២. បច្ចយបច្ចនីយំ

នហេតុបច្ចយោ

៤. សំកិលិដ្ឋសំកិលេសិកំ ធម្មំ បដិច្ច សំកិលិដ្ឋសំកិលេសិកោ ធម្មោ ឧប្បជ្ជតិ នហេតុបច្ចយា – វិចិកិច្ឆាសហគតេ ឧទ្ធច្ចសហគតេ ខន្ធេ បដិច្ច វិចិកិច្ឆាសហគតោ ឧទ្ធច្ចសហគតោ មោហោ. (១)

អសំកិលិដ្ឋសំកិលេសិកំ ធម្មំ បដិច្ច អសំកិលិដ្ឋសំកិលេសិកោ ធម្មោ ឧប្បជ្ជតិ នហេតុបច្ចយា – អហេតុកំ អសំកិលិដ្ឋសំកិលេសិកំ ឯកំ ខន្ធំ បដិច្ច តយោ ខន្ធា ចិត្តសមុដ្ឋានញ្ច រូបំ…បេ… អហេតុកបដិសន្ធិក្ខណេ…បេ… អសញ្ញសត្តានំ ឯកំ មហាភូតំ. (សំខិត្តំ.) (១)

(យថា កុសលត្តិកេ វិភត្តំ, ឯវំ វិភជិតព្ពំ.)

សុទ្ធំ

៥. នហេតុយា ទ្វេ, នអារម្មណេ បញ្ច, នអធិបតិយា ឆ, នអនន្តរេ បញ្ច…បេ… នឧបនិស្សយេ បញ្ច, នបុរេជាតេ សត្ត, នបច្ឆាជាតេ នវ, នអាសេវនេ នវ, នកម្មេ តីណិ, នវិបាកេ នវ, នអាហារេ ឯកំ…បេ… នមគ្គេ ឯកំ, នសម្បយុត្តេ បញ្ច, នវិប្បយុត្តេ តីណិ, នោនត្ថិយា បញ្ច, នោវិគតេ បញ្ច. (សំខិត្តំ.)