១. វិភង្គវារោ

ហេតុបច្ចយោ

៣៨. សុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស ហេតុបច្ចយេន បច្ចយោ – សុខាយ វេទនាយ សម្បយុត្តា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ; បដិសន្ធិក្ខណេ សុខាយ វេទនាយ សម្បយុត្តា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (១)

ទុក្ខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស ហេតុបច្ចយេន បច្ចយោ – ទុក្ខាយ វេទនាយ សម្បយុត្តា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (១)

អទុក្ខមសុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស ហេតុបច្ចយេន បច្ចយោ – អទុក្ខមសុខាយ វេទនាយ សម្បយុត្តា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ; បដិសន្ធិក្ខណេ អទុក្ខមសុខាយ វេទនាយ សម្បយុត្តា ហេតូ សម្បយុត្តកានំ ខន្ធានំ ហេតុបច្ចយេន បច្ចយោ. (១)

អារម្មណបច្ចយោ

៣៩. សុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស អារម្មណបច្ចយេន បច្ចយោ – សុខាយ វេទនាយ សម្បយុត្តេន ចិត្តេន ទានំ ទត្វា, សីលំ សមាទិយិត្វា, ឧបោសថកម្មំ កត្វា សុខាយ វេទនាយ សម្បយុត្តេន ចិត្តេន បច្ចវេក្ខតិ. សុខាយ វេទនាយ សម្បយុត្តា ឈានា វុដ្ឋហិត្វា, មគ្គា វុដ្ឋហិត្វា, ផលា វុដ្ឋហិត្វា សុខាយ វេទនាយ សម្បយុត្តេន ចិត្តេន បច្ចវេក្ខតិ. អរិយា សុខាយ វេទនាយ សម្បយុត្តេន ចិត្តេន សុខាយ វេទនាយ សម្បយុត្តេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. សុខាយ វេទនាយ សម្បយុត្តេ ខន្ធេ សុខាយ វេទនាយ សម្បយុត្តេន ចិត្តេន អនិច្ចតោ ទុក្ខតោ អនត្តតោ វិបស្សតិ, អស្សាទេតិ អភិនន្ទតិ; តំ អារព្ភ សុខាយ វេទនាយ សម្បយុត្តោ រាគោ ឧប្បជ្ជតិ, ទិដ្ឋិ ឧប្បជ្ជតិ; សុខាយ វេទនាយ សម្បយុត្តេ ខន្ធេ អារព្ភ សុខាយ វេទនាយ សម្បយុត្តា ខន្ធា ឧប្បជ្ជន្តិ. (១)

សុខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស អារម្មណបច្ចយេន បច្ចយោ – សុខាយ វេទនាយ សម្បយុត្តេន ចិត្តេន ទានំ ទត្វា, សីលំ សមាទិយិត្វា, ឧបោសថកម្មំ កត្វា វិប្បដិសារិស្ស ទោមនស្សំ ឧប្បជ្ជតិ. សុខាយ វេទនាយ សម្បយុត្តេ ឈានេ បរិហីនេ វិប្បដិសារិស្ស ទោមនស្សំ ឧប្បជ្ជតិ. សុខាយ វេទនាយ សម្បយុត្តេ ខន្ធេ អារព្ភ ទុក្ខាយ វេទនាយ សម្បយុត្តា ខន្ធា ឧប្បជ្ជន្តិ. (២)

សុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស អារម្មណបច្ចយេន បច្ចយោ – សុខាយ វេទនាយ សម្បយុត្តេន ចិត្តេន ទានំ ទត្វា, សីលំ សមាទិយិត្វា, ឧបោសថកម្មំ កត្វា អទុក្ខមសុខាយ វេទនាយ សម្បយុត្តេន ចិត្តេន បច្ចវេក្ខតិ. សុខាយ វេទនាយ សម្បយុត្តា ឈានា វុដ្ឋហិត្វា, មគ្គា វុដ្ឋហិត្វា, ផលា វុដ្ឋហិត្វា អទុក្ខមសុខាយ វេទនាយ សម្បយុត្តេន ចិត្តេន បច្ចវេក្ខតិ. អរិយា អទុក្ខមសុខាយ វេទនាយ សម្បយុត្តេន ចិត្តេន សុខាយ វេទនាយ សម្បយុត្តេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. សុខាយ វេទនាយ សម្បយុត្តេ ខន្ធេ អទុក្ខមសុខាយ វេទនាយ សម្បយុត្តេន ចិត្តេន អនិច្ចតោ ទុក្ខតោ អនត្តតោ វិបស្សតិ, អស្សាទេតិ អភិនន្ទតិ; តំ អារព្ភ អទុក្ខមសុខាយ វេទនាយ សម្បយុត្តោ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ, ចេតោបរិយញាណេន សុខាយ វេទនាយ សម្បយុត្តចិត្តសមង្គិស្ស ចិត្តំ ជានាតិ. សុខាយ វេទនាយ សម្បយុត្តា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ. សុខាយ វេទនាយ សម្បយុត្តេ ខន្ធេ អារព្ភ អទុក្ខមសុខាយ វេទនាយ សម្បយុត្តា ខន្ធា ឧប្បជ្ជន្តិ. (៣)

៤០. ទុក្ខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស អារម្មណបច្ចយេន បច្ចយោ – ទោសំ អារព្ភ ទោសោ ឧប្បជ្ជតិ, មោហោ ឧប្បជ្ជតិ; ទុក្ខាយ វេទនាយ សម្បយុត្តំ មោហំ អារព្ភ មោហោ ឧប្បជ្ជតិ, ទោសោ ឧប្បជ្ជតិ; ទុក្ខសហគតំ កាយវិញ្ញាណំ អារព្ភ ទោសោ ឧប្បជ្ជតិ, មោហោ ឧប្បជ្ជតិ; ទុក្ខាយ វេទនាយ សម្បយុត្តេ ខន្ធេ អារព្ភ ទុក្ខាយ វេទនាយ សម្បយុត្តា ខន្ធា ឧប្បជ្ជន្តិ. (១)

ទុក្ខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស អារម្មណបច្ចយេន បច្ចយោ – អរិយា សុខាយ វេទនាយ សម្បយុត្តេន ចិត្តេន ទុក្ខាយ វេទនាយ សម្បយុត្តេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. ទុក្ខាយ វេទនាយ សម្បយុត្តេ ខន្ធេ សុខាយ វេទនាយ សម្បយុត្តេន ចិត្តេន អនិច្ចតោ ទុក្ខតោ អនត្តតោ វិបស្សតិ; ទុក្ខាយ វេទនាយ សម្បយុត្តេ ខន្ធេ អារព្ភ សុខាយ វេទនាយ សម្បយុត្តា ខន្ធា ឧប្បជ្ជន្តិ. (២)

