១. វិភង្គវារោ

នហេតុបច្ចយោ

៧៥. វិបាកំ ធម្មំ បច្ចយា វិបាកោ ធម្មោ ឧប្បជ្ជតិ នហេតុបច្ចយា – អហេតុកំ វិបាកំ ឯកំ ខន្ធំ បច្ចយា… តីណិ.

វិបាកធម្មធម្មំ បច្ចយា វិបាកធម្មធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ បច្ចយា វិចិកិច្ឆាសហគតោ ឧទ្ធច្ចសហគតោ មោហោ.

នេវវិបាកនវិបាកធម្មធម្មំ បច្ចយា នេវវិបាកនវិបាកធម្មធម្មោ ឧប្បជ្ជតិ នហេតុបច្ចយា – អហេតុកំ នេវវិបាកនវិបាកធម្មធម្មំ ឯកំ ខន្ធំ បច្ចយា…បេ…. (១)

នេវវិបាកនវិបាកធម្មធម្មំ បច្ចយា វិបាកោ ធម្មោ ឧប្បជ្ជតិ នហេតុបច្ចយា – ចក្ខាយតនំ បច្ចយា ចក្ខុវិញ្ញាណំ…បេ…. (២)

នេវវិបាកនវិបាកធម្មធម្មំ បច្ចយា វិបាកធម្មធម្មោ ឧប្បជ្ជតិ នហេតុបច្ចយា – វត្ថុំ បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (៣)

នេវវិបាកនវិបាកធម្មធម្មំ បច្ចយា វិបាកោ ច នេវវិបាកនវិបាកធម្មធម្មោ ច ធម្មា ឧប្បជ្ជន្តិ នហេតុបច្ចយា – វត្ថុំ បច្ចយា អហេតុកា វិបាកា ខន្ធា, មហាភូតេ បច្ចយា ចិត្តសមុដ្ឋានំ រូបំ, អហេតុកបដិសន្ធិក្ខណេ…បេ… (៤)

៧៦. វិបាកញ្ច នេវវិបាកនវិបាកធម្មធម្មញ្ច ធម្មំ បច្ចយា វិបាកោ ធម្មោ ឧប្បជ្ជតិ…បេ… នេវវិបាកនវិបាកធម្មធម្មោ ឧប្បជ្ជតិ…បេ… វិបាកោ ច នេវវិបាកនវិបាកធម្មធម្មោ ច ធម្មា ឧប្បជ្ជន្តិ នហេតុបច្ចយា…បេ… តីណិ.

វិបាកធម្មធម្មញ្ច នេវវិបាកនវិបាកធម្មធម្មញ្ច ធម្មំ បច្ចយា វិបាកធម្មធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ ច វត្ថុញ្ច បច្ចយា វិចិកិច្ឆាសហគតោ ឧទ្ធច្ចសហគតោ មោហោ. (១)

នអារម្មណបច្ចយោ

៧៧. វិបាកំ ធម្មំ បច្ចយា នេវវិបាកនវិបាកធម្មធម្មោ ឧប្បជ្ជតិ នអារម្មណបច្ចយា (សំខិត្តំ. សព្ពានិ បទានិ វិត្ថារេតព្ពានិ.)