – ចត្តារោ ខន្ធា អរូបិនោ អញ្ញមញ្ញបច្ចយេន បច្ចយោ. ចត្តារោ មហាភូតា អញ្ញមញ្ញបច្ចយេន បច្ចយោ. ឱក្កន្តិក្ខណេ នាមរូបំ អញ្ញមញ្ញបច្ចយេន បច្ចយោ.

៨. និស្សយបច្ចយោតិ – ចត្តារោ ខន្ធា អរូបិនោ អញ្ញមញ្ញំ និស្សយបច្ចយេន បច្ចយោ. ចត្តារោ មហាភូតា អញ្ញមញ្ញំ និស្សយបច្ចយេន បច្ចយោ. ឱក្កន្តិក្ខណេ នាមរូបំ អញ្ញមញ្ញំ និស្សយបច្ចយេន បច្ចយោ. ចិត្តចេតសិកា ធម្មា ចិត្តសមុដ្ឋានានំ រូបានំ និស្សយបច្ចយេន បច្ចយោ. មហាភូតា ឧបាទារូបានំ និស្សយបច្ចយេន បច្ចយោ.

ចក្ខាយតនំ ចក្ខុវិញ្ញាណធាតុយា តំសម្បយុត្តកានញ្ច ធម្មានំ និស្សយបច្ចយេន បច្ចយោ. សោតាយតនំ សោតវិញ្ញាណធាតុយា តំសម្បយុត្តកានញ្ច ធម្មានំ និស្សយបច្ចយេន បច្ចយោ. ឃានាយតនំ ឃានវិញ្ញាណធាតុយា តំសម្បយុត្តកានញ្ច ធម្មានំ និស្សយបច្ចយេន បច្ចយោ. ជិវ្ហាយតនំ ជិវ្ហាវិញ្ញាណធាតុយា តំសម្បយុត្តកានញ្ច ធម្មានំ និស្សយបច្ចយេន បច្ចយោ. កាយាយតនំ កាយវិញ្ញាណធាតុយា តំសម្បយុត្តកានញ្ច ធម្មានំ និស្សយបច្ចយេន បច្ចយោ. យំ រូបំ និស្សាយ មនោធាតុ ច មនោវិញ្ញាណធាតុ ច វត្តន្តិ, តំ រូបំ មនោធាតុយា ច មនោវិញ្ញាណធាតុយា ច តំសម្បយុត្តកានញ្ច ធម្មានំ និស្សយបច្ចយេន បច្ចយោ.

៩. ឧបនិស្សយបច្ចយោតិ – បុរិមា បុរិមា កុសលា ធម្មា បច្ឆិមានំ បច្ឆិមានំ កុសលានំ ធម្មានំ ឧបនិស្សយបច្ចយេន បច្ចយោ. បុរិមា បុរិមា កុសលា ធម្មា បច្ឆិមានំ បច្ឆិមានំ អកុសលានំ ធម្មានំ កេសញ្ចិ ឧបនិស្សយបច្ចយេន បច្ចយោ. បុរិមា បុរិមា កុសលា ធម្មា បច្ឆិមានំ បច្ឆិមានំ អព្យាកតានំ ធម្មានំ ឧបនិស្សយបច្ចយេន បច្ចយោ.

បុរិមា បុរិមា អកុសលា ធម្មា បច្ឆិមានំ បច្ឆិមានំ អកុសលានំ ធម្មានំ ឧបនិស្សយបច្ចយេន បច្ចយោ. បុរិមា បុរិមា អកុសលា ធម្មា បច្ឆិមានំ បច្ឆិមានំ កុសលានំ ធម្មានំ កេសញ្ចិ ឧបនិស្សយបច្ចយេន បច្ចយោ. បុរិមា បុរិមា អកុសលា ធម្មា បច្ឆិមានំ បច្ឆិមានំ អព្យាកតានំ ធម្មានំ ឧបនិស្សយបច្ចយេន បច្ចយោ.

បុរិមា បុរិមា អព្យាកតា ធម្មា បច្ឆិមានំ បច្ឆិមានំ អព្យាកតានំ ធម្មានំ ឧបនិស្សយបច្ចយេន បច្ចយោ. បុរិមា បុរិមា អព្យាកតា ធម្មា បច្ឆិមានំ បច្ឆិមានំ កុសលានំ ធម្មានំ ឧបនិស្សយបច្ចយេន បច្ចយោ. បុរិមា បុរិមា អព្យាកតា ធម្មា បច្ឆិមានំ បច្ឆិមានំ អកុសលានំ ធម្មានំ ឧបនិស្សយបច្ចយេន បច្ចយោ.

ឧតុភោជនម្បិ ឧបនិស្សយបច្ចយេន បច្ចយោ. បុគ្គលោបិ ឧបនិស្សយបច្ចយេន បច្ចយោ. សេនាសនម្បិ ឧបនិស្សយបច្ចយេន បច្ចយោ.