ទុក្ខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស អារម្មណបច្ចយេន បច្ចយោ – អរិយា អទុក្ខមសុខាយ វេទនាយ សម្បយុត្តេន ចិត្តេន ទុក្ខាយ វេទនាយ សម្បយុត្តេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. ទុក្ខាយ វេទនាយ សម្បយុត្តេ ខន្ធេ អទុក្ខមសុខាយ វេទនាយ សម្បយុត្តេន ចិត្តេន អនិច្ចតោ ទុក្ខតោ អនត្តតោ វិបស្សតិ; ចេតោបរិយញាណេន ទុក្ខាយ វេទនាយ សម្បយុត្តចិត្តសមង្គិស្ស ចិត្តំ ជានន្តិ. ទុក្ខាយ វេទនាយ សម្បយុត្តា ខន្ធា ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស, អាវជ្ជនាយ អារម្មណបច្ចយេន បច្ចយោ – ទុក្ខាយ វេទនាយ សម្បយុត្តេ ខន្ធេ អារព្ភ អទុក្ខមសុខាយ វេទនាយ សម្បយុត្តា ខន្ធា ឧប្បជ្ជន្តិ. (៣)

៤១. អទុក្ខមសុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស អារម្មណបច្ចយេន បច្ចយោ – អទុក្ខមសុខាយ វេទនាយ សម្បយុត្តេន ចិត្តេន ទានំ ទត្វា, សីលំ សមាទិយិត្វា, ឧបោសថកម្មំ កត្វា អទុក្ខមសុខាយ វេទនាយ សម្បយុត្តេន ចិត្តេន បច្ចវេក្ខតិ. អទុក្ខមសុខាយ វេទនាយ សម្បយុត្តា ឈានា វុដ្ឋហិត្វា, មគ្គា វុដ្ឋហិត្វា, ផលា វុដ្ឋហិត្វា អទុក្ខមសុខាយ វេទនាយ សម្បយុត្តេន ចិត្តេន បច្ចវេក្ខតិ; អរិយា អទុក្ខមសុខាយ វេទនាយ សម្បយុត្តេន ចិត្តេន អទុក្ខមសុខាយ វេទនាយ សម្បយុត្តេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. អទុក្ខមសុខាយ វេទនាយ សម្បយុត្តេ ខន្ធេ អទុក្ខមសុខាយ វេទនាយ សម្បយុត្តេន ចិត្តេន អនិច្ចតោ ទុក្ខតោ អនត្តតោ វិបស្សតិ, អស្សាទេតិ អភិនន្ទតិ; តំ អារព្ភ អទុក្ខមសុខាយ វេទនាយ សម្បយុត្តោ រាគោ ឧប្បជ្ជតិ, ទិដ្ឋិ ឧប្បជ្ជតិ, វិចិកិច្ឆា ឧប្បជ្ជតិ, ឧទ្ធច្ចំ ឧប្បជ្ជតិ; ចេតោបរិយញាណេន អទុក្ខមសុខាយ វេទនាយ សម្បយុត្តចិត្តសមង្គិស្ស ចិត្តំ ជានន្តិ. អាកាសានញ្ចាយតនំ វិញ្ញាណញ្ចាយតនស្ស អារម្មណបច្ចយេន បច្ចយោ. អាកិញ្ចញ្ញាយតនំ នេវសញ្ញានាសញ្ញាយតនស្ស អារម្មណបច្ចយេន បច្ចយោ. អទុក្ខមសុខាយ វេទនាយ សម្បយុត្តា ខន្ធា ឥទ្ធិវិធញាណស្ស, ចេតោបរិយញាណស្ស, បុព្ពេនិវាសានុស្សតិញាណស្ស, យថាកម្មូបគញាណស្ស, អនាគតំសញាណស្ស អាវជ្ជនាយ អារម្មណបច្ចយេន បច្ចយោ. អទុក្ខមសុខាយ វេទនាយ សម្បយុត្តេ ខន្ធេ អារព្ភ អទុក្ខមសុខាយ វេទនាយ សម្បយុត្តា ខន្ធា ឧប្បជ្ជន្តិ. (១)

អទុក្ខមសុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស អារម្មណបច្ចយេន បច្ចយោ – អទុក្ខមសុខាយ វេទនាយ សម្បយុត្តេន ចិត្តេន ទានំ ទត្វា, សីលំ សមាទិយិត្វា, ឧបោសថកម្មំ កត្វា សុខាយ វេទនាយ សម្បយុត្តេន ចិត្តេន បច្ចវេក្ខតិ. អទុក្ខមសុខាយ វេទនាយ សម្បយុត្តា ឈានា វុដ្ឋហិត្វា, មគ្គា វុដ្ឋហិត្វា, ផលា វុដ្ឋហិត្វា សុខាយ វេទនាយ សម្បយុត្តេន ចិត្តេន បច្ចវេក្ខតិ. អរិយា សុខាយ វេទនាយ សម្បយុត្តេន ចិត្តេន អទុក្ខមសុខាយ វេទនាយ សម្បយុត្តេ បហីនេ កិលេសេ បច្ចវេក្ខន្តិ, វិក្ខម្ភិតេ កិលេសេ បច្ចវេក្ខន្តិ, បុព្ពេ សមុទាចិណ្ណេ កិលេសេ ជានន្តិ. អទុក្ខមសុខាយ វេទនាយ សម្បយុត្តេ ខន្ធេ សុខាយ វេទនាយ សម្បយុត្តេន ចិត្តេន អនិច្ចតោ ទុក្ខតោ អនត្តតោ វិបស្សតិ, អស្សាទេតិ អភិនន្ទតិ; តំ អារព្ភ សុខាយ វេទនាយ សម្បយុត្តោ រាគោ ឧប្បជ្ជតិ, ទិដ្ឋិ ឧប្បជ្ជតិ; អទុក្ខមសុខាយ វេទនាយ សម្បយុត្តេ ខន្ធេ អារព្ភ សុខាយ វេទនាយ សម្បយុត្តា ខន្ធា ឧប្បជ្ជន្តិ. (២)

អទុក្ខមសុខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស អារម្មណបច្ចយេន បច្ចយោ – អទុក្ខមសុខាយ វេទនាយ សម្បយុត្តេន ចិត្តេន ទានំ ទត្វា, សីលំ សមាទិយិត្វា, ឧបោសថកម្មំ កត្វា វិប្បដិសារិស្ស ទោមនស្សំ ឧប្បជ្ជតិ, អទុក្ខមសុខាយ វេទនាយ សម្បយុត្តេ ឈានេ បរិហីនេ វិប្បដិសារិស្ស ទោមនស្សំ ឧប្បជ្ជតិ, អទុក្ខមសុខាយ វេទនាយ សម្បយុត្តេ ខន្ធេ អារព្ភ ទុក្ខាយ វេទនាយ សម្បយុត្តា ខន្ធា ឧប្បជ្ជន្តិ. (៣)

អធិបតិបច្ចយោ

៤២. សុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ.

អារម្មណាធិបតិ – សុខាយ វេទនាយ សម្បយុត្តេន ចិត្តេន ទានំ ទត្វា, សីលំ សមាទិយិត្វា, ឧបោសថកម្មំ កត្វា សុខាយ វេទនាយ សម្បយុត្តេន ចិត្តេន តំ គរុំ កត្វា បច្ចវេក្ខតិ. សុខាយ វេទនាយ សម្បយុត្តា ឈានា វុដ្ឋហិត្វា, មគ្គា វុដ្ឋហិត្វា, ផលា វុដ្ឋហិត្វា សុខាយ វេទនាយ សម្បយុត្តេន ចិត្តេន តំ គរុំ កត្វា បច្ចវេក្ខតិ. សុខាយ វេទនាយ សម្បយុត្តេ ខន្ធេ សុខាយ វេទនាយ សម្បយុត្តេន ចិត្តេន គរុំ កត្វា អស្សាទេតិ អភិនន្ទតិ; តំ គរុំ កត្វា សុខាយ វេទនាយ សម្បយុត្តោ រាគោ ឧប្បជ្ជតិ, ទិដ្ឋិ ឧប្បជ្ជតិ.

សហជាតាធិបតិ – សុខាយ វេទនាយ សម្បយុត្តាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

សុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស អធិបតិបច្ចយេន បច្ចយោ.

អារម្មណាធិបតិ – សុខាយ វេទនាយ សម្បយុត្តេន ចិត្តេន ទានំ ទត្វា, សីលំ សមាទិយិត្វា, ឧបោសថកម្មំ កត្វា អទុក្ខមសុខាយ វេទនាយ សម្បយុត្តេន ចិត្តេន តំ គរុំ កត្វា បច្ចវេក្ខតិ. សុខាយ វេទនាយ សម្បយុត្តា ឈានា វុដ្ឋហិត្វា, មគ្គា វុដ្ឋហិត្វា, ផលា វុដ្ឋហិត្វា អទុក្ខមសុខាយ វេទនាយ សម្បយុត្តេន ចិត្តេន តំ គរុំ កត្វា បច្ចវេក្ខតិ. សុខាយ វេទនាយ សម្បយុត្តេ ខន្ធេ អទុក្ខមសុខាយ វេទនាយ សម្បយុត្តេន ចិត្តេន គរុំ កត្វា អស្សាទេតិ អភិនន្ទតិ; តំ គរុំ កត្វា អទុក្ខមសុខាយ វេទនាយ សម្បយុត្តោ រាគោ ឧប្បជ្ជតិ, ទិដ្ឋិ ឧប្បជ្ជតិ. (២)

៤៣. ទុក្ខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស អធិបតិបច្ចយេន បច្ចយោ.

សហជាតាធិបតិ – ទុក្ខាយ វេទនាយ សម្បយុត្តាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

៤៤. អទុក្ខមសុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស អធិបតិបច្ចយេន បច្ចយោ – អារម្មណាធិបតិ, សហជាតាធិបតិ.

អារម្មណាធិបតិ – អទុក្ខមសុខាយ វេទនាយ សម្បយុត្តេន ចិត្តេន ទានំ ទត្វា, សីលំ សមាទិយិត្វា, ឧបោសថកម្មំ កត្វា អទុក្ខមសុខាយ វេទនាយ សម្បយុត្តេន ចិត្តេន តំ គរុំ កត្វា បច្ចវេក្ខតិ. អទុក្ខមសុខាយ វេទនាយ សម្បយុត្តា ឈានា វុដ្ឋហិត្វា, មគ្គា វុដ្ឋហិត្វា, ផលា វុដ្ឋហិត្វា អទុក្ខមសុខាយ វេទនាយ សម្បយុត្តេន ចិត្តេន តំ គរុំ កត្វា បច្ចវេក្ខតិ. អទុក្ខមសុខាយ វេទនាយ សម្បយុត្តេ ខន្ធេ អទុក្ខមសុខាយ វេទនាយ សម្បយុត្តេន ចិត្តេន គរុំ កត្វា អស្សាទេតិ អភិនន្ទតិ; តំ គរុំ កត្វា អទុក្ខមសុខាយ វេទនាយ សម្បយុត្តោ រាគោ ឧប្បជ្ជតិ, ទិដ្ឋិ ឧប្បជ្ជតិ.

សហជាតាធិបតិ – អទុក្ខមសុខាយ វេទនាយ សម្បយុត្តាធិបតិ សម្បយុត្តកានំ ខន្ធានំ អធិបតិបច្ចយេន បច្ចយោ. (១)

អទុក្ខមសុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស អធិបតិបច្ចយេន បច្ចយោ.

អារម្មណាធិបតិ – អទុក្ខមសុខាយ វេទនាយ សម្បយុត្តេន ចិត្តេន ទានំ ទត្វា, សីលំ សមាទិយិត្វា, ឧបោសថកម្មំ កត្វា សុខាយ វេទនាយ សម្បយុត្តេន ចិត្តេន តំ គរុំ កត្វា បច្ចវេក្ខតិ. អទុក្ខមសុខាយ វេទនាយ សម្បយុត្តា ឈានា វុដ្ឋហិត្វា, មគ្គា វុដ្ឋហិត្វា, ផលា វុដ្ឋហិត្វា សុខាយ វេទនាយ សម្បយុត្តេន ចិត្តេន តំ គរុំ កត្វា បច្ចវេក្ខតិ. អទុក្ខមសុខាយ វេទនាយ សម្បយុត្តេ ខន្ធេ សុខាយ វេទនាយ សម្បយុត្តេន ចិត្តេន គរុំ កត្វា អស្សាទេតិ អភិនន្ទតិ; តំ គរុំ កត្វា សុខាយ វេទនាយ សម្បយុត្តោ រាគោ ឧប្បជ្ជតិ, ទិដ្ឋិ ឧប្បជ្ជតិ. (២)