១០. បុរេជាតបច្ចយោតិ – ចក្ខាយតនំ ចក្ខុវិញ្ញាណធាតុយា តំសម្បយុត្តកានញ្ច ធម្មានំ បុរេជាតបច្ចយេន បច្ចយោ. សោតាយតនំ សោតវិញ្ញាណធាតុយា តំសម្បយុត្តកានញ្ច ធម្មានំ បុរេជាតបច្ចយេន បច្ចយោ. ឃានាយតនំ ឃានវិញ្ញាណធាតុយា តំសម្បយុត្តកានញ្ច ធម្មានំ បុរេជាតបច្ចយេន បច្ចយោ. ជិវ្ហាយតនំ ជិវ្ហាវិញ្ញាណធាតុយា តំសម្បយុត្តកានញ្ច ធម្មានំ បុរេជាតបច្ចយេន បច្ចយោ. កាយាយតនំ កាយវិញ្ញាណធាតុយា តំសម្បយុត្តកានញ្ច ធម្មានំ បុរេជាតបច្ចយេន បច្ចយោ.

រូបាយតនំ ចក្ខុវិញ្ញាណធាតុយា តំសម្បយុត្តកានញ្ច ធម្មានំ បុរេជាតបច្ចយេន បច្ចយោ. សទ្ទាយតនំ សោតវិញ្ញាណធាតុយា តំសម្បយុត្តកានញ្ច ធម្មានំ បុរេជាតបច្ចយេន បច្ចយោ. គន្ធាយតនំ ឃានវិញ្ញាណធាតុយា តំសម្បយុត្តកានញ្ច ធម្មានំ បុរេជាតបច្ចយេន បច្ចយោ. រសាយតនំ ជិវ្ហាវិញ្ញាណធាតុយា តំសម្បយុត្តកានញ្ច ធម្មានំ បុរេជាតបច្ចយេន បច្ចយោ. ផោដ្ឋព្ពាយតនំ កាយវិញ្ញាណធាតុយា តំសម្បយុត្តកានញ្ច ធម្មានំ បុរេជាតបច្ចយេន បច្ចយោ. រូបាយតនំ សទ្ទាយតនំ គន្ធាយតនំ រសាយតនំ ផោដ្ឋព្ពាយតនំ មនោធាតុយា តំសម្បយុត្តកានញ្ច ធម្មានំ បុរេជាតបច្ចយេន បច្ចយោ.

យំ រូបំ និស្សាយ មនោធាតុ ច មនោវិញ្ញាណធាតុ ច វត្តន្តិ, តំ រូបំ មនោធាតុយា តំសម្បយុត្តកានញ្ច ធម្មានំ បុរេជាតបច្ចយេន បច្ចយោ. មនោវិញ្ញាណធាតុយា តំសម្បយុត្តកានញ្ច ធម្មានំ កិញ្ចិ កាលេ បុរេជាតបច្ចយេន បច្ចយោ, កិញ្ចិ កាលេ ន បុរេជាតបច្ចយេន បច្ចយោ.

១១. បច្ឆាជាតបច្ចយោតិ – បច្ឆាជាតា ចិត្តចេតសិកា ធម្មា បុរេជាតស្ស ឥមស្ស កាយស្ស បច្ឆាជាតបច្ចយេន បច្ចយោ.

១២. អាសេវនបច្ចយោតិ – បុរិមា បុរិមា កុសលា ធម្មា បច្ឆិមានំ បច្ឆិមានំ កុសលានំ ធម្មានំ អាសេវនបច្ចយេន បច្ចយោ. បុរិមា បុរិមា អកុសលា ធម្មា បច្ឆិមានំ បច្ឆិមានំ អកុសលានំ ធម្មានំ អាសេវនបច្ចយេន បច្ចយោ. បុរិមា បុរិមា កិរិយាព្យាកតា ធម្មា បច្ឆិមានំ បច្ឆិមានំ កិរិយាព្យាកតានំ ធម្មានំ អាសេវនបច្ចយេន បច្ចយោ.

១៣. កម្មបច្ចយោតិ – កុសលាកុសលំ កម្មំ វិបាកានំ ខន្ធានំ កដត្តា ច រូបានំ កម្មបច្ចយេន បច្ចយោ. ចេតនា សម្បយុត្តកានំ ធម្មានំ តំសមុដ្ឋានានញ្ច រូបានំ កម្មបច្ចយេន បច្ចយោ.

១៤. វិបាកបច្ចយោតិ – វិបាកា ចត្តារោ ខន្ធា អរូបិនោ អញ្ញមញ្ញំ វិបាកបច្ចយេន បច្ចយោ.

១៥. អាហារបច្ចយោតិ – កពឡីការោ [កពឡិង្ការោ (ក. សី. ស្យា.)] អាហារោ ឥមស្ស កាយស្ស អាហារបច្ចយេន បច្ចយោ. អរូបិនោ អាហារា សម្បយុត្តកានំ ធម្មានំ តំសមុដ្ឋានានញ្ច រូបានំ អាហារបច្ចយេន បច្ចយោ.

១៦. ឥន្ទ្រិយបច្ចយោតិ – ចក្ខុន្ទ្រិយំ ចក្ខុវិញ្ញាណធាតុយា តំសម្បយុត្តកានញ្ច ធម្មានំ ឥន្ទ្រិយបច្ចយេន បច្ចយោ. សោតិន្ទ្រិយំ សោតវិញ្ញាណធាតុយា តំសម្បយុត្តកានញ្ច ធម្មានំ ឥន្ទ្រិយបច្ចយេន បច្ចយោ. ឃានិន្ទ្រិយំ ឃានវិញ្ញាណធាតុយា តំសម្បយុត្តកានញ្ច ធម្មានំ ឥន្ទ្រិយបច្ចយេន បច្ចយោ. ជិវ្ហិន្ទ្រិយំ ជិវ្ហាវិញ្ញាណធាតុយា តំសម្បយុត្តកានញ្ច ធម្មានំ ឥន្ទ្រិយបច្ចយេន បច្ចយោ. កាយិន្ទ្រិយំ កាយវិញ្ញាណធាតុយា តំសម្បយុត្តកានញ្ច ធម្មានំ ឥន្ទ្រិយបច្ចយេន បច្ចយោ. រូបជីវិតិន្ទ្រិយំ កដត្តារូបានំ ឥន្ទ្រិយបច្ចយេន បច្ចយោ.

អរូបិនោ ឥន្ទ្រិយា សម្បយុត្តកានំ ធម្មានំ តំសមុដ្ឋានានញ្ច រូបានំ ឥន្ទ្រិយបច្ចយេន បច្ចយោ.

១៧. ឈានបច្ចយោតិ – ឈានង្គានិ ឈានសម្បយុត្តកានំ ធម្មានំ តំសមុដ្ឋានានញ្ច រូបានំ ឈានបច្ចយេន បច្ចយោ.

១៨. មគ្គបច្ចយោតិ – មគ្គង្គានិ មគ្គសម្បយុត្តកានំ ធម្មានំ តំសមុដ្ឋានានញ្ច រូបានំ មគ្គបច្ចយេន បច្ចយោ.

១៩. សម្បយុត្តបច្ចយោតិ – ចត្តារោ ខន្ធា អរូបិនោ អញ្ញមញ្ញំ សម្បយុត្តបច្ចយេន បច្ចយោ.

២០. វិប្បយុត្តបច្ចយោតិ – រូបិនោ ធម្មា អរូបីនំ ធម្មានំ វិប្បយុត្តបច្ចយេន បច្ចយោ. អរូបិនោ ធម្មា រូបីនំ ធម្មានំ វិប្បយុត្តបច្ចយេន បច្ចយោ.

២១. អត្ថិបច្ចយោតិ – ចត្តារោ ខន្ធា អរូបិនោ អញ្ញមញ្ញំ អត្ថិបច្ចយេន បច្ចយោ. ចត្តារោ មហាភូតា អញ្ញមញ្ញំ អត្ថិបច្ចយេន បច្ចយោ. ឱក្កន្តិក្ខណេ នាមរូបំ អញ្ញមញ្ញំ អត្ថិបច្ចយេន បច្ចយោ. ចិត្តចេតសិកា ធម្មា ចិត្តសមុដ្ឋានានំ រូបានំ អត្ថិបច្ចយេន បច្ចយោ. មហាភូតា ឧបាទារូបានំ អត្ថិបច្ចយេន បច្ចយោ.

ចក្ខាយតនំ ចក្ខុវិញ្ញាណធាតុយា តំសម្បយុត្តកានញ្ច ធម្មានំ អត្ថិបច្ចយេន បច្ចយោ. សោតាយតនំ សោតវិញ្ញាណធាតុយា តំសម្បយុត្តកានញ្ច ធម្មានំ អត្ថិបច្ចយេន បច្ចយោ. ឃានាយតនំ ឃានវិញ្ញាណធាតុយា តំសម្បយុត្តកានញ្ច ធម្មានំ អត្ថិបច្ចយេន បច្ចយោ. ជិវ្ហាយតនំ ជិវ្ហាវិញ្ញាណធាតុយា តំសម្បយុត្តកានញ្ច ធម្មានំ អត្ថិបច្ចយេន បច្ចយោ. កាយាយតនំ កាយវិញ្ញាណធាតុយា តំសម្បយុត្តកានញ្ច ធម្មានំ អត្ថិបច្ចយេន បច្ចយោ.

រូបាយតនំ ចក្ខុវិញ្ញាណធាតុយា តំសម្បយុត្តកានញ្ច ធម្មានំ អត្ថិបច្ចយេន បច្ចយោ. សទ្ទាយតនំ សោតវិញ្ញាណធាតុយា តំសម្បយុត្តកានញ្ច ធម្មានំ អត្ថិបច្ចយេន បច្ចយោ. គន្ធាយតនំ ឃានវិញ្ញាណធាតុយា តំសម្បយុត្តកានញ្ច ធម្មានំ អត្ថិបច្ចយេន បច្ចយោ. រសាយតនំ ជិវ្ហាវិញ្ញាណធាតុយា តំសម្បយុត្តកានញ្ច ធម្មានំ អត្ថិបច្ចយេន បច្ចយោ. ផោដ្ឋព្ពាយតនំ កាយវិញ្ញាណធាតុយា តំសម្បយុត្តកានញ្ច ធម្មានំ អត្ថិបច្ចយេន បច្ចយោ. រូបាយតនំ សទ្ទាយតនំ គន្ធាយតនំ រសាយតនំ ផោដ្ឋព្ពាយតនំ មនោធាតុយា តំសម្បយុត្តកានញ្ច ធម្មានំ អត្ថិបច្ចយេន បច្ចយោ.