អនន្តរបច្ចយោ

៤៥. សុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស អនន្តរបច្ចយេន បច្ចយោ – បុរិមា បុរិមា សុខាយ វេទនាយ សម្បយុត្តា ខន្ធា បច្ឆិមានំ បច្ឆិមានំ សុខាយ វេទនាយ សម្បយុត្តកានំ ខន្ធានំ អនន្តរបច្ចយេន បច្ចយោ. សុខាយ វេទនាយ សម្បយុត្តំ អនុលោមំ សុខាយ វេទនាយ សម្បយុត្តស្ស គោត្រភុស្ស អនន្តរបច្ចយេន បច្ចយោ, អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស… មគ្គោ ផលស្ស… ផលំ ផលស្ស… អនុលោមំ សុខាយ វេទនាយ សម្បយុត្តាយ ផលសមាបត្តិយា អនន្តរបច្ចយេន បច្ចយោ. សុខាយ វេទនាយ សម្បយុត្តា ខន្ធា សុខាយ វេទនាយ សម្បយុត្តស្ស វុដ្ឋានស្ស អនន្តរបច្ចយេន បច្ចយោ. (១)

សុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស អនន្តរបច្ចយេន បច្ចយោ – សុខាយ វេទនាយ សម្បយុត្តំ ចុតិចិត្តំ អទុក្ខមសុខាយ វេទនាយ សម្បយុត្តស្ស ឧបបត្តិចិត្តស្ស អនន្តរបច្ចយេន បច្ចយោ. សុខាយ វេទនាយ សម្បយុត្តំ ភវង្គំ អាវជ្ជនាយ អនន្តរបច្ចយេន បច្ចយោ. សុខសហគតំ កាយវិញ្ញាណំ វិបាកមនោធាតុយា អនន្តរបច្ចយេន បច្ចយោ. សុខាយ វេទនាយ សម្បយុត្តា វិបាកមនោវិញ្ញាណធាតុ កិរិយមនោវិញ្ញាណធាតុយា អនន្តរបច្ចយេន បច្ចយោ. សុខាយ វេទនាយ សម្បយុត្តំ ភវង្គំ អទុក្ខមសុខាយ វេទនាយ សម្បយុត្តស្ស ភវង្គស្ស អនន្តរបច្ចយេន បច្ចយោ. សុខាយ វេទនាយ សម្បយុត្តំ កុសលាកុសលំ អទុក្ខមសុខាយ វេទនាយ សម្បយុត្តស្ស វុដ្ឋានស្ស… កិរិយំ វុដ្ឋានស្ស… ផលំ វុដ្ឋានស្ស អនន្តរបច្ចយេន បច្ចយោ. (២)

៤៦. ទុក្ខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស អនន្តរបច្ចយេន បច្ចយោ – បុរិមា បុរិមា ទុក្ខាយ វេទនាយ សម្បយុត្តា ខន្ធា បច្ឆិមានំ បច្ឆិមានំ ទុក្ខាយ វេទនាយ សម្បយុត្តកានំ ខន្ធានំ អនន្តរបច្ចយេន បច្ចយោ. (១)

ទុក្ខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស អនន្តរបច្ចយេន បច្ចយោ – ទុក្ខសហគតំ កាយវិញ្ញាណំ វិបាកមនោធាតុយា អនន្តរបច្ចយេន បច្ចយោ. ទុក្ខាយ វេទនាយ សម្បយុត្តា ខន្ធា អទុក្ខមសុខាយ វេទនាយ សម្បយុត្តស្ស វុដ្ឋានស្ស អនន្តរបច្ចយេន បច្ចយោ. (២)

៤៧. អទុក្ខមសុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស អនន្តរបច្ចយេន បច្ចយោ – បុរិមា បុរិមា អទុក្ខមសុខាយ វេទនាយ សម្បយុត្តា ខន្ធា បច្ឆិមានំ បច្ឆិមានំ អទុក្ខមសុខាយ វេទនាយ សម្បយុត្តកានំ ខន្ធានំ អនន្តរបច្ចយេន បច្ចយោ. អទុក្ខមសុខាយ វេទនាយ សម្បយុត្តំ អនុលោមំ អទុក្ខមសុខាយ វេទនាយ សម្បយុត្តស្ស គោត្រភុស្ស អនន្តរបច្ចយេន បច្ចយោ. អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស… មគ្គោ ផលស្ស… ផលំ ផលស្ស… អនុលោមំ ផលសមាបត្តិយា… និរោធា វុដ្ឋហន្តស្ស នេវសញ្ញានាសញ្ញាយតនំ អទុក្ខមសុខាយ វេទនាយ សម្បយុត្តាយ ផលសមាបត្តិយា អនន្តរបច្ចយេន បច្ចយោ. អទុក្ខមសុខាយ វេទនាយ សម្បយុត្តា ខន្ធា អទុក្ខមសុខាយ វេទនាយ សម្បយុត្តស្ស វុដ្ឋានស្ស អនន្តរបច្ចយេន បច្ចយោ. (១)

អទុក្ខមសុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស អនន្តរបច្ចយេន បច្ចយោ – អទុក្ខមសុខាយ វេទនាយ សម្បយុត្តំ ចុតិចិត្តំ សុខាយ វេទនាយ សម្បយុត្តស្ស ឧបបត្តិចិត្តស្ស អនន្តរបច្ចយេន បច្ចយោ. អាវជ្ជនា សុខាយ វេទនាយ សម្បយុត្តកានំ ខន្ធានំ អនន្តរបច្ចយេន បច្ចយោ. វិបាកមនោធាតុ សុខាយ វេទនាយ សម្បយុត្តាយ វិបាកមនោវិញ្ញាណធាតុយា អនន្តរបច្ចយេន បច្ចយោ. អទុក្ខមសុខាយ វេទនាយ សម្បយុត្តំ ភវង្គំ សុខាយ វេទនាយ សម្បយុត្តស្ស ភវង្គស្ស អនន្តរបច្ចយេន បច្ចយោ. អទុក្ខមសុខាយ វេទនាយ សម្បយុត្តំ កុសលាកុសលំ សុខាយ វេទនាយ សម្បយុត្តស្ស វុដ្ឋានស្ស… កិរិយំ វុដ្ឋានស្ស… ផលំ វុដ្ឋានស្ស… និរោធា វុដ្ឋហន្តស្ស នេវសញ្ញានាសញ្ញាយតនំ សុខាយ វេទនាយ សម្បយុត្តាយ ផលសមាបត្តិយា អនន្តរបច្ចយេន បច្ចយោ. (២)

អទុក្ខមសុខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស អនន្តរបច្ចយេន បច្ចយោ – អាវជ្ជនា ទុក្ខាយ វេទនាយ សម្បយុត្តកានំ ខន្ធានំ អនន្តរបច្ចយេន បច្ចយោ. (៣)

សមនន្តរបច្ចយោ

៤៨. សុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស សមនន្តរបច្ចយេន បច្ចយោ (អនន្តរបច្ចយសទិសំ).

សហជាតបច្ចយោ

៤៩. សុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស សហជាតបច្ចយេន បច្ចយោ – សុខាយ វេទនាយ សម្បយុត្តោ ឯកោ ខន្ធោ ទ្វិន្នំ ខន្ធានំ សហជាតបច្ចយេន បច្ចយោ. ទ្វេ ខន្ធា ឯកស្ស ខន្ធស្ស សហជាតបច្ចយេន បច្ចយោ. បដិសន្ធិក្ខណេ សុខាយ វេទនាយ សម្បយុត្តោ ឯកោ ខន្ធោ ទ្វិន្នំ ខន្ធានំ សហជាតបច្ចយេន បច្ចយោ. ទ្វេ ខន្ធា ឯកស្ស ខន្ធស្ស សហជាតបច្ចយេន បច្ចយោ. (១)

៥០. ទុក្ខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស សហជាតបច្ចយេន បច្ចយោ – ទុក្ខាយ វេទនាយ សម្បយុត្តោ ឯកោ ខន្ធោ ទ្វិន្នំ ខន្ធានំ សហជាតបច្ចយេន បច្ចយោ. ទ្វេ ខន្ធា ឯកស្ស ខន្ធស្ស សហជាតបច្ចយេន បច្ចយោ. (ទុក្ខាយ វេទនាយ សម្បយុត្តបដិសន្ធិ ន លព្ភតិ.) (១)

៥១. អទុក្ខមសុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស សហជាតបច្ចយេន បច្ចយោ – អទុក្ខមសុខាយ វេទនាយ សម្បយុត្តោ ឯកោ ខន្ធោ ទ្វិន្នំ ខន្ធានំ សហជាតបច្ចយេន បច្ចយោ. ទ្វេ ខន្ធា ឯកស្ស ខន្ធស្ស សហជាតបច្ចយេន បច្ចយោ. បដិសន្ធិក្ខណេ អទុក្ខមសុខាយ វេទនាយ សម្បយុត្តោ ឯកោ ខន្ធោ ទ្វិន្នំ ខន្ធានំ សហជាតបច្ចយេន បច្ចយោ. ទ្វេ ខន្ធា ឯកស្ស ខន្ធស្ស សហជាតបច្ចយេន បច្ចយោ. (១)

អញ្ញមញ្ញ-និស្សយបច្ចយា

៥២. សុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស អញ្ញមញ្ញបច្ចយេន បច្ចយោ… និស្សយបច្ចយេន បច្ចយោ (អញ្ញមញ្ញម្បិ និស្សយម្បិ សហជាតបច្ចយសទិសំ).

ឧបនិស្សយបច្ចយោ

៥៣. សុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – សុខាយ វេទនាយ សម្បយុត្តំ សទ្ធំ ឧបនិស្សាយ សុខាយ វេទនាយ សម្បយុត្តេន ចិត្តេន ទានំ ទេតិ, សីលំ សមាទិយតិ, ឧបោសថកម្មំ ករោតិ, សុខាយ វេទនាយ សម្បយុត្តំ ឈានំ ឧប្បាទេតិ, វិបស្សនំ ឧប្បាទេតិ, មគ្គំ ឧប្បាទេតិ, សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ. សុខាយ វេទនាយ សម្បយុត្តំ សីលំ… សុតំ… ចាគំ… បញ្ញំ… រាគំ… មោហំ… មានំ… ទិដ្ឋិំ… បត្ថនំ… សុខសហគតំ កាយវិញ្ញាណំ ឧបនិស្សាយ សុខាយ វេទនាយ សម្បយុត្តេន ចិត្តេន ទានំ ទេតិ…បេ… សមាបត្តិំ ឧប្បាទេតិ (សទ្ធាបញ្ចមកេសុ ‘‘មានំ ជប្បេតិ, ទិដ្ឋិំ គណ្ហាតី’’តិ កាតព្ពំ, អវសេសេសុ ន កាតព្ពំ). សុខាយ វេទនាយ សម្បយុត្តេន ចិត្តេន អទិន្នំ អាទិយតិ, មុសា ភណតិ, បិសុណំ ភណតិ, សម្ផំ បលបតិ, សន្ធិំ ឆិន្ទតិ, និល្លោបំ ហរតិ, ឯកាគារិកំ ករោតិ, បរិបន្ថេ តិដ្ឋតិ, បរទារំ គច្ឆតិ, គាមឃាតំ ករោតិ, និគមឃាតំ ករោតិ. សុខាយ វេទនាយ សម្បយុត្តា សទ្ធា… សីលំ… សុតំ… ចាគោ… បញ្ញា… រាគោ… មោហោ… មានោ… ទិដ្ឋិ… បត្ថនា… សុខសហគតំ កាយវិញ្ញាណំ សុខាយ វេទនាយ សម្បយុត្តាយ សទ្ធាយ… សីលស្ស… សុតស្ស… ចាគស្ស… បញ្ញាយ… រាគស្ស… មោហស្ស… មានស្ស… ទិដ្ឋិយា… បត្ថនាយ… សុខសហគតស្ស កាយវិញ្ញាណស្ស… សុខាយ វេទនាយ សម្បយុត្តកានំ ខន្ធានំ ឧបនិស្សយបច្ចយេន បច្ចយោ. (១)

សុខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស ឧបនិស្សយបច្ចយេន បច្ចយោ.

បកតូបនិស្សយោ – សុខាយ វេទនាយ សម្បយុត្តំ សទ្ធំ ឧបនិស្សាយ អត្តានំ អាតាបេតិ បរិតាបេតិ, បរិយិដ្ឋិមូលកំ ទុក្ខំ បច្ចនុភោតិ. សុខាយ វេទនាយ សម្បយុត្តំ សីលំ… សុតំ… ចាគំ… បញ្ញំ ឧបនិស្សាយ អត្តានំ អាតាបេតិ បរិតាបេតិ, បរិយិដ្ឋិមូលកំ ទុក្ខំ បច្ចនុភោតិ. សុខាយ វេទនាយ សម្បយុត្តំ រាគំ… មោហំ… មានំ… ទិដ្ឋិំ… បត្ថនំ… សុខសហគតំ កាយវិញ្ញាណំ ឧបនិស្សាយ បាណំ ហនតិ. ទុក្ខាយ វេទនាយ សម្បយុត្តេន ចិត្តេន អទិន្នំ អាទិយតិ, មុសា ភណតិ, បិសុណំ ភណតិ, ផរុសំ ភណតិ, សម្ផំ បលបតិ, សន្ធិំ ឆិន្ទតិ, និល្លោបំ ហរតិ, ឯកាគារិកំ ករោតិ, បរិបន្ថេ តិដ្ឋតិ, បរទារំ គច្ឆតិ, គាមឃាតំ ករោតិ, និគមឃាតំ ករោតិ, មាតរំ ជីវិតា វោរោបេតិ, បិតរំ ជីវិតា វោរោបេតិ, អរហន្តំ ជីវិតា វោរោបេតិ, ទុដ្ឋេន ចិត្តេន តថាគតស្ស លោហិតំ ឧប្បាទេតិ, សង្ឃំ ភិន្ទតិ. សុខាយ វេទនាយ សម្បយុត្តា សទ្ធា… សីលំ… សុតំ… ចាគោ… បញ្ញា… រាគោ… មោហោ… មានោ… ទិដ្ឋិ… បត្ថនា… សុខសហគតំ កាយវិញ្ញាណំ ទោសស្ស… មោហស្ស… ទុក្ខសហគតស្ស កាយវិញ្ញាណស្ស… ទុក្ខាយ វេទនាយ សម្បយុត្តកានំ ខន្ធានំ ឧបនិស្សយបច្ចយេន បច្ចយោ. (២)

សុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – សុខាយ វេទនាយ សម្បយុត្តំ សទ្ធំ ឧបនិស្សាយ អទុក្ខមសុខាយ វេទនាយ សម្បយុត្តេន ចិត្តេន ទានំ ទេតិ, សីលំ សមាទិយតិ, ឧបោសថកម្មំ ករោតិ, អទុក្ខមសុខាយ វេទនាយ សម្បយុត្តំ ឈានំ ឧប្បាទេតិ, វិបស្សនំ ឧប្បាទេតិ, មគ្គំ ឧប្បាទេតិ, អភិញ្ញំ ឧប្បាទេតិ, សមាបត្តិំ ឧប្បាទេតិ, មានំ ជប្បេតិ, ទិដ្ឋិំ គណ្ហាតិ. សុខាយ វេទនាយ សម្បយុត្តំ សីលំ… សុតំ… ចាគំ… បញ្ញំ… រាគំ… មោហំ… មានំ… ទិដ្ឋិំ… បត្ថនំ… សុខសហគតំ កាយវិញ្ញាណំ ឧបនិស្សាយ អទុក្ខមសុខាយ វេទនាយ សម្បយុត្តេន ចិត្តេន ទានំ ទេតិ…បេ… សមាបត្តិំ ឧប្បាទេតិ. អទុក្ខមសុខាយ វេទនាយ សម្បយុត្តេន ចិត្តេន អទិន្នំ អាទិយតិ, មុសា ភណតិ, បិសុណំ ភណតិ, សម្ផំ បលបតិ [ផរុសំ ភណតិ, សម្ផំ បលបតិ (សី. ស្យា.)], សន្ធិំ ឆិន្ទតិ, និល្លោបំ ហរតិ, ឯកាគារិកំ ករោតិ, បរិបន្ថេ តិដ្ឋតិ, បរទារំ គច្ឆតិ, គាមឃាតំ ករោតិ, និគមឃាតំ ករោតិ. សុខាយ វេទនាយ សម្បយុត្តា សទ្ធា… សីលំ… សុតំ… ចាគោ… បញ្ញា… រាគោ… មោហោ… មានោ… ទិដ្ឋិ… បត្ថនា… សុខសហគតំ កាយវិញ្ញាណំ អទុក្ខមសុខាយ វេទនាយ សម្បយុត្តាយ សទ្ធាយ… សីលស្ស… សុតស្ស… ចាគស្ស… បញ្ញាយ… រាគស្ស… មោហស្ស… មានស្ស… ទិដ្ឋិយា… បត្ថនាយ… អទុក្ខមសុខាយ វេទនាយ សម្បយុត្តកានំ ខន្ធានំ ឧបនិស្សយបច្ចយេន បច្ចយោ. (៣)

៥៤. ទុក្ខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – ទោសំ ឧបនិស្សាយ បាណំ ហនតិ, ទុក្ខាយ វេទនាយ សម្បយុត្តេន ចិត្តេន អទិន្នំ អាទិយតិ…បេ… សង្ឃំ ភិន្ទតិ. មោហំ, ទុក្ខសហគតំ កាយវិញ្ញាណំ ឧបនិស្សាយ បាណំ ហនតិ, ទុក្ខាយ វេទនាយ សម្បយុត្តេន ចិត្តេន អទិន្នំ អាទិយតិ…បេ… សង្ឃំ ភិន្ទតិ. ទោសោ… មោហោ… ទុក្ខសហគតំ កាយវិញ្ញាណំ ទោសស្ស… មោហស្ស… ទុក្ខសហគតស្ស កាយវិញ្ញាណស្ស… ទុក្ខាយ វេទនាយ សម្បយុត្តកានំ ខន្ធានំ ឧបនិស្សយបច្ចយេន បច្ចយោ. (១)

ទុក្ខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស ឧបនិស្សយបច្ចយេន បច្ចយោ.

បកតូបនិស្សយោ – ទោសំ ឧបនិស្សាយ សុខាយ វេទនាយ សម្បយុត្តេន ចិត្តេន ទានំ ទេតិ…បេ… សមាបត្តិំ ឧប្បាទេតិ. សុខាយ វេទនាយ សម្បយុត្តេន ចិត្តេន អទិន្នំ អាទិយតិ…បេ… និគមឃាតំ ករោតិ. មោហំ, ទុក្ខសហគតំ កាយវិញ្ញាណំ ឧបនិស្សាយ សុខាយ វេទនាយ សម្បយុត្តេន ចិត្តេន ទានំ ទេតិ…បេ… និគមឃាតំ ករោតិ. ទោសោ… មោហោ… ទុក្ខសហគតំ កាយវិញ្ញាណំ សុខាយ វេទនាយ សម្បយុត្តាយ សទ្ធាយ…បេ… សុខសហគតស្ស កាយវិញ្ញាណស្ស សុខាយ វេទនាយ សម្បយុត្តកានំ ខន្ធានំ ឧបនិស្សយបច្ចយេន បច្ចយោ. (២)

ទុក្ខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – ទោសំ ឧបនិស្សាយ អទុក្ខមសុខាយ វេទនាយ សម្បយុត្តេន ចិត្តេន ទានំ ទេតិ…បេ… និគមឃាតំ ករោតិ. មោហំ, ទុក្ខសហគតំ កាយវិញ្ញាណំ ឧបនិស្សាយ អទុក្ខមសុខាយ វេទនាយ សម្បយុត្តេន ចិត្តេន ទានំ ទេតិ…បេ… និគមឃាតំ ករោតិ. ទោសោ… មោហោ… ទុក្ខសហគតំ កាយវិញ្ញាណំ អទុក្ខមសុខាយ វេទនាយ សម្បយុត្តាយ សទ្ធាយ…បេ… បត្ថនាយ… អទុក្ខមសុខាយ វេទនាយ សម្បយុត្តកានំ ខន្ធានំ ឧបនិស្សយបច្ចយេន បច្ចយោ. (៣)

៥៥. អទុក្ខមសុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – អទុក្ខមសុខាយ វេទនាយ សម្បយុត្តំ សទ្ធំ ឧបនិស្សាយ អទុក្ខមសុខាយ វេទនាយ សម្បយុត្តេន ចិត្តេន ទានំ ទេតិ…បេ… ទិដ្ឋិំ គណ្ហាតិ. អទុក្ខមសុខាយ វេទនាយ សម្បយុត្តំ សីលំ… សុតំ… ចាគំ… បញ្ញំ… រាគំ… មោហំ… មានំ… ទិដ្ឋិំ… បត្ថនំ ឧបនិស្សាយ អទុក្ខមសុខាយ វេទនាយ សម្បយុត្តេន ចិត្តេន ទានំ ទេតិ…បេ… សមាបត្តិំ ឧប្បាទេតិ. អទុក្ខមសុខាយ វេទនាយ សម្បយុត្តេន ចិត្តេន អទិន្នំ អាទិយតិ…បេ… និគមឃាតំ ករោតិ. អទុក្ខមសុខាយ វេទនាយ សម្បយុត្តា សទ្ធា… សីលំ… សុតំ… ចាគោ… បញ្ញា… រាគោ… មោហោ… មានោ… ទិដ្ឋិ… បត្ថនា… អទុក្ខមសុខាយ វេទនាយ សម្បយុត្តាយ សទ្ធាយ…បេ… បត្ថនាយ អទុក្ខមសុខាយ វេទនាយ សម្បយុត្តកានំ ខន្ធានំ ឧបនិស្សយបច្ចយេន បច្ចយោ. (១)

អទុក្ខមសុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស ឧបនិស្សយបច្ចយេន បច្ចយោ – អារម្មណូបនិស្សយោ, អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – អទុក្ខមសុខាយ វេទនាយ សម្បយុត្តំ សទ្ធំ ឧបនិស្សាយ សុខាយ វេទនាយ សម្បយុត្តេន ចិត្តេន ទានំ ទេតិ…បេ… ទិដ្ឋិំ គណ្ហាតិ. អទុក្ខមសុខាយ វេទនាយ សម្បយុត្តំ សីលំ…បេ… បត្ថនំ ឧបនិស្សាយ សុខាយ វេទនាយ សម្បយុត្តេន ចិត្តេន ទានំ ទេតិ…បេ… សមាបត្តិំ ឧប្បាទេតិ. សុខាយ វេទនាយ សម្បយុត្តេន ចិត្តេន អទិន្នំ អាទិយតិ…បេ… និគមឃាតំ ករោតិ. អទុក្ខមសុខាយ វេទនាយ សម្បយុត្តា សទ្ធា…បេ… បត្ថនា សុខាយ វេទនាយ សម្បយុត្តាយ សទ្ធាយ…បេ… បត្ថនាយ… សុខសហគតស្ស កាយវិញ្ញាណស្ស សុខាយ វេទនាយ សម្បយុត្តកានំ ខន្ធានំ ឧបនិស្សយបច្ចយេន បច្ចយោ. (២)

អទុក្ខមសុខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស ឧបនិស្សយបច្ចយេន បច្ចយោ – អនន្តរូបនិស្សយោ, បកតូបនិស្សយោ…បេ….

បកតូបនិស្សយោ – អទុក្ខមសុខាយ វេទនាយ សម្បយុត្តំ សទ្ធំ ឧបនិស្សាយ អត្តានំ អាតាបេតិ បរិតាបេតិ, បរិយិដ្ឋិមូលកំ ទុក្ខំ បច្ចនុភោតិ. អទុក្ខមសុខាយ វេទនាយ សម្បយុត្តំ សីលំ…បេ… បត្ថនំ ឧបនិស្សាយ បាណំ ហនតិ. ទុក្ខាយ វេទនាយ សម្បយុត្តេន ចិត្តេន អទិន្នំ អាទិយតិ…បេ… សង្ឃំ ភិន្ទតិ. អទុក្ខមសុខាយ វេទនាយ សម្បយុត្តា សទ្ធា…បេ… បត្ថនា… ទោសស្ស… មោហស្ស… ទុក្ខសហគតស្ស កាយវិញ្ញាណស្ស… ទុក្ខាយ វេទនាយ សម្បយុត្តកានំ ខន្ធានំ ឧបនិស្សយបច្ចយេន បច្ចយោ. (៣)

អាសេវនបច្ចយោ

៥៦. សុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស អាសេវនបច្ចយេន បច្ចយោ – បុរិមា បុរិមា សុខាយ វេទនាយ សម្បយុត្តា ខន្ធា បច្ឆិមានំ បច្ឆិមានំ សុខាយ វេទនាយ សម្បយុត្តកានំ ខន្ធានំ អាសេវនបច្ចយេន បច្ចយោ. សុខាយ វេទនាយ សម្បយុត្តំ អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស អាសេវនបច្ចយេន បច្ចយោ. (១)

ទុក្ខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស អាសេវនបច្ចយេន បច្ចយោ – បុរិមា បុរិមា ទុក្ខាយ វេទនាយ សម្បយុត្តា ខន្ធា បច្ឆិមានំ បច្ឆិមានំ ទុក្ខាយ វេទនាយ សម្បយុត្តកានំ ខន្ធានំ អាសេវនបច្ចយេន បច្ចយោ. (១)