យំ រូបំ និស្សាយ មនោធាតុ ច មនោវិញ្ញាណធាតុ ច វត្តន្តិ, តំ រូបំ មនោធាតុយា ច មនោវិញ្ញាណធាតុយា ច តំសម្បយុត្តកានញ្ច ធម្មានំ អត្ថិបច្ចយេន បច្ចយោ.

២២. នត្ថិបច្ចយោតិ – សមនន្តរនិរុទ្ធា ចិត្តចេតសិកា ធម្មា បដុប្បន្នានំ ចិត្តចេតសិកានំ ធម្មានំ នត្ថិបច្ចយេន បច្ចយោ.

២៣. វិគតបច្ចយោតិ – សមនន្តរវិគតា ចិត្តចេតសិកា ធម្មា បដុប្បន្នានំ ចិត្តចេតសិកានំ ធម្មានំ វិគតបច្ចយេន បច្ចយោ.

២៤. អវិគតបច្ចយោតិ – ចត្តារោ ខន្ធា អរូបិនោ អញ្ញមញ្ញំ អវិគតបច្ចយេន បច្ចយោ. ចត្តារោ មហាភូតា អញ្ញមញ្ញំ អវិគតបច្ចយេន បច្ចយោ. ឱក្កន្តិក្ខណេ នាមរូបំ អញ្ញមញ្ញំ អវិគតបច្ចយេន បច្ចយោ. ចិត្តចេតសិកា ធម្មា ចិត្តសមុដ្ឋានានំ រូបានំ អវិគតបច្ចយេន បច្ចយោ. មហាភូតា ឧបាទារូបានំ អវិគតបច្ចយេន បច្ចយោ.

ចក្ខាយតនំ ចក្ខុវិញ្ញាណធាតុយា តំសម្បយុត្តកានញ្ច ធម្មានំ អវិគតបច្ចយេន បច្ចយោ. សោតាយតនំ សោតវិញ្ញាណធាតុយា តំសម្បយុត្តកានញ្ច ធម្មានំ អវិគតបច្ចយេន បច្ចយោ. ឃានាយតនំ ឃានវិញ្ញាណធាតុយា តំសម្បយុត្តកានញ្ច ធម្មានំ អវិគតបច្ចយេន បច្ចយោ. ជិវ្ហាយតនំ ជិវ្ហាវិញ្ញាណធាតុយា តំសម្បយុត្តកានញ្ច ធម្មានំ អវិគតបច្ចយេន បច្ចយោ. កាយាយតនំ កាយវិញ្ញាណធាតុយា តំសម្បយុត្តកានញ្ច ធម្មានំ អវិគតបច្ចយេន បច្ចយោ.

រូបាយតនំ ចក្ខុវិញ្ញាណធាតុយា តំសម្បយុត្តកានញ្ច ធម្មានំ អវិគតបច្ចយេន បច្ចយោ. សទ្ទាយតនំ សោតវិញ្ញាណធាតុយា តំសម្បយុត្តកានញ្ច ធម្មានំ អវិគតបច្ចយេន បច្ចយោ. គន្ធាយតនំ ឃានវិញ្ញាណធាតុយា តំសម្បយុត្តកានញ្ច ធម្មានំ អវិគតបច្ចយេន បច្ចយោ. រសាយតនំ ជិវ្ហាវិញ្ញាណធាតុយា តំសម្បយុត្តកានញ្ច ធម្មានំ អវិគតបច្ចយេន បច្ចយោ. ផោដ្ឋព្ពាយតនំ កាយវិញ្ញាណធាតុយា តំសម្បយុត្តកានញ្ច ធម្មានំ អវិគតបច្ចយេន បច្ចយោ. រូបាយតនំ សទ្ទាយតនំ គន្ធាយតនំ រសាយតនំ ផោដ្ឋព្ពាយតនំ មនោធាតុយា តំសម្បយុត្តកានញ្ច ធម្មានំ អវិគតបច្ចយេន បច្ចយោ.

យំ រូបំ និស្សាយ មនោធាតុ ច មនោវិញ្ញាណធាតុ ច វត្តន្តិ, តំ រូបំ មនោធាតុយា ច មនោវិញ្ញាណធាតុយា ច តំសម្បយុត្តកានញ្ច ធម្មានំ អវិគតបច្ចយេន បច្ចយោ.

បច្ចយនិទ្ទេសោ.

៣. បុច្ឆាវារោ

១. បច្ចយានុលោមំ

ឯកមូលកំ

(១.) កុសលបទំ

២៥. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា. សិយា កុសលំ ធម្មំ បដិច្ច អកុសលោ ធម្មោ ឧប្បជ្ជេយ្យ ហេតុបច្ចយា. សិយា កុសលំ ធម្មំ បដិច្ច អព្យាកតោ ធម្មោ ឧប្បជ្ជេយ្យ ហេតុបច្ចយា. សិយា កុសលំ ធម្មំ បដិច្ច កុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា កុសលំ ធម្មំ បដិច្ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា កុសលំ ធម្មំ បដិច្ច កុសលោ ច អកុសលោ ច ធម្មា ឧប្បជ្ជេយ្យុំ ហេតុបច្ចយា. សិយា កុសលំ ធម្មំ បដិច្ច កុសលោ ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា.

(២) អកុសលបទំ

២៦. សិយា អកុសលំ ធម្មំ បដិច្ច អកុសលោ ធម្មោ ឧប្បជ្ជេយ្យ ហេតុបច្ចយា. សិយា អកុសលំ ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា. សិយា អកុសលំ ធម្មំ បដិច្ច អព្យាកតោ ធម្មោ ឧប្បជ្ជេយ្យ ហេតុបច្ចយា. សិយា អកុសលំ ធម្មំ បដិច្ច កុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា អកុសលំ ធម្មំ បដិច្ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា អកុសលំ ធម្មំ បដិច្ច កុសលោ ច អកុសលោ ច ធម្មា ឧប្បជ្ជេយ្យុំ ហេតុបច្ចយា. សិយា អកុសលំ ធម្មំ បដិច្ច កុសលោ ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា.

(៣) អព្យាកតបទំ

២៧. សិយា អព្យាកតំ ធម្មំ បដិច្ច អព្យាកតោ ធម្មោ ឧប្បជ្ជេយ្យ ហេតុបច្ចយា. សិយា អព្យាកតំ ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា. សិយា អព្យាកតំ ធម្មំ បដិច្ច អកុសលោ ធម្មោ ឧប្បជ្ជេយ្យ ហេតុបច្ចយា. សិយា អព្យាកតំ ធម្មំ បដិច្ច កុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា អព្យាកតំ ធម្មំ បដិច្ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា អព្យាកតំ ធម្មំ បដិច្ច កុសលោ ច អកុសលោ ច ធម្មា ឧប្បជ្ជេយ្យុំ ហេតុបច្ចយា. សិយា អព្យាកតំ ធម្មំ បដិច្ច កុសលោ ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា.

(៤) កុសលាព្យាកតបទំ

២៨. សិយា កុសលញ្ច អព្យាកតញ្ច ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា. សិយា កុសលញ្ច អព្យាកតញ្ច ធម្មំ បដិច្ច អកុសលោ ធម្មោ ឧប្បជ្ជេយ្យ ហេតុបច្ចយា. សិយា កុសលញ្ច អព្យាកតញ្ច ធម្មំ បដិច្ច អព្យាកតោ ធម្មោ ឧប្បជ្ជេយ្យ ហេតុបច្ចយា. សិយា កុសលញ្ច អព្យាកតញ្ច ធម្មំ បដិច្ច កុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា កុសលញ្ច អព្យាកតញ្ច ធម្មំ បដិច្ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា កុសលញ្ច អព្យាកតញ្ច ធម្មំ បដិច្ច កុសលោ ច អកុសលោ ច ធម្មា ឧប្បជ្ជេយ្យុំ ហេតុបច្ចយា. សិយា កុសលញ្ច អព្យាកតញ្ច ធម្មំ បដិច្ច កុសលោ ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា.

(៥) អកុសលាព្យាកតបទំ

២៩. សិយា អកុសលញ្ច អព្យាកតញ្ច ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា. សិយា អកុសលញ្ច អព្យាកតញ្ច ធម្មំ បដិច្ច អកុសលោ ធម្មោ ឧប្បជ្ជេយ្យ ហេតុបច្ចយា. សិយា អកុសលញ្ច អព្យាកតញ្ច ធម្មំ បដិច្ច អព្យាកតោ ធម្មោ ឧប្បជ្ជេយ្យ ហេតុបច្ចយា. សិយា អកុសលញ្ច អព្យាកតញ្ច ធម្មំ បដិច្ច កុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា អកុសលញ្ច អព្យាកតញ្ច ធម្មំ បដិច្ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា អកុសលញ្ច អព្យាកតញ្ច ធម្មំ បដិច្ច កុសលោ ច អកុសលោ ច ធម្មា ឧប្បជ្ជេយ្យុំ ហេតុបច្ចយា. សិយា អកុសលញ្ច អព្យាកតញ្ច ធម្មំ បដិច្ច កុសលោ ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា.

(៦) កុសលាកុសលបទំ

៣០. សិយា កុសលញ្ច អកុសលញ្ច ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា. សិយា កុសលញ្ច អកុសលញ្ច ធម្មំ បដិច្ច អកុសលោ ធម្មោ ឧប្បជ្ជេយ្យ ហេតុបច្ចយា. សិយា កុសលញ្ច អកុសលញ្ច ធម្មំ បដិច្ច អព្យាកតោ ធម្មោ ឧប្បជ្ជេយ្យ ហេតុបច្ចយា. សិយា កុសលញ្ច អកុសលញ្ច ធម្មំ បដិច្ច កុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា កុសលញ្ច អកុសលញ្ច ធម្មំ បដិច្ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា កុសលញ្ច អកុសលញ្ច ធម្មំ បដិច្ច កុសលោ ច អកុសលោ ច ធម្មា ឧប្បជ្ជេយ្យុំ ហេតុបច្ចយា. សិយា កុសលញ្ច អកុសលញ្ច ធម្មំ បដិច្ច កុសលោ ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា.

(៧) កុសលាកុសលាព្យាកតបទំ

៣១. សិយា កុសលញ្ច អកុសលញ្ច អព្យាកតញ្ច ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា. សិយា កុសលញ្ច អកុសលញ្ច អព្យាកតញ្ច ធម្មំ បដិច្ច អកុសលោ ធម្មោ ឧប្បជ្ជេយ្យ ហេតុបច្ចយា. សិយា កុសលញ្ច អកុសលញ្ច អព្យាកតញ្ច ធម្មំ បដិច្ច អព្យាកតោ ធម្មោ ឧប្បជ្ជេយ្យ ហេតុបច្ចយា. សិយា កុសលញ្ច អកុសលញ្ច អព្យាកតញ្ច ធម្មំ បដិច្ច កុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា កុសលញ្ច អកុសលញ្ច អព្យាកតញ្ច ធម្មំ បដិច្ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា. សិយា កុសលញ្ច អកុសលញ្ច អព្យាកតញ្ច ធម្មំ បដិច្ច កុសលោ ច អកុសលោ ច ធម្មា ឧប្បជ្ជេយ្យុំ ហេតុបច្ចយា. សិយា កុសលញ្ច អកុសលញ្ច អព្យាកតញ្ច ធម្មំ បដិច្ច កុសលោ ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា.

ហេតុបច្ចយវារោ.

៣២. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ អារម្មណបច្ចយា.

(យថា ហេតុបច្ចយោ វិត្ថារិតោ, ឯវំ អារម្មណបច្ចយោបិ វិត្ថារេតព្ពោ វាចនាមគ្គេន.)

៣៣. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ អធិបតិបច្ចយា… អនន្តរបច្ចយា… សមនន្តរបច្ចយា… សហជាតបច្ចយា… អញ្ញមញ្ញបច្ចយា… និស្សយបច្ចយា… ឧបនិស្សយបច្ចយា… បុរេជាតបច្ចយា… បច្ឆាជាតបច្ចយា… អាសេវនបច្ចយា… កម្មបច្ចយា… វិបាកបច្ចយា… អាហារបច្ចយា… ឥន្ទ្រិយបច្ចយា… ឈានបច្ចយា… មគ្គបច្ចយា… សម្បយុត្តបច្ចយា… វិប្បយុត្តបច្ចយា… អត្ថិបច្ចយា… នត្ថិបច្ចយា… វិគតបច្ចយា.

៣៤. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ អវិគតបច្ចយា…បេ… អកុសលំ ធម្មំ បដិច្ច… អព្យាកតំ ធម្មំ បដិច្ច… កុសលញ្ច អព្យាកតញ្ច ធម្មំ បដិច្ច… អកុសលញ្ច អព្យាកតញ្ច ធម្មំ បដិច្ច… កុសលញ្ច អកុសលញ្ច ធម្មំ បដិច្ច… កុសលញ្ច អកុសលញ្ច អព្យាកតញ្ច ធម្មំ បដិច្ច កុសលោ ធម្មោ ឧប្បជ្ជេយ្យ… អកុសលោ ធម្មោ ឧប្បជ្ជេយ្យ… អព្យាកតោ ធម្មោ ឧប្បជ្ជេយ្យ… កុសលោ ច អព្យាកតោ ច ធម្មា ឧប្បជ្ជេយ្យុំ… អកុសលោ ច អព្យាកតោ ច ធម្មា ឧប្បជ្ជេយ្យុំ… កុសលោ ច អកុសលោ ច ធម្មា ឧប្បជ្ជេយ្យុំ… កុសលោ ច អកុសលោ ច អព្យាកតោ ច ធម្មា ឧប្បជ្ជេយ្យុំ អវិគតបច្ចយា.

(យថា ហេតុបច្ចយោ វិត្ថារិតោ, ឯវំ អវិគតបច្ចយោបិ វិត្ថារេតព្ពោ វាចនាមគ្គេន.)

ឯកមូលកំ.

ទុមូលកាទិ

ហេតុមូលកំ

៣៥. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា អារម្មណបច្ចយា…បេ… សិយា កុសលញ្ច អកុសលញ្ច អព្យាកតញ្ច ធម្មំ បដិច្ច កុសលោ ច អកុសលោ ច អព្យាកតោ ច ធម្មា ឧប្បជ្ជេយ្យុំ ហេតុបច្ចយា អារម្មណបច្ចយា.

៣៦. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា អធិបតិបច្ចយា …បេ… ហេតុបច្ចយា អនន្តរបច្ចយា… ហេតុបច្ចយា សមនន្តរបច្ចយា…បេ… ហេតុបច្ចយា អវិគតបច្ចយា.

ទុមូលកំ.

៣៧. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា អារម្មណបច្ចយា អធិបតិបច្ចយា…បេ… ហេតុបច្ចយា អារម្មណបច្ចយា អនន្តរបច្ចយា…បេ… ហេតុបច្ចយា អារម្មណបច្ចយា អវិគតបច្ចយា.

តិមូលកំ.

៣៨. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា អារម្មណបច្ចយា អធិបតិបច្ចយា អនន្តរបច្ចយា…បេ… ហេតុបច្ចយា អារម្មណបច្ចយា អធិបតិបច្ចយា អវិគតបច្ចយា.

ចតុមូលកំ.

(បញ្ចមូលកាទិកា សំខិត្តា. ឯកមូលកំ, ទុមូលកំ, តិមូលកំ, ចតុមូលកំ, បញ្ចមូលកំ, សព្ពមូលកំ អសម្មុយ្ហន្តេន វិត្ថារេតព្ពំ.)

ហេតុមូលកំ.

អារម្មណមូលកាទិ

៣៩. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ អារម្មណបច្ចយា ហេតុបច្ចយា… អារម្មណបច្ចយា អធិបតិបច្ចយា…បេ… អារម្មណបច្ចយា អវិគតបច្ចយា.

សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ អធិបតិបច្ចយា… អនន្តរបច្ចយា… សមនន្តរបច្ចយា… សហជាតបច្ចយា… អញ្ញមញ្ញបច្ចយា…បេ… អវិគតបច្ចយា ហេតុបច្ចយា… អវិគតបច្ចយា អារម្មណបច្ចយា… អវិគតបច្ចយា អធិបតិបច្ចយា…បេ… អវិគតបច្ចយា វិគតបច្ចយា.

ទុមូលកំ.

៤០. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ អវិគតបច្ចយា ហេតុបច្ចយា អារម្មណបច្ចយា… អវិគតបច្ចយា ហេតុបច្ចយា អធិបតិបច្ចយា… អវិគតបច្ចយា ហេតុបច្ចយា អនន្តរបច្ចយា…បេ… អវិគតបច្ចយា ហេតុបច្ចយា វិគតបច្ចយា.

៤១. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ អវិគតបច្ចយា ហេតុបច្ចយា អារម្មណបច្ចយា អធិបតិបច្ចយា… អវិគតបច្ចយា ហេតុបច្ចយា អារម្មណបច្ចយា អនន្តរបច្ចយា…បេ… វិគតបច្ចយា.

(ឯកេកស្ស បទស្ស ឯកមូលកំ, ទុមូលកំ, តិមូលកំ, ចតុមូលកំ, បញ្ចមូលកំ, សព្ពមូលកំ អសម្មុយ្ហន្តេន វិត្ថារេតព្ពំ. )

(ក) តិកញ្ច បដ្ឋានវរំ ទុកុត្តមំ,

ទុកំ តិកញ្ចេវ តិកំ ទុកញ្ច;

តិកំ តិកញ្ចេវ ទុកំ ទុកញ្ច,

ឆ អនុលោមម្ហិ នយា សុគម្ភីរាតិ.

២. បច្ចយបច្ចនីយំ

៤២. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ នហេតុបច្ចយា.

(យថា អនុលោមេ ហេតុបច្ចយោ វិត្ថារិតោ, ឯវំ បច្ចនីយេបិ នហេតុបច្ចយោ វិត្ថារេតព្ពោ.)

៤៣. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ នអារម្មណបច្ចយា… នអធិបតិបច្ចយា… នអនន្តរបច្ចយា… នសមនន្តរបច្ចយា… នសហជាតបច្ចយា… នអញ្ញមញ្ញបច្ចយា… ននិស្សយបច្ចយា… នឧបនិស្សយបច្ចយា… នបុរេជាតបច្ចយា… នបច្ឆាជាតបច្ចយា … នអាសេវនបច្ចយា… នកម្មបច្ចយា… នវិបាកបច្ចយា… នអាហារបច្ចយា… នឥន្ទ្រិយបច្ចយា… នឈានបច្ចយា… នមគ្គបច្ចយា… នសម្បយុត្តបច្ចយា… នវិប្បយុត្តបច្ចយា… នោអត្ថិបច្ចយា… នោនត្ថិបច្ចយា… នោវិគតបច្ចយា… នោអវិគតបច្ចយា.

៤៤. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ នហេតុបច្ចយា នអារម្មណបច្ចយា….

(យថា អនុលោមេ ឯកេកស្ស បទស្ស ឯកមូលកំ, ទុមូលកំ, តិមូលកំ, ចតុមូលកំ, យាវ តេវីសតិមូលកំ ឯវំ បច្ចនីយេបិ វិត្ថារេតព្ពំ. )

(ខ) តិកញ្ច បដ្ឋានវរំ ទុកុត្តមំ,

ទុកំ តិកញ្ចេវ តិកំ ទុកញ្ច;

តិកំ តិកញ្ចេវ ទុកំ ទុកញ្ច,

ឆ បច្ចនីយម្ហិ នយា សុគម្ភីរាតិ.

៣. បច្ចយានុលោមបច្ចនីយំ

៤៥. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា នអារម្មណបច្ចយា… សិយា កុសលំ ធម្មំ បដិច្ច អកុសលោ ធម្មោ ឧប្បជ្ជេយ្យ ហេតុបច្ចយា នអារម្មណបច្ចយា.

(យថា អនុលោមេ ហេតុបច្ចយោ វិត្ថារិតោ, ឯវំ អនុលោមបច្ចនីយេបិ បទំ វិត្ថារេតព្ពំ.)

៤៦. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា នអធិបតិបច្ចយា… ហេតុបច្ចយា នអនន្តរបច្ចយា…បេ… ហេតុបច្ចយា នោអវិគតបច្ចយា.

៤៧. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ ហេតុបច្ចយា អារម្មណបច្ចយា នអធិបតិបច្ចយា… ហេតុបច្ចយា អារម្មណបច្ចយា នអនន្តរបច្ចយា…បេ… ហេតុបច្ចយា អារម្មណបច្ចយា នោអវិគតបច្ចយា.