អទុក្ខមសុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស អាសេវនបច្ចយេន បច្ចយោ – បុរិមា បុរិមា អទុក្ខមសុខាយ វេទនាយ សម្បយុត្តា ខន្ធា បច្ឆិមានំ បច្ឆិមានំ អទុក្ខមសុខាយ វេទនាយ សម្បយុត្តកានំ ខន្ធានំ អាសេវនបច្ចយេន បច្ចយោ. អទុក្ខមសុខាយ វេទនាយ សម្បយុត្តំ អនុលោមំ គោត្រភុស្ស… អនុលោមំ វោទានស្ស… គោត្រភុ មគ្គស្ស… វោទានំ មគ្គស្ស អាសេវនបច្ចយេន បច្ចយោ. (១)

កម្មបច្ចយោ

៥៧. សុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា [នានាខណិកា (ក.)]. សហជាតា – សុខាយ វេទនាយ សម្បយុត្តា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. បដិសន្ធិក្ខណេ…បេ…. នានាក្ខណិកា – សុខាយ វេទនាយ សម្បយុត្តា ចេតនា វិបាកានំ សុខាយ វេទនាយ សម្បយុត្តកានំ ខន្ធានំ កម្មបច្ចយេន បច្ចយោ. (១)

សុខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស កម្មបច្ចយេន បច្ចយោ. នានាក្ខណិកា – សុខាយ វេទនាយ សម្បយុត្តា ចេតនា វិបាកានំ ទុក្ខាយ វេទនាយ សម្បយុត្តកានំ ខន្ធានំ កម្មបច្ចយេន បច្ចយោ. (២)

សុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស កម្មបច្ចយេន បច្ចយោ. នានាក្ខណិកា – សុខាយ វេទនាយ សម្បយុត្តា ចេតនា វិបាកានំ អទុក្ខមសុខាយ វេទនាយ សម្បយុត្តកានំ ខន្ធានំ កម្មបច្ចយេន បច្ចយោ. (៣)

៥៨. ទុក្ខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – ទុក្ខាយ វេទនាយ សម្បយុត្តា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. នានាក្ខណិកា – ទុក្ខាយ វេទនាយ សម្បយុត្តា ចេតនា វិបាកានំ ទុក្ខាយ វេទនាយ សម្បយុត្តកានំ ខន្ធានំ កម្មបច្ចយេន បច្ចយោ. (១)

ទុក្ខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស កម្មបច្ចយេន បច្ចយោ. នានាក្ខណិកា – ទុក្ខាយ វេទនាយ សម្បយុត្តា ចេតនា វិបាកានំ អទុក្ខមសុខាយ វេទនាយ សម្បយុត្តកានំ ខន្ធានំ កម្មបច្ចយេន បច្ចយោ. (២)

៥៩. អទុក្ខមសុខាយ វេទនាយ សម្បយុត្តោ ធម្មោ អទុក្ខមសុខាយ វេទនាយ សម្បយុត្តស្ស ធម្មស្ស កម្មបច្ចយេន បច្ចយោ – សហជាតា, នានាក្ខណិកា. សហជាតា – អទុក្ខមសុខាយ វេទនាយ សម្បយុត្តា ចេតនា សម្បយុត្តកានំ ខន្ធានំ កម្មបច្ចយេន បច្ចយោ. បដិសន្ធិក្ខណេ…បេ…. នានាក្ខណិកា – អទុក្ខមសុខាយ វេទនាយ សម្បយុត្តា ចេតនា វិបាកានំ អទុក្ខមសុខាយ វេទនាយ សម្បយុត្តកានំ ខន្ធានំ កម្មបច្ចយេន បច្ចយោ. (១)

អទុក្ខមសុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស កម្មបច្ចយេន បច្ចយោ. នានាក្ខណិកា – អទុក្ខមសុខាយ វេទនាយ សម្បយុត្តា ចេតនា វិបាកានំ សុខាយ វេទនាយ សម្បយុត្តកានំ ខន្ធានំ កម្មបច្ចយេន បច្ចយោ. (២)

អទុក្ខមសុខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស កម្មបច្ចយេន បច្ចយោ. នានាក្ខណិកា – អទុក្ខមសុខាយ វេទនាយ សម្បយុត្តា ចេតនា វិបាកានំ ទុក្ខាយ វេទនាយ សម្បយុត្តកានំ ខន្ធានំ កម្មបច្ចយេន បច្ចយោ. (៣)

វិបាកបច្ចយោ

៦០. សុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស វិបាកបច្ចយេន បច្ចយោ – វិបាកោ សុខាយ វេទនាយ សម្បយុត្តោ ឯកោ ខន្ធោ ទ្វិន្នំ ខន្ធានំ វិបាកបច្ចយេន បច្ចយោ. ទ្វេ ខន្ធា ឯកស្ស ខន្ធស្ស វិបាកបច្ចយេន បច្ចយោ. បដិសន្ធិក្ខណេ សុខាយ វេទនាយ សម្បយុត្តោ ឯកោ ខន្ធោ ទ្វិន្នំ ខន្ធានំ វិបាកបច្ចយេន បច្ចយោ. ទ្វេ ខន្ធា ឯកស្ស ខន្ធស្ស…បេ…. (១)

ទុក្ខាយ វេទនាយ សម្បយុត្តោ ធម្មោ ទុក្ខាយ វេទនាយ សម្បយុត្តស្ស ធម្មស្ស វិបាកបច្ចយេន បច្ចយោ – វិបាកោ ទុក្ខាយ វេទនាយ សម្បយុត្តោ ឯកោ ខន្ធោ ទ្វិន្នំ ខន្ធានំ វិបាកបច្ចយេន បច្ចយោ …បេ…. (១)

អទុក្ខមសុខាយ វេទនាយ…បេ… វិបាកោ អទុក្ខមសុខាយ វេទនាយ សម្បយុត្តោ ឯកោ ខន្ធោ ទ្វិន្នំ ខន្ធានំ…បេ… បដិសន្ធិក្ខណេ…បេ…. (១)

អាហារបច្ចយាទិ

៦១. សុខាយ វេទនាយ សម្បយុត្តោ ធម្មោ សុខាយ វេទនាយ សម្បយុត្តស្ស ធម្មស្ស អាហារបច្ចយេន បច្ចយោ…បេ… ឥន្ទ្រិយបច្ចយេន បច្ចយោ…បេ… ឈានបច្ចយេន បច្ចយោ…បេ… មគ្គបច្ចយេន បច្ចយោ…បេ… សម្បយុត្តបច្ចយេន បច្ចយោ…បេ… អត្ថិបច្ចយេន បច្ចយោ…បេ… នត្ថិបច្ចយេន បច្ចយោ…បេ… វិគតបច្ចយេន បច្ចយោ…បេ… អវិគតបច្ចយេន បច្ចយោ…បេ….