ហេតុបច្ចយា អារម្មណបច្ចយា អធិបតិបច្ចយា នអនន្តរបច្ចយា…បេ… ហេតុបច្ចយា អារម្មណបច្ចយា អធិបតិបច្ចយា នោអវិគតបច្ចយា.

ហេតុបច្ចយា អារម្មណបច្ចយា អធិបតិបច្ចយា អនន្តរបច្ចយា នសមនន្តរបច្ចយា…បេ… ហេតុបច្ចយា អារម្មណបច្ចយា អធិបតិបច្ចយា អនន្តរបច្ចយា នោអវិគតបច្ចយា…បេ….

ហេតុបច្ចយា អារម្មណបច្ចយា អធិបតិបច្ចយា អនន្តរបច្ចយា សមនន្តរបច្ចយា សហជាតបច្ចយា អញ្ញមញ្ញបច្ចយា និស្សយបច្ចយា ឧបនិស្សយបច្ចយា បុរេជាតបច្ចយា បច្ឆាជាតបច្ចយា អាសេវនបច្ចយា កម្មបច្ចយា វិបាកបច្ចយា អាហារបច្ចយា ឥន្ទ្រិយបច្ចយា ឈានបច្ចយា មគ្គបច្ចយា សម្បយុត្តបច្ចយា វិប្បយុត្តបច្ចយា អត្ថិបច្ចយា នត្ថិបច្ចយា វិគតបច្ចយា នោអវិគតបច្ចយា.

៤៨. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ អារម្មណបច្ចយា… អធិបតិបច្ចយា… អនន្តរបច្ចយា…បេ… អវិគតបច្ចយា នហេតុបច្ចយា … អវិគតបច្ចយា នអារម្មណបច្ចយា…បេ… អវិគតបច្ចយា នោវិគតបច្ចយា.

អវិគតបច្ចយា ហេតុបច្ចយា នអារម្មណបច្ចយា…បេ… អវិគតបច្ចយា ហេតុបច្ចយា នោវិគតបច្ចយា.

អវិគតបច្ចយា ហេតុបច្ចយា អារម្មណបច្ចយា នអធិបតិបច្ចយា…បេ… អវិគតបច្ចយា ហេតុបច្ចយា អារម្មណបច្ចយា នោវិគតបច្ចយា.

អវិគតបច្ចយា ហេតុបច្ចយា អារម្មណបច្ចយា អធិបតិបច្ចយា អនន្តរបច្ចយា សមនន្តរបច្ចយា សហជាតបច្ចយា…បេ… នោវិគតបច្ចយា.

(គ) តិកញ្ច បដ្ឋានវរំ ទុកុត្តមំ,

ទុកំ តិកញ្ចេវ តិកំ ទុកញ្ច;

តិកំ តិកញ្ចេវ ទុកំ ទុកញ្ច,

ឆ អនុលោមបច្ចនីយម្ហិ នយា សុគម្ភីរាតិ.

៤. បច្ចយបច្ចនីយានុលោមំ

៤៩. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ នហេតុបច្ចយា អារម្មណបច្ចយា. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ នហេតុបច្ចយា អធិបតិបច្ចយា…បេ… នហេតុបច្ចយា អវិគតបច្ចយា.

៥០. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ នហេតុបច្ចយា នអារម្មណបច្ចយា អធិបតិបច្ចយា…បេ… អវិគតបច្ចយា.

នហេតុបច្ចយា នអារម្មណបច្ចយា នអធិបតិបច្ចយា…បេ… អវិគតបច្ចយា.

នហេតុបច្ចយា នអារម្មណបច្ចយា នអធិបតិបច្ចយា នអនន្តរបច្ចយា នសមនន្តរបច្ចយា…បេ… នោអត្ថិបច្ចយា នោនត្ថិបច្ចយា នោវិគតបច្ចយា អវិគតបច្ចយា.

៥១. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ នអារម្មណបច្ចយា ហេតុបច្ចយា.

៥២. សិយា កុសលំ ធម្មំ បដិច្ច កុសលោ ធម្មោ ឧប្បជ្ជេយ្យ នអារម្មណបច្ចយា អធិបតិបច្ចយា…បេ… នអារម្មណបច្ចយា អវិគតបច្ចយា…បេ… នោអវិគតបច្ចយា ហេតុបច្ចយា… នោអវិគតបច្ចយា អារម្មណបច្ចយា…បេ… នោអវិគតបច្ចយា វិគតបច្ចយា.

នោអវិគតបច្ចយា នហេតុបច្ចយា អារម្មណបច្ចយា…បេ… នោអវិគតបច្ចយា នហេតុបច្ចយា វិគតបច្ចយា.

នោអវិគតបច្ចយា នហេតុបច្ចយា នអារម្មណបច្ចយា នអធិបតិបច្ចយា…បេ… នោអត្ថិបច្ចយា នោនត្ថិបច្ចយា វិគតបច្ចយា.

(ឃ) តិកញ្ច បដ្ឋានវរំ ទុកុត្តមំ,

ទុកំ តិកញ្ចេវ តិកំ ទុកញ្ច;

តិកំ តិកញ្ចេវ ទុកំ ទុកញ្ច,

ឆ បច្ចនីយានុលោមម្ហិ នយា សុគម្ភីរាតិ